January 17, 2010
-
<誠意推介 系列 4>
呢個系列, 寫左三期, 然後脫期脫左兩次. 一心取材, 卻想到推介自己. 到最後一刻還是卻步.
自瀆我通常一個人係屋企, 關上房門口 (但對住個芒).
今次推介既, 係一個地方.
旺角(o虛聲媽聲屌聲四起~~~)
我曾經去過不同的地方, 包括銅鑼灣, 尖沙咀, 屯門, 灣仔, 信和, 好景, 東京的涉谷新宿六本木, 悉尼, 台北的西門町, 北京的王府井大街, 新加玻的烏節路, 沒有一個地方比得上旺角的多姿多彩.
用十秒廿秒, 想一種香港有得賣, 但旺角沒有的東西 (除左樓盤).
沒有. 我想了數個月, 想不到
旺角是世上最偉大的地方.
————
1. 旺角地標 :
旺角 Body ShopHotcha 未賣廣告之前, 你未必識永成 (但更大可能係你連 Hotcha 都唔識); 約人又唔會約係信和等. 女人街有成里長, 朋友係波鞋街你搵一日都搵唔到. 唯獨係旺角 Body Shop, 香港有九成約過人係旺角等既, 都會約係 Body Shop.
我估計, 以人口密度計, 呢度贏撚晒世界上所有角落. 就連以前賣中國人豬仔既遠洋船倉, 也比下去. 如果你朋友唔識死, 居然企係面向書報攤個邊等, 咁係你搵到佢之前, 佢多數迫死左. 旺角 Body Shop 迫人程度尤其以周未, 假期前後為甚. 你試下年初一約人係 旺角 Body Shop 等, 然後掉一個核彈 (而家當然以漒水彈較貼市; 但幸災樂禍既野, 少講為妙, 當積陰德), 起碼有過億人中招.
我亦想講, 呢間 Body Shop, 既然係地標, 佢既作用就只係地標 : 長期空空如也. 但以 Body Shop 食水咁深計, 佢唔使好多客, 都可以生存到. 揀皇后碼頭 同 旺角 Body Shop 作保留, 我會毫不猶豫揀 Body shop. 有經歷, 才有回憶. 中環匯豐總行可以拆 (或變作機械人飛走), 銅鑼灣時代廣場大電視可以由有線轉做 now tv, 沙田新城市廣場可以執笠 (反正 apm, 圓方都係一撚樣), 但旺角 Body Shop 不可以改.
這比起還政於民, 平反六四, 結束一黨專政, 更加堅定不移.
————
2. 旺角名勝
- 波鞋街 : 允記 (有人曾告訴我, 波鞋街大部份店舖的老闆, 都是同一個人. 不過一撚樣, 和記又係佢, 佢家賢仔乸玩撚晒…)
- 掃街 : 登打士街珍珠奶茶 (呢d 野竟然可以返生), 肥姐小食店, 魚蛋燒賣, 鼓油街山東街許留山群組, 銀行中心對出既華夫夾餅
- 上樓書店 : 可惜買少見少
- 三仔, 四仔 : 九樓有四仔, 四樓有狗仔既好景商場
- 日文偶像物品 : 信和底層 (那裏的日文碟比日本更快推出; 就像我在網上看狐忍, 快過我在東京看到 Jump 的 hard copy…)
- 電腦用品 / 手提電話 : 旺電, 星際城市, 先達
- 垃圾 垃雜野, 玩具 : 女人街, 兆萬, 潮流特區 (每次去旺角, 我都會去兆萬, 潮流特區)
- 名牌貨 : 曾是旺角最弱的一環. 但自從米蘭站進駐後, 球證已經宣佈旺角無敵.
- 商場 : 朗豪坊, 旺角中心, 家樂商場 (而家改左個名叫家樂坊. 挑! 咪一鳩樣.)
- $500西裝 : 荷利活商場
- 畜牲 / 野味 : 雀仔街, 金魚街
- War Game 用品 : 廣華街 (好景後面). 早陣子蔡瀾在電視節目中, 帶住兩條女, 介紹彈槍, 那店就在廣華街.
- 交通方便 : 旺角幾乎有往香港各地區的小巴/ 巴士. 入夜後, 好多人係會搭的士去旺角, 專搭其他通宵交通工具
如果東京的新宿夠行兩日, 我想, 要仔細行旺角一次, 起碼要五日. 每次我走到旺角, 也覺得這是個不可思議的地方. 至於香港另一個令我覺得不可思議的地方, 叫太平山頂 (夜景).
———————
3. MK 文化
更重要係, 旺角有佢獨特既文化, 叫 MK 文化. 香港根本係一個無文化既地方, 但偏偏有所謂 MK 文化! 無尖沙咀文化 (但有文化中心), 無銅鑼灣文化, 有所謂中環價值 (which basically is a piece of shit), 卻有 MK 文化!
節錄維基條碼中 (連維基都有…) 對 MK 文化的坊間定義如下 :
— 喜愛使用一些地方的簡稱,(如稱「花園街」為「花街」,港鐵旺角站恆生銀行為「旺地恆」,「潮流特區」為「潮特」,「旺角中心」為「旺中」。)
— 在句子中強加上一些不必要的押韻…
— 喜愛穿着全身黑色衣物,仿照香港電影古惑仔的造型
— 男女之間大多會比較誰比比誰多男朋友女朋友之類“特別留意的是,MK 人是不會自稱為「MK 人」的,因為此字含貶意,而且他們亦不認為自己的行徑、衣着有問題。”
———————
4. 一些旺角的有趣數字 :— 有 1,321 間餐廳 (openrice 連結), 比起尖沙咀的二千間 及 銅鑼灣的 千五間少一點. Openrice 史中最多好評的十間餐廳, 有三間係旺角 (肥姐, 萬家燒餅, 澳門翠苑茶餐廳). 而最多劣評的十間, 也有四間在旺角 – 我很奇怪這么多劣評的餐廳居然還可以生存…
— 共有 64 位鳳姐在旺角營業 (141 連結). 上海街, 砵蘭街一向由集團操控, 一樓一較少. 數目比起尖沙咀 (294 位), 荃灣 (77 位) 和 銅鑼灣 (85 位) 少一點, 並不出奇.
— 2008 年, 每四個訪港過夜旅客, 有一個會去女人街 (即25%, 太平山是 33%, 星光大道是26%)
———————
5. 驚喜之旅
自從西洋菜南街 (即銀行中心後面) 大部份時間成為行人專用區, 個度出現左好多藝術表現者 行乞 表演. 某個星期六, 我由家樂行到去旺角中心, 途中遇到不少檔攤.
笑到我仆街呀, 屌你.Here we go…
兆萬開始 : 好了, 阿叔左手拿著的, 分明是小時候在茶樓, 嚷一千次要食, 才能吃一次的啫喱, 插在上面的那些紙傘…
穿紅色褸的阿姐在伴唱. 究竟是阿媽伴唱, 定係阿叔伴舞? 而我已經分不清, 你是友情, 還是錯過的愛情… 莊周夢蝶, 蝶夢莊周乎?
味千拉面對出 : 街頭卡拉ok
戴紅帽的阿叔陪舞, 佢跳得好撚 high. 睇得佢無 take 野. 要 high, 使乜索 k? 俾錢黎旺角唱街頭卡拉 OK 就得.
旺角百老匯 : 少女拉二胡交學費…
順帶一提, 我發過誓 (即食過生菜), 呢世唔會係旺角百老匯睇戲. 除非我想係戲院裏面講電話 (大聲講 : 我睇緊戲呀!!!) 同 食煙.
Bossini 對出 : 無手寫書法 1
後面兩個黑褲人, 係有八百人示威, 派千六人保護鄭汝樺搭地鐵既差人.
Baleno 對出 : 街頭表演者 (魔術, 馬戲)
少數我會睇好耐 (唔等於會俾錢) 既表演
荷利活商場 : 無手寫書法 2
Izzue 對出 : 無手寫書法 3
好一句家和萬事興. 應該買黎俾曾當奴.
(點解咁撚多人無手, 又咁撚多無手既人寫書法?)
唔記乜野對出 : 旺角 最乞人憎既 台柱好戲量
好戲量 : 入錢會唱歌
銀行中心對出 : 阿叔賣唱 x 2
對住警車賣唱, 還真特別
街尾百老匯 : 十點都未擺好檔口… 唔知佢表演俾邊個睇
好咧, 越寫越似生活 . 鳩o翕.
是日經典, 許留山對出 : 容祖兒公主我唔識形容…
差佬都俾佢挑逗到呆撚左…
我去到許留山個站, 已經笑到收唔到聲… 國之將亡… 國之將亡…
———————
6. 鏹水彈事件
好痛恨狂徒. 正一懦夫.
至於旺角狂徒有什么特徵, 可參考 exist2 的文章 – 步行者惡夢 (節錄如下) :
1.兇徒是附近居民,極有可能住在西洋菜南街樓上。
2.沒有精神病,但價值 觀極度扭曲。
3.二十歲到尾,有職業,與較他年長的家人同住。
4.十分聰明、細心,有 敏銳的觀察力。
5.只有旺角的三宗鏹水 案是同一個兇徒所為,而其它的全部是模仿犯案。———————
旺角, 是碩果僅存, 我認為香港值得自豪的地方. 周末沒有什么事, 還是會坐車到旺角走走. 人來人往, 靜靜地站在旁點, 抽著煙, 看看各人的動作表情, 十分有趣.
Comments (14)
有時我放工收夜,會專登坐巴士早幾個站落車,係西洋菜街感受下人潮先行番屋企。(好病態)
係旺角生活左20幾年,我發現自己係絕對適應唔到歐美國家的退休式生活的
那個拉二胡的小妹妹,我跟女友在通往新世紀的那條天橋上遇過一次,那一刻我真的有點感動,因為通常在街頭表演的,都是老伯──而且還要毫無音準音色。這個小妹妹是有受過正統音樂訓練的。
re: 銀行中心對出 : 阿叔賣唱…
你好似忽略左佢o既賣點: 佢都有隻秋田犬八千陪佢賣唱…
差佬要捉佢都要搵埋漁農處先可以掃佢場…
其實旺角都有樓盤賣~ 雅蘭office成日都有大陸樓盤做展銷~ XD
我都見到容祖兒公主…
二胡少女係mk都有做?!
(之前係ifc見過佢開工:p)
@lo_409 -
其實唔算病態… 話晒你都住旺角附近. 我有時都會特登搭車走一轉呀…
@hystericireul -
咁… 你有冇科水…
@dickyliu -
哈哈. Hachi!
@mk -
MK? Ok, you win. 謝咧.
@tangcheukying -
完全呆左. 真係… 容祖兒喎…
@Bazaci -
據聞呢班人會全港四圍走.
鍾意容祖兒「公主」(?!)的男人我都見過,佢之前是在味千個邊的,可能反應唔好宜家搬左位。
雖然佢真係騎呢到爆,不過都有一樣野可取,就係佢真係勇於走出黎接受大家諮詢(質問?)
@hystericireul - 其實有一次係菜街曾經有一次很震撼我的表演,是四個男生夾band,drumset, guitar, bass, keyboard四個齊哂,full gear,vocal唱得好,band也夾得不錯,最震撼的是呢四個男生都係得十一二歲左右……可惜因為佢地full gear駁埋amp,唱左四首歌左右就被警察「勸籲」離開了
@siurekrek -
…佢真係好勁. 近排去親旺角都要拜一拜佢先走
p.s. 我尋日睇唔知 cosmopolitan 定 marie claire 見到你; 有張 free hug 既相呀~~
深井裕記燒鵝係旺角冇分店
@relgitsjg - Marie Claire ar!!! ^^
Hey!
I laughed…
… MANY times
throughout……
GREAT!
thanks for share..