<太陽底下無新事之 an old way of looking old facts>

講正經野之前, 讓史弟為世上想散拖但又唔敢講既男女提供一條好橋 : 係值得紀念既日子帶你既另一半去尖沙咀亞士厘道新加玻餐廳食飯. 係咁惡劣既環境, 食物同服務水平之下, 分手所帶黎既邊際傷害, 大概等於零. 你試過約女友到港島香格里拉吃自助餐, 到喝咖啡的時候和她說分手嗎? come on.

 

正題. 對於認為生活苦悶到爆的人 (如你生活等於工作, 加兩元另計), 史弟是無法理解的. 讓我分享一下.

 

講明先, 你唔係中環返工或者去慣中環, 以下可能悶撚死你. 同理以下既野係憑我記憶寫出黎 (特別係紅綠燈閃幾下), 有錯聽日更正.

 

我的家與辦公室的距離大約 10 分鐘路程 (??? 此句已有三個語病. 但我唔係教中文或者報紙佬, 可以不理), 每日返九點, 又想八點九先起身, 就要知道由屋企至公司之間既紅綠燈, 邊盞紅個陣邊盞係綠, 紅完之後又點. 知道後大概可以訓多幾十秒.

 

讓我具體一點說 : 由中環半山行人電梯開始, 靠舊連卡佛方向向匯豐銀行總行行, 一共要過四盞紅綠燈.

第一盞為蘭桂芳 body shop 與 娛樂行之間那一條. 這紅綠燈的 “紅” 是史上最長的紅燈, 不論是以 “紅燈時間除以綠燈時間” 還是淨以 “紅燈時間” 來計. 綠燈開始閃時, 綠色公仔一共會閃 六下 (約六秒), 然後才會出現紅色公仔.

春宵, 苦短.

我估計那綠色公仔每一次只會出現六至八秒 (不計閃緊個六下), 然後紅燈出現約二百秒.

 

第二盞位於娛樂行與馬莎百貨之間的長命斜. 這和蘭桂芳之間那盞剛好倒轉, 這紅綠燈的 “綠” 是世上史上最長的綠燈之一. 這燈和畢打街那盞是相對的 – 即畢打街那盞是綠的話, 這盞必然是紅. 當蘭桂芳個盞綠色公仔閃既時候, 呢盞燈會一齊閃 六下, 然後大家一直轉為紅燈. 但兩盞燈不會一齊轉返做綠燈 – 估計這紅色公仔每一次會出現十六秒. 當畢打街那綠燈閃過十一次後轉為紅燈, 這娛樂行與馬莎之間的紅綠燈會轉為綠色公仔.

由於上述既第一盞同第二盞燈一同轉為紅燈, 咁當你由蘭桂芳個邊盞燈 綠燈 既時候開始出發, 行完斑馬線大概六秒, 行到去 extravaganza 大概要多六秒. 這時娛樂行與馬莎百貨的綠燈己經閃緊燈.

要過埋 extravaganza 先知娛樂行與馬莎百貨個盞燈原來閃緊, 係由於娛樂行對於皇后大道中個一個角位 (即有書報攤那位置), 面向金鐘方向站在角位後面只聽到蘭桂芳的紅綠燈的聲音; 站在前面只聽到娛樂行與馬莎百貨那紅綠燈的聲音. 你聽到佢閃, 就算有劉翔咁快都過唔切. 因為佢已經差唔多閃完.

以正常步速由 extravaganza 行到娛樂行與馬莎百貨的紅綠燈, 約需七秒. 於是乎係 紅燈 , 過不了.

這樣你便少睡了十幾秒.

於是乎, 如果咁好彩過老蘭個條馬路咁o岩綠燈, 我一定會衝過去 – 唔係怕呢盞紅燈, 係怕要多等十一秒.

而要過老蘭個條馬路, 亦唔一定要等個十二秒綠燈. 因為娛樂行與馬莎百貨的紅綠燈會早好多轉成綠燈, 當紅燈轉到去畢打街個盞的時候, 會有一至兩秒的時間是 “真空期” – 即畢打街的紅燈時的第一輛車不會跟貼住娛樂行與馬莎百貨紅燈時的最後一輛車而行駛. 這裏, 你便可衝紅燈而不會被撞死.

再者, 當你係娛樂行個邊開始行, 睇見老蘭個盞燈 綠燈, 都唔使衝. 衝極都過唔到.

總之一句, 橫過皇后大道中既紅綠燈 (語病又黎…), 紅燈長而綠燈短.

 

第三條, 雪廠街斜路. 綠燈超長, 紅燈超短, 綠燈閃 八下 轉為紅燈. 此燈與皇后大道中九號的紅綠燈是相對的. 皇九那便是第四盞燈, 綠燈 閃 八下 轉為紅燈. 無乜特別, 除左食飯時間有時會有個阿伯搵粗口狂操特區政府.

而蘭桂芳及娛樂行與馬莎百貨之間那盞燈, 燈泡已改用 LED 燈炮. 燈的色彩比一般紅綠燈的光亮及清楚, 而且長時間使用後亦不會轉淡或暗啞. 有意者請留意交通燈下面的告示.

中環街市 (惠康對出), 萬宜大廈 (中藝對出), 余道生行 (莎莎對出) 的紅綠燈, 綠燈 閃 十下 轉為紅燈. 中環街市轉為紅燈, 約三秒後萬宜大廈燈跟隨轉為紅燈.

__________________________________________________________________

講燈? 邊個有興趣. 好些人定會說史弟只是想演野. 係既, 你講既野好o岩, 我會改進.

超長既一個 POST, 亦係記憶中最無聊既一個.

原來人家說生活苦悶, 不無道理.

<霍元甲 @ IFC>

新年溜溜投訴太多唔好, 不過對於<霍元甲> 我是有點失望. 想講的講不到 – 儘管導演已一而再咁借他人口中講出 – 但劇本不滯就是不滯.

我最想最想看到的便是霍元甲與陳真的一段師徒情. 陳真, 即李小龍於 <精武門> 一片中的角色名稱, <精> 一開場便講到霍元甲已經死左, 而霍係俾人落慢性毒毒死的 (下手的人好像是管家與大師兄?). 可惜 <霍> 並無交代陳真… 無左陳真, 霍元甲即刻變得獨身走我路… 

記得當年亞視仲有拍劇個陣, 甄子丹做陳真既精武門 (由今天無線覆雨翻雲既皇帝黎做霍元甲), 無論故事同交待師徒情, 都正過 <霍元甲> 好多. 當然, <精武門> 主題曲既歌詞, 亦比起周董的 fuck fuck fuck fuck fuck fuck fuck 實在有意思得多 :

************************************
無可擋, 原是我精武英雄. 英雄, 無不衝動.
誰阻擋, 凌辱我怎去遵從. 堅持, 人的尊重.
誰瑟縮中偷生, 我憤怒. 我定我的命途.
誰啞忍聲音不會洩露, 我心一生刺著刀.
無妥協, 世局搖盪, 甚麼, 東亞病漢.
無妥協, 眼在前望, 歷史, 因我被震盪.
寧於猛火中, 滅亡.

無擔憂, 無害怕走上驚濤. 英雄, 源於風暴.
狂魔者, 來負我怎需分途. 堅持, 人的驕傲.
誰瑟縮中偷生, 我憤怒. 我定我的命途.
誰啞忍聲音不會洩露, 內心一生刺著刀.
無妥協, 世局搖盪, 甚麼, 東亞病漢.
無妥協, 眼在前望, 歷史, 因我被震盪.
寧於猛火中, 滅亡.

我話俾你地知! 我地中國人, 唔係東亞病夫!

身, 在天邊的遠方, 看沙穿過萬里, 令心感真理不死.

無妥協, 世局搖盪, 甚麼, 東亞病漢.
無妥協, 眼在前望, 歷史, 因我被震盪.
寧於猛火中, 寧於猛火中, 滅亡.

誰可擋原是我精武英雄, 英雄無不衝動….
************************************

至於武打場面, 李生要 Y 也, 預左, 但估唔打得幾單調.

據聞春天花花幼稚園, 乃驚世爛片…
_________________________________________________________________

<亡人>

超人亡妻墳被掘, 令人氣憤. 內地人只知李超人有錢, 卻不知其對某些事情十分孤寒. 起碼, 佢唔會放七卡鑽戒陪亡妻. 亦無乜香港人咁笨.

笨既, 只係個幾隻內地同胞.

用 “隻” 黎量化同胞, 只係覺得佢地豬一樣, 咁蠢.

普遍香港人 – 政府的高官除外 – 不喜歡幹他媽的假大空事情, 花許多錢來換一時之快感. 女人也除外, 因為她們購物純粹是為了購物這行為, 而非為了所得的衫褲鞋襪等. 沒有電視台直播葬禮, 誰也不會笨得把 999 足金, 唐三彩花瓶, 張大千古畫一併放入倌材裏去. 就連假的也不會.

至於點解同胞仍然係豬咁蠢, 係佢地唔明白一個將其妻葬係對外開放既歌連臣角墳場既人, 據正常邏輯係笨唔會將貴重物品一同陪葬.

<四個婚禮, 一個葬禮>

我沒有看過這電影或小說.

年初一流流, 唔好講唔開心既野, 死人事件既篇幅少d. 這是報館既做法.

世事如此, 一個好消息, 一個懷消息, 你想聽哪個先?

我在沒有選擇的情況下, 先聽好消息. 葬禮, 未必要為一個死去的人而舉行. 天莫大於心死, 把自己的希望, 世界的戰爭, 人際間無謂的對立, 舉行葬禮, 其實幾過癮. 千祈唔好搞錯, 將你剛買既多布拉多尋回犬生葬.

無乜關係既人, 係我聽到壞消息之後, 又突然變得關係密切起來.

祝各位,

心想事成, 笑口想開.

“心想事成” 這句拜年說話, 行貨到爆. 行貨既原因, 是因為基本上你唔使做任何事前功課 – 睇下佢有冇仔女做緊乜野人工幾多 – 先俾一句 tailor-made 既拜年說話. 例如對住破產既人講 “財源廣進”, 佢唔會多謝你 – 反而錢也不是他的. 失業既人你祝佢步步高升, 佢淨係諗到爬上頂層跳樓, 到時唔知係拿彩定贈興. 對住任何人講心想事成, 一定中. 於是乎 “心想事成” 就成為唔肯用腦, 唔做功課既人最佳的拜年說話.

但我又覺得沒有什么比 “心想事成” 更好. 只要你想, 什么也可 – 哪理會你是連生貴子出入平安左右逢源. 心想什么, 什么就成, 多好.

突然覺得, 能活著, 多美好.

<完全啞掉>

好耐無見既教書佬成日掛住咀邊既 O 咀. 從字面上無從解釋, 只能 “意會” – 只有看到不可思議的東西或事件時, 人們才會下顎向下鬆弛, 咀巴形成圓形狀.

史弟唔去做, 更唔想做偉人 – 偉人多數早死, 儘管風流. 唔想影響人家的行為以極到任何私利或快感. 但好些事情, 不吐不快.

1. 炒輪. 當街邊的阿毛, 與及你家裏的阿媽也在炒輪的時候, 就如今期仍然無乜料到既壹週刊所說, 天國將近. 評芬員說許多人連什么叫 hedge ratio 或者引伸波幅都未知係乜就去炒輪, 同玩大細連有幾多粒骰仔都唔知, 同數目字都唔識一樣.

2. 壹週刊. 究竟熱船係咪壹仔大股東 (或其女友)? 粗略估計, 每五期熱船起碼當一次封面. 市場研究是需要的. 楊懷康成日講海耶克, 究竟佢有冇搞好訊息接受?

3. 留言. 開得公家日誌 (即你睇緊呢個西), 你覺得有道理, 又同作者講既野有關, 鍾意留咩咪留咩言. 言論自由包括自由講錯野既自由 – 只要不是存心誤導及傷害到他人利益就可以. 我地, 活係香港. 大陸當初唔俾沙士既消息傳出去, 都係 “怕引起恐慌”. The road to hell is paved with good intentions.

4. 有幸見到徐 X 琪既男友李 X 誠, 仲聽到佢上台演講. 一, 即刻想狂沽恒基估票. 二, 中華大字典 “二世祖” 一詞旁邊的候選圖片又多一張. 三, 怪唔之得溝到徐小姐, 講野既速度同順暢程度, 非常接近.

 

 

 

奠

 

Sir John James Cowperthwaite, 1916-2006

 

 

 

 

 

 

 

 

 

<二三事>

對於一個事無不可對人言的小伙子來說, 沒有什么比要保守秘密更具挑戰性, 及更屌那星. 這些秘密並不能令史弟或任何人發財, 講左也對事情沒有影響, 但就是不能說. 對任何有關人等也不能說 – 你對街上的乞丐說, 倒是沒有所謂 – 但係叫得做無關人等, 講佢地都唔明. 講左, 只會更麻煩.

這些秘密可能係林行止生瘡, 或原來我阿媽係男人.

人際關係, 工作情緒, 做人態度, 處事技巧, 好麻煩. 麻煩到只想收埋一邊, 自己做自己野. 其實, 咁幾好. 乜都唔好搞到我, 亦唔好之前比我知道咁多野. 對我黎講, 返工只係為左交租.

誰是誰非, 根本只有上帝才了解. 但我日日都俾人迫表態, 要支持一號還是二號. 一號權大, 但二號更惡. 但最根本就是大家也沒有 “正確” 的理據. 救命. 邊鬼度可以專心做野.

麻煩 x 10.

各位, 史弟又放左屁咧. 多謝.

<樓市數聞>

1. 由今年四月高峰到而家, 住宅樓價大概跌左一成. 如果你相信息口的影響是滯後的話, 而且係累進的話, 今年樓市應該牛皮 – 上下波幅不過 10%. 利好因素 – 即什么收入上升, 經濟繼續向好等 – 頂多係同利淡因素打個和.

2. 至於近排樓市係點, 去 wisenews 睇下樓市既報導有幾多就知 – 上年七八月每日有三百幾篇, 今日有一百五十篇已經叫多. 水靜河飛是也.

3. 地產商近排無樓好賣 (搵鬼買?), 唯有好似趙國雄咁做下小丑. 近排已經開始放風, 為年中賣一手樓再作準備.

4. 至於賣地, 好多人依然食古不化, 話而家既勾地表制度無問題. 當一年賣得一兩次地, 市場缺乏充足及有代表性的價格訊息, 無足夠既訊息令投資者決定係入市定係唔玩, 一直講 “睇下先”.

<痴鳩線>

你細心觀察, 就會發覺呢個世界實在有太多荒謬絕論的事情.

1. 在此賣廣告. 光明面.

2. 今日係 now 報導, 話香港既候選傑出運動員去左陪d 公公婆婆做運動. 根住電視出現一大班人做運動早操既畫面, 然後有高禮澤, 李靜… 等等.

 

突然, 畫面出現 李健和.

 

如果你一時唔記得邊個係. 可參考下圖, 左手邊為李生 (圖來自大公報) :

 

對, 是當年把足球踢向球證, 然後被罰禁止參與國際賽一年的 李健和.

對, 是當年 (那時史弟只有十歲) 和山度士齊名的李健和.

你可以知道, 香港的體壇是如何地不濟, 如何地青黃不接. 香港體壇竟然要搵今年接近四十, 曾經坐過一年國際賽波監既人, 做候選傑出運動員, 情形有如楊光獲頒大紫荊章一樣.

你不禁問句, 乜香港冇人咧咩?

不如今年賀歲盃港隊重召譚兆偉, 山度士, 譚拔士入, 加埋單刀王歐偉倫, 鄭兆聰, 巴貝利, 加上肥仔門神希福特, 叫元老香港隊. 起碼認識佢地既香港人, 肯定多個認識卓卓同其他一堆蛋散. 你唔知邊個叫卓卓? come on. 算吧拉, 六師弟.

橫豎都係輸, 不如大打快樂足球, 唔好彩香港觀眾念舊, 坐爆大球場, 總好過阿叔對住個空場話入座率好高, 又要話香港隊好波.

 

3. 播完李健和. 諗住可以回一回氣. 點知根住係訪問黎新祥 (好似係港隊教練). 記者問佢有冇機會勝出初賽拿到十萬獎金. 佢答話港隊好有機會勝出, 原因係對方正值 off-season, 無態; 而且香港主場, 睇高半線.

Oh My God. 不如下次搵傷殘人仕踢賀歲盃拉, 對方無腳, 港隊肯定贏硬.

 

4. 由於暴暴飯焦引起公眾人仕不安, 李國章終於搵左高彥鳴 (究竟佢係城大定係科大?) 做主席, 主持一個 “檢討教師壓力的獨立委員會”. 至於做乜. 政府話研究下教師面對既壓力.

唔知道既以為 “老師” 係飛機或東鐵其中一條避震器既名稱, 政府要睇一睇佢可以承受幾大壓力, 及壓力來源.

以政府一向做法, 肯定會懶科學 (事實上佢地一d 都唔科學) 去量度下教師面對的壓力. 梗係拉, 都無清楚有冇壓力就去研究, 邊夠科學化?

痴鳩線. 邊個做人無壓力? 中學生有壓力, 應否搵任志剛 (橫豎佢都話炒輸股) 做 “檢討中學生壓力的獨立委員會”?

你阿媽每日諗要煮乜菜, 好大壓力 – 怕買唔到新鮮菜肉魚, 係咪又要黃英琦搞個什么 ”檢討家庭煮婦壓力獨立委員會”?

於是乎, 周街都係委員會, 策發會, 乜野會, 實際做什么, 連當時人也搞不清楚. 遲點要否來一個 “反委員會獨立委員會”?

5. 好, 我心有不甘. 於是上網搵下究竟傑出運動員選舉係乜東東. 於是乎我係 http://sportstar2005.hkolympic.org/staraward/html/main_c.php 搵到呢個選舉. 根住 click 下 click 下, 我搵到投票個一頁

http://sportstar2005.hkolympic.org/staraward/html/voting_select_c.php?

點知係傑出運動員搵唔到和仔.

原來係佢所踢既香雪晨曦成為 “香港最佳運動隊伍” 候選隊伍. 我再望真的, 原來所謂 ”香港最佳運動隊伍” 既選舉, 同過去兩屆特首選舉三個特首選舉一模一樣. 即係乜? 你自己按上面的連結感受一下.

真係痴撚線. 得一個候選人都可以叫選舉.

<?????????>

Kobe’s 81-point game second only to Wilt

http://sports.espn.go.com/nba/recap?gameId=260122013

這是籃球, 不是桌球…

____________________________________________________________________

<oh come on…>

回歸教改, 好多野都有爭議. 334, 005, 殺校, vr……但係我眼中, 有一樣野肯定係錯, 比八萬五及董廢帝任何政策更錯 – 遺害更深.

呢樣野叫做 <母語政策>

<大智若愚>

人生中不可能沒有 “偷看” 男友女友手寫日記, 電郵, 手電及其他私人物品的機會. 吹噓一下 : 但係事實上, 對著不同的女友, 我也未試過偷看 – 儘管我曾懷疑 c 女友有別的男人 (事後知道那是真的), 儘管我懷疑 j 女友和以前的男女有很 “緊密” 的聯繫. 兩個人一起, 只講個信字 – 對某些人來說, 史弟講 “信”, 就如當奴話佢鍾意普選. 不信的話, 一起下去也沒有意思.

至於偷看, 那不過是按幾個掣. 偷聽的代價更低… 但當老廉靠偷聽得返黎既証據都不能成為呈堂證供而且要永久終止領訊, 男女之間靠偷而得返d 黎既資料, 無助於彼此的關係, 無乜用, 最終只會係 lose-lose.

睇左, 咁又點? 搵把刀通佢, 大興問罪之師, 數佢繼而分手? come on, 男人最叻就係發爛渣. 當佢發現你係靠偷睇而得而重要既秘密, 佢唔會感到內疚, 反而第一句就會話 : 你做乜睇我D 野? 根住, 發老脾諸如此類. 結果, 你受了委屈, 反而要 dum 男友, 何苦?

一開始有這裏的立論, 大家最多係 50/50 平手. 傷了感情. 可況還沒有真憑實據就問呢問路, 理虧的是誰?

睇到呢度, 我睇怕已經又俾人話我世紀賤男. 但唔緊要, 言論自由包括發表錯誤言論既自由. 你就當我是在鼓勵人家做壞事還是為自己找藉口.

最聰明的女人, 不是 HP 打印機的 CEO, 克林頓的老婆, 還是四人幫的江青 – 她們全是成功人物, 而是懂得在適當時聰明, 適當時蠢的女人. 朋友的男友常北上工幹, 難道她們不知道男友有上去沙沙滾? 不惹性病, 不上身 (被人騙財), 乾淨, 其他? 可以的話都不去知.

男人是會內疚的人物 – 他真是愛你的話, 去完滾, 回家會更聽你話 - 這簡炳墀說的.
__________________________________________________________________

也順便放一下屁, 解釋為何史弟這么討厭人家在偷看我的物品. 那是 “童年” 陰影 : 香港樓貴, 一家四口只住在二百多呎的地方 (當然比許多人大得多了), 完全沒有私隱可言. 明白, 所以一直也沒有特意收埋任何東西.

一九九五年二月十三日, 我放學後把禮物 – 那是一隻木偶奇遇記的公仔 – 收在 adidias 的書包裏, 吃過晚飯再回家. 放下書包後, 返和爸爸 share 的房間與女朋友談了一會電話.

傾完出到廳, 有人問我剛才去了邊. 我說去和同學食飯.

有人以半譏笑的態度說 : 我以為你去了買禮物添.

語畢我已經知中招, 但我扮若無其事去廁所. 後來, 我發覺本應獨自在一旁的書包, 給打開了. 木偶本是坐著的, 但那時已經倒樹沖了.

我覺得我根本沒有被尊重. 那個時候的我, 還未懂像今天般發惡. 或者這樣說會好一點 : 那時候我被侮辱的感覺, 遠遠超乎於我想發惡的情緒.

到今天我依然清楚記得細節, 因為那是我第一個情人節.

到今天我依然清楚記得細節, 因為我第一個情人節收到的禮物, 要放在好友的家, 數個月後才能借生日為名而帶回家. 我害怕聽到 : e, 那便是你的禮物嗎? 哈哈哈哈哈.

往後的數年 – 直到中六 – 我的私人信件或物品也曾經被人偷看過, 特別是有關女友的. 至於 “直到中六”, 是因為我中六開始也沒有拍拖, 他們知道沒有什么值得好睇. 而直到下一次拍拖, 即大學二年級時, 我已經搬了.

所以我會告訴你, 中學生拍拖根本是沒啥大不了的事情. 父母一日沒當那是和食飯飲水一樣普通的事情, 他們還是會繼續偷睇仔女既野. 按幾個掣只係幾秒鐘既事, 但造成的傷害, 可以殘留好幾十年 – 起碼大家今日都浪費左幾十秒睇史弟放屁.

cest la vie. 這些事情既不能重來一次, 我得與其活著.

既然我對私隱如此重視, 我對別人的私隱, 也不會掉以輕心. 做人得有一條最低的標準 – 那和最低工資和最高工時是不同的. 可以的話, 不要俾人話你 “有口話人無口話自己”.

結論係, 董廢帝把樓價推低八成, 其實係想大家有私隱.
__________________________________________________________________

<終於…到二百件咧!!>

九鐵主席田北辰說，早上已完成1465件東鐵列車主要組件調查，有裂痕的共212件，月底會完成焊接。

田北辰晚上在記者會上稱，當中有189件是吊架焊接位出現裂痕；18件掛架焊接位有裂痕，其中17件的裂紋少於10毫米，另外5掛架拉釘焊接位有裂痕。全部檢查了1465件東鐵列車主要組件，有裂痕的共212件，佔14%，但不致構成危險，預料在本月廿八日前會完成所有焊接工作。

(轉載自明報)