February 24, 2006

• <山水有相逢>

  今個星期最震撼既 NBA 交易並唔係法蘭西斯去左紐約人, 而係彭尼 . 夏達威在此交易中被換至魔術.

  夏達威係新秀開始時既93/94 至 98/99 六個球季, 都係著奧蘭多魔術既波衫. 頭四季既佢, 真係好癲好勁. 佐敦復出個季, 魔術 4-2 係季後賽 KO 公牛 (之後個年又俾公牛 4-0 KO, 公牛仲拿埋個年總冠軍). 可能年青人總喜歡找個偶像, 夏生令史弟好著迷, 連打波既動作, 神態同技巧都學埋佢.

  好死唔死, 夏先生可能見打波容易上位, 去學人玩政治, 仲要求班主炒左當時既教練 白賴仁 . 希爾. 諗住發圍之際, 又發現自己膝頭有內傷, 做過幾次手術, 好返之後先知唔係個回事 – 佢已經再跳唔起. 跳唔起既籃球員, 同無左雙手去打網球有乜分別?

  你唔好理, 係魔術個朵臭晒, 但太陽又肯以高價簽佢 – 年薪有成千萬美元. 但夏先生去到太陽再傷, 好返就淪為三線球員, 後交換至紐約人做大後備. 近排佢又再傷, 但紐約人都由得佢自己搵人醫.

  到最後, 夏先生成為紐約人換取法蘭西斯既籌碼, 輾轉返到老家 奧蘭多魔術. 你可知道今天奧籣多魔術的教練是誰?

  對, 是當年俾佢玩野而無左份工既 白賴仁 . 希爾.

  夏達威死都估唔到, 今日既然會俾一個佢踢走既人 head 返住.

  此乃真正的風水輪流轉. 世事之邪釘, 不可不信.
  ___________________________________________________________________

  <同工唔同酬>

  成日有人話, 同工唔同酬好唔公平. 觀乎官校同津校既新入行教師, 醫管局既新入職醫生, 仲有好多行業, 坐你陪離個個可能早你兩個月入行, 但唔單止人工, 就連相關福利亦相差一大截.

  老實講. 每逢我聽到呢d 申訴, 口裏面仲係個句 : 你講得好o岩. 但我心想既就係 要怪就怪你老頭老母遲扑野, 令你遲早世.

  有強姦, 無局賭. 唔鍾意, 覺得唔公平, 千祈咪撚撈, 立即轉行 – 如果你認為別的工作能給你同樣或更高的人工的話.

  我到今日依然記得中七畢業 (噢, 呼呼北風又黎咧…) 旅行, 個邊既導遊講出旅行玩得開心既要訣 :

  “唔好計較, 唔好比較, 唔好訓覺.”

  這是少數有影響力的短句字. 對於人生, 頭兩點同樣有道理. 我們每一天浪費在猜度, 計算, 比較, 衡量的精神與時間, 實在太多.

  尤記得當年老家有日夜看更各一. 日更那個比夜更的勤力及盡責, 大廈的立案法團在某一年年尾多付了日更五百元 (那大概是八八, 八九年, 今天約值 二千元) 作為獎勵. 後來夜更知道了, 深深不忿的他找日更理論, 大興問罪之師, 為何這樣 “不公平”. 日更鬼知咩…. 夜更最後仲打傷了個日更…

  夜更當然丟掉了工作. 他終日在我老家附近徘徊, 更酗起酒來 (日更也因被打傷而辭了工作), 潦倒終老.

  究竟那五百元是否合理, 我不知道. 但如果當天那個夜更不是在比較和計算, 兩老的下場應該會理想和合理得多. 每天也算著旁邊的同事, 比我是否優勝, 人工是否合理, 這樣的人生, 太沒意思了. 難道你存在的價值, 只是用來與旁邊的人作比較嗎?

  __________________________________________________________________

   

  • 5:45 am
  • 3 Comments