June 5, 2009

• <狂畫唐老鴨>

  對唔治. 又係講唐老鴨.

  最好的朋友, 自僱 J 快要結婚. 話快, 其實都仲有半年. 但時光飛逝, 我識佢個陣, 大家都只係十二歲, 毛都未出齊 (儘管我到今日都未出齊). 然而話咁快又差唔多十八年; 髮線向上, 肚腩開始擋住望向腳指公既視線…. 哀哉, 哀哉.

  為左滿足我一己私慾, 我提議畫張唐老鴨俾佢. 係佢同未來老婆無反對既情況下 – 其實佢地兩個根本唔知呢件事, 只係我自把自為 – 我就開始左呢個咁艱巨既任務.

  我開始似個D 宗教狂熱份子, 自己鍾意既野, 不斷迫身邊既人一齊鍾意.

  當然, 林嘉欣呢d 野係唔可以分享…

  好咧, 去片.

  呢d 相, 我兩三個月前整好. 懶懶行既我, 一直唔記得同懶得放上黎…

  ————

  (1) 參考對像

  • 一路懷疑迪士尼既公仔 (除左公主), 究竟會唔會結婚. 就好像劉德華一樣, 米奇老鼠同唐老鴨係唔使屙屎既! 米老同米妮既結婚相還容易找; 唐老鴨的就較難了, 而些款式也較少. 在無乜得揀之下 (其實係我懶得搵), 我就選取左下圖所參考對像

  

  • 我第一次畫黛絲… 其實我唔係太鍾意佢… anyway, 唔通畫donald + 白雪公主咩.

  • 另外, 我覺得老鴨對眼太咸濕. 好似一路諗住滾阿黛絲上床咁.
  • 黛絲條裙…太難畫. 我研究左半年都唔知點畫…

  (2) 鉛筆草稿

  • 斷斷續續, 用鉛筆畫左成年.

  • 個樣, 係印既; 但個身就係對住黎畫.
  • 由於我畫功太精湛, 根本畫唔到黛絲條裙. 所以索性求燃其算. 大佬, lacy碎花… 點畫呀? 我中學美術科無合格過嫁… 放過我拉…
  • 另外, 一朵朵既玫瑰, 變左分不清對錯既小花球
  • 唐先生既眼睛, 亦俾我改到好正直. 唔 . 好 . 成 . 日 . 諗 . 住 . 扑 . 野!

  

  (3) 影印草稿

  • 由於草稿只有一張, 上色上錯左就大燃鑊 (當年幫一眾讀者畫的唐老鴨, 我試過上上下色, 發覺上左張原稿度 -____-)
    
    
  • 將原稿影印, 上色大計開始 (距離原稿完成, 又足足兩個月… 計下計下, 我開始畫個陣, 自僱 J 可能連婚都未求…)

  

  (4) 花球

  • 先用紅色油性筆, 綠色螢光筆, 綠色油性筆, 再加粉紅色木顏色上, 填好黛絲的頭飾及花球.

  • 留意, 花球上花的數目, 比起參考點那張, 多出一億倍. 由於相太細, 所以望上去一舊舊…

  

  (5) 唐老鴨先生既西裝

  • 先填用兩支油性筆填好唐老鴨先生的呔

  • 黑色西裝
  • 銀色油性筆西衭 (中間已預留位置填西衭的直間)

  

  (6) 面相

  • 用黑筆填好, 西衭的直間

  • 用幼黑線勾好二人的面相, 填好眼睛
  • 用淺黃, 黃色及淺橙色填好二人的咀及腳先填用兩支油性筆填好唐老鴨先生的呔

  

  (7) 黛絲既裙

  • 難度最高的項目 : 黛絲的婚紗.

  • 怎樣也找不到 “象牙色”, 所以用木顏色 肉色 代替
  • 加上淺綠色的紗
  • 用黑色筆, 勾線
  • 填好名字
  • 終於完成!!! 完成既一刻, 幾乎 射左 喊左出黎 (皆因上色上左大半日…)

  

  (8) 精彩既入球慢鏡重播

  

  That’s MARVELOUS~~~

  (沉醉於個人自瀆中)

  

  ———————

  (9) 花絮
  
  
  花絮 1 : 試色既其中幾張
  
  淨係試條裙, 試色試左五六張.

  黑線粗幼, 又試兩三張.
  

  

  
  花絮 2 : 諗過畫兩人頭像…
  
  都係畫唐老鴨算…

  可以見到佢地個名既字型.

  

  ———————
  
  買筆買到窮. 連鉛筆刨都刨爛一個…
  
  放心. d 錢係人情度扣 (如果你個四舊幾水夠扣…)

  

  —————————
  
  
  對唔治, 繼續講唐老鴨

  話說… 其實我一直想 (再) 去日本 (得咧, 成日想去呀嘛)

  如果唔係仆街豬流感, 我而家已經係日本. 原因?

  唐老鴨先生 6 月 9 日生日, 我一直想去同佢賀一賀佢七十五歲生日.

  可惜, 我仍身在香港…

  未能替唐老鴨先生賀壽, 是一大可惜.

  在這裏送上一幅前陣子替朋友畫的生日咭吧.

  唐老鴨先生, 生日快樂呢!

  

  • 1:46 pm
  • 11 Comments