February 1, 2006

• <豬肉送舊豬頭骨>

  大概等於買菜送條蔥. 古時社會風氣較純樸, 壞人較少, 荒謬事情/ 事物出現既次數相對較少. 但隨住社會發達, 世上不知所謂既事情越黎, 越多.

  1. 於是乎, 出現左買歌手既 CD 送你千幾頁既寫真集. 我中學個陣歌手唔係賣歌都仲係奇聞 – 對唔住, 如果你只係得十多歲, 你唔會知道香港係有曾經識唱歌的新人. 陸家俊, 是例外的. 羅敏莊, 都是例外.

  記得劉小慧個隻 <寂寞都有罪>, 好似係第一隻以 “賣 CD 送巨型寫真集” 作招徠既鐳射唱片. 起碼對我黎講係第一隻. 因為, 我係完全為左本寫真集而買左呢隻碟. $88. 鎖你, 劉小慧, 都係例外.

  既然 work, 唱片公司就投放更多資源係呢d 花臣野度, 完全唔再理會 (係既, 應該係理少左) 歌手既唱功同質素. 大家可以一齊數下香港既唱片送過d 乜 : 化粧品, 服裝店代用/現金卷, 公仔, 飾物, t-shirt, 印花稅, 釐印費, 商業登記證, 地鐵回程車票… 諸如此類.

  算. 都係娛樂事業, 大家幫對方一把.

   

  2. 本地漫畫亦唔執輸. 曾幾何時有細路夠膽死拿把漫畫送既刀劍去五金店開封. 天下龍虎門海虎神兵黑豹全部每期送你武器一把, 每把有七隻顏色, 儲到你精盡人亡為止. 我記得李卓人講過要立法管制漫畫送呢d 有危險性既玩具, 俾肥良屌到佢屎眼流血.

  赤劍, 絕世好劍等都出過 1 : 1 , 即實物原大既 “玩具”.

  買漫畫送有關既兵器, 好, 算.

   

  3. 我一直覺得, 老麥搞什么營養餐, 是多舊魚, 無事搵事做. 就如垃圾債券搞什么 “利息保證計劃”.

  另外, 百老匯/鐳射/泰林/中原不斷係咁推廣買電器送公仔, 我成日懷疑究竟有冇智商正常, 身心健全既香港人係為左屎怒比而去百老匯買 nokia6110. 自由含中招, 唔出奇. 皆因佢地善財難捨, 冤枉甘心. 仲有, 佢地蠢 – 你可以話我歧視佢地. 我係呀, 你吹咩 …#!(!&@ (有理由相信作者陷入失控狀態)

  點知今日搭丁丁俾我見到樣仲好笑既野:

   

  合味道個廣告, 話杯面已經加入鈣, 維他命 D1/ E2 (類似…) 等營養.

   

  痴鳩線. 你都唔知我係丁丁忍得幾辛苦.

  杯面加入營養?

  不如可卡因加入維他命 C 拉, 唔o岩 “牛牛” 加薰衣草味, 更易入口.

  你可以想像若干年後, 348 裏面既拆家向你說出以下的說話嗎?

  “先生, 試下隻新 k 仔. 有唐老鴨絕版包裝, 更有抽獎卡, 隨時可以贏來回澳門船票. 全球三百包, 唔試走寶!”

  好心. 搞什么企業道德, 企業責任都要有個譜. 起碼唔好笑撚死人先. 搞 gag 都要知咩料.

   

  同場加映 : 光明面.

   

   

  • 11:03 am
  • 1 Comment