<相熟>

屌得人多, 係時候講d 無謂野黎調劑下, 廢事令自己 (進一步) 心理變態.

史弟成日係街度見到一d 人 (唔單止係女人), 明明唔識佢地, 但相樣梗係覺得好熟面口, 好想跳過去錫佢一啖 (???). 或者因為人同人平均只隔五層 (唔係膠膜), 所以人人都好似好熟面口咁.

呢種似曾相識既感覺, 係老人家身上更容易搵到. 你望住老人家, 佢又好多時望住你… 結果互相對望 (但記住大家其實唔識對方), 極像一對初相戀既情人, 好羅曼蒂克呀~~~~~~~~
__________________________________________________________________

<尋晚>

見到認識差不多廿年的朋友. 我們讀同一小學及中學, 十一年中大概有六七年是同班的. 他向來 (直到中三) 成績好, 人品佳, 靚仔. 可惜中三認識了壞朋友, 不能自拔. 到後來失業三年, 每晚飲酒至醉死.

我回想起當年大家一起讀書的日子. 當初的小小分別, 十年後會轉變成巨大的差野. 今天的 CEO, 昨天曾是抄你功課的小流氓.

這故事 (???) 教訓我們, 任何的決定也不可以錯. 做錯容易, 把錯誤糾正過來, 難矣.
__________________________________________________________________

<尋晚 2>

唔係鬼故… 之所以叫尋晚 2, 係由於我尋晚見到第二個朋友. well…. 係前女友既朋友既朋友, 簡稱朋友 (????).

佢連我名都唔記得, 一見到面仲好意思問我買唔買基金. 又話近排好多好有潛力既基金 (有潛力即係未有實際成績拉….)…. 下刪廿字. 又問我拿咭片…咁o岩我又無係身…

我笑笑口話我都幾熟你地個行, 大概知你公司做乜, 你公司近排搞得好大, 又講得出佢係邊度返工, 近排乜野芬好賣….. (下刪四萬字).

我講左大概地鐵由尖沙咀去金鐘既時間, 唔知點解, 我睇得出佢嚇到屎都標埋.

他身邊那個女同事, 不斷在東張西望, 窺看我拿的膠袋裏有什么東西.

咁既質素, 想老子幫你買開心野, 下世.
___________________________________________________________________

鳩吹完畢.

好撚野. 特首無端白事係電視台播五分鐘垃圾講話, 跟住電視台又搵左學者黎阿媽係女人一番, 搞撚到我無得睇豈有此埋.

好明顯, 特首係等壹週刊出左先播講話, 好毒! 但忽然一週仲未出!

- “我們的政改方案是一個民主的方案，可以令香港朝向普選的目標，邁出重大的一步。這個方案將行政長官的產生方式大幅民主化，原來八百人的選舉委員會，增加到一千六百人。”

如果八百人選委會增加到千六人叫民主一大步, 咁如果今次改一改加到三千二人, 簡直係徒步行上月球, 實在超英趕美越中. 什么岩士唐, 聶海勝費俊龍, 神州 N 號也要死開. 連仙丹都唔使食可以去探嫦娥, 簡直係第一個大發現.

經過一輪複雜但又簡單的加減乘除數, 我有以下另一個大發現, 夠數搵何 B 拍返集開心大發現 :

1. 如果每屆特首選舉既選委會增加八百人, 以香港零五年人口 (假設等於未來人口) 六百八十萬人計算, 要八千五百次選舉先等於有普選. 八千五百乘四年一任等於三萬四千年. 到時恐龍都返撚左生, 有埋選舉權.

2. 如果每屆增加一倍數目, 這好一點, 選十三次就等於普選. 如果你今日十三歲, 而退休年齡一直係六十五. 到你退休個日就有得選特首.

- “我們要邁向普選，立法會通過政改方案是第一步。有關下一步如何發展民主的路線圖和時間表，我承諾會盡快在策發會及其他途徑充份討論。我們不能急就章，但亦絕不會嘆慢板。”

肚餓你食撚左屎先, 之後我搵d 辦法睇下有冇砂糖俾你. 搵唔到唔好怪我.

既然你食左屎, 遲d 俾埋尿你飲都無所謂. 你唔想食屎, 想食好野呀嘛, 我知, 但得屎你食唔食? 唔食餓撚死喎. 這是什么邏輯來呢.

- “我懇請大家不要讓兩年的心血與汗水，付諸東流。事實上，我也想不出有更適合香港現況而可得到各方支持的方案。”

又黎, 兩年造舊屎俾你都要食. 可否諗下人對眼係向前望定係後望, 先出黎講野? 你浪費兩年造垃圾出黎, 關我奶事?

- “我們現在面臨民主發展停滯不前的危機，一些人士堅持政府應立即提出普選時間表，否則將不支持政改方案。他們的立場令我百思不得其解。支持政府方案與爭取普選路線圖及時間表有甚麼衝突呢？為何否決政改方案反而會幫助我們訂下路線圖和時間表？”

更能史弟百思不得其解的是, 政制發展唔係講政制發展嫁咩? 普選時間表乜唔係政制發展既可能原素之一?

仲有, 策發會係什么? 你諗真的策發會是什么? 它既不是政府的一部份, 討論議題及發展不受市民及立會人仕監察, 它又不是獨立既團體, 再沒有法律支持 (ordinance-back, 政府部門如 planning, environment protection, building 都有相關法律), 市民也沒有機會發表意見. 但策發會既結論卻會成為日後政策制定的金剛圈, 全部政策也以它的結論作為依歸! 又諗多一次, 邊個選人入策發會?

- ”如果今次選擇了原地踏步，普選的一天，只會更遠，不會更近。”

如果星期日唔去遊行, 普選的一天, 只會更遠, 不會更近.

- ”希望各位議員本著香港市民的整體利益和意願，反映民意，投下理性的一票。”

對, 所以星期日, 用你的一步去投票吧!

*****************************************************************

記者做乜問何鴻桑, 胡應湘等人? 問佢個仔仔女女. 問下佢地選讀書個陣班長係點選?

民主派人仕係賤, 係人都知. 但唔好靠傳媒黎抹黑. 我又想問, 如果今日佢講一個鐘, 無廣告, 之後電視台賣返, 廣管局係咪有權罰電視台?

呢d 百年一度既廣播, 唔係應該真係人命尤天先用? 沙士, 可能出現既禽流感, 天災, 地震, 戰爭. 到時用乜?

你覺得以上既說話不合邏輯, KAM 粗黎? 你到這裏看一看特首講話的所謂邏輯, 才說吧. (連結自明報)

得咧, 我星期日會上街, 唔好再搵臥底黎激人. 我個日仲想搭地鐵去維園, 唔想迫. 小貓三四隻咪好…

仲有, 個個李永達真係垃圾. 上無線話政府個方案係等於一個人係山腳行兩步. 撚鳩痴! 我係政府咪又應一句 : 政改唔可以一步登天! 李生食屎拉.

<今年>

無左上年太陽個種驚喜, nba 實在悶在發慌. 除左勒邦.占士同埋佢隊波表現較突出, 同埋過去既魚腩部隊 (快艇同金州勇士) 叫人有d 驚喜, 好多球隊同球員都叫人失望而回, 大叫回水.

球隊 : 熱火, 太陽, 候斯頓, 公鹿. 頭三隊既主將分別送往明愛同伊利沙伯醫院, 情有可原. 韋特擔唔起大旗, 其他大名字又做唔到野 (獲加, j 威廉士真係得個名). 太陽同候斯頓新黎d 人又唔對板, 真係大鑊. 候斯頓仲放走左件 m.james 換黎廢柴. 公鹿開季前臨急臨忙換左麥可亞黎, 諗住內線好d. 不過仲有時間溶合下. 新人 bogut 能力一般, 唔係大將.

其實而家成績比較好既球隊, 表現只是一般 : 馬剌既後備力量好少用到; 活塞仍只靠五個正選; 東岸對手太弱. 只有小牛真係似樣…

球員 : 呢個表有排講. 拉利.曉士變左三線球員; 祖.莊遜去左鷹隊, 變返普通球員; 紐約人無個似樣既人, 慘在人工超高, 但表現九流; 金塊既安東尼繼續二線球員表現, 唔似會更上一層樓. 雷.亞倫真係典型加左人工即刻放 per 既例子; AK47 又傷… 卡達又係二線人拿一線人工,  嘩呀呀呀呀

特出…球員 : 速龍的 BOSH, 華盛頓的畢拿, 公鹿的西門士, 小牛既祖舒.候活, 快艇既馬特以, 仲有班特. 其他? 今年除左占士, 無明星喎.

<對著幹>

每天也遇到許多 “對著幹” 的事情. 對著幹, 即有人與話事人/別人永遠持反對意見. 或因為過去的不愉快經驗, 對某人有難以用常理去理解既偏見 – 如果有人同你講 “我之所以對佢咁, 你唔明嫁咧”, 即係佢對此人有偏見.

好煩. 唔知幾時開始, 我變得好怕麻煩 – 唔單止唔想有涉及任何既對抗, 連望住或者知道都唔想… 我只係想一直平淡地活下去, 做我的小人物, 儲錢交稅, 放工打下 ps2, 最後百年歸老. 我唔想向上爬搵好多錢, 更加唔想 (有人或者自己) 因為呢d 野 (拿, 同 “為左呢d 野” 好唔同) 而俾人陷害或及陷害人. 大家一場相識 – 儘管我會肯定同事只係同事, 完全唔該放工後有任何方式的聯絡或溝通 – 但返工無非為左糊口同合皮, 算罷拉. 你要上, 我俾你上. 放過我咧. 我只係努力做好我份內事, 所謂飯來張口, 女黎就手, 唔好當我係一回事咧…

對著幹, 對抗及搞陷害, 全部都係人世間不可或缺的一部份, 就等同台灣係中國一部份既道理一樣.

一咁諗, 我就會認為與其等人害我, 不如我害左人先. 嘩哈哈哈哈哈~~~

<投資>

好多人問史弟, 買乜估票好. 史弟連稅都冇錢交, 無拿錢去投資. 當然, 有錢都未必去買估票, 皆因廢事俾老廉查, 唔好有任何機會令自己出錯或令人懷疑… 無論如何, 如何講投資, 有幾條準則一定要守 :

1. 識計加減數 : 除非你肯定估票回報高於信用咭利率, 否則還晒錢先好去投資. 或者咁講, 如果得 (即估票回報) 高過 失 (負債既利率), 投資無妨. 千祈唔好飯都唔食拿錢去炒估.

2. 眼光要長遠 : 你唔係屋企既阿媽, 難以一日廿四小時睇住個市 (做公務員另計). 千祈唔好諗短炒. 再者廿三十歲既人, 搵錢不在於今日.

3. 買優質的估票. 由於錢少, 加上無時間, 唔好諗可以扑中仙股, 一毫變四毫. 大藍籌係貴, 但係有道理的. 概念係睇唔到既野, 炒唔出乜野花樣. 而且, 你都無時間或者根本唔識睇年報. 無謂o厄自己. 再者, 年報都係o厄人既野多. 算拉.

4. 咪買淨係做香港生意既公司.

5. 至於風險分散, 學某報高人話, 無一球都無謂分散風險. 如果你真係好驚, 建議你組合有以下三樣野 : 盈富, ABF 亞洲債券基金, 領匯. 好處係, 你由得佢自已玩, 唔使成日睇; 質素高; 價錢 ok (除左領匯). 無謂浪費時間買外國估票, 唔扺. 去聯交所買隻 ETF 好過. 或者買利豐.

6. 再續風險分散. 好多大公司有 STOCK OPTIONS. 諗真的, 你拿 STOCK OPTIONS 或公司估票會令你個人風險增加 – employment risk (你份工) 及 market risk (你公司). in the money 既認權証 (即市價高於認購價) 好拿拿聲賣左佢.

好多美資行興呢樣野, 好多做金融既員工以為好正. 佢地唔知咁會令佢地同公司搭同一條船. 你只係打份工, 無謂與任何野同生共死. 更笨既人當然係娶左公司既女同事做老婆. 如果以風險最大化黎講, 無野比得上.

7. 對沖. 如果你買國泰但怕油價不利盈利, 咪買石油估. 好多野都可以做個對沖 (不過比較弱), 代價係升值能力會下降. 如果你買得優質估, 對沖有點多餘. 而且錢唔多, 對沖黎做乜? 得一舊水買大又買細, 咪即係博開圍骰?

8. 咪買基金. 此乃騙財工具. 好多基金經理既知識, 比你同我更膚淺.

9. 估票唔係女, 唔好溝. 什么平均成本投資法, 笑撚死人.

<痴鳩線>

一個七點會自動熄冷氣既辦公室, 告訴你一個含意 : 唔好 OT.

一個開到盡但冷氣只得廿五.五度既辦公室, 告訴你另一含意 : 夏天唔好係公司著衫.

當你有好多野諗唔掂, 唯有返屋企 OT.
_________________________________________________________________

<好一句>

強政勵治. 今天梁展文先生 – 曾特首竟然可以用 “先生” 客氣地稱呼作為公務員, 即拿納稅人錢的傢伙 – 在立會的表現, 預料可令十二月四日的遊行人數增加五百, 民望下跌零點三個百份點.

我看得出, 孫公在立會時恨不得坐過去議員那邊.

一時唔偷雞, 劉勵超立刻跳出來講呢講路.

<李小龍>

今天是他的六十五歲冥壽.

人們都說, 李小龍很好打, 所以很受歡迎. 又說他

我卻認為, 李小龍所以受歡迎, 很大原因是他那從雙眼表現出來, 永不動搖的自信.

無論俾人打到仆街, 俾三五七十人圍住, 俾人用鎗指住個頭, 佢眼神仍表現出那自信.

<太空人>

原來唔興送海報, 我仲記得當年李麗珊拿奧運冠軍蘋果送左張 A4 size 既海報… 今日出版既明報, 送左神州六號既 vcd 一隻. 好一個 IT 年代…

各位, 佢地聽日黎咧~~~
____________________________________________________________________

<似曾相識既感覺>

去左淘大花園商場內既廁所, 傳來一陣醫院味 – 儘管廁所極其污糟.

醫院味令我回想起六年級斷手住了三天醫院, 太太 (太婆) 在瑪麗醫院過身, 老姐在聯合住醫, 艾雲入院… 許多事情.

與其說很剌鼻很難聞, 倒不如說那氣味會勾起不安的情緒, 還有不太美好的回憶.

<龜>

應該係爬虫類動物. 特色有二 : 行動緩慢, 遇上外來風浪會把五肢收埋.

此種動物進化神速, 已滲入人類既組織裏, 例如香港特區政府.

高官接近六四, 七一, 十二四, 必定學殺左人既古惑仔咁, 避一避風頭. 或者好似啞左咁, 問乜都唔回應. 之後就會出黎廿文廿武, 表示自己好似見解獨到的意見. 其實個d 意見, 阿旺都識.

好一大堆龜.

但係龜唔識用把口放屁. 仲係好臭個隻屁.

同埋, 龜唔會拿幾百萬年薪.

<地政總署>

成日講佢地估值係 OMV – Open Market Value, 即係市價. 當然, 個班 valuer 唔知乜係市場, 亦唔知乜野係市價. 佢地梗係以為自己明, 詳情請睇 光明面.

點解史弟咁講? 市價並唔係有人投個個最低價格. 你開 $1, 我都去投. 市價就係成交價. 在拍賣前, 不肯定的情況下來定 OMV, OMV 就是那個預期高得 (或低得) 只餘一個人肯付鈔買的最低價格. 當然, 預期和現實當然有分別, 所以 OMV 和真正成交價當然有別. 但每次也有 50%-60% 的 “錯誤” 代表什么?

(1) 地政班人訊息和市場的有很大的誤差;
(2) 有人特登禁低個價, 以利他人;
(3) 班估價既能力有問題.

底價係政府個底線, 並唔係市價.

唔好以為加個 “market” 呢個字, 就以為可以胡混過關. 記住, 錯誤所引致既並唔係一百幾十, 而係千萬上億. 例子如下 :

(1) 自從 03 恢復賣地, 用勾地表制度, 每次賣地個勝出價格都高過底價 – 即地政班人所定既 OMV – 50%-60%. 咁代表乜? 佢地意圖賤賣土地, 定的底價竟然係成交價 (市價) 既四至五成. 記住, 有意圖已經係死罪.

(2) 每次估價都估到鬼五馬六. 夠膽標屯門站每呎三千五. 起完要五千五先回到本. 我估佢地睇錯, 以為個度係名門.

我不懷疑他們的專業資格及誠信 (能力另計). 不過, 錢唔係你既, 多左唔係你, 少左又唔係. 完全唔需要負責. 估幾多, 有乜所謂? 你試下有間估價行估樣野三百, 但賣出十萬, 你睇下仲有冇人用? OPM, OTHER PEOPLE’S MONEY.

室友說佢拿個車牌俾人估價, 有人估三千, 有人估幾萬. 結果賣出了數萬元. 他老闆二話不說, 立刻出了一個電郵給全香港員工, 叫他們永遠不要再用前者估價.

OMV? 搞笑.
_________________________________________________________________

<得咧>

唔想再多講.

十二月四日見.