<奧運吉祥物>
黎緊奧運, 無線既無聊節目定會出現以下問題 : 請順序講出以下吉祥物既名字.
(圖來自蘋果日報)
我一定會答 冰河, 星矢, 阿瞬, 一輝, 紫龍.
人類最好, 也是最差的性格及行為, 就是貪. 吉祥物是用來比現主題, 不是用來宏揚佛法, 用來歌頌你文化如何源遠流長. 我睇蘋果話每一隻都代表幾百種意思/概念, 唔o岩不如幫佢地出自傳呀, 笨.
所以, 到位的話, 一隻吉祥物便夠了. 搵野代表中國, 除左萬里長城, 你幾時會搵埋江澤民紫禁城黃河?
既然呢五隻野係代表五環, 我極想係開幕日見佢地做出真人五環扣既極限動作.
唔知點解, 藍色個隻令我諗起家燕姐. 黑色隻熊貓好似香港玩具店有售的熊貓機械人玩具 (個頭可以打開放公仔入去坐).
學 iamsorman 話, 佢地係真係奧運五色戰隊.
<喂, 你好咧喎>
史弟唔鍾意人身攻擊. 我淨係鍾意攻擊政府官員. 不過, 欣宜成日以為自己係正菜個種行為, 打扮及表情, 已經比先皇董廢帝更能引起香港人, 尤其係正常男人, 既反感. 此乃正宗 “又要睇, 又要屌” 既無線劇集觀賞行為, 但唔滾唔知身體好, 唔賭唔知時運高, 唔睇又點知佢咁醜?
你試下再望真d 佢既眼神. 真係嚇到屎到標.
佢老母, 即係肥姐, 高明得多. 明白知道自己唔靚, 所以三四十年黎賣既都係開心果形象. 以搞笑及公益形象逗你開心. 我係肥, 但我起碼唔會做d 乞你憎既野 – 我食煙唔會係大庭廣眾食 (肥姐係煙剷一名). 我成日笑, 成日保持開心形象. 此點, 肥姐一百份.
當年年少無知, 覺得肥姐姓 “沉” 比起 姓 “沈” 貼切得多. 除左個 “肥” 字, 有什么比 “沉” 更適合形容肥人? 簡直完美過雪完美.
史弟更相信, 當年秋官係中左邪先至娶左肥姐. 唔係話肥姐唔好, 或者肥人唔應該有靚仔老公, 而係秋官當年唔愁無女. 楚留香喎, 唔係許留山呀. 或者秋官試慣骨女, 試下新野, 點知上左癮…
屌, 橫豎都係, 不如下年 “四字成詞籌款日” 搵民政局局長肥何同欣宜合跳一舞拉. 有件咁不受歡迎既野係旁邊, 肥何留底有望呀.
___________________________________________________________________
<I-Banker>
好多人問過史弟入投資銀行做, 究竟難唔難. 更多人問既問題係 : 係投資銀行做既人究竟係咪個個都人中之龍, IQ 180, 才高八斗 (或更高), 好叻, 所以值咁高人工?
我既官方答案係 :
1. 佢地都係有手有腳, 有血有肉既人. 貝多芬, 愛迪生及愛因斯坦都要食飯訓覺. 佢地應該唔例外, 最多佢地可以訓少 d.
2. 以時薪黎計, 佢地人工未必好高 (睇埋下面, 我要收返呢句).
3. 我所認識既 I-BANKER (number of samples 極少), 都係本身屋企有錢, 仲係非常有錢. 本身就係投資銀行既生意或者家族同潛在客戶有聯繫.
4. 投資銀行都有 mid-office 同 back-office, 呢堆人既人工比起市場高五至七成.
5. 你聽見人做投資銀行, 要知道佢係咪做坐盆 - 呢班人搵最多. 其他做 asset management, compliance, m&a, ipo 個堆, 其實好多野都係d financial planning, 比起坐盆, 較易捉路, 所需要既智慧, 低一點點.
6. 投資銀行既人好多唔係 IQ180, 但有數共通點 : 說話大方得體 (即英文所謂既 presentable), 英文好, 懂走精面, 個腦轉得快, 對答要如流 (或者可以講係死撐). 記住, 係有晒以上全部五點.
今日係 AWSJ 睇到以下報道 :
Expected Compensation (US$) :
- Global head of commdities trading : 6.0 – 8.0 million
- Head of swaps trading : 3.3 – 4.0 million
- Investment banking, Managing direct : 2.2 – 3.3 million
- Global head of emergin markets debt trading : 2.0 million
- Head of information technology, Asia : 1.2 million
- Municipal derivatives trader, 3 years experience : 170,00 – 215,000
- Investment banker, first-year associate : 105,000 – 125,000
一個字, 屌. 好多蚊年, 哈哈哈哈哈.
<明星>
官恩娜真人幾正. 無上鏡咁大隻同買醜樣. 身材好, 膚色棕黑. 著衫一般.
余文樂真人好靚仔. 不過無想像中咁高.
鄭融好矮, 大概只有五呎差一吋. 完全感覺唔到佢係相裏面成日表現既姣意, 只像一個十五六歲既小妹妹.
stephy, 似瘦版林嘉欣, 皮膚不錯. 現場唱 live 驚嚇度100 分.
薜家燕, 好肥, 好矮, 傳統既肥婆奶奶.
阿 sa 好厚粉, 對助手好似幾好.
__________________________________________________________________
<政改>
高斯理論的其中一個含意是, 在未搞清楚產權之前, 任何人指摘對方不負責任的言論都是沒有邏緝根據 : 既然 A 沒有責任要負, 指 B 要負責/ 不負責任 都流於煽情. 個仔唔係我既, 點解話我冷血, 唔肯俾錢養佢? 問題是相對的 : 你又點解唔養?
政府近日的口吻係 : 民主派要是反對第五號報告書, 令其流產, 會令民主發展原地踏步. 這么一句便把所有罪名, 推得一乾二淨. 情形大概如 : 食完飯老公同老婆講你洗碗, 萬一成屋蛇虫鼠蟻你負責, 之後自己施施然去訓覺.
倒轉來說, 為何政府不能定下普選時間表, 好讓皆大歡喜 (這句可圈可點) ? 究竟決定民主步伐的權利, 在政府 (代表中央) 還是香港市民 (隱含在基本法裏) 手裏? 既然決無人提供到明確的答案 (雖然個人主觀地認為該權利隱含在基本法裏), 民主結果原地踏步的責任就不在任何一方 (包括政府).
問題的結晶所在就是政府的邏緝 : 立會議員及人民有義務/責任去通過由政府提出的政改方案, 但就無權利去決定方案應該如何. 政府就有權利就無責任.
所以再重申, 有否普選, 史弟不太重視. 然任政府及現任主要官員那些 “周官 vs 蟻民” 的行為及心態, 排擠一切與自己不同的意見, 實在作嘔.
<戒煙>
史弟由廿歲開始吸煙, 中途曾為挑戰自己而停食了一年煙 (….). 由純薄萬去到純萬到印尼話梅煙, 真係無諗過停. 一來煙癮不大 (話自己無乜煙癮既人通常係煙剷) – 自己從不帶煙出街, 出街要吃只會在室內及食朋友的煙 (呵呵呵); 二來食煙對我來黎講同食糖水上網訓覺無乜分別, 都係生活的一部份. 不如戒溝女呀笨…
好死唔死, 兩三個星期前心絞痛. 隱隱作痛了十數天, 大力點呼吸也忌住忌住. 又好死唔死, 上急救時阿蛇 (佢唔係醫生) 話除左天生, 急性心臟病人唔會突然有呢個病, 而係開始時有心絞痛, 漸漸變為心臟病.
雖然唔知有冇因果關係, 但抱住一個大膽假設, 小心求証既精神, 停食一排先 (記住, 係停食).
再好死唔死, 呢兩星期真係無再心絞痛. 咁我無奶油再食返, 睇下有冇心絞痛, 再戒煙黎驗証一下. 大佬, 生命無 take 2.
但係! 我尋日又食左支純萬. 竟然, 發覺好難食 (可能耐無食既關係).
於是乎, 我可以安心戒屋企煙, 即係係屋企唔食. 出街依然會食人地d 煙. 此乃人出雞我出命. 我相信, 此舉將吸煙的數目會減至每星期最多三支.
又, 廣告話食煙會減低性能力, 即戒煙會提升翻. 此乃大話中之大話, 同 “一國兩制係香港得以全面落實” 一樣, 係與事實不乎. 千祈唔好信.
_________________________________________________________________
<西九文娛>
老實說, 是時候拉倒了.
當大多數香港人仍然認為 文化 = 藝術館歌劇院CATS既時候, 我們的文化處於的水平低得不值拿幾百億的地皮來興建數十座基建設施. 再者, 發展文化不見得需要一個可同時容納千幾個藝術團體的地方. 畢竟, 當史弟連龍應台的文章也未看得懂的時候, 評論西九的財務安排及所引致的效果, 比談論風馬牛不相及的文化政策舒服得多. 就狹義的文化 – 即文化等同藝術術館表演 – 來說, 西九是想找個地方好讓外國的藝術團體有地方表演落腳 (西九裏面有酒店); 還是想培養本土的文化工作者呢. 對史弟來說, 硬分 “外國” 和 “本地” 當然意義不大 – 只要是好的文化工作者, 哪用理會她來自南極? 但對於納稅人和有志成為文化工作者的人來說, 西九發展的方向及定位是會影響她們的.
那個地方, 拿來多起兩個凱旋門吧. 藝術團體? 讓他們散落在凡間吧, 灣仔, 油塘, 舊機場, 全港十八區.
_________________________________________________________________
<政制發展>
史弟不相信民主. 但極度反對現在政府那種 “看似聆聽及接受意見”, 但暗啞底仍是一意孤行的態度. 特區政府日日強調既所謂 “一國兩制, 港人治港” 得以在香港徹底實行, 完全同事實不乎. 基本法只講國防同外交係由中央處理, 但慢慢乜撚都由中央處理 – 連當奴 (呢個名真係正) 都話香港人想自己發制民主係妙想天開. 更重要的是, 史弟抱著一顆愛國既心, 希望中國早日以非武力方法光復台灣, 用許仕仁的語調說 : 從這個原則出法, 我都是愛國人仕. “一國兩制” 弄至如斯地步, 連考慮普選也不納入考慮範圍, 試問台灣的同胞又怎會安心歸順內地, 馬英九又怎說服台灣民眾中國獨一後台灣的民主不會開倒車呢?
那三數個有機會當二五仔的民主派人仕 – 我幾乎肯定馮檢基會重蹈九七臨立會的覆轍, 與及當奴好友大班也會叛變 – 好快會成為炮灰. 陳日君已聞到陣二五之風, 呢排出黎狂嘈咧.
當年七一遊行, 我們不單是為了沙士, 為了梁錦松. 政府不聽人民的意見, 全部事情黑箱作業, 才是真正令人上街的最有效催化劑.
誰說田北俊是人民英雄? 媽的, 看風駛渎的人, 只是低級的政治家.
許仕仁曾經講過, 政改方案過唔到立會, 佢係會辭職的. 許仕仁如果言而有信, 咁林 D9 仲可以坐多幾耐?
<盲目的背後>
史弟對市場的膜拜, 在很多人的眼中, 已到達橫不講理, 盲目, 進入一個哲學性, 不理性的地步. 史弟認為, 市場並非全能 – 我不相信有任何東西是全能可以解決任何問題. 只要一天資源仍是 “有限” 的話, 不可能有 “全能” 這回事.
市場有其局限. 什么壟斷公用品界外效益資訊不完全, 全是現實世界存在的, 這些不容否認. 史弟所否認的, 是許多人以為有比市場更好的制度 – 民主, 投票, 政府, 獨立的監管團體, 選美 - 可以更有效地解決這些所謂的 “市場失效”. 既然市場可以失效, 政府也可以 “失效”. 民主也可以, 任何解決問題的制度也可以. 比起市場, 其他的制度都有數個缺憾 : 其對社會的貢獻及其得益可以一點關係也沒有; 即使明知沒有用, 要廢除, 花上極長時間勇氣能力及決心. 在未能解決之前, 錯的繼續錯下去.
有人說, 既然這些制度在現實世界存在, 他們在解決問題上一定比用市場來得優勝, 否則 “既然人是自私, 永遠爭取最大利益”, 我們早已用較有效率的方法. 這是對的, 但做決定用市場還是制度的人, 考慮的除了效率, 還有很多一大堆不知名的東西, 這些是什么, 他們自己也搞不清楚 : 民意, 背後利益, 公平分配, 諸如此類, 如此這般. 我不想舉些空中樓閣的例子. 一堆的既得利益者, 是可以影響當權者的決定, 令他們的既得利益得以保持, 而社會的代價比既得利益大. 看看每年調整綜援, 總有一大班人來嘈話加得太少/ 減得太多.
市場是什么? 講到最後, 是個人選擇的權利. 經濟學, 講的是人會如何對誘因反應, 來來去去不外乎是三兩招.
<意外>
為左狐忍, 我尋日竟然去 188 買 ps2 老翻. $70 三隻, 半句鐘拿貨.
拿貨時那個操國語口音的阿叔說 : 除了姐個, 次他都味有. 語畢從袋裏拿出一堆不知名的 ps2 遊戲, 叫我拿兩個補數. 我立刻以國語回應 : 把錢給回我.
阿叔支吾以對, 然後找來類似話事人的物體說只能 “以 game 代 game”. 我心想 : 下次你條仆街去叫雞, 雞頭搵個男人俾你, 同你講以窿代窿, 呀笨.
此時, 我又記起自己其實是買緊老翻, 好難去消委會告發佢 – 早年好景那些有壞包換其實都是騙人的… 於是乎當自己 $70 買一隻老翻, 求其拿左兩隻遊戲 (大概知玩乜), 拿拿臨走. 臨走時我幾乎係話事人面前打電話報串叫海關黎…
幸好, 狐忍是舊貨, 仍有供應. 由於室友的 playstation2 (有中文譯名嗎? 不如叫遊戲驛第二站) 沒有記憶咭, 睇怕又要花費一百幾十先有機會用到我愛羅. 我愛羅, 即係我 xanga 左邊的那個人物.
之後同 LT, 即佢女友好憎我個個舊同事 (原因不外乎係 : 我教壞 LT…, 哈哈哈哈哈), 去食飯. 大家都好怕食日本野, 行過活道 (WOOD ROAD, 對住灣仔188 正門), 見到有間叫 “哲學咖啡館” 既野, 裝修幾正. 於是兩條佬走入去食野.
結論係 : (1) 野幾好食 (2) 招呼幾好 (3) 應該會再去.
講番轉頭, 個度有個待應好騎呢. 話說飲完湯食完蒜蓉飽, 待應過黎問我地要唔要另外一隻飽. 我怕食兩個飽太飽, 於是問佢係乜野面飽, 待應呆了半響, 緩緩答道 :
er…… 係面飽.
屌! 我夠知係面飽, 使春你講咩. 算咧, 叫佢先拿來. 原來是兩條有手掌咁長既條狀面飽, 味道很好.
食完, 剛才那個待應過黎問我地邊隻好食d, 我地話長條型面飽. 待應滿意地答道 :
係呀, 通常有客要求我地先會俾呢隻飽佢. 因為呢隻飽太好食, 我地自己都唔夠食.
!?????????? 條友想點? 我同 LT 對望, 然後答道 “哦….”
所以我重申, 請好的伙計, 是很重要的.
此外, 我們還遇上了另一樁意外. 話說我和 LT 吃完飯在餐廳吹水時, 見到一名貌似 TTW 的男了在面前經過, 潛意識梗係叫佢個名. 條友停左一停, 望一望我同 LT, 根住繼續行! 好似… 不單止外貌, 就連衣著及表情都似足 TTW… 嘩哈哈哈哈.
<The Hong Kont Originals>
呢個 xanga 既圈, 最近一歲生日. 教主為 kykykyky, 眾門徒如 venet 等大肆慶祝一翻. 順帶一提, 尋日睇到 silly_cecile 既 xanga, 笑左我一個下午.
聽教主講, htAB 叫呢個圈做 <香港原人圈>. 原人可解作 “原創作人”, “原始人”, “原來唔係人”. 諸如此類, 如此這般.
史弟口臭地認為, 叫 <香港猿人圈>, 簡稱 <猿圈> – 食字 “圓圈”, 更加有意思. 嘩哈哈哈哈. 尋日連 kursk 都裁埋 <猿圈>, 小圈子原來幾過癮. 唔怪之得當奴要做反骨仔, 棄明投暗, 玩他媽的八百人大圈子選舉.
個人向總教主推薦, she_square 乃不可多得的 xanga.
__________________________________________________________________
<阿石 : 比試>
-_____-
八月頭$10,000本, 九月底結餘為 $9,914, 回報為 -0.9%, 原因為美元轉強, 史弟拿住好多日本元蟹貨. 但相信日本經濟會超市場預期而繼續做好, 目標係 115 對一美元.
