December 18, 2005

• <絕種動物>

  唔知係因為我本身就唔太鍾意小朋友既關係, 還是我真係唔屬於呢個年代, 我發覺香港好多父母真係當自己既仔女係豆腐. 又或者以為佢地係同熊貓一樣, 需要100% 保護之餘, 仲要在別人前表演一番 – 我有涉臨絕類動物.

  例子一 : 朝早十一點打波, 三個場只得三數丁友在射球. 不久我發覺有一對母子既物體係場外來來回回幾云, 並指指點點. 我嚇得以為差佬在做野.

  最後二人來到我個場, 又對我指指點點了十數分鐘. 跟住個仔放底個袋, 拿出籃球一個, 並和我射同一個籃. 原來, 我個樣係三個場之中最純既一個. 我興奮得想告訴他老母, 黑社會係唔會朝早十一點起到身打波.

  值得一提的是, 個仔一路射波, 個老母就站在旁看著. 她肯定睇得九十年代經典廣告 “靚仔, 你邊度嫁?” 睇得太多. 上晒腦.

  重申, 黑社會, 唔會十一點起到身打波.

  例子二 : 在百貨公司或食肆, 久不久會出現以下情況. 

  一家人在研究食乜.
  老母問 :仔, 你想食 congee 還是 noodle?
  三歲既仔 : 面呀媽咪.
  老母 : congee 還是 noodle?
  三歲既仔 : noodle.
  老母 : 好咧, good boy.

  或

  citysuper, 迫到仆街. 一家人明明在講廣東話. 突然, 老母求其拿起一樣野, 用其港式英語 (唔係港式茶餐廳) 問 :

  “Christophe (唔知點解, 個仔既名一定係水蛇春咁長, 或者你根本未聽過, 更唔知係英文定北極熊文), 屈 is 的士?”

  兒子 : “strawberry”

  老母望一望四周 (記住, 周圍都係人), 眼神露出滿意既神色. 繼而放下士多啤梨. 一家人到別的地方, 繼續其串字人生.

  正. 每次我覺得呢d 人正爆. 呢個月, 我大大話話遇過五六次既情況. 仲有更多, 不過呢兩個最正.

  歡迎提供更多例子.
  __________________________________________________________________

  <AO>

  今日去蓮香飲茶. 同台有數個類似大學生物體. 三人在看報紙, 以下對話出現.

  同學 A : 點解中大唔整返條地下電梯, 通往所有 BUILDING 同 LECTURE THEATRE?

  同學 B : RIGHT, 咪係, 如果有條咁既野, 所有 SHUTTLE BUS 都可以 CANCEL. 我地又可以唔使行, 除笨有精呀.

  同學 C : 嘩, 如果整得成, 呢條電梯, 肯定係整個 WORLD LONGEST 既電梯. 中大有條咁既電梯, 真係一份光榮. 世界第一喎.

  我望一望三人, 又感覺到, 呢三人除左係上述父母下既產物外, 佢地肯定係未來既 AO.
  __________________________________________________________________

  <???>

  講明, 我唔係好鍾意佢.

  政府搵左一大班人黎搵廣告支持政改.

  竟然有黎明份.

  ??? 佢既職業, 係藝人. 戲子佬. 黎生講既說話, 除左樂基兒, 信既只有佢一大班番士.

  竟然有一班行政會議成員.

  不如, 索性搵民建聯拉. 有時又唔怪得本地報紙成日將娛樂版放係頭版, 政府都係一大班人在演戲. 學吳孟達話,

  我先應該拿奧斯卡.

  今晚, 世貿會議終於結束. 據聞, 各國 – 世貿的成員國共有多少人口, 我不知道, 但包括中國美國非洲歐洲, 最少有三十億 – 達成協議, 在 2013 年或之前取消所有農產品補貼或相同措施.

  一些涉及最少三十億人利益政策既時間表, 也可以在短短一百小時的會議迫出來. 這突顯特區政府不斷重複又重複, 一個只得六百八十萬人的小島上未有普選時間表的共識, 是多么假的一個大話.

  都好, 這一切提醒我星期三四五都唔好約人, 準備隨時圍堵立法會.

  • 10:04 am
  • 4 Comments