|
| <停寫啓示>
我講過, 如果有一天我發覺在這裏寫作, 感覺到不快樂, 唔舒服, 我會停寫.
寫作是種樂趣, 是種分享.
在這裏寫作的目的從來很簡單, 也很自私 : 開開心心寫作.
萬一大家睇完有乜得著, 好; 無, 也希望大家開開心心. 我從不惡意攻擊朋友, 也從不以這裏作任何手段去取得什么報酬利益.
在這裏, 交了很多朋友. 一些不論是現實世界還是網上世界的好朋友. 我覺得我是誰根本不重要, 重要的, 是寫的東西大家有沒有共鳴. 沒有共鳴, 你係劉德華都冇用.
這裏叫後花園. 以前會寫多一點, 現在有靈感, 會收集一下資料才寫. 大前提是 : 我能夠隨心作欲, 寫什么便是什么.
對許多人說, 這不是什么珍貴的東西, 事實上我連life premium 都無買. 可是, 我一直對這後花園非常珍惜, 因為這裏真的可以暢作欲言.
但我暗地裏知道, 終有一天我會停寫. 我也有我的底線.
這天似乎比想像中早來臨.
過程也比想像中低能. 一個人, 一個簡單動作, 原來可以輕易將這個後花園徹底摧毀. 沒有做好準備迎接可能出現的失誤, 是我的過失.
有過失, 要付出代價. 我唔會低能到話留底需要更大勇氣. 我唔係董建華.
如果你睇完上面唔開心, 千祈唔好. 如果你喜歡過這裏的文字, 請保持開開心心的態度. 得閒黎拜下山, 感覺好過癮.
我不會說永遠不會回來, 而且根據多次經驗, 我好快就守唔到寡. 暫時我只能好似富慳咁講句, 復刊日未定.
最後想說一點. 好些朋友以為經我面書傳閱, 所以出左事. 絕對不是. 我貼得出來, 歡迎大家轉載.
| | |
| <婚姻這種邪教>
文章超長超長的. 印象中沒有寫過這樣長的文.
參加過許多婚宴. 舊式那種, 早上/下午在婚姻註冊處註冊, 晚上在酒樓/酒店擺酒. 註冊同晚上去飲, 起碼隔左三五七個鐘, 返屋企訓覺又唔係, 去街又唔係, 免得過就唔去.
近年政府放寬註冊方式, 律師可以 "到會", 於是很多人會在晚上飲宴時搞埋註冊. 真係睇得多都識背 - 何況我還是做過第二千九百三十萬六十次兄弟, 年中俾人情多過儲錢既那種人. 律師總會例行公事地講以下幾句話 :
"在兩位結為夫婦之前，本人在職責上要提醒你們：根據《婚姻條例》締結的婚姻是莊嚴而有約束力的，在法律上是一男一女自願終身結合，不容他人介入。因此， (新郎姓名)和(新娘姓名)，你們的婚禮雖然沒有世俗或宗教儀式，但你們在本人和現時在場的人面前當眾表示以對方為配偶，並為此簽名為證後，便成為合法夫妻。"
然後, 新郎哥會對住張咭紙, 講一段廢話; 跟住到新娘.
新娘呢, 通常講唔晒段廢話, 因為去到中途新娘就會開始喊. 好一點的, 停一下, 可以繼續讀下去; 嚴重點的, 真係唔知佢嫁老公定送老公殯.
跟住乳豬影相條魚唔好食敬酒... 大家終於結左婚.
大家以為個段真係廢話, 其實個段說話講晒香港婚姻既重點 :
(1) 有約束力. 唔係玩玩下. 拍拖同一夜情係無約束力既. 所以當男人插入時女人問“你係咪認真嫁”而男人答 “我好認真”, 其實係唔會有人當認真.
(2) 一男一女. 一男一女. 所以我寫過既 同性戀婚姻係無法律效力.
(3) 不容他人介入. 係講緊結婚個一部份; 擺酒個部份通常有好多其他人你不容佢都介入, 例如你老頭老母, 同佢老頭老母, 仲有姨媽姑姐. 試過新娘老頭自動請纓上台獻唱幾曲, 真係想毒啞佢老頭.
(4) 自願. 好多人唔明呢一點. 呢個世界, 迫到你結婚既, 只有你自己.
倒轉來說, 如果你無諗住淨係同呢個人完成你既人生, 你唔好結婚, 亦唔好打算結婚.
有一個師兄曾好言相勸, 說一定要結婚, 反正離婚也很容易, 簽張紙就可以了.結, 就不能預計要離. 不是說不能離婚, 而是, 你不能抱著 "屌你老母, 唔啱咪離婚lor" 既心態去結婚.
反正我不打算結婚, 要批評人, 總很容易. 世上很多人, 特別是男人, 根本不知道為何要結婚, 也不知道要怎樣才應該去結婚.
對他們來說, 婚姻是一種宗教. 一種到達某個年紀便自動自覺要信的宗教. “差唔多係時候”大概就是這樣的意思. 所以他們不需要預備, 不需要講能力, 但求有人肯結婚. 好些朋友, 與舊伴拍拖多年, 臨門一腳散了; 他們再拍拖, 往往在極短時間內就結婚, 因為所謂唔遲得. 再沉迷婚姻教多一點的, 不單自己結了, 若你唔結, 他們會覺得你係一個fucking loser (詳見 你們的幸福). 我就係一個他媽的輸家, 又如何?
結婚唔係擺酒影婚紗相簽證書. 而係同一個人在餘生一齊渡過. 好多人連呢樣咁基本既野都唔記得, 就去結婚. At doomsday their spring pocket will be barbecued.
------------------------
森哥同女友Joyce 拍拖七年. 佢對待Joyce, 似屋企賓妹多過似女友; 事實上, Joyce 亦似佢老母多過似佢女友. 一個呼呼喝喝, 一個服待周到. 一齊食飯, Joyce 會先搵晒有乜餐廳, 問問森哥, 訂好位. 森哥坐底, Joyce 就會自自然然拎紙巾, 再拎消毒紙巾抺碗碟, 睇晒餐牌諗好叫乜, 然後問問森哥. 森哥多數話是但 - 因為Joyce 叫既都係森哥啱食既野 - 然後餸黎, Joyce 會夾埋俾森哥, 差在未餵埋落肚. 單森哥會埋, 但係之前 Joyce會檢查下張單先.
上述既野, 我都會做, 但唔係每次似老馮咁; 更重要係態度問題 : 我唔介意你做或者我做, 反正有d野一定要有人做, 但唔好老馮. 森哥對Joyce, 仲老馮過我對我老母. 大家無論識左幾耐, 拍左幾多年, 都唔可以唔尊重對方.
森哥唔單止唔尊重女友, 對任何女人都唔尊重. 有次友人同森哥係街度見到某女名星拍模特兒照, 友人話條女幾正. 跟住森哥在距離女星一兩米講左句 :
“俾五千水佢, 佢即刻跪低幫我含拉.”
人地做雞係一回事, 你唔尊重女人, 係一回事. 再者五千銀未必會幫你係街含. 森哥同詹培忠一樣, 都係認為世上女人都係雞既男人. 一個唔尊重女人既男人, 對女人好極有限.
好咧, 既然係咁, 點解Joyce仲肯成個賓妹咁呢?
Joyce 只係一個普通女人; 普通女人, 都信婚姻宗教, 普遍都恨嫁. 於是森哥成日同佢去結婚展.
講開結婚展, 當初每年只有一個結婚展 (亂葬岡不能搞那么多, 搞得多會折壽). 而家搞下搞下, 仲密過泛民/民陣搞個D 示威遊行, 三日一小展, 七日一大展. 春秋二祭, 大夏立冬都有. 婚紗可以獨立搞個展, 擺酒又可以, 遲點連預約醫院生仔都可以分拆上市再集資. 真係想窮都難.
不過, 有D 地方係唔可以亂同女人去. 男廁亂入無所謂, Zara 去左最多碌爆咭. 結婚展係其中一個. 跑馬地間Amigo, 係另外一個. 你去得, 就等同俾訊息條女, 你要同對方結婚. 哦, 唔係既話, 即係點? 去完141 搵好地址, 跟住按人鐘仔然後話我係黎讀書考試? 森哥曾經講過, 佢要條女 (唔知講個陣係咪Joyce) 貼貼服服, 得閒帶佢去結婚展就得 - 無 . 見 . 過 . 人 . 可 . 以 . 咁 . 撚 . 賤 (除左我自己).
與其以45度同人講野, 不如以結婚既角度去識女仔. 第一次約會, 約佢去結婚展. 唔撚使搞咁多野, 又送花又盛. 第一次見面, 就傾結婚, 個晚洞埋房. 慳水慳力, 完全適合現代人忙碌既生活. 仲拎乜野facebook, 浪費時間玩whatsapp? 人地連仔都生埋咧.
你會問, 點解森哥咁賤我仲同佢做到朋友. 人係物以類聚. 再者, 只要唔踏到我做人既底線 (即係無底線), 我同好多人都可以做朋友. 佢唔係賤到我, 唔係搵我著數, 做朋友唔使要求咁多. 仆街, 殺手都有小學同學嫁.
講返轉頭. 我知道森哥是會結婚的. 佢唔係純粹想女友貼貼服服所以特登去婚紗展.
上得山多終遇虎. 記得係新正頭, 年初一二三晨早流流 (即係晏就兩三點) 咁上下. 新正頭都有人搞婚紗展, 你話係咪痴撚線. 電話響起.
"唉, 我要結婚咧."
"下, 同邊個?" (邊有人賤得過我?)
"屌你咩, 同Joyce 囉."
"哈, 問真d啫, 無謂搞錯. 咁幾時?"
"下年12月."
"哦....咁咪好囉. 點解會結婚?"
出現...係因為個陣只係2月, 距離下年12月仲有成20個月, 遠過買樓花. 你諗下, 20 個月前有人同你講梁振英會做特首, 你信唔信? 想講不如順便搵埋靈堂, 不過忍住無講出口.
"頭先去結婚展, 一路想擺酒間酒店有期. 咪訂lor."
乜撚野理由黎? 即係無個間酒店唔結婚? 究竟係同間酒店結定點? 我做人情俾邊個好, 間酒店定係你地? 一大堆問題, 我個陣仲未訓醒, 搞唔清楚. 雖然到今日都唔知佢究竟講乜.
唔好話我馬後炮, 我當時同責任總編講過, 森哥同Joyce未必結得成婚; 總編話我黑心. 屌, 我唔結婚, 唔等於要咀咒婚姻; 這是我的gut feeling. 咁不平衡既關係 - 一個賓妹一個皇帝, 點結婚? 做賓妹, 做皇帝唔係問題, 大家你情我願就可以. 但即使對方肯做賓妹, 要關係能夠維持, 必定要對方懂得珍惜 同 欣賞. 對方唔珍惜, 你搵天山雪蓮或者用搵第一行少女時代演唱會飛返黎都冇用. 而森哥完全無半點欣賞同珍惜Joyce.
除左親情, 維持關係需要雙方give and take. 朋友, 情人, 同學, 師徒, 僱傭... 通通如是. 字頭唔能夠獨大. 能持續的關係, 一定要有來有往, 不平衡, 互相尊重. 起樓打樁野, 樁柱要平衡地打通地基, 否則起出黎既樓會側埋一邊, 會倒塌, 會死人既.
------------------------
一年過左, 終於到左今年3月. 該煨...都仲有成七八個月先結婚. 佢地已經預備好晒d野, 並會去影結婚相. 結婚時我會當兄弟. 屌那星, 第二千九百三十萬六十一次當兄弟.
某日收到森哥訊息
“對唔住, 我同Joyce結唔成婚.”
大驚, 又唔係好出奇, 但又覺得好奇怪, 因為隔兩日佢地就要出發去老練影結婚相, 呢個時候先出事.
原來森哥有左第二個.
情形大概是,一次在飯局上, 森哥認識了新的女生. 女生是朋友的朋友, 當天咁啱路過, 又未食飯, 於是朋友就拉左佢一齊食飯. 之後森哥唔覺意拎左facebook 和 電話號碼, 於是whatsapp 起來. 跟住很快便掉入情網, 上床, 拖手, 傾計, 接吻. 上述行為既次序有點奇怪, 但好多人都係跟呢個次序做事.
由於都幾大件事, 森哥, 我同另外一個朋友就即刻出黎去飲野. 當然, 作為痛風病人既我只能夠飲水. 森哥細說新的女友如何地好, 如何如何地合拍. 佢好似第一次拍拖咁. 屌你老母, 開頭拍拖梗係好, 梗sweet 架.
不過, 成件事我都覺無乜問題. 問題只不過係佢就快同Joyce結婚.
最好笑係, 佢同左新個個上床之後, 居然同Joyce 坦白咁講佢有左第二個, 但又唔諗住同Joyce 分手.
奇怪既係, Joyce 再俾機會佢. 幾年前森哥亦試過做同樣既事, 事後同樣坦白, Joyce 俾機會佢, 佢最終揀返Joyce. 森哥話拍拖唔可以有秘密, 我笑撚左出黎. 哦, 如果你申報左, 坦白左就可以繼續出軌. 咁呢個世界無人要坐監拉, 殺左人+登報呢個combo, 真係好用過贖罪券呀.
呢次就快要結婚, Joyce 迫森哥揀. 森哥開頭揀左同Joyce一齊, 誓神劈願話唔再見新個個, 結果只係隔左兩日咁大撚把, 佢就搵返新個個.
你又不得不佩服森哥. 佢又再次坦白, 話俾阿Joyce知.
Joyce 真係好傷心, 結果佢臨去影相前幾日, 趁森哥唔係屋企, 將佢同居既物品全數移走. 我估森哥返到屋企, 得返間空屋.
既然人地做左選擇, 仆你個臭街咪算撚數. 但森哥唔知係忿氣結果係佢俾人拋棄, 定係真係想搵返阿Joyce, 佢第二日去人地屋企, 希望和好如初.
講到中途, 森哥話 :
“我跪埋係佢房門口, 佢都唔肯出黎, 無辦法.”
然後一副無奈既表情.
佢講既時候, 我一路用FBI 讀心術研究佢肢體動作 : 見唔到佢有扯旗, 可惜亦唔覺得佢有半點悔意. 佢覺得跪左, 口講兩句對唔治, 筆數就一筆清. 人地咁都唔肯原諒佢, 係佢既問題. 真係完全理直氣壯. 總之佢既態度就係 : something has happened. 佢嬲左, 我想搵返佢. 然後我跪左, 佢依然唔原諒我, 完. Let’s move on.
之前佢對Joyce 既所謂坦白, 只不過係對Joyce 既唔尊重 : 我對你坦白, 話俾你聽去滾, 你又可以點?
喂, 人地一心諗住同你結婚, 你搵其他女人, 人地肯原諒你一次兩次, 算. 你既然選擇左, 又反悔, 仲想點? 仲要係出發影結婚前兩日.
我心裏面覺得Joyce 可以離開呢個人渣, 其實係一件好事.
Ok, let’s move on. 唔講Joyce, 講佢新條女.
咁佢新個女友叫乜名?
Joycelin.
嘩哈哈哈哈哈哈哈哈!!!!!! 屌你老母呀!!! 你知唔知我忍笑忍得幾辛苦?
不如你下次搵個叫Josephine 拉, 根住搵個叫Jolin, Joeie, Jo. 邊有可能唔叫錯名? 哈哈哈...
“咁你結婚相同酒席點?”
“咪照結lor.”
“下? 同一日, 用返個個酒席?”
“係呀, 同一日.”
同 . 一 . 日 . 結 . 婚?
“你唔係趕到咁呀嘛?”
“再由頭搞過, 又要成年, 太遲拉. 我想快d 生仔, 唔想退休既時候個仔得5歲. 有個同事下年退休, 但今年個仔仲係手抱...我唔想係咁.
不過, 我搵左第二個地方擺.”
即係, 原來森哥唔係想同間酒店結婚, 只係想搵個人結婚生仔. 哦, 陳小姐肯, 我又唔介意, 咪結; 如果陳小姐唔肯, 咁啱李小姐肯, 咪同李小姐結. 成件事變得合情合理.
錢對森哥來說不是問題. 所以佢話去第二度擺.
Joyce and Joycelin, 同一日擺酒, 以為成件事匪夷所思既境界已經去到高峰.
“哦, 咁後日影結婚相點?”
“我咪同Joycelin去影. 橫豎Joyce係屋企執晒D 野走, 但係留底左個folder, 裏面有晒每一樣結婚既野既進度, 包括影結婚相. 真係好撚詳細. 得返咁短時間, 搵唔切其他人影.”
真係屌你老母, 而家諗唔起點解個陣無反枱. 條女叫差唔多名既, 算, 你無得控制; 同一日結婚, 算, 仲可以講話你仲去第二間擺酒; 用返前度個個結婚相package, 真係好撚野. 你地留底個folder 俾你, 你可唔可以appreciate 下為呢段感情做左幾多野, 而唔係搭順風車去用返個package同第二條女影相?
我絕對不是什么站在道德高地的人, 而是好些事情必須有基本的底線. 這種傷害不是一般人能夠承受. 在原本你與他結婚的日子, 他走去與別人結婚; 用原本屬於你們去影的行程, 與別的女生去影結婚相, 這是想像中前度對你最不尊重的事情. 他不但搭上別人, 離開你, 更加要徹徹底底的侮辱你.
到呢刻我再次相信, Joyce 能夠離開佢, 係有點短痛. 但完全是個正確的決定.
之後森哥真係去左個package 去影結婚相. 好 . 撚 . 野 .
當然更好野係我無同佢絕交.
-------
過左兩日, Joyce 係面書status 如下 :
“多年來我一直痴心錯付. 不過, 哭過後會收拾心情. 雖然我失去了很多, 但我得到更多更多, 再次上路. 感謝家人和朋友的支持, 我會努力, 謝謝你們.”
如果你是Joyce, 不幸地看到這篇文, 可以嬲我, 但請不要難過. 雖然有點遲, 但遲好過冇. 有時候, 我們太容易為傷害我們的人痛心. 我們不甘心, 痛恨自己浪費了青春, 蹉跎了歲月. 你終於了解他有幾仆街, 是件好事, 因為你有足夠的理由去離開他, 忘記他. 沒有最後這些日子, 你可能反而對他念念不忘.
(上文的藍字是5月8日加的)
因為Joyce 已經block 左森哥. 我好放心留言 :
“成世人流流長, 總會愛上幾個人渣. 希望你振作.”
這是我的心底話.
無幾耐, 森哥發條whatsapp 黎.
森哥 : Can u help me view Joyce’s FB? she totally blocked me. I can't see her on FB.
我係Joyce, 搵人劈柒你添呀.
史 : Technically, and in reality, you two have already separated. And you are going to marry another girl in a couple of months. The gist is : you dumped Joyce at the first place. So while I have capped screen of her FB, it will be better for you to let go. Just do a nice thing - freeing her. Anyway, the pictures follow.
Photos sent.
森哥 : Thanks. I don't know whether u can feel I am very guilty now. I really hurt her.
史 : Sorry, and as a matter of fact, I don't feel that. I can only feel that you are very delighted for a new gf and using the wedding photo package with her. That’s very nice shot.
森哥 : Maybe I show I am brave in front of u. I can suddenly cry at mtr, at street , at office or even wait my lunch.
史 : It's really mean, but I have to say that it's useless. Not confess now, not confess to me.
Just let things go. And one important reminder I would suggest : never let Joyce know, directly or indirectly, on purpose or inadvertently, that you (1) have used the photo package with another girl and (2) will marry in the same date that you two are supposed to marry. I swear to god that there is 90% that Joyce will hurt herself.
森哥 : I think I will not forgive myself in my rest of life.
收皮拉屌你老母. 如果我十八廿二, 都仲會信你好傷心. 算撚數拉. 仲講.
史 : Save these words for Joyce. But if you really want to pay back to the world, treat your new gf cum fiancée better.
I feel sorry, but as what I have said, this is not really a bad ending for both of you. It is totally pointless in confessing, as there are more important things for you.
森哥 : Can u also cap me those comments written by her fd for her latest post?
哈哈哈哈哈. 今次仆街咧, 咁我cap 唔cap 我話森哥人渣個留言好?
諗左三秒, 決定照cap. 如果森哥要同我絕交, 錯不在我 – 佢事實係一個人渣. 再者, 如果佢咁小器, 少一個咁既朋友都無乜所謂.
Photo sent.
森哥 : U don't need to comment and say I am 人渣.
無諗過佢會出聲. 雖然佢只係o翕左一句, 我一路以黎既不滿真係要爆, 終於忍唔住屌柒佢. 以下係我一路食干炒牛河一路打既...
史 : You are indeed.
I mean, all the years I have seen so many assholes and 人渣, myself included, but so far you ranked the first, in terms of the disrespect for your ex, of the way u messed up the shit, and of the way u portray yourself as guilty.
I don't have to, and don't want to conceal my feeling anymore, simply because you have crossed my bottom line. Were it not for the fact that I know you and Joyce, I would have never believed that someone could have done all of these shits. This is just a fucking shame on human being.
森哥 : Even I know, nothing can change. Please update me her status especially the date she finds a new bf or recover well. Whatever u believe or not, I really feel guilty for her and I really love her.
OK, nothing can change.
史 : Save the words. Joyce and most women are more mature than we think. They can heal soon. So treat your gf better.
森哥 : Sorry. U meet a friend like me.
史 : Sorry, you don't hurt me. No need to say sorry to me.
無幾耐, Joycelin有左...真係好似趕尾班車, 遲左就大撚鑊咁. 嗯, 既然森哥咁對唔治, 又話成世唔安落, 生仔生女叫Joyce 拉. 咁我就信你咧.
好多人話要結婚, 即係求其搵個人結婚, 只要某人有女性既特徵, 有乳房, 有陰道, 加上能生小孩就成. 許多女生所謂既要求都差唔多. 佢要既不過係一個有相關特徵人同佢結婚 (例如有錢/靚仔), 而唔係一個特定既人 (即我非陳小明不嫁).
情形同我睇AV 差唔多. 你話係咪一定要有蒼井空? 有佢係好d, 不過若果無蒼井空, 有立花里子都好. 無立花? 咁麻倉憂都好.
後來與森哥及Joycelin 吃過飯. 或許他們隱藏得很好, 我感受不到他們的感情. 對在三數月內完成相識拍拖上床影相預備結婚, 說出也有點趕. 似乎森哥真係好撚想結婚. 通常, 我不認為時間長短有關係 – 所以不要迷信扑野耐d 條女會有高潮 - 只是, 你要摸熟一個人, 要肯定你下半生可唔可以同佢一齊, 三個月有點短. 作為朋友, 我只能祝願佢地呢次係一擊即中, 然後可以僥倖地白頭到老. 因為, 佢地關係唔好, 最終只會害左肚裏面既啤啤...
-------
婚外情, 女人都會搞. 女人一搞婚外情, 多數無好結果. 因為女人係感情既動物, 一旦投入不容易抽離; 而男人搞婚外情, 多數係婚外性, 抽離既機會較高. 男人鳩痕完, 會返屋企.
大學時候流連酒吧, 搭上搭識阿藍. 阿藍好靚女, 成個長澤正美咁款, 好多人追. 不過大學畢業無耐, 阿藍就結左婚, 嫁個事業心好強, 好忙既男人. 條友大佢五六年.
阿藍有以下理論 :
無論男人靚仔唔靚仔, 無乜所謂, 最緊要佢對我好. 越早結, 越好; 如果唔好, 仲可以有時間搵個第二個.
Good theory. 不過問題係, 老公對佢好差. 未結婚之前, 朋友同阿藍與其未婚夫食飯, 佢未婚夫成程都係度同人sms, 傾公事, 食食下飯話有野做要走先, 單佢會埋, 完全無理會過阿藍既朋友. 幾次食飯都係咁, 就算阿藍同佢講野, 佢都係應D唔應D. 仆你個街錢我冇咩?
好多話佢老公唔會對佢好, 因為佢睇少阿藍, 亦睇少佢朋友. 當住面話佢老公既, 大把. 全部反晒面. 無講既, 只係無當住阿藍面講. 最後阿藍都係嫁左俾佢老公. 阿藍對自己既理論, 有一股不可解釋既信念. 當時好多女人都一心等睇阿藍仆街, 靚女但嫁左仆街, 呢個機遇比百年難得一遇既乜春金融海嘯更令一班八婆大叫過癮.
嚴格黎講, 佢老公唔可以叫做對佢差, 因為佢老公好忙, 忙到根本無時間理佢. 不過, 阿藍畢業後入左跨國公司做MT, 自己仲忙過佢. 兩夫妻無時間見面. 阿藍講過個笑話, 話因為每次返到屋企, 老公都訓左, 而佢又早起身, 佢試過有幾個月只係見到佢老公個頭 (個身俾張被遮住左). 後來先發現佢老公肥左幾個碼, 由百四磅變左百六磅.
佢老公對呢段婚姻置之度外既程度係, 兩人結左婚兩年, 佢老公都話抽唔到時間渡蜜月, 反而自己去歐洲美國公幹, 多的是. 操他娘, 他是馬可孛羅會的鑽石咭會員, 每年要飛十二萬公里先可以入會. 十二萬公里有幾多? 來回東京200 次, 而去紐約/倫敦大概兩萬六公里, 即一年飛五次紐約. 好多人一世都搭唔到五次飛機呀. 以我理解, 佢老公真係去做野, 唔係去鬼混. 倒頭來這究竟是好彩還是不幸?
漸地, 阿藍發覺唔對路, 於是開始嘈, 同佢老公投訴. 起初佢老公唔理佢, 直到阿藍嚷離婚, 佢老公先好返D, 然後離奇地抽到時間補渡蜜月.
唔知有心定無意, 就係個個渡蜜月, 阿藍有左(平日二人少見更少搞野). 一般女強人有左, 起碼悶悶不樂一世; 阿藍反而開心到中六合彩咁. 佢覺得有左個女, 老公唔睇僧面睇佛面, 點都會抽多點時間陪自己. 於是即刻辭職不幹, 坐在家中安胎.
結果佢老公都係無乜返屋企.
阿藍廿五歲生左個仔...佢老公只係睇個仔, 完全無理過佢老母 - 類似拾香紀裏面某個故事. 個仔一路大, 佢老公依舊咁忙, 依舊無時間理佢.
結果...阿藍以為生多一個, 佢老公會將注意力放返係佢度. 我唔知點解佢有咁既念頭. 愛因斯坦對於痴線既定義係 :
Insanity : doing the same thing over and over again and expecting different results.
以呢個定義睇, 阿藍應該係痴撚左線. 你有左佢唔理你, 你生第一個佢唔理你, 你生到一千個, 佢都係唔會理你. 生完兩個, 佢老公留係屋企既時間, 更少... 而家阿藍要見佢老公個頭, 要望下以前d 相先得.
阿藍好後悔. 可惜, 生左兩個離唔到婚. 唔係離唔到, 只係有個兩個兒女, 好難離婚. 你要自己既幸福, 定係想仔女有個完整家庭? 好多有仔女既人, 特別係女人, 一味淨係覺得唔可以離婚, 離婚對仔女傷害好大. D 細路唔係傻嫁, 大大下會知道乜野係關係好, 乜野係唔好. 當年阿媽因為唔能夠自力更新, 離婚後繼續養住我同家姐, 所以佢真係迫住要同老頭一齊. 但我想講, 阿媽係計劃左好多野, 部署左好多年, 到我十五六歲個陣, 先同老頭離婚. 爸媽還沒有離婚的日子, 那些不愉快的經歷, 沒有忘記. 要子女在那種父母不融洽的環境長上, 實在稱不上是什么完整家庭.
既然關係是錯了, 嫁錯人, 你要承認. 然後努力拯救關係. 但當拯救無效, 再繼續落去, 係錯上加錯.
結婚要自願, 維繫一段婚姻, 亦都要. 好明顯, 成段婚姻無人想自願維繫 –佢老公係呢段婚姻根本係路人甲, 最叻既地方係射左兩次精. 至於仔女, 阿藍唔愁錢, 亦唔怕爭唔嬴撫養權. 佢要既話, 應該無問題. 當年佢廿八歲, 仲夠本錢搵個好既男人.
阿藍無離婚.
佢忘記左自己個理論既第二部分 : 如果你老公對你唔好, 早結仲可以有時間搵個第二個. 佢個個理論, 第一部份錯, 第二部份都錯. 錯 . 撚 . 晒.
經舊上司介紹, 佢去左另一間跨國企業做.
某天, 阿藍重遇當年舊同事Felix. Felix 幾靚仔, 仲好識溝女. 結左婚都周圍搭訕. 呢點阿藍知, 天知, 地知, 唔識Felix 既人都知; 佢偏偏要玩火. 由於二人都已經結左婚, 所以大部份時間用sms 或者whatsapp 暗啞底溝通. 唔通電話或者見面, 因為Felix 其實係長駐英國, 上次重遇阿藍, 只係返香港處理一些事.
好一個sms. 當年阿藍老公掛住玩sms, 今日阿藍用sms 勾佬. 唔係話佢老公完全無錯, 不過如果你唔離婚, 請繼續對這婚姻忠誠. I repeat : 無人迫你留低; 但你留低, 要做好一個老婆. 呢點唔關仔女事.
紙包唔住火. 阿藍同Felix 外遊偷情, 俾人發現左.
故事有點不可思議, 因為發現並報串的人, 其實係阿藍個阿爸. 老人家大概唔忍心個女咁辛苦, 大義滅親.
我覺得唔係件壞事...
除左佢老公以阿藍通姦為理由, 嬴左對仔女既撫養權. 個法官都食屎既, 條友咁多年都冇照顧過仔女, 點解判俾佢?
除左阿藍係仔女心目中變左蕩婦 - 佢對仔女係街度見到阿藍都唔會叫佢 - 無左聲譽, 乜柒都無晒.
除左阿藍有幾年無同佢老頭講野.
除左原本應承會與老婆離婚的Felix, 也很快與阿藍斬了纜. 這點反而不是很出奇. 婚外情一轉地上情就唔好玩.
佢老公D 仆街野呢? 呢個世界得返三個人記得, 阿藍, 佢老頭, 我.
講開又講, 我唔係Felix.
-------
寫左九千幾萬字, 我想講, 因為科技的進步, 要建立新關係, 實在太容易了. 以前有icq, sms, msn, facebook, whatsapp. 就算是身處異地, 下載 Tango 大家可以見面. 新鮮感每天都可以有.
我不會說那些感情是假的 - 很多人是經過這些渠道而發展的. 要建立新的關係, 成本太低了. 要寫出動聽的句字, 誘人的說話, 想你的言詞 - 那不過是按數個掣. 這個不行的話, 找下一個. Easy comes, easier to go.
新科技很容易把關係淘汰. 舊時一D錯既野可以捱到好多年 – 例如錯誤既婚姻 – 而家破裂真係容易過問邦民借錢. 我不會認為那是科技的錯, 科技不過是一堆facilitator. 那些視婚姻為宗教, 為信仰, 而沒有考慮過自身能力與條件的人, 科技對他們的影響特別大. 科技一方面造就人們建立新的關係, 另一方面淘汰舊的關係.
來來回回, 究竟大家得到的是多了還是少了, 我不知道.
準備結婚/已經結左婚既你, 如果想要與別人有關係的話 - 要重申, 最好是不要有, 因為你準備結婚/結左婚 - 唔好涉及感情, 有性需要, 俾錢去解決 (最好是連錢也不用付), 做足安全措施; 要是涉及感情, 不要找老公/老婆認識的; 涉及感情, 又認識的, 請先認真思考離婚的可能性.
不想離婚, 要有決心欺騙對方一輩子, 要有技巧, 不留痕跡.
隱瞞也有技巧, 只要你稍有正常智商, 總瞞得了一時. 話說友人瞞著女友搭上同事, 然後一整夜沒有回家 (係呀, 佢地兩個人浪費地對望足一晚). 女友問他去了哪裏, 他說與一個已婚的男友人去唱通宵k.
真係不可思議, 因為年過30既人係無精神唱通宵K 的... 更不可思議的是, 女友與該已婚男友人既老婆非常熟悉, “下, 我老公尋晚係屋企喎”...
大佬你搵人過橋都搵個女友唔識架. 大家廿幾年寒窗苦讀大學, 最終都係為左訓練下D 呃人技巧, 等出黎社會可以搵到飯食. 你咁樣真係晒撚晒納稅人既錢.
一係唔好做, 一係呃一世. 即使被揭發了, 有證有據, 死都唔認. 也不和別人說 - 世上沒有秘密這回事.
千萬也不要懶型去自首. 自首只係對法庭既法官求情時有用 (儘管近年有用既求情理由更加層出不窮); 而你老公老婆唔係法官, 唔會因為你自首而嬲少D. 雖然佢會因為發現你呃佢好耐/收得咁埋/情婦咁醜/情夫好型/成日去滾而嬲多D, 但係絕對, 係絕對唔會因為你自首而覺得 "呀~ 你咁偉大對我自首, 所以我原諒你拉".
婚姻作為一種宗教, 更像邪教. 要信, 就信到底. 不然就像某人, 無耐就寫幾萬字黎唱衰個D 結左婚既人...
(有一個很無聊的花絮在這咧)
| | |
| <生活 . 鳩o翕 我投蔡英文>
陳水扁貪污, 2008年時民進黨將台灣總統一職送回給國民黨.
不過, 仍有五百四十多萬人 (佔總投票人數的41%) 投了票給民進黨的候選人.
在我來說, 那四成人是反智的. 一個黨的總統貪污, 決不可能是他一個人的所為. 對呀, 全宇宙也在貪, 但貪到這樣出面, 還投他們, 是對智慧的一種侮辱.
今年1 月台灣再選總統, 有六百一十萬人 (47%) 投了票給蔡英文.
若然有該黨的總統污貪, 這一生也不會投給這個黨. 重申, 我唔單止介意你貪, 但更介意你貪都唔識貪, 唔識收收埋埋. 即係, 你叫我投票讓曾蔭權個仔做特首? 虎父無犬子, 我只會相信佢個仔比曾蔭權更貪, 同埋貪得更蠢.
---------
2012年4月24日.
台灣, 劍潭車站, 的士候車處.
我與責任主編的目的地, 是故宮博物館.
等了很久, 終於上到的士.
"故宮博物館. 謝謝."
可能因為普通話非常普通的關係, 司機很快便知我們是香港人.
"呀, 你們是香港人嗎."
"是."
"呀, 想問你一下, 香港回歸了十五年, 覺得怎樣?" 坐在我旁邊的司機甫一車就問道. 你可以想像, 求其一個台灣人知道香港回歸了多少年嗎?
司機問我的時候, 半秒間我腦海忽然浮起了許多回憶. 包括零三七一, 梁振英的影像, 董建華唐英年曾蔭權...共產黨.
"一點也不好." 斬釘截鐵的回答. 有一點點好的, 就只有派了六千元.
"噢呀, 為什么你們不反抗呢?"
實在不知道回答什么好. 我想說, 其實我們已經反抗了. 每年春秋二祭大遊行, 還有各式各樣的示威... 這是極限了. 反抗? 快連網上貼張圖都要捉. 我恨不得回歸英國呀, 老兄.
司機見我沒有回答, 開始自言自語咕嚕一輪. 車子快要駛到士林站時, 他罵某人是"...他媽的狗皇帝..." . 台灣人說的國語太快太求其 (直覺上是周杰倫的錯), 加上我聽覺長期有問題, 所以聽不清楚他說什么.
"你知道那個狗皇帝是誰嗎? 馬英九咧."
想從喉嚨吐出句 "馬英九還不錯, 可憐我們的新特首是共產黨員." 此時我望出窗外. 天氣酷熱, 實在不想三十多度找另一部的士. 於是把說話吞回肚內.
司機開始大罵馬英九.
"參選的時候說電價不漲, 油價不漲; 選完後電價大張, 油價大漲, 什么也漲. 操你娘."
這個我知一點點. 多得黎智英在香港選特首閞始時太過偏梁, 我放棄了看香港的蘋果日報, 反而進看台灣蘋果 - 當然是 C1. 但翻頁時偶爾會看到頭版. 今年台灣的電費, 大概是住戶加約 15%, 工業加35%. 你沒有看錯, 是電費加15-35%. 早幾個月中電加10%不夠, 已經夠上頭條幾天了.
"呀, 這個不好. 大家生活很辛苦呀." 吐出兩句支持的說話, 看他還有什么說.
"那狗皇帝居然讓瘦肉精進口..."
這個我也明白他說什么. 來台第一晚, 與責任主編在台灣當教授的夫婦吃飯, 他們說到近來比較熱的新聞, 就是台灣政府準備讓美國含瘦肉精的牛肉入口. 簡單來說, 瘦肉精等同 california 個d 大隻佬飲既蛋白奶粉. 人飲蛋白奶粉會大隻 (同埋屙出黎既屎 "傑tart tart"), 畜牲食左會快高長大. 不過瘦肉精有副作用, 一般要有監管, 而大部份地方已禁止使用 (包括台灣). 主編的朋友說, 台灣放寬某一兩種瘦肉精牛肉入口, 大概可以換來台灣人大概去美國免簽證.
雖然我唔明點解免簽證係一種皇恩浩蕩, 但事情大概如此.
不過, 成件事最搞笑, 也令台灣民眾最氣憤的是, 美國是不容許出售的牛肉含有讓一兩種瘦肉精. 即係美國唔准賣, 就拎去台灣賣.
的士司機繼續狂罵...
"油價加也可以... 可是這個可不成咧. 我靠, 你美國人不吃的, 就拿來給台灣老百姓吃...
這傢伙應該吃牛糞. 食含瘦肉精的牛糞.... 可惜昨天有人拿了一個含牛糞的蛋糕給他, 還沒有送到他, 就給人讓走了. 門外那些保安... 很麻煩."
其實司機的說話粗中帶幼, 由貼身的油價, 到全台灣人民的身體健康.
然後司機越講越烈. 可惜人類史上中, 粗口最具形神的, 是廣東話. 國語來來去去 操 和 靠 - 台灣的屌字, 同屌你老母無關 (其實屌你老母同你老母都無關); 英文也只是 fuck shit ass; 廣東話淨係 屌鳩閪柒撚 己經贏到開巷. 在恐懼之下, 我暗地為廣東粗口叫好.
"你知道嗎. 那傢伙有美國國籍, 兩個女兒也是美國人. 要是他不聽美國人的說話, 一腳伸他出來, 他就完蛋了.
所以我應該把命也拼出去. 應該把一個個的汽油彈掉進總統府去. 可恨那傢伙整天都不知躲到哪裏去. 我應該身繫汽油彈, 然後一命換一命, 來個同歸於盡.
你知道什么是汽油彈嗎? 那汽油倒進啤酒杯, 塞進毛巾, 點著, 然後丟進總統府.
可恨真的埋不到身. 昨天送去的牛糞蛋糕, 送不到給他. 一命換一命好呀, 可能就是埋不到身..."
成段對話, 如果佢並非司機, 原本好好笑.
我個刻好慶幸無講個句 "馬英九幾好". 到左呢個時候, 我已經完全搭唔到咀. 對於自己既鳩o翕能力, 向來十分自豪. 係酒店樓下煲煙, 可以同日本人吹到三五分鐘水 - 儘管日文除左唔好 . 停 . 舒服之外, 我淨係識一句 "我來自香港".
現在, 我覺得只要講錯一句說話, 司機真係會殺死我. 或者將個汽油彈塞落我個咀, 然後引爆, 來個同歸於盡.
我坐連頭, 看不到後排, 不過估計責任主編同佢細路+女友, 應該嚇撚到傻. 因為我真係信佢車度有汽油彈, 隨時準備同歸於盡. 事實上, 細路 同 女友成程無講過野.
司機繼續暴走.
"見到他那兩個女兒, 我應該強姦她們, 然後再把裸照放上網. 可恨又是看不到她們."
這句話有點過了我底線, 我再沒有說話 - 不過, 如果我一早知馬元中 同 馬唯中 個樣係點, 我一定會原諒的士司機, 並會口頭答應參與行動.
好了, 的士已經到達故宮博物館. 十多分鐘的車程, 好像變了個多句鐘. 也記不起當中有沒有說過共產黨, 臨落車, 我想和司機說, 不要信美國佬, 更加不要信共產黨.
當然, 我無講到出口.
以前常聽人說台灣的士司機的政治立場壁壘分明. 這次一遇, 完全相信.
這個世界, 真的會有人肯原來用條命黎發洩自己既不滿 - 起碼用把口.
你敢唔敢話殺死梁振英, 然後自殺?
---------------------------------
推進門, 進入故宮.
我以為自己去了海洋公園.
人人人人人人人人人人.
大陸人大陸人大陸人大陸人大陸人大陸人.
一團團一團團一團團一團團一團團一團團一團團一團團.
---------------------------------
你要知道講國語既係大陸人定台灣人, 最簡單既方法, 係睇下佢地排隊搭電梯.
簡單d 講, 佢地係唔撚排隊.
仲同你講左行右企? 發你老母的春秋大夢.
地下大堂, 嘈過任何一間酒樓.
購票, 入場. 二樓的展品是陶瓷, 所以遊人數量也可以接受.
人少, 不等於唔嘈.一團團既遊客, 你一言, 我一語, 呱拉呱拉的叫著. "你看到沒有r?" "這個很美呀r~" "嘩" "呱" "嘛".
最嘈的是一團團遊客的導遊. 他們拿著米高風, 以秒速十個字既速度講解展品. 一團, 你有心去聽一下講解, 也有意思; 當有五團人係三百呎既地方, 就變成好煩, 好嘈. 更弱智同反智既係, 博物館內有職員拿著 "請輕聲說話" 的紙牌提醒其他遊人. 我屌你老母! 你叫個班導遊唔好嘈先拉! 最嘈個班人係導遊呀! 到故宮前一晚去了錢櫃唱k - 不要問為什么要搭飛機去台灣唱k - 但故宮比起錢櫃還要嘈吵.
這裏必須要講解我對 "嘈" 同 "吵" 既分別. 嘈 係發出煩厭既聲音. 一個人都可以嘈, 一聲歌聽得多, 例如那些年, 都會變嘈. 吵 係 有兩個或以上的人發出乞人憎既對話/聲音, 然後混雜出黎既聲響. 大陸人既奧妙之處, 係一個人同時造成 "嘈" 同 "吵" 既現象. 當有三百個內地人一齊嘈吵, 簡直令普通人如我身處於地獄的核心中.
我唔係史學家/藝術家, 亦唔識真正咁欣賞展品. 去博物館只係一種人文心靈上的訓練, 簡單d 講即係hea 下. 我並唔係要追求乜野有形既目標而黎. 當一團團遊人係你身邊走來走去, 你只係想用三分鐘既時間靜靜地欣賞展品, 忽然變得好奢侈. 根本不會有心情再行下去.
真正的戲肉在三樓.
無錯. 三樓正是故宮壓軸展品 豬肉 同 白菜 既展館所在地. 唔明豬肉 同 白菜 係乜, 麻煩自己 google; 無知唔係罪, 但有google 唔用, 係大罪. Spring pocket will be barbecued.
去到三樓... 個度似年宵市場維園入口個條龍. 或者係20年六四紀念晚會 (即曾蔭權話代表香港人忘記六四那一年), 個條人龍咁. 由頭到尾, 一直排到二樓. 全部都係遊行團遊客. 人人人人人人人人人人人人人人人...
選星期一去故宮, 原本希望少人一點. 我錯撚晒. 往好一點想, 星期六日的情況將更加具災難性.
當然, 排隊的時候, 大陸遊客還是一直在嘈, 導遊也一直在嘈. 當然, 即是係一團團跟住行, 大陸佬仍然會打尖. 即使打尖無用, 都係會打尖.
去到博物館, 不可能不提他們無理的肢體推撞. 不論什么時候, 站在你身後的大陸人一定會推你, 排隊, 看展品, 去廁所, 吃飯... 總之一定會在背後推你. 佢地推你係本能反應, 同唔排隊一樣. 這點他們倒是很一致.
在排隊看豬肉時, 後面有團內地遊客, 也有一團日本人. 據主編說, 內地人與那團日本人吵, 大家在雞同鴨講互罵. 大概是附近已經太嘈, 我聽不到, 也看不到. 但我從來沒有見到日本人主動與人嘈. 大部份日本人是 "OK, 你煩鳩我, 我怕撚左你 - 我行開" 那種人, 很少同人嘈. 內地人就有意想不到的能耐.
排了良久, 總於看到豬肉... 個塊玻璃. 不知痴心妄想可以看到豬肉的本尊. 一團團的遊客會將展品徹底包圍.
我更想說的是, 每一團在展品逗留的時間, 只有十秒. 然後該團的遊人又會跟著導遊, 一窩蜂衝向下個展品, 這刻他們真的是一群又一群的蝗虫.
因為館內不准拍照, 所以無法將呢d精彩既時刻帶俾大家.
人多, 不等於你要喧囂.
排候時間長, 不等於你要推來推去.
重點展品固然吸引, 奈何你只看十秒.
2003年第一次去台灣, 人文氣息怎重, 那個時候誠品才冒出名來. 故宮還沒有翻新. 人的確少, 來的都是有意慢慢欣賞展品的人, 總的來說, 建築物有點殘舊, 但氣氛良好. 前年再來, 已漸見人多, 但還可以.
這次再來, 博物館活像是海洋公園, 遊樂園地. 我來來去去都係日本, 所以好少去少博物館. 不計香港的, 只去過東京國立博物館 (上野), 悉尼art gallery of New South Wales. 但從來沒有見過, 也沒有聽過博物館是這樣的, 集嘈吵亂於一身. 問歐遊過的主編, 羅浮宮是否這樣, 她冷笑一聲, 然後說 : 當然不是.
故宮博物館不是要賺錢的東西, 是一個顯示文化累積的地方. 將博物館搞成一個像遊樂場的地方, 不單辜負千年以來先人的心血結晶, 也愧對當年小心奕奕地把收藏品由北京運到台灣的烈祖烈宗. 多年來積成的文化, 付之一炬. 你有什么展品, 豬肉白菜, 陶瓷字畫, 全不管用. 你搞什么重建計劃, 不過為了掩飾江河日下的文化水平.
多得大陸人, 我以後去台灣也不會去故宮博物館.
----------------------
對呀, 美國佬當然霸道. 他們的霸道, 明刀明槍.
更令我不認同, 也感到恐懼的是, 內地的軟性入侵. 看看香港過去數年發生的, 自由含種票買樓到今天放共產黨成為特首, 都不需要再多解釋.
我誠心希望台灣不要與內地搞什么經濟融合. 可恨一搞什么 EFCA 自由行, 內地遊客一來到, 台灣立刻玩完. 美國經濟是不濟, 但一個只有二千多萬人民的州, 他還頂得住.
馬英九是個書生, 應熟讀歷史, 知道經濟好, 只要不出什么亂子, 執政黨可保勝算. 80% 的時間, 對於大部份人來說經濟問題較其他問題 - 包括統一台獨, 親美 - 的問題重要. 像馬英九這種兩頭蛇, 魚與熊掌兼得的想法. 倒頭來只會顧得頭時腳來翻, 兩邊不是人.
回來後找來新聞看看, 內地又再放寬到台自由行. 望著左邊相片的內地遊客, 心裏慨嘆一聲 :
今天香港, 他日台灣.
很美國人靠不住, 共產黨更加不可信. 看到台灣故宮的墮落, 我終於明白為什么還有人投給蔡英文. 我寧願早點轟烈的來個台獨, 搞一支公投, 大家決定所謂一國兩制在台灣是否可能, 然後十年不是統一台獨議題. 不過, 麻煩大家先看看兩個例子, 一個叫澳門, 一個叫香港.
You either die a hero, or you live long enough to see yourself become villain.
我相信, 到最後我也會投給蔡英文. 畢竟大家也愛英文, 對不對?
| | |
| <天下同聲一哭>
為慶祝 共產黨黨員 梁振英先生 當選特首, 我決定停寫一個月.
那些 "香港未來定會更好的" 論調, 2003年開始聽過N次. 若果新特首為香港帶來變天, 從個人來說也不能再用以前的一套走下去.
Albert Einstein : Insanity is doing the same thing over and over again and expecting different results.
留下是一個過程, 離開是個目標.
| | |
| <向小圈子選舉說不>
Martin Niemöller :
我不說話 因為我不是共產主義者
接著他們追殺社會民主主義者
我不說話 因為我不是社會民主主義者
後來他們追殺工會成員
我不說話 因為我不是工會成員
之後他們追殺猶太人
我還是不說話 因為我不是猶太人
最後他們要追殺我
但再也沒有人站起來為我說話了
------------------
經過許多花生戲, 終於來到最後的一星期了. 大概, 過了這一兩星期, 大家不需要再聽到三個精神病病人係公眾場合胡言亂語.
首先是何俊仁. 口口聲聲要推動民主, 一人一票, 取消功能組別, 打倒小圈子選舉. 這真有趣, 彷彿在2010年6月25日立法會通過的那個政改方案, 他與其民主黨黨友是沒有投贊成票的份兒. 2005年那個法案, 比2010年那個更民主, 偏偏民主黨卻投了反對票. 民主黨不代表民主, 正如菠蘿包沒有菠蘿, 西多士也沒有屎. 名不副實的東西, 多的是.
永遠記得那是是6月25日, 除了記仇, 更重要是那天是責任總編的生日. 每想到這點, 就不想和責任總編在生日正日慶祝, 當然也更憎民主黨. 實在沒有什么值得好慶祝 - 除非你要慶祝被人出賣. 共產黨是這個小圈子的原兇, 民主黨是第一幫兇.
大家終於知道為什么我永遠不會原諒民主黨.
何俊仁說參選是要凸顯小圈子選舉的不義, 成件事無奚到極點. 有朋友在面書上說, 你要凸顯毒品的禍害, 是不用親身吸毒的. 實在沒有更好的比喻. 小圈子選舉的不公義, 在這次選舉表露無遺, 可惜這與何俊仁一點關係也沒有.
順帶一提, 五年後香港大概有0.0001% 可以以低門檻的提名方式, 一人一票選特首, 究竟到時泛民可以推邊個出黎選? 民主黨創黨既老餅死既死, 退既退, 淨返一班廖化 - 連唯一既希望鄭家富都俾佢迫走埋 : 鄭家富靚仔 (望下 涂謹申 同 甘乃威), 有台形 (何俊仁要擔梯先夠梁振英高), 後生 (五年後57歲, 李柱銘到時已經接近80), 家庭生活似正常... 最有義氣個鑊就係佢脫離民主黨個役; 人民/社民連不受一般中產師奶歡迎, 公民黨自司法覆核數案後完全龜縮... 唔通真係要唔好做雞, 唔好叫雞既馮檢基出黎選咩. 十多廿年後, 民建聯有李慧玲 + 陳克勤, 泛民呢? 似樣既得陳淑莊一個.
唐英年. 智障, 也有語障. 研究過佢講野既片段, 佢從來無試過正正經經, 流流暢暢咁讀出一句超過十個字既完整句子, 因為超過十個字既句字, 佢都一定會唔覺意咁斬開幾句黎講. 即係話上面兩句, 佢會讀到好似魔法擂台個Albert Tam 咁, 因為 / 超過 / 十個字 / 既字句, 佢 / 都會一定 / 唔覺意咁 / 斬開 / 幾句黎講.
"I think that's completely rubbish", 得八個音, 可以好流暢. "梁振英, 你o厄人", 三個音. 全部都係咁, 一次例外都冇. 又講多句, 佢既選舉經理人, 李國寶都係一樣, 不論講英文同中文, 都係一舊舊. 所以當唐英年呢幾日係辯論度串人, 大家幾乎懷疑個個係第二個人假扮.
搞女人, 又懷疑有私生子, 再僭建, 然後推個老婆出黎受死, 仲要推一次兩次三次 - 佢老婆勁過耶穌, 唔使等三日就復活 - 可以繼續參選, 呢個先係小圈子選舉最不義既地方 (呢點同何俊仁先生毫無關係, 除非何俊仁係唐英年個私生子). 搵個民選既地方, 是但中一樣, 都肯定唔使選. 唐英年中晒 - 我數唔到究竟係幾多樣, 佢最後都繼續選, 香港真係一個充滿奇蹟既地方 (cross-reference : Twins 可以係樂壇立足十幾年, 係另一個.)
梁振英. 呢個世界有一種人, 雖無過犯, 面目可憎. 梁先生正正係呢種人. 懂一點相人. 從佢成為行政會議召集人開始, 已經唔鍾意呢個人. 有冇得解? 無. 好多野都冇得解. 點解我老頭唔係李嘉誠? 咪係lor. 另一個有呢種面口既人, 叫林瑞麟.
你鍾唔鍾意一個人, 係唔需要理性分析. 呢個係個人口味既問題.
不過點都好, 我信梁振英唔係共產黨員、信佢無爆唐英年黑材料、信佢無話要縮短商台續牌年期、信佢無話遲早有鑊用催淚彈、信佢同黑金飯局無關、信佢西九個鑊係佢唔知情、信佢自由行係佢爭取返黎.
正如我信當年梁錦松買車漏報唔係佢暗啞底爆出黎.
真係所有事都同梁振英無關架. 佢完美過劉華, 一人中從沒有做錯事, 完美到佢選完或者做完五年特首, 佢就會去梵蒂岡直接封聖架咧. 掂未?
---------------
從開始就覺得這次選舉, 越胡鬧, 越不知所謂越好. 這樣才能徹底地顯示這個所謂選舉既不義. 結果, 一干人等不負眾望.
不過到最後, 凡人如你我都無辦法投票去直接影響結果. 我相信這也是為什么特首選舉只有少數人留意政綱. 當無論怎留意怎關心, 也不能影響最後結果, 是沒有誘因去留意. 大部份人會以為梁振英與唐英年的政綱大同小異. 這大錯特錯. 至少來說, 二人對政府在市場中角色的取態, 天南地北.
唐英年 : 肯定及堅持資本主義下的市場經濟，但留意、防範並適時處理市場失效，維護長遠大眾利益，實事求是地適度規管和參與市場。
梁振英 : 自由的營商環境和積極的政府角色之間可以互相補充。以尊重市場機制原則為前提，政府可以發揮主動的市場推動者和引導者的作用，從而改善香港的經濟結構和就業市場結構，提升市民向上流動的機會。
唐英年的市場及政府角色是前者為主, 後者為輔; 梁振英是平衡的. 當然, 到最後這些政綱都係多餘. 因為都係李嘉誠玩晒. 而李嘉誠玩晒, 即係球證旁證, 甚至乎你隊波都係佢既人 - 好似羅傑承咁係甲組有兩隊波咁.
無人睇政綱, 更有可能是香港人非常八卦, 對所有事情也抱著看娛樂新聞的心態, 對於一些有長遠深遠影響的事都不怎樣留意, 不關心 - 所以溫水煮蛙對香港人特別見效.
這並不代表大家就要坐在家裏, 什么也不做.
多得鍾庭耀, 多得死左既 Steve Jobs, 我們今年可以隨時隨地投票. 當然不是3月25日那個. 而是323民間全民投票計劃.
大家可以透過網站, 或手機 apps 投票.
大家或許會認為投了票, 對結果也沒有影響. 這是真的. 我不會騙大家說若有一百萬人投了票, 或許有選委良心發現, 然後向阿爺作出反抗. 對唔治, 做得選委 - 除左民選既議員 - 等同認同自己比起其他七百多萬香港人有優越性, 你投唔投票, 都係同流合烏.
不過, 透過這一票, 大家可以發表對這個選舉的看法, 也可以支持心儀的候選人. 你喜歡梁振英夠奸, 請你投票支持他. 你鍾愛唐英年可以搞三搞四, 請你投票支持他. 你認同何俊仁搞屎搞棍, 請你投票支持他.
你要反對這個小圈子選舉, 不要做沉默的一群, 去投白票.
我看過一本叫 : A Complain Free World 的書. 裏面提到要減少投訴的策略. 當中最重要的就是, 你要減少投訴, 必須要有相應行動來解決問題. 不要只一味投訴投訴投訴. 五區公投時, 有朋友說那幾條友是小丑, 不屑去投票. 到民主黨2010年支持政改方案, 他對我說十分後悔沒有在公投投票. 歷史沒有如果, 但我敢說, 若然當初有更多人去五區公投, 投票的人數是158萬人, 而不是58萬人, 民主黨不敢支持政改, 政府不能強行推出遞補機制, 最後長毛不會因衝擊論壇而被入罪.
不要小看個人的力量. 2003年71, 靠的就是大家一個傳一個, 一個叫一個上街; 最後有四五六七十萬人去了. 0471如是. 然後梁錦松落台, 葉劉落台, 楊永強落台, 最後連董建華自己都落了台. 靠的不是共產黨, 不是民主黨, 而是個人的力量.
不要再迷信民主黨/派會為大家爭取民主, 奪回應得的權益. 民主是沒有順風車搭的.
大家也要支持鍾庭耀博士. 過去一段時間左派對他的攻擊無日無之. 原因是這個全民投票計劃等同普選. 而萬一這個普選投票率高而選出來的候選人, 與最終的特首不同, 不但令選舉的幕後操控者尷尬, 也凸顯了這個選舉的不公義 (而這點與何俊仁先生也是無關的).
鍾博士預計今次只有五萬人投票, 不足本港人口1%. 怎計也個很保守的推算. 不過, 若最終只有小貓三數千投票, 左派又可以再大力攻擊鍾庭耀, 然後又去攻擊其他目標. 鍾博士當年受董建華隻狗路長安施壓, 這三兩個月再受左派批鬥. 歷史證明, 與其他獨裁政權一樣, 共產黨是不會容許異見的.
我受夠了.
大家去download 一個app, 或者用網上版, 花一點時間便可以投票. 代價除了一兩分鐘, 就只有一個sms 的費用. 以彰顯公義來說, 這代價便宜得有點不合理 (當然, 與何俊仁先生也無關). 若然有朋友想投票但不想付/支付不起那個sms, 請留言給我. 我承諾會替你想辦法替你付. 這不是要證明我有錢 - 事實上我沒有, 而是在能力許可下, 彰顯正義及公義, 應該得到合理的支持.
大家也要呼籲身邊的人去投票.
經過過去三兩個月的花生, 花邊, 抹黑, 無賴, 無恥, 不要再做旁觀者了. 不要再做沉默的香港人.
3月23日, 記住投票.
向小圈子選舉說不.
(後補 : 見到老師在面書貼了連結, 為免麻煩, 將常用粗口移去了. 真係好偉大.)
| | |
|
