December 21, 2011

• <擺景定贈慶>

  各位親愛的讀者,

  若然你留意這個網站有一段時間, 應知道我好燃鍾意炒冷飯. 每逢聖誕, 我都會搵返 飲酒 FAQ 出黎. 例如上年, 我就貼左一次 (2010 版).

  聖誕將近, 原本我想攞一下景, 再貼多一次.

  點知早兩日飲完酒後, 起身腳趾公腫到似雞蛋.

  無錯, 係 痛風.

  係同 愛滋病與及椰菜花 一樣無法根治 既 痛風.

  係應該 四十歲男人 應該先會有既 痛風.

  係要戒食 海鮮內臟菇類豆類麥類酒類, 某部分菜類魚類, 不能吃太多肉類 既 痛風. 簡單點說, 即係乜都唔食得.

  痛風成因之一係飲酒太多. 難怪的, 過去四五年不斷飲威士忌, 可能已經飲了人家飲幾世既酒…

  不後悔, 也不內咎. 好倪永孝既爸爸話齌 (倪坤) : 出黎行, 遲早要還. 既然要還, 好咧, 我以後要同麥哥倫, 嘉士伯, 山崎 等外國人講再見.

  不過, 唔知點解, 我覺得呢個時候再 post 篇文, 反而有種贈慶既感覺. 就好似當年 尤伯年納 呢個廣告咁 (起碼今年廿八歲先知呢個廣告係乜野黎. 順帶一提, 配音個個係譚炳文).

  ——————

  (藍色字為今年的改動)

  聖誕將至. 呢個普天同慶既日子, 大家少不免係各式各樣既派對三兩數十杯落肚. 可惜偶爾發生飲酒猝死事件, 令人關注飲酒對健康既影響. 當然, 好些人飲酒飲到有痛風, 冰封三尺非一日之寒, 這是非常抵死的.

  史弟借此機會講解一下, 等大家飲酒飲得健康 D, 最起碼留得住小命. 留得青山在, 那怕無柴燒? 沒有國, 哪有家?

  Q. 要防止飲酒猝死, 有什么辦法?

  A. 最徹底既方法係, 唔好飲酒 (看我是多么善解人意!); 起碼要知道自己身體有冇暗病, 例如心肌梗塞, 心臟病等 (順便檢查下有沒有陽萎). 更加要肯定自己對該類酒精無敏感. 有數個朋友對酒精敏感, 飲完會出現氣喘, 身痕 – 大概等同好些小朋友對花生敏感. 好些對啤酒等平價貨敏感, 但對威士忌等貴價貨又沒有. 世事就是這么神奇.

  如果你兩樣都做唔到, 又要飲酒. 咁記住 :

  一, 千祈唔好溝酒飲. 百威可以溝喜力, 但啤酒不可以溝威士忌, 玫瑰露亦不宜混入紅酒. 皆因溝酒飲, 嘔既機會, 接近 100%. 死既機會, 大過 100%; 即係死梗. 聖誕新年, 街頭總有人嘔到好似耶穌釘十字架咁 – 左右各一友人扶住, 然後佢企係度嘔… 嘔落自己個身度. 真係何奇淒美呀~~

  二, 如果之前無飲開酒, 徵狀如飲一杯就訓, 聞一下就醉, 望一下就暈, 咁你千祈唔好飲烈酒 (威士忌及伏特加酒精濃度在 40% 以上, 還有各式 shooters). 記住, 淨係飲啤酒. 紅酒酒精成分不高, 酒量淺者亦頂得住; 但啤酒有氣, 唔飲得既人好快個肚似有啤啤咁, 飲唔落, 醉既機會亦大減.

  三, 女士們千祈唔好飲d 易入口既酒. 皆因, 越易入口, 越易飲得仲多, 醉既機會越高. 數年前有一杯好美麗既雞尾酒, 叫 林保堅尼 – 對, 是與跑車牌子同名的飲品. 佢吸引人既地方, 係貴. 出名貴. 同埋, 個伙計係會係你面前點著杯酒, 舊幾水杯酒點火, 蒸發左一半先叫你飲… 世間就充滿各樣無知的人和事. 無論如何, 即使杯酒會著火, 但其實非常易入口. 我當年就見過不少女生, 飲下又一杯, 飲下又一杯, 飲飲下自己醉左都唔知.

  順帶一提, 飲酒後做任何運動, 不論運動既地點係床上或者床下, 都係非常危險既事. 心跳加速會令酒精及血液運行得更快, 醉得更勁. 所以男生要係平安夜要平平安安咁令人失身, 都係飲少D 好. 當然, 對方要飲多D.

  男生也別因一時之快而逞強 (我講緊呢d 快感係來自飲酒), 明知到頂仲係咁飲. 好多人就係咁飲到入醫院. 據聞每年聖誕, 自行入院的醉酒人士特別多.

  Q. 市面上有許多解酒丸, 解酒藥. 可以先服用再飲嗎?

  A. 大家係去玩, 唔係去賣命. 做乜要咁辛苦, 食解酒藥去飲酒? 飲極唔醉, 一肚水, 其實好辛苦. 除非你係同日本人, 韓國人, 內地人傾生意, 咁呢D 藥就大派用場. 否則, 去派對, 唔好食呢D 藥. 要食, 食定偉哥.

  大時大節, 大家要抱住一個輕鬆既心情去玩. 淺嘗與否, 任君抽插; 飲酒只係幫你放鬆心情. 拎住杯紅酒拜神, 或者一杯威士忌, 三五知己吹水講笑. 又可能平安夜遇上心儀的對象, 人不醉人人自醉, 真係長夜漫漫. 何必只爭朝夕? 養精千日, 用在一刻, 係咪?

  Q. 如何知道自己到頂?

  A. 憑經驗. 這不是說笑, 你未飲醉過, 實在唔會知自己個頂係邊. 這也是為什么許多飲酒後猝死的, 都是酒門新手 – 數年前好像有個新郎定兄弟新婚之晚就咁領野. 若你飲到想嘔, 應該即刻停止, 唔好再飲. 到你身痕, 出現一粒粒紅點, 已經太遲. 若你膚色較白, 飲到變紫 (好似十元紙幣咁既顏色), 更應該即刻飛的入醫院洗胃.

  若果你想知自己到頂未, 不妨飲飲下叫朋友玩 “醉酒佬行直線遊戲”. 顧名思義, 就係叫晒你所有朋友一齊行直線, 或者跑直線. 若果你行唔到, 固之然係飲醉; 之不過你行到都唔使開心, 因為一個清醒既人係唔會參加呢D 遊戲 (除左奧運 100 米賽跑). 所以, 無論你行唔行到, 一參加呢個遊戲就代表你已經有D 醉意, 某程度上已經係飲醉酒.

  Q. 萬一飲醉酒, 點算?
  
  A. 其實無 “萬一” 呢回事, 因為飲醉酒同交稅一樣, 係人生裏面係無可避免. 再者, 問點算既並唔係飲醉個個, 而係冇飲醉或者未飲醉既人. 皆因飲醉酒既人, 同你女朋友一樣, 都係大撚晒. 要執手尾既從來都係無乜點醉既人. 所以大學時與友人去飲酒, 大家都飲到鬥快醉咁款…

  飲 醉酒最辛苦並唔係飲醉個陣 – 就如係床上做某些事時, 個陣其實好撚 high – 而係第二日. 過度吸入酒精會令身體出現缺水既情況, 繼而出現頭痛, 肚痛 (飲醉酒第二朝大便的機會率是戶愚呂弟 150% 中的 150%), 戇鳩鳩等徵狀, 人稱 hangover. 若果你仲有一丁點意志力, 麻煩飲一支 1.25 公支既水或保礦力先好訓覺. 擔保第二日戇鳩鳩既情況能減至最低.

  Q. (For 女生 only) 萬一飲醉, 點算?

  A. 要睇下同行有冇咸濕既男性友人. 有, 你都放心可以返到屋企 (係咪自己屋企我唔敢講). 千祈千祈唔好合埋眼, 皆因好多女生飲醉酒就呼呼大睡, 其實好危險. 同埋唔好一個人去飲酒, 最好有 d 比較熟既女生一起去.

  Q. (For 男生 only) 萬一對面條女飲極唔醉, 點算?

  A. 傻豬, 如果條女係想醉, 哪會飲極都唔醉? 飲一杯啤酒就 (詐) 醉拉. 如果你發覺飲左兩支威士忌, 條女都仲好似天安門個解放軍咁迄立不倒; 若剛好你那小鋼炮也迄立不倒, 我建議你去廁所自己發洩一下好了. 兩支威士忌最平都要五六百元, 何苦還要虐待自己個肝 (同埋荷包)? 回家打手槍好了. 一次不行, 打兩次.

  Q. 怎樣訓練酒量?

  A. Practice makes perfect. 買定半打青島, 或一兩枝威士忌, 放係雪櫃. 得閒拎出黎飲一兩鑵/ 杯, 飲得一年半載, 包你千杯不醉.
  
  不過咁, 當你訓練到七七八八, 千杯不醉, 但偏偏不醉無歸之時, 亦是你隨便取得 痛風 呢個特殊技能既時候. 所以酒量這回事, 本質上和女朋友差不多 – 無既時候好想有, 有既時候發覺無乜用.

  Q. 如何解決全球暖化危機?

  A. 這好像超出了會考範圍….

  無論如何, 熄燈熄電視熄冷氣, 像那些環保人士倡議般 – 記住佢地只係倡議, 並非身體力行 – 吸風飲露, 不食人間煙火, 行路上廣州, 無論如何都唔開冷氣 (但要買部冷氣; 唔使點顯得你節儉?), 對解決全球暖化, 應該有丁點兒的幫助.

  • 2:14 am
  • 1 Comment