January 8, 2006

• <無聊二三事>

  
  

  呢排報紙佬除左不斷解讀 “深層次矛盾” 同埋搵下邊度有教師跳樓, 幾項重要既新聞都俾人忽略左.

  
  

  1. 電力市場 :

  
  

  中港電力同慧峰引入南方電網 (下稱中慧南), 向香港供電. 住在香港島既你 (同我) 唔好以為電費可以在有競爭既情況下減價. 中慧南只係 “諗住” 供電俾接近中國既新界地區, 仲要只係非住宅用戶. 再者, 一億既電網最多只係夠一條村. 內容毫無新意, 同上次吹風話供電俾香港, 慧峰然後散貨個鑊, 分別唔大.

  
  

  但你唔好理. 係創業板上市既慧峰, 之後個日股價升左一倍. 証明香港估市裏面唔睇報紙既, 大有人在.

  
  

  既然外國勢力 (…) 靠唔住, 唯有退而求其次, 靠政府. 係 http://www.edlb.gov.hk/edb/eng/papers/electricity/image/icon_b.jpg 提到, 兩電既保證回報率將由13.5% 或 15% 降至 7% – 11%. 如以 13.5% 作基礎, 回報率到 7%, 電費將減差唔多一半.

  
  

  如果你唔明電費點計, 我話你知係點. 假設電力公司有 $100 資產, 而保證回報率為 13.5%, 每一度電原料及生產成本 $1, 根據一些估計方法, 我們預期來年電力需求為 10 度. 咁每一度既價格就係 ($100 * 13.5%)/10 + $1 = $2.35, 即每一度電既利潤加上每度電既成本.

  
  

  如果回報率去到 7%, 咁每度電只係 ($100 * 7%)/10 + $1 = $1.7. 電費係有減到價的. 所以前兩日中大既蘇偉民博士話回報率下降電費未必減, 是將概念混淆了. 點解? 據蘇博士所講, 因為電力公司既資產會隨年月上升 (原因不詳談, 但與回報率下降無關), 如果當回報率減到 7% 既時候而資產又上升左 100%, 每度電既價格將為 ($200 * 7%)/10 + $1 = $2.40. 電費的確無減到, 更加上升添.

  
  

  你諗真d 就知呢個比較方法有問題.

  
  

  如果比起今日, 數年後既電費的確無減到. 但比起如果回報率仍維持係 13.5% (在 $200 資產下, 電費為每度 $3.7), 電費的確低了.

  
  

  究竟用既個比較基礎 – 今日定係如果無調整回報率既聽日?

  
  

  回到正題 (????). 7%-11% 究竟最終係幾多, 梗係政府同電力公司角力既成果. 天真既你唔好以為我地既政府真係會聽你意見. 除非報紙 – 包括太陽東方等左派報, 一面倒反對 (例如廖秀冬既回程預繳), 否則民意除左係新聞報導出下街, 實用度係接近零. 文件都冇提 7%-11% 最終係幾多…

  
  

  由 13.5% 去到 7%-11%, 好似好多. 但你睇上面個條 link 既 pdf, 你會發覺 7%-11% 係用零五年既指標而計出黎. 即係話當年利率處於低既水平, 美國股市回報一般, 所計出黎既回報都有 7%-11%. 美國多加三兩七次息, 11% 既 “上限” 會升至 12%-13%. 於是大家減電費既幻想又危危乎…

  
  

  2. 唐英年

  
  

  成個下亞厘畢道都知佢係二世祖, 一個淨係識飲紅酒既二世祖.

  
  

  當年梁錦松還是財政司的時候, 其中一個長遠目標, 就是要搞掂金管局呢個山寨. 據報章報導, 梁生個腦成日諗住如英國 FSA 及新加玻 MAS 既 SUPER REGULATOR, 希望係香港整個, 然後集所有金融機構既監管力量於一身, 唔似(個陣同而家咁) 香港咁銀行由金管局睇, 保險歸保監, 上市歸証監等. 可惜梁生出師未節身先死, 任總逃過一劫.

  
  

  唐英年作為一個出色既二世祖, 對於金融市場既運作, 當然一D 都唔識. 於是乎任總繼續蝦蝦霸霸, 連二流腳色馬時亨都可以廿文廿武. 証監個班人, 更加係無皇管 (儘管根據政府組織, 証監係馬時亨之下, 馬生又係唐生下面).

  
  

  要改革香港監管機構權力過大, 而又沒有 CHECK AND BALANCE , 形成眾多山寨既局面, 係唐英年仲係財政司 (或以上職位) 既有生之年, 都唔會見得到.

  
  

  唔怪得連壹仔既金牙大狀都係今期忍唔住串唐生.

  • 3:39 am
  • 1 Comment