March 4, 2007

• <開口夾著脷 @ 人地婚禮>

  見到靚媽講牧師叫人唸保操口號…又諗起幾單笑料.

  話說尋日同自僱 J 與阿陳 (J 的女友) 吃飯, 席間談到二人結婚…但其實又未求婚又未儲錢… 好似講緊移民火星咁… 唔好埋, J 話搵我統籌… 我話好, 但千祈唔好搵我上台講野, 皆因唔知係我潛意識還是黑心, 我係人地婚禮開口夾著脷既機會近乎 100%…

  例子一 : 紅棉道

  新郎哥 : 多謝你黎
  我 (晨早未訓醒) : 祝你年年有今日.
  新郎哥 : (!!!)

  例子二 : 酒樓

  新郎哥 : 招呼唔到
  我 (呢鑊真係痴左線) : 你幾時再請我飲?
  新郎哥 : (!!!!!!!!!!!!, 唔係例子一個個)

  例子三 : 酒樓門外, 通常有櫃台放結婚相

  我 (睇睇下, 望於女友) : 嘩….
  友人 : 乜事?
  我 (細細聲) : 佢地一D 夫妻相都冇.

  所以去到婚宴, 我多數唔出聲…或者試過全程匿埋食煙.

  早幾年, 有一次我老頭個表叔個女嫁人, 請我老頭飲, 條友竟然叫我代佢去! 花木蘭昔日代父從軍, 史弟今天代父去飲! 個新娘…我大概係阿媽個肚個陣見個佢. 仲有, 我老頭係八年抗戰個陣出世, 阿爸阿媽好似係戰爭個陣死左, 我老頭連佢地係邊個都唔知, 一路話自己係孤兒. 點解有表叔?
  我同家姐曾經問過佢, 佢幾句屌你老母就打發左我地.

  題外話, 我d 粗口係阿爸身教. 所以家教係好重要…
  唔係我點會成日係人地婚宴亂o翕野…

  我又唔知發乜神經答應, 於是去左一個….. 平均年齡應該起碼 45 歲既婚宴… 頂佢個肺, 唔好講賓客, 我就連自己係男家定係女家既親友都搞左一輪先知. 入去到好似去左老人院咁….大佬… 行埋去影相, 新娘新郎都錯愕, 完全無印象呢條友係乜野人. 好在我即刻撻朵, 話我係興叔個仔, 佢地兩個都仲要諗左幾秒先有反映 – 個幾秒裏面我已經懷疑我係去錯地方 – 後來佢地好似諗起咁 (可能唔好意思再問), 於是一齊影左幅相…

  跟住唔煲煙有乜好做? 難道仲以為在婚宴會有艷遇嗎?

  • 8:29 pm
  • 3 Comments