October 7, 2006

• <無聊日記>
  
  
  十月一日
  國慶. 我屙屎個陣唱左一次國歌, 唱到 “到了最危險的時候”, 蠢蠢欲動; 一到 “前進, 前進, 前進進”, 順利彈出, 升空.
  
  
  國歌真係好使好用.
  
  
  無出去玩, 係屋企睇 now 139. 嘩, 個晚做左三套大片 – 忘不了, 黑社會, 千杯不醉. 139 台平時只係會做 見習黑玫瑰, 魔幻賭船, 阿嫂. <千杯不醉> 爛到爆, 楊千嬅仲係新扎師妹咁既演技, 悶唔悶呀… 官因娜個對 Y 字波就正好多, 退休 J 既偶像戴夢夢都幾正. 套戲打邊爐背景應該係西環既火井, 加返 20 分; 吳彥祖間法國餐廳係屋企附近, 加返 20 分.
  
  
  
  十月二日
  蘋果頭條話黃金週熱情不再. 好事, 我食食下飯連聲叫好. 女友以為我痴左線.
  
  夜晚老表生日請食飯. 係個間酒樓食左起碼三四年, 每次食既翅都衰過當年中學係白田食個d 翅面. 同表弟妹打左四圈, 淨係食左兩舖三翻. 好彩打 $1 一番, 全沖, 最大十番 (出沖 $40), 唔係實輸到仆街.
  
  
  
  十月三日
  公司終於出糧俾我. 每個月我都淨係呢日會興奮一陣. 但只要我對住櫃員機同 pps 十五分鐘, 人工就會成功左手黎右手去, 揮一揮衣袖, 不留半點雲彩. 據統計, 由我發現由公司出左糧到戶口被自己洗劫一空, 大概只係需要三十分鐘. 若果好彩, 可以多留一日半日.
  
  
  
  十月四日
  戶口得番幾千塊. 對於一個做左三年野既人黎講, 戶口得幾錢塊流動資金, 實在有點說不過去.
  
  
  
  十月五日
  收到糧單. 我知, 糧單對報稅既重要性係零, 皆因我賺幾多, 稅局都係亂咁收稅. 其實, 糧單既作用係, 公司想俾你知道, 你今個月已經出左糧, 唔好再黎搵老闆.
  
  
  股市食偉哥, 升到 17900. 又有傻豬出黎話年底見 19000, 我話聽日升到見月球添呀.
  
  
  
  十月六日
  你唔好搵老闆, 唔代表老闆唔搵你. 上個星期做完演示, 大家先同意左點做個計劃, 老闆夠膽死今日就問我做成點. 如果唔使日日開埋d 無投入亦無產出, 純粹係浪費時間既會議, 我做野既效率應該會好 d – 起碼我可以打多幾篇 xanga.
  
  
  我真係想一拳打埋佢度, 跟住拔足狂奔.
  
  
  當然, 我都係得個諗字. 正一諗樣.
  
  
  
  
  (以上日記純屬虛構)
  
  
  
  
  
  
  

  • 1:50 am
  • 5 Comments