November 17, 2005

• <生存, 投資與風險>

  靈感來自總教主既文章.

  仲個陣賭波, 成日 “買 A 捧 B”. 明明鍾意阿根廷但走去買對手英格蘭. 此乃對沖 – 不錯, 如過阿根廷勝出我好開心, 但如果佢輸我會好唔開心. 馬會既出現, 令到許多零售睇波人搵到能夠對沖心愛球隊輸波既金融工具. 於是乎我買廿皮英格蘭 : 阿根廷勝出, 儘管輸廿皮, 但依然合皮; 輸了, 雖然唔合皮, 但有金錢回報. 以放棄少許好景時的快樂以換取仆街時既得益, 預期功用會上升, 好事也.

  傳說話讀過經濟既人投資多數會失利, 買樓多數變 – 資產. 應該仲有一句 : 逢賭必輸. 後來走火入鬼, 鍾唔鍾意都買, 又買極都唔中. 於是乎連賭波都戒左. 我仲曾一度成為友人中既苦海明燈. WTF.

  入正題, 普選. 如果你好想普選成功, 但係又怕希望越大失望越大. 普選呢 d 咁重要既野, 當然唔輪到香港人單獨決定, 此乃 “妙想天開”. 要係本地搵到對賭人又唔容易 (除非當奴肯同你玩). 咁史弟提議你做以下事情黎對沖一下風險 :

  - 學會計師李 x 玲 (名字忘了) 加入民建聯, 並成功係地鐵出到 4呎 x 6呎既廣告, “我認為民建聯係務實既政黨”. 或而家買定十年後既蛇宴飛.

  - 狂買金利來/ 方向傳媒股票, 或狂 short 數字傳媒股票. 小心, 唔好炒輪.

  - 寫信要求英國博彩 (搏彩?) 公司為”香港能夠在2008/2009/2012…/2099… 普選特首” 開盤. 至於你想投注邊年, 就視乎你有冇仔女而定. 英國佬應該肯開盤. 注意 : 信要用英文寫. 你唔係國家領導, 對住貝利雅都可以照講國語. 普選英文係 universal suffrage, 唔好寫錯 universal suffer.

  - 或要求 TDF 開 “普選不實現遠期合約”.

  - 或寫報告俾任總, 証明呢樣野比佢既HKMC 潛力更高. 理據大概為 : 以零三年七一經驗顯示, 香港起碼有五十萬人會有機會成為此合約的投資者, 需求什大… …呢間野點對沖? YO, 成個外匯基金幾萬億, 使乜驚? 再者, 任總期期都話因為美元弱所以外匯基金收益減, 咁既解釋都過到立會. 呢間野仲對沖黎做乜?

  - 同你老婆定下協議, 未能普選的話, 離婚贍養費減半; 普選成功, 家用加半. 唔好搞錯以為係未能普選就結婚, 失敗就分手. 咁你好傷, 除非你想換女友. 

  - 認曾當奴做契爺. 曾憲梓都唔錯, 而且年紀大d. 馬上風機會較高. 注意 : 此招只適合女性.
  ________________________________________________________________

  • 6:24 am
  • 1 Comment