January 15, 2006
-
<火井邊爐>
仲讀緊大學個陣 (~~身後吹起呼呼北風, 我穿上大褸, 低頭向前走…畢竟那已是 n 年前既事), 某日有人同我講西環既火井邊爐好正. 我話擇日不如撞日, 於是乎動身去. 無訂位, 去到食條毛.
直到前排短暫既冬天來到, 我又記起火井. 拿拿臨打去訂位, 打左半朝 -____- 情形同有 ID CARD 訂容祖兒或陳奕迅既演唱會飛差唔多. 去報到後仲要等 15 分鐘 (算短). 都好, 有時間睇下食乜.
食左牛背脊 (呢度好似無普通牛肉食), 鱔片, 菜, 雙拼丸 (推介墨魚丸), 仲有芋頭. 湯底係 “招牌湯底”, 眼見有蕃茄, 鳳爪, 支竹等, 個人估計即類似清湯底. 野食, 幾好, 比得上謙記 (鵝頸橋附近), 牛背脊必食. 鱔片水準之上.
兩個人 $320, 肯定平過謙記. 算係咁.
坐門口, 所以大概知道有幾多人黎食野 – 唔訂位既話, 老闆有禮貌地叫你唔好等, 因為最快要等到十點半 (個陣只係九點)… 記住, 佢真係誠心誠意叫你唔好等, 唔係好似有骨氣門口 PR 晦氣地並以高八度聲音話 : 醉塊實訂半先有太.
其間仲見到 堪輿學家 楊天命 – 其實相信堪輿學家後果幾堪輿 – 入黎問老闆有冇位. 老闆回答無訂最快要十點半, 條友好錯愕咁走左… 可能食飯只係人生閒事一件, 並唔值得黎之前計下時辰八字睇下有冇位…
聽見老闆都係向人推介 招牌湯底 而非更貴既湯底. 而咁多人排隊 – 有不少更認識老闆, 但老闆都無暗啞底幫熟客打尖. 門口既人, 排隊是值得的.
記住, 呢間係大排檔式邊爐店, 唔好期望有好好既招呼同埋裝修. 無加一.
火井地址 : 西環西營盤屈地街20號金陵大廈地下
http://www.openrice.com/big5/sr2.htm?shopid=11146 (開飯連結)
__________________________________________________________________
