May 4, 2006

• <俾面派對>
  
  
  “拿, 史弟, 當俾面我, 呢件事就咁算數.”
  
  
  一向好討厭 “俾面” 呢樣野. 當然, 我更討厭 “俾錢”.
  
  
  要 “俾面” 人地先肯做既野, 即係你原本唔想做. 係無壓力下, 你係唔會選擇做那時候情. 不過由於人地要求你俾面 – 即唔係再運用你既腦袋, 要令佢好似神州六號咁升空後改由自動操作; 而你既行為, 亦都隨住腦袋停止運作, 好自然咁順應對方既要求, 無論係 “唔好嘈”, “收聲”, “支持我”, “遲d 先收筆數”, “做左份功課佢”, “飲左呢杯酒”, 一於沉淪做你既黃大仙. 
  
  
  有來有往, 有出有入. 若 “俾面” 可當作為信用咭既 透支 , 而 “人情” 就可被視作戶口裏面既 蚊年. 銀行 (不論是匯豐還是你的精子銀行) 可以拒絕你 “透支”, 但 你有人情就大概等同 EPS, 幾時使都得. 今日你俾左面, 口袋裏就會多了一張 “人情”. 他日遇到困難, 要求對方助你, 掏出人情咭, 刷一刷, 就像龍珠裏面的神龍一樣, 多無理的要求也可以實現 – 還記得嗎? 神龍第一個達成的原望是給予小豬一條女性底衭.
  
  
  我知道再寫落去會變成中學會考既中文科課文 “請客”. 所以… 我決定鳴金收兵… 續寫經濟
  
  
  於是乎, 俾面大概可視為一種係對方身上既投資. 由於呢種投資只能夠係該人身上取回 – 你大概不能告訴朋友 B 說你俾過面朋友 A 所以佢要俾返面你 (… 你試下讀一次), 所以你越少機會見到個個人, 就越細機會會俾面佢. 於是乎 :
  
  
  (1) 如果以人口密度黎作標準, 香港應該係世界上最喜歡俾面既地方 – 因為人與人重遇, 合作及接觸的機會多;
  
  (2) 而人的流動性越低 (如農村社會), ‘市場’ 發展越不成熟 (鈔款可代替俾面) 的社會, 越愛講面子講俾面. 於是乎我地認為中國人較愛講面子, 野野要俾面, 不無原因;
  
  (3) 老人家, 有地位既人多要求人俾面 (dis-invest), 後生仔多被要求俾面 (invest). 黑社會中任達會就先後對梁家輝及東莞仔說 : 俾面我, 兩年後我選你做話事人.
  
  (4) 錢可以代替俾面, 但並不代表有錢人不講俾面. 因為對方可能從自己身上得到金錢既回報, 所有錢人可能更加講面. 勢利是也. 但由於自己有錢, 所以佢地唔鍾意俾面人.
  
  (5) 大家唔會同三唔識七, 九唔搭八既人現俾面. 你試過同巴士司機講 : 俾面我, 今次收少我 兩毫子 嗎? 巴士司機採你都有味.
  
  
  
  
  
  
  
  

  • 7:15 am
  • 4 Comments