November 13, 2006

• <籌旗去唱 k>

  攝於某大卡拉 ok 內…

  

  
  “獨自去偷歡, 我謝絕你監管…”

  主人真係好, 帶埋我去唱 k….

  *****************************************************************

  歡迎提議想阿大做乜野動作, 及去邊個地方.

  個人暫時有以下計劃 :

  1. 零七年一月一日前帶佢去酒吧食煙

  2. 同佢去深水步公廁昅佬

  **************************************************************************

  近日, 我發覺有人好鍾意係辛格留言, 叫人去某個會戶度留個生日快樂. 留言者會表明希望儲夠 xxxx 咁多個留言, 然後送俾朋友作禮物咁.

  好似當年 icq 熱潮個陣 (即係戶口號碼由八位跳到十位只係用左半年時間個段日子), 有人不斷 forward d msg 出黎, 叫人 “快d 將呢個 msg forward 俾廿個你認識既人, 唔係就永遠得唔到幸福!!!”

  (太陽報式社評) 叮你個叮叮~ 原來我既幸福就係當年俾人透支晒. 唔怪之得我而家咁失落咧…

  我又諗起當年係學校嘗試食腦, 睇下有乜野方法可以搵到真銀, 以增加自己既零用錢. 最後, 不知道是誰想出這樣的一條屎橋 – 我肯定佢並唔係屙屎既時候諗出黎, 皆因屙屎時候諗既橋應該正好多 – 每日向你認識的三十個同學借 $1, 於是乎你每日有 $30. 讀到中五, 自己個級識一百人應該不難 – 再者, 借 $1 咁少, 應該無人追你還. 於是乎真係好似可行咁.

  當年有好事者 (唔知退休 J 有冇份…) 真係試過將呢個計劃付諸實行. 但好似借到 $5, 當年大概夠買兩隻雞翼咁上下, 就發覺每問人借 $1 實在不划算, 淨係口水都唔止. 再者, 個個借 $1, 目標太明顯, 同學都知你籠野, 個名一臭, 人地就好快連 $1 都唔借. 即刻令我諗起 :

  出師未捷身先死, 長使英雄淚滿襟

  後來, 讀大學既時候真係有人將呢招改良, 仲搵到食添. 畢竟, 納稅人每年花幾十萬係大學生身上, 又關又loan 又盛, 大學生個個都珠光寶氣.

  咁呢個人板咁搵食? 佢首先問 A 借 $1000, 話要找咭數. 大佬, 咭數喎, 廿幾厘, 一陣又斬又殺又紅油, 呢d 咁既吸血鬼, 點可以俾錢佢賺? 拿拿臨借咧.

  好咧, 過左一個月, 阿 A 叫人板還錢. 人板就問 B 借 $1500, 或者問 B 同 C 借 $750. 原因, 又係咭數. 你唔以為借左 $1500 番黎, 會還 $1000 俾 A. 佢只係還 $500-$750, 淨返既佢會愛黎玩愛黎唱K.

  周而復此. 一個月先還錢俾人, 好有道理 – 不論係打工還是阿爸俾零用, 都一個月一次 – 於是乎, 唔需要好多朋友 (一個月搵兩個), 基本上呢個計劃, 用政府既口吻, 係可持續發展的. 一年半載, 真係過到活.

  呢個計劃要有持續性, 有兩個要點好重要. 第一, 必須從最唔熟既人開始, 亦需要從小錢碼開始. 第二, 笨七 ABCDEF..之間唔可以有太好既溝通渠道, 唔可以同時間俾所有街外人知道你拖住街數. 係中學呢招好難, 畢竟大家日日要返學日日見住. 但大學唔同 – 我試過一年未撞過一個同系而又日日有返學既同學 – 大家走堂唱 K食 TEA勁過衝 PAPER 係可以無性, 係可以無乜溝通. 幾舊水邊個會介意?

  於是乎, 該人板既最後受害者, 係借左差唔多成皮俾佢. 果真唔熟唔食.

  點解史弟會知? well… 套用阿美利堅諺語 :

  You can cheat some of the people all the time, you can cheat all of the people some of the time, but you cannot cheat all of the people all of the time.

  更重要既係, 史弟就係其中一個早期受害者. 後來同系既人講講下, 發現佢呢個類以 ponzi scheme 既計劃, 除左要追佢還錢既, 好多都同佢絕左交 – 皆因大家都忙於自己個個同類計劃.

  人板點? 呀, 你又吹佢唔脹. 佢當年以破紀錄既 GPA 俾法律學院趕左出系, 之後係文學院浮沉. 皆因個度D 人唔知佢籠野, 人板應該又係個度滾左一筆.

  認識人板, 真係獲益良多. 幸好我只係借左 $500 俾佢, 我就認識呢個人既真面目. 你話幾抵?

  如果你想我認識你既真面目, 不妨問我借五舊. 我會電匯冥通俾你, 等你也知道我真面目… 係一個鬼差….

  ******************************************************************

  又到大掀秘時間.

  人板係邊個? 佢係香港一個老牌 DJ 既仔. 不過呢D 人無乜新聞價值, 點會有娛記想追?

  • 8:32 am
  • 9 Comments