August 31, 2006

• <男人的墳墓 : 潔淨版>

  據聞, 本網頁已經被教統局列及壹級禁地, 嚴禁大中小學生瀏覽. 歸根究底, 是本網頁粗口出現次數太過頻密. 小朋友 – 即使佢地可能已經廿幾歲 - 睇得多, 會對心智造成不良影響. 又或者口語太多, 對於已經唔識中文字既學生黎講, 唔係咁好.

  為顧及小朋友的口味, 我特意將早前一篇名為 <男人的墳墓> 的文章推出潔淨版, 好讓唔想睇粗口既人, 或者喜愛教科書式中文既人仕, 都可以享受瀏覽此網頁既樂趣.

  為令想做比較及對照 (compare and contrast) 既人, 瀏覽既時候可即時得知潔淨版與未沖涼版既分別, 以下粗體底線字, 就是有作出修改的地方.

  **************************************************************

  好像很久也沒有認真地寫笑話. 認真地寫笑話, 就像抱著道德原則去搶劫一樣. 唉, 我又開始胡言亂語了. 此等惡習, 一定要戒.

  今天和女友去了葵涌廣場行街. 對於很多人來說, 這個係葵芳地鐵站, 新都會廣場旁邊的商場, 好大陸. 講真, 真係好大陸. 我想了大半天也不明白為何女友成日都要去呢度行街買野. 佢行黎行去都係得個一樓個個 潮流廊 及 MRT 消費站 (我無打錯, 唔係 MTR)…  個兩度幾十間時裝店所賣既衫…  唔講尤由可, 一講起, 真係唔知係香港既女性消費者口味太狹窄, 還是設計師 (定係裁縫佬?) 太懶.

  基本所有衫, 不外乎係薄薄薄, 米白青綠卡奇啡色, 中袖, 然後在心口既位置有 d 花紋. 今日我有幸係個度來回三次, 睇左百幾件衫, 件件都差唔多. 三個月前我陪女友黎, 又係咁; 一年前, 又係咁. 雖則話口味既野, 一兩年間既變動相對地細, 但唔使件件季季都差唔多野呀嘛.

  但你最好不要理會那么多. 個個潮流廊 及 MRT 消費站, 一到假日都旺過五六日俾北區少年去深圳北上尋找性服務工作者既文錦渡管制站. 賣既衫, 一件閒閒地二百幾. 相比係三樓賣玩具, 早已經夾帶私逃既老細, 做女人生意的確潛力大好多.

  個度女人多都算, 最慘係俾人係威迫利誘之下等候既男人, 都像禽牲的排泄物那樣多. 男人老狗, 入女性時裝店, 除左睇其他女人, 識欣賞服裝既人, 少之又少. 畢竟男人最想係脫下女仕們的衣服. 所以男人多以複數, 三五成群係門口等. 有時仲會多過時裝店裏面既人.

  就今日所見, 係呢兩個地方時裝店門口見到既男人, 個個都好似喪失親人咁既面口. 雖然臨近清明, 但我肯定同拜山無關. 無論係肥既, 瘦既, 後生仔, 抱住個未滿月既仔, 通通站在時裝門口, 一副等被打靶般既面口.

  呢樣都未算慘.

  好多女人, 我真係唔知佢地乜野心態, 賣衫硬係鍾意做 “假咨詢”. 乜野係 “假咨詢”? 正就是明明自己睇中個件衫, 好想買. 好貴, 但真係好想買. 好靚, 但又好貴. 係好貴好靚好想買好想洗錢好想買d 野返屋企好想行街等一大輪李天命都搞唔掂既邏輯後, 佢地又唔知點解好想問下人意見. 於是係決定拿出匯豐既萬事達咭之前, 她們總會拿著衣服問門口既男仕,

  請問一下, 這件衫好不好看?

  這 “假咨詢”, 比起任何東西更容易引起兩性既衝突. 皆因 “呢件衫好唔好睇”, 這問題比起政府考政務官的難答千萬倍. 所涉及的政治公關技巧, 也極度高明. 答得不好, 可以死得好慘.

  回答 “不好”, 你永遠只會被認為係 “無 taste” (哀哉, 哪你問我幹嗎? 這便是 “假咨詢” 的本質.);

  答 “好”, 實在有違自己良心. 男人無幾可覺得自己女友著既衫好睇. 即使佢地答 “好”, 其實後面係有 “如果著係周汶琪/林嘉欣/梁詠琪 身上”. 再者, 儘管唔係自己俾錢, 但答 “好” 即係某程度上支持佢刷咭;

  怕麻煩, 只想佢盡快付鈔了事, 敷衍答一句 “是但” 或是 “靚到爆”? 待你真正逛完街, 臀部終於可以係十個鐘頭後再貼住椅子, 而你正想把楊州炒飯作為今天的第一口食物, 此時女友會像葉劉般既眼神, 提高八度的聲線問道 : 乜你覺得同我行街好辛苦好麻煩咩? 或是咽哽. 到時你真係寫廿個報告, 設立九千幾個獨立委員會解釋都是徒然.

  尤其是當男人認為件件衫都一樣既時候, 你問佢好唔好睇, 咪即係盡情玩弄佢.

  佢地心裏面其實都有一個問題 :

  你難道還沒有行夠嗎?

  時裝店門口, 每一天也重複地上演 <焚鈔坑男> 這經典的舞台劇.

  **************************************************************

  請注意 : 以下 <未沖涼版> 含有大量粗口及口語化中文. 如果你未滿十八歲, 會考中文未達 U 級以上, 未曾係立法會或區議會投票, 或認為粗口對人的心智有不良影響, 請注意閱讀以下文章, 會可能對你及你身邊人仕產生不良影響. 本網頁及其網主對任何因閱讀以下文章所造成的傷害及影響, 包括但不限於失眠, 心跳加速, 偶發性便秘等毛病, 全部不會負責.
  

  <男人的墳墓 : 未沖涼版>

  • 2:56 am
  • 5 Comments