February 26, 2007

• <我會做好呢份工之Paco 治港>

  就算你將三月底既特首選舉搬去近排華人有入無出既南非, 下一屆既特首, 唔使蘇民峰計, 都肯定係曾蔭權.

  等等, 講明先. 如果你係黃栢高既 fans, 或者係鄧麗欣既影迷歌迷裙底迷, 都唔好睇落去. 再先旨聲明, 其實我覺得 stephy 幾正. 起碼佢幾年前幫 HIM 拍落既性感相 (不過係著短裙), 我都有留係電腦度. 而” Paco 治港” 呢四個字, 並唔係我發明, 好似係來自老味既 entry.

  如果你係曾蔭權, 你而家應該諗緊班子 (或者已經諗完). 你第一個會郁邊個?

  肥左三十磅既何志平?

  做左五年都淨係做左可加可減機制, 同埋令到個天灰過失戀既廖秀冬?

  雖無過犯, 面目可憎既林瑞麟?

  A 字膊王永平?

  成日惹事生非既李國章?

  我第一個郁新聞統籌專員, 何安達.

  換邊個? 你睇題目都知, 梗係換人稱 Paco 既金牌經理人老闆 黃栢高.

  此話何解? 要講返今晚我返阿媽度食飯, 睇到唔知係今日既頭條日報定係都市日報, Paco – 叫洋名的感覺, 是多么的親切! 就好似陳志雲係智能飯局叫人家洋名一樣, 就算係陳慧琳都即刻變返鄰家女孩等你性騷擾等你搞到喊 – 係裏面有個地盤. 每日俾佢講下自己既哲學, 同俾佢同嘉賓吹下水咁 (嘉賓梗係佢金牌既馬… 你可以想像佢搵 twins 上去嗎?). 而今日既嘉賓係 stephy.

  我無乜心機睇報紙, 淨係睇左第一段同埋旁邊stephy 既相 (佢著短裙). 大意係話 Paco 要

  (1) 做一首飲歌俾 stephy,
  (2) 三年內俾 stephy 係紅館開演唱會 同埋
  (3) 為 stephy 打造才女形像.

  簡直令人汗額! 老老實實, 要係紅館開演唱會, 除非你係唱好女人既張偉文 (謝 R 更正), 或者年過四十既老人家 (如朱咪咪或菜琴…呵呵呵, 最緊要正字. 但我覺得菜琴好過蔡琴. 如果蔡姐姐係我 subscriber, 千祈唔好嬲), 已經極難 – 連顏福偉也做不到 (佢都係做過嘉賓)! Paco一次過要滿足三個咁難既願望, 但講出來就好像去7仔拎 $28 買包純萬咁簡單!

  我從沒有懷疑 stephy 的唱功 (因為根本沒有. 男兒身的你會懷疑自己有沒有月經嗎?), 而我也知道做飲歌不需要唱功 (“對你愛不完”, “我來自北京” 很難唱嗎?), 但Paco把飲歌和東莞OEM 既玩具一樣, 想做就做… 而根據維基既資料顯示, stephy 十七歲就入 cookies, 大概沒有完成中七吧. 當然她在娛樂圈這么多年, 經歷總有點, 寫出來也有點讀者吧… 但就憑這丁點經歷當才女, 恐怕藍潔瑛在五台山泡了這么久, 也當了才女很多年… 無論如何, 我可以想像林燕妮看到這篇報導後, 肯定擺出不屑的表情, 然後拿報紙拾狗屎.

  stephy 有沒有飲歌, 她當不當成才女, 這完全不是重點. 重點是,

  第一, 飲歌和當才女, 也需要普羅大眾既認同. 這不是每日新聞報導民意調查個d 認同, 而是行為上表示認同 – 唱她的 “飲歌”, 買她的著作, 欣賞她的才華 (歌藝, 技笑能力, 博學等等). 大家可以不喜歡她, 但也不得不承認她是才女 – 就好像很多人不喜歡陶傑, 但他的而且確是個才子, 次於林行止及… 張五常…

  第二, Paco對於自己既出品, 簡直 100% 有信心之餘, 更加顯示佢對民眾既行為及口味, 盡在掌握之中! 試想想, 好文學之人, 大多不好唱k; 反之亦然 (呵呵呵, 原人係異數). 當然好多人唔鍾意唱k, 又唔鍾意文字. 但Paco左一句打造才女形象, 右一句做隻飲歌 (希望佢唔係玩食字, 之後 stephy 有首歌叫 “飲歌”), 兩班人都受佢操控. 即表示左佢起碼掌握到香港起碼八成人既思想!

  我對Paco有沒有懷疑? 半點也沒有. 就以二零零四計, 有去過k 既人起碼唱過三十次 <愛與誠>. 古巨基, 係Paco既人. 而側田於零五年一炮而紅後, 更加是繼阿 rain 後, 為史弟等一眾醜男帶來無限希望的新人類! 想想, 側田未出現之前, 有誰想過外表沒有過人之處的傢伙可以在的士高內受到中英美法日美眉既青睞? 唔好忘記, 側田, 都係Paco既人. 不知所謂既龍咁威, 可以拍到兩集, 成功將鄭中基轉型為新一代笑匠 (呢句我有懷疑). 記住, 鄭中基, 都係Paco既人.

  香港有七百萬人. 佢地每人每日花十五分鐘睇娛樂版 – 花係頭版只有三分鐘, 仲要係純粹為左搵印花.. 一日有96 個十五分鐘, 計一計, Paco其實每日24 小時統治緊 7 萬個人 (7百萬除 96)!!! 是徹徹底底的統治 – 除了希特拉, 就只有毛主席做得到!

  講到呢度, 大家都應該知我想講乜. 特首究竟每日統治緊幾多人? 你可以話係十六萬公務員. 但唔計各懷鬼胎個d, 同埋公務員其實每日工作八個鐘 (實際更少), 最多四五萬人 (以每日 24 小時計). 究竟是誰在統治香港? 邊個先真係做好份工?

  當然, 我係曾蔭權, 梗唔會笨到好似董建華咁係最好時機, 搵人坐自己個位. 再者, 咁辛苦先爭到個位, 做乜要讓俾人? 我又唔係叫阿堯叫阿舜. 統治既人少咁多, 搵錢又少, 又日日俾人問候, 我係Paco, 都唔會做特首.

  但作為人材之都, 香港特區政府係咪就咁由得Paco呢D 人材貢獻唔到社會? 從以上分析可見, Paco對於掌握普羅大眾既口味, 眼光獨特. Don’t argue with success. 點可以好好利用? 點拆局?

  一早講左. 俾一個月代通知, 炒左何安達. 然後搵Paco做兼職新聞統籌專員.

  眾所周知 (你唔知我話你知), 曾蔭權對於十分著重公關, 打民意牌. 當然佢更相信風水. 有意見認為佢對公關, 民意既著緊程度, 已經到達不求內容, 只求包裝既地步. 而點解佢會咁信公關? 有雞先定有蛋先? 但個人認為何安達作扮演既 spindoctor 角色, 功不可抺.

  可惜, 何安達說服到曾蔭權要搞好公關, 甚至乎係只搞公關, 卻不能助曾搞好公關. 唔係經濟增長年年超標, 何解特首民望仍然插水? 咪係公關搞唔好. 是時候讓何安達退下來, 好似皇后碼頭咁完成 “歷史任務” 咧.

  搵 Paco 做新聞統籌專員. 除左可以令曾特權間接統治多七萬幾人, 仲可以更加掌握民意, 順應民意去推行政策. 有乜唔掂, 唔知東方太陽蘋果點睇, 打電話問 Paco. 想知乜野係最能夠引起共鳴, 唔使拆呢拆拆個樣, 問下 Paco 近排 plug 乜野歌就得. 再唔係叫佢係自己地盤寫下個政策有幾好, 大把廿歲以下既少年 (及廿歲以上既反智人仕及 OL) 肯定 buy.

  再者, 身痕處寫新聞稿, 一句 “黃栢高先生曾以龍咁成一電影, 將中年漢鄭中基轉型為新一代笑匠” 勝過勞工處什么中年陪訓計劃一千句.

  再唔係, 萬一出左事, 要搵明星唱國歌補鑊, 或者拍乜野宣傳短片, 鄭中基側田 stephy theresa kary 古巨基 梁漢文 排住隊等你揀, 拍到你怕拍到你唔拍. 橫豎高寶拉死唇, 一切既分界都變得血肉模糊, 也是時候進一步將 港聞及娛樂版 正式合拼了…反正我一早已經當港聞當娛樂版睇 (張栢芝也偶爾出現於港聞版呢…) 既乎合環保, 也有經濟效益, 更具政治實效. 根本沒有誰會反對黃柏高出任新聞統籌專員.

  曾蔭權, 仲去乜野選舉論壇?

  • 10:36 am
  • 14 Comments