February 13, 2010

• <情人節 : 2010 版>

  
  又黎到年度鉅獻. 一個題目, 寫左五年… 這是有趣的. 畢竟要唔炒冷飯咁寫同一個題目… 還有好幾年是沒有情人, 簡直與太監教皇帝行房沒有任何分別.

  好在我唔使寫多好多年, 皆因人類將係 2012 年玩完 – 我主觀如此認為. 就算地球唔係好似瑪雅曆咁玩完, 2012 年梁振英/ 唐英年上場, 起碼香港都玩撚完. 之不過你覺得而家香港未玩撚完咩? 搵唐老鴨上場, 唔玩撚完既機會仲大. 起碼有我支持呀…

  1. 炒冷飯 (又話唔炒冷飯? 系列 tag)

  2006 年

  2007 年

  2008 年

  2009 年

  ——————–

  今年只寫三件事 : 遇上, 分手, 忘記. 葡萄味相當重的三件事, 好揀唔揀, d 人偏偏要係情人節寫.

  點樣同男女友相處, 我真係唔記得晒. 真係生鏽的鐵不能開…

  [遇上]

  早陣子寫了三個 Harvxxd Businexx Schxxl 既畸士, 留言者清一色男人. 是的, 我知道已經得罪好多人, 特別係女人.
  
  不喜歡寫衰女人, 更討厭還說什么港男港女 : 我喜歡, 也欣賞女人. 獨陽不生, 孤陰不長.

  三個畸士, 本身有一個第二部, 是個相對 : 一些女生, 條件比起三個畸士的差不多. 開首時她們也一樣, 要求多多. 只是一天她們遇到心儀的人, 即使條件與她們要求的, 沒什么符合, 但她們沒有立刻嫌三嫌四, 思前想後. 她們只是憑感覺, 與對方好好交往, 相處. 

  最後她們三人結了婚. 好些已生兒育女. (仍然) 過著美滿的生活.

  做個實驗吧 : 問一問你較熟悉的女生, 她的夢中情人是怎樣的; 到她結婚時, 再看看她的老公, 有多少是似她的夢中情人. 我幾乎肯定, 除了大家是男人, 兩者幾乎無任何共通之處.
  
  是男是女, 這是沒有什么分別. 最近一個男友人結婚了. 記得數年前吃飯, 他認真說過女友的要求 : 身材中等, 有一定知識水平 (但不是書獃子), 靚女, 最好有家底, 還有許多. 我可以告訴你, 十多樣無理條件, 他老婆只得一兩項中. 那要求清單, 我寫在信用咭收據背面.
  
  不是說你不可能遇到夢中情人, 然後拍拖結婚生仔. 這肯定有; 不過那是少數. 少數的話, 代價就高. 這是供求的結果. 不可能反對大家追求夢想, 可是到了某一點, 除非你真的不在乎結果, 否則最好面對現實.
  
  是的是的, 結婚後也要面對現實. 貧賤夫妻百事哀, 白髮時下難久居 (我係識咁多中文). 找到心愛的人, 經濟生活可以想辦法解決; 找不到愛的, 這是無法解決.
  
  是的, 口味會隨著歲月, 環境慢慢地改變. 或許一天你會想通了. 更重要是, 沒有任何公式可以計算戀愛, 皆因 timing 這因素, 永能不可能計算到.
  
  而 timing 是一段情緣最重要的成份. 這也是為什么你女性朋友的夢中情人與現實丈夫, 分野會那么大. 婚宴連綿, 看著許多人結婚, 讓我知道大部份都不是對方的夢中情人. 不是沒有, 而是少數.
  
  你問 : 既然不是夢中情人, 為什么這些人還一起, 還要結婚那么傻?
  
  太著重預設條件, 許多可能會發生的緣份, 會自動消失.

  就像中央為香港定下普選的條件一樣.

  這是我寫那三個畸士時, 心裏想著的.

  事到如今, 再賣口乖也是徒然. 打你一拳, 然後講對唔住呀笨?

  ——————–

  [分手]

  從來沒有聽過二人分手後, 其中一方 “稱讚” 另一方分手分得很好, 是個精明的決定, 手法很高明等等. 沒有. 正如在香港出現真普選之前, 不會有特首做得好.

  分手, 畢竟是將一段關係終結. 分手只有 downside risk, 而沒有  upside risk. 只有令你好仆街的可能; 無論如何苦心經營, 也不會得到稱讚. 你有讚過別人, 分手分得高明嗎?

  兩年前, 我曾與一個女孩交往了一段很短的日子, 大概只有數星期. 還沒有找到能代表她的歌曲, 人失蹤了. 安然無恙, 只是不想我聯絡到她.

  我沒有什么. 只是記仇的我, 覺得無論如何, 分手也應該說一聲.

  哪怕是突如其來的一句 I don’t love you anymore?

  多說一個故事.

  2004 年年底, 張震 – 王家衛最愛起用的那個張震 – 向當時的女友路嘉欣 (台灣藝人), 提出分手. 而表達分手的方式, 是透過寄出一張明信片. 這是有史以來, 最具創意的分手方式之一.
  
  張震事後被大肆評擊. 他解釋說, 當時想起某個台灣樂團的一首歌, 叫 <明信片>, 於是以明信片提出分手.
  
  順帶一提, 那張明信片, 是從日本寄出的; 當年, 張震在那裏拍攝 絕世好片 爛片 <吳清源>. 拍d 咁既片, 果然令人頭昏腦脹…
  
  如果你有看過 陳綺貞 旅行的意義 那個 mtv, 你會發覺, mtv 中男主角最後一臉無奈地在寫明信片, 然後陳綺貞唱出 : 你離開我, 就是旅行的意義.
  
  陳綺貞殿堂級作品 <旅行的意義>, 是 2004 年 3 月的作品. 巧合地, 那個 mtv 拍攝的地方, 也是日本.
  
  很多年後, 張震接受訪問, 說後悔以明信片提出分手.
  
  他繼續說, 早知那樣, (1) 應該將明信片放入信封中 (???) 及 (2) 倒頭來說, 他寧願什么也不做, 不聯絡然後讓感情丟淡 (????)
  
  好 . 撚 . 野 .
  
  分手時可以不理對方; 也別要扮好心, 分手後做什么好朋友. 我不相信分了手還是朋友. 拿自己做過實驗, 不論是愛還是不愛那個人, 分了手, 就不是朋友. 這不是長大與否, 成熟與否的事情; 這是生活的哲學. 不要打探對方的生活, 不要去探究對方有沒有新的伴侶.

  難道對方一直獨身, 你內心會舒服一點? 這也太黑心了.

  ——————–

  [忘記]

  我曾經開過一個愛情信箱, 有人問 : 如何忘掉舊愛.

  那是去年四月的事.

  答案, 我諗左好耐. 在過去一段日子, 不斷反覆研究, 實證; 再研究, 再實證.

  數年, 我終於找到答案了. 開 blog 四周年時, 我曾經承諾會 做好呢份工 完成呢個愛情信箱.

  —

  1. 材料

  正所謂工欲善其事, 必先利其器. 要煮個好餸, 好既材料梗係唔少得. 要煮呢個餸, 需要大量黑材料. 而家先透露一部份, 其他所需材料, 落去會再交代

  一堆硬頸/ 拗頸 : 唔使買, 只需要係你條頸左邊下巴對落, 切最硬個舊肉落黎. 記住要最硬個部份.

  決心 : 一個靚既心係必要. 可向相熟既豬肉佬洽購.

  酒精 : 洗材料, 調味用. 一般啤酒已經足夠; 如果慳返d 時間, 快 d 煮好個菜, 可以用烈酒, 例如威士忌.

  毒男 男性朋友 : 其實無乜用. 哈哈哈哈哈.

  假手 : 唔係豬手, 唔係烏首, 係假手.

  七分時間, 三分努力 : 唔好咁笨去春回堂, 拎 廿皮出黎 話要七分時間, 三分努力. 順帶一提, 去年匯豐 $33 個陣, 我曾經提議朋友拎八達通去買四股匯豐返黎, 我俾返錢佢.

  好猛火既 BT Engine : 據聞在某些特定情況下, 香港寬頻的速度最高. 至於電訊盈科, 用鳩緊你拉, 用撚左好撚柒耐, 算數吧拉…

  2. 煮法

  首先, 要下定決心, 將與舊愛有關的事情, 一把火燒掉. 生日禮物, 公仔, 情信, 電腦親熱照, 唐老鴨, 一鑊過淋火水然後點火, 一野燒晒佢. 唔好掉係後樓梯, 因為你轉頭就會唔捨得, 追住架垃圾車搵返. 電腦檔案, 即使清除 recycle bin. 最好連去過既酒樓, 食店, 國家, 都一野消滅佢.

  唔怪之得咁多人去馬爾代夫旅行, 陸沉左, 乜野記憶都冇!!

  當然, 呢d 你以為咁有價值既野, 用自己隻手掉左去, 好多人都唔捨得. 於是要利用假手於人, 好些決定你做不了, 總希望有人替你做. 很多年前, 友人的媽媽將他以前女友的物品, 不小心地丟了. 正值沙士, 那傢伙像瘋了的在垃圾站找過一個又一個垃圾筒, 最後只能找回一點點. 我想, 若不是友人媽媽的那個 “不小心”, 友人仍戇鳩鳩地 好好地 保存著那些物品.

  2. 開始煮飯之前, 總不免洗洗材料. 最重要係, 消除大腦瘀血, 並為佢消消愁. 正所謂少女情懷是詩. 酒精能夠殺菌之餘, 又能為腦根提供短暫的虛無與舒緩. 有一班獨男碰杯, 更兼收轉移視線之效.

  若能同時使用尼古丁, 憑倚窗邊, 拿著酒杯, 望向遠方, 簡直型至裂開. 但切忌大量長期服用酒精, 若讓大腦浸於酒精過耐, 會出現舉杯消愁愁更愁等不良現象, 令材料陷入萬劫不復之地. 適量服用 (詳情看炒炒炒冷飯之 酒精 FAQ), 能免費提供額外材料 – 時間 – 等你完成菜式. 飲酒又型又盛, 簡直一箭 N 鵰.
  
  然後要切斷 . 聯繫. 不要偷看他/ 她的 facebook, unsubscribe xanga, 聽著陳栢宇, 移除 msn, 封存 gchat, 一口氣將多年來發給你的 sms 刪掉. 將電話號碼從手電中移除. 不要在朋友口打探近況, 什至叫朋友若在街上碰到他與新女伴一起, 也不要告訴你. 不要心存僥倖, 以為對方還會找你. 不會.

  3. 揮之不去的回憶, 剩餘的情感, 多餘的愛意, 固執的性格, 一時之氣, 總之有關你同佢既一切一切, 唔好保留, 一鑊過放落去個煲度.

  
  呢個煲, 叫盡地一煲.

  唔使搞勻, 順其自然

  用乜野煮法 : 唔係煎炒煮炸炆燉焗蒸煲. 亦唔係開門七件事 (留意有別於扑野七件事, 即含吹奶啜磨擰插).

  答案好簡單. 就係個煲落夠水, 然後等d 材料烚下烚下. 因為人生, 大部份都係拾下拾下. 尤其是花時間係舊愛, 即係你以前條女身上 (或其他身體部位), 有一日你會發覺花得好無謂. 但你之前服用左拗頸, 無論朋友點講, 你都係懶有性格. 最可悲的一種人係, 佢知道自己就算點鍾意個女仔都好, 都會好快唔記得呢段情, 佢偏偏為自己呢種假情假意, 而傷心. 呢D 人睇得小王子太多.

  總之大部份人, 大部份時間都係戇鳩鳩, 白白痴痴, 柒頭皮, 碌撚咁, 唔屌唔鬆化, 肆意率性放蕩, 三二如六三三歸九, 一舊雲咁過左 (留意係由拾倒數到去一).

  3. 心得

  第一個烹飪心得, 乃 “切忌強求”. 忘記本身係人類唔能夠單靠意志去完成的事; 相反, 越唔用腦, 個人越善忘. 所以下次阿媽話你懶, 唔用腦, 乜都做唔到, 你可以大聲話佢知, 起碼你精於善忘, 而且達至超凡入聖之水平.

  平常心. 如果你忘不掉, 又想忘掉, 一字記之曰 : 總算有美好既回憶 (突然寒風凜凜…)

  因此第二個心得, 乃 “慢火快火, 任君 抽插 選擇”. 第一次, 時間會耐D (唔好心邪); 慢慢你會熟能生巧 (越講越咸濕). 要有心理準備, 你可能一世都煮唔完呢個餸. 好些人一生只能愛一個人, 就像無腳的雀仔, 一生只能落一次地.

  想想吧. 若然小龍女沒有像 米高 . 舒密迦, 米高 . 佐敦那樣復出, 楊過可能會等到機都唔能夠再起.

  煮既中途, 用先前預備好的 BT Engine, 下載十至百套日本動作片. 此乃第三個心得, “精神轉移大法”. 畢竟就沒有人能夠一邊看 AV, 一邊流淚. 若中途出現反覆, 心臟忍忍作痛, 緊記 打開明步, 藥力即到. 保證藥到病除, 肯定萬試萬靈.

  精神轉移大法, 具體實行的方法有很多. 打開明步 只是其中一個辦法, 而且只適合男生. 女生也可以用, 但我恐妨你見到男優的龐然巨物, 耐力持久, 嚇撚傻左. 坊間仲有好多辦法 : 讀書去 (外語乃首選. 我聽過好多人失戀去讀法文, 然後識左個新男/ 女朋友), 瘋狂工作 (詳見 案例 三), 或是安排在未來一百天完成各式各樣花式項目 (切勿對號入座). 唔理黑貓定係熊貓, 捉到老鼠就係好貓!

  第四個心得, “切忌在朋友中尋找代替品”. 愛是沒有代替品. 男女之間的愛是有特定的對象. 對任何人都能表達男女間愛的那些傢伙, 叫濫交. 只有公義上, 道德上的愛, 才能大公無私. 朋友中總有些人, 一直對你有意思 – 不論有意識還是無意識的. 你硬要在朋友中挑起情愛, 總會有一兩個落搭. 如果你愛前度的程度, 是要找方法去忘記他/ 她, 不要以為能將剩下的愛意分給別人. 你能分的, 只有痛苦. 見過不少人, 分手後糊里糊塗, 搭上相識多年的友人, 最後多年朋友不歡而散 – 你根本不愛他.

  更甚者是故意搭上前度的友人, 以為能夠三氣周瑜. 咪 . 撚 . 傻 . 拉 . 你只會賠了夫人又折兵.

  想氣周瑜, 自己反而成了周瑜, 人生最大的諷刺, 莫過於此.

  4. 製成品

  叮! 開蓋. 如果成功, 你會發覺個煲乜野都冇.

  一縷輕煙緩緩地升上半空, 煙消雲散, 不剩下半點香氣.

  你喝著熱摩卡, 淡淡然微笑的說 :

  那已經是前世的事了

  白馬非馬. 什么都沒有; 忘記了的, 便是你所得到的.

  成功, 你根本不需要開蓋 : 你早已忘記自己在努力忘記. 渾然, 忘我.

  當你多年來反覆以上各步驟. 除了可能會令你三十歲前不舉 (畢竟你看不看日本片, 和失戀一點關係也沒有). 一天, 你會不其然地哼著

  熱播的歌　忽然靜了
  場邊　一聲慘叫
  好友都靠近了　你沒有被忘掉
  觀眾　預了分擔惡兆

  大喝三杯　失控地笑
  孩子　終於哭了
  空氣的震盪裡　你沒說但心照
  某個事情大概　不妙了

  因一個人痛哭　哭崩派對舞曲
  我也曾像這樣　青春大概相似
  總有段情　落入這種　困局

  或有一天　當你大了　城府　開始深了
  年輕的眼淚流光了　便掛念曾經這樣了

  讓你哭泣　哭到倦了
  重整　呼吸心跳
  哭過吵過鬧過　你為愛做足了
  再接下來就要　收拾了

  因一個人痛哭　哭崩派對舞曲
  我也曾像這樣　青春大概相似
  總有段情　落入這種　困局

  或有一天　當你大了　城府　開始深了
  年輕的眼淚流光了　便掛念曾經這樣了

  是　所有熱情會乾掉　一發現已經成熟了

  ——————–

  Eventually we come to know and understand a lot of things, but it’s too late because a whole life has already been determined, and undermined.
  
  Though, being early does not mean that you will or can make any change.
  
  Thank you very much for all the sweet memories throughout the years.
  
  Thank you; Thank you
  

  ——————–

  [鳴謝 A, S 及 F 提供校對服務]

  • 11:15 am
  • 19 Comments