February 6, 2008

• <新春奇聞數則>

  好了… 不想再說奇拿了 (這個 gag 幾爛).

  管理員

  當大家見到呢個 entry, 就好快/ 已經體會到, 其實你住既地方, 係好撚多 管理員 同 清潔工人. 事實上,我懷疑, 一部份呢d 所謂管理員 同 清潔工人 只係會係農曆新年, 即初一至初七先至返工. 更恐怖 (也更實際) 的是, 他們也只會在這段時間掛起笑容, 向你說 “早晨, 恭喜發財”, 而不是朝早見你拎住一袋大家樂, 仲問你 “陳生, 食早餐呀?”, 或者 見到你成箱行李仲講 “李小姐, 去旅行呀?” 創意, 創新, 是值錢的.

  當然, 係其他既日子, 管理員為左令人察覺佢既存在 (以 justify 你交 $2.5 一呎管理費), 會故意留難想去你屋企既朋友, 好等佢地去到目的地後狂媽 管理員. 荃灣的愉景新城, 由商場到住戶的屋企, 有三道密碼門, 其中兩道有 管理員 把守. 如果你有朋友住將軍澳, 你更加明白我大概講乜. 在九七年後建成的大型私人屋苑, 多舊魚情況更為嚴重. 又講得太遠… 呢d 管理員, 目的只係故意留難某些人, 對於實際既保安, 作用係零.

  實例一. 前兩日放工後去上環某豪庭. 門口一個 管理員, 入到去大堂仲有一個. 第一次去, 諗住要登記. 但見個日著住西裝, 於是乎氣高趾揚咁行入去. 門口個 管理員 即刻開門, 入到去, 大堂個 管理員 再笑笑口同我講 “放工呀?” 順利到達目的地.

  現實就是這樣. 很少人會著住老西去爆格. 再加上我咁型… 係實例一裏面 管理員 唔問我, 係可以理解, 係非常合情合理. 然而事實上, 亦沒有什么人會扮外賣仔, 拎住盒蕃茄炒蛋飯, 然後潛入人地屋企姦淫一番. 更加唔會有人抬住七呎高, 十幾 kg 既宜家傢俬梳化床, 偷龍轉鳳換走張歐化全皮曲尺梳化.

  偏偏最常被 管理員 所留難的, 就是 外賣仔 同 送貨佬. “18C? 無姓黃嫁喎” “你呢d 貨唔入得電梯, 你抬上去咧” (但目的地係四十五樓).

  我住既地方, 只有三個管理員, 即係早更, 午更, 晚更. 晚更那個, 在很多 entry 已經說過. 他十時許便呼呼大睡 – 幾乎我放工吃完飯回家, 他已經與周公捉了幾次棋; 有次不小心把他弄醒, 他望一望我, 然後 “啜” 我一聲. 跟著轉身再睡… 好些朋友也知道, 晚上到我家要小心關樓下的門… 免得弄醒大業主佢. 但條友真係好撚醒, 起碼認得每一個住客, 仲有佢既大部份朋友. 而他睡覺也不見得大廈治安特別差, 起碼我住了三年多, 鐵閘也差不多沒有鎖過…

  上述還說漏了 貴 大廈既清潔工人. 平時, 佢唯一令你留下印象的, 就是經常以行動證明, 整濕塊地就叫做拖地呢個真理… 簡直同食環署求其搵架 Dennis 車係條街度噴下水就叫洗街一模一樣. 屌, 咁呢個世界仲有病毒? 仲有愛滋? 仲有全球暖化?.

  2. 笑話兩則 (出賣屋企人)

  偷野

  阿媽打黎, 沒精打彩.

  “阿仔, 我俾人偷左野.”

  “下???? 偷左銀包? 電話?”

  “唔係呀, 我係街市俾人偷左包豬肉.”

  好辛苦先忍得住笑. 偷心偷情偷相都聽過… 偷豬肉, 真係可以入健力士.

  “唔係呀嘛? 豬肉都有人偷?”

  “咪係… 我放係環保袋. 返到屋企就唔見左, 去問豬肉舖又話冇. 個包野成四十幾銀…”

  媽同老姊住, 兩個人好少食肉. 加上過年阿媽唔煮飯, 買肉肯定買好少.

  由此推斷, 豬肉的確好撚貴.

  同埋, 貧富懸殊的確好嚴重.

  仲有, 恒指跌得好勁. (好耐無見既後面怒吼 : 呢個使春你講!)

  
  巧遇老姊及其男友

  其男友回家, 我與老姊離去. 剛巧經過附近糖水店, 二人堂食. 我提議問其男友落唔落黎一齊食. 老姊二話不說, 拿起電話.

  “西港城, 食糖水, 而家.”

  “嘩… (下刪一百字廢話) 其實兩個人一齊都要互相尊敬尊重.”

  “下? 我而家好尊重佢呀!”

  “嗯, 從你剛才既電話我睇得出.”

  非常周星馳 (pre-長江七號版) 式對白.

  正如, 我大聲並唔代表我惡.

  我家姐的確好強.

  • 1:11 pm
  • 8 Comments