March 6, 2013

• <辦公室七不思議事件>

  

  第一集

  第二集

  呢個季度報告終於去到第三集。傳說呢個系列有七集。

  內容根據真人真事所作.

  —-

  講左半個鐘, 今次終於輪到人事部阿頭安祖忍唔住黎料. 我計過咧,傾左咁耐, 安祖第三次出聲. 如果唔係見到佢不斷係咁飲酒, 我會以為佢係枱底幫Nelson 吹緊.

  “新黎班友仔真係唔多掂.”安祖一邊倒住支20年余市, 一邊講. 佢倒酒倒到好似翠華既凍檬茶咁大杯…支余市係我嫁…

  “個個瑪莉, 前兩日我叫佢搞幾條excel formula, 計一個temp 既人工, 加減乘除四則運算之嘛, 呀, 減都冇, 淨係加乘除, 搞左一整日. 乜大學無教用excel 架咩? 點知都要搞錯. 都算咧. 我執好之後, 同佢講 :

  ‘我send 返份野俾你, 你執執format, 搞掂俾我簽名. 然後拎去財務部.’

  ‘係咪要print 出黎俾你簽?’

  該煨, 我呆左呀… 乜呢個係問題黎? 撚弱智嫁. 食野係咪用個咀? 屌閪係咪用碌鳩? 人工有上限, 弱智無底線. 我把心一橫, 將錯就錯, 睇下佢點死…

  ‘梗唔使拉, 我對住個螢幕簽就得.’

  ‘哦,係呀, 好拉. 原來對住個螢幕簽就得.’

  
  真係佢而家當自己係DHL 做派件, 簽收對住個芒鬼畫符就得? 人事部點解請咁既人返黎…

  “喂, 你咪係人事部嫁囉!” 我提醒佢.

  安祖飲一大啖飲酒, 然後望一望我, 右邊咀角微微向上, 笑左一下. 仆街我支余市呀!!!

  “跟住佢整好, 居然打俾我

  ‘電腦個條線唔夠長喎. 不如整好左我打俾你叫你過黎簽?’

  oh jesus! 真係天真過黑鮑阿嬌呀. 我睇返佢CV, 劍劍劍橋雙碩士, 真係泡你阿么, 食屎拉你.”

  Nelson 哈哈大笑.

  “個日另一個見習第一日返工, 叫佢幫我將一份一版英文brief譯做中文, 一個上午都未俾返我 – 平時我三十分鐘點都譯完打完 – 問佢做乜春, 佢原來唔識打中文…”

  “下, 咁其實佢識唔識打中文字? 乜佢地大學唔玩icq 嫁咩? 要用呢類網上溝通工具, 第一件事就係識打字.” 秀英又再次惶恐地發問. 點解佢要同少女時代, 我心目中排名第三個 (第一Yoona; 第二薜凱琪. 麻煩唔好再問林嘉欣) 個個女仔一樣名?

  “Icq? 不如你講返tenet 呀, bbs 呀笨. 仲有, 而家佢地全部用手寫板架咧. 又有幾多人部iPhone有倉頡? 手寫板手寫板手寫板. 好快連打英文都唔識. 呀, 唔係, 係字都唔識呀.

   
  講左咁耐, 點解瑪莉呀、拜仁呢班細佬會入到黎?”我問.

  “屌, 個個細路入黎做見習, 暑期工, 唔係阿邊個個姪, 就係乜水個朋友個仔. 最常見好似化學原素咁, 交叉相乘 : 你個女去你公司影三兩個月印, 我個仔去你基金坐返半年. 暑期工, 邊鬼度有人正經請? 教得你用bloomberg兩三個芬唇, 暑假就已經玩完. 暑假要學野, 不如學下學民班細路咁反國教仲有意思.”安祖答. 九月反國教個陣, 我係公民廣場撞過佢幾次.

  “唉, 大家明拉. 入得黎做見習, 非富則貴, 唔通真係GPA 4.0入黎做咩. 點呀, 或者你阿爸阿媽開海味舖, 等佢個仔入黎做打雜, 我地等佢做大做闊之後再上市咩. 傻拉.”

  —

  
  終於有個人印證交叉相乘呢個都市傳說. 做咁多年野, 見過D人真係眼耳口鼻都欠奉就入黎返工. 打字, 唔曉; 用excel既function, 好慢. 我懷疑佢識唔識自己刷牙洗面. 一返工就問我點解上唔到facebook 同 twitter. 不如homepage 設定係高登好唔好? 佢地肯返工, 只係想寫落cv 度. 背靠老母, 面向世界.

  來自窮撚人家, 想正正經經讀好書, 搵份暑期工學野兼做靚個cv, 希望畢業後可以搵份兩萬銀既management trainee? 咸豐年代就有呢套. 早兩年, 舊公司老闆問我反對高鐵個班年青人做乜, 我話佢地係為公義.

  老闆係行內老行尊, 好多出面既中層都係佢徒弟. 佢話 : 呢班人書又唔讀, 工又唔返, 無所事事, 不事生產, 然後投訴呢樣投訴個樣.

  個陣我回答係 : 佢地睇唔到希望啫. 只要努努力力讀書, 總有機會. 好似我咁, 屋企小康, 不過叫做讀過下書, 而家叫有份工.

  
  我唔係因為討好老闆所以咁講. 個陣我信好多機會. 不過, 幾年黎一個又一個真實例子, 我唔撚信呢D機會仲普遍性地存在. 與其讀書努力做人, 不如自盡投胎去個中產家庭, 機會仲大仲快趣. 以前好好地讀書, 然後向上流動個套已經唔再存在. 都仲有既, 不過由以前既普遍性, 變做而家既特殊例子. 你去訪問下港島個間直資學校既學生, 有幾多個係來自窮撚人家? 比例仲少過香港既印巴籍人士.

  你條命生得好, 老竇老母以前讀名校, 加分; 入左尊貴教會 (即地下舖雲石, 水晶吊燈), 加分; 住係校網好既地區, 加分; 有錢買學校發既債 (前提係有錢, 有幾球閒錢個隻有錢),入乜野幼稚園小學中學大學都冇乜難度 – 最難就係你父母排隊拎張申請表. 真係慘, 唯一要付出既事情, 都唔使學生去做. 你人生係精英定係廢青, 出黎做野人工係每分鐘$30定每個鐘$30, 他日結婚後住嘉亨灣定土瓜灣, 對唔住, 呢一切既野, 係你未出世之前,已經決定左. 白手興家難; 有父蔭, 仲難.

  我, 大力, nelson 住尖沙咀私樓, 葵涌公屋, 鑽石山夾屋. 我去過大力以前既屋企, 舊式公屋, 一百五十呎, 四個人住, 無房, 阿媽沖涼你會聽到水聲. 樓上沖廁你知道人地開大定開細. 瑪莉, 拜仁, 一個住太古城, 一個住淺水灣. 望住近年入黎既新仔, 個個都住豪宅半山, 司機接送, 著hugo boss, brooks brothers, 返工只係為左有空閒錢, 可以訂下nike air max同bathing ape. 都有絕種動物既, 十個有一個係住公屋, 真係紅褲出身. 呢d細路先慘. 係公司好似人力同社民連係立法會咁, 係少數派中既少數派, 根本不斷俾人孤立. 其實唔係有意孤立, 而係根本傾唔埋欄.

  或者世界係變左. 變得仆街左. 已經唔係大家係咪同一條起跑線, 有冇level playing field 既問題. 而係, 呢樣野 . 已 . 經 . 唔 . 再 . 存 . 在 . 大家活係唔同世界. 一個AM, 一個FM, 大家都唔同channel. 轉channel? 轉你老母呀!

  當信念一個接一個被摧毀, 原來可以相信的已經所剩無幾.

  —

  “聽同事講, 拜仁哥除左工作能力一流 (請參考第二集), 態度仲真係似足籃球明星高比拜仁咁串.”
   

  安祖係個D 足球淨係會睇碧咸 (仲以為佢踢緊曼聯, 仲係國家隊著七號, 同埋佢會係神射手個隻), 不過連越位都唔知係乜既人. 佢居然知高比拜仁係串咀.

  佢飲左一大啖酒, 無理其他人反應, 繼續一輪咀咁講.

  “同事話叫佢上黎見工, 推三推四, 放左兩次飛機. 老闆交帶落, 點都要見一見佢先請. 留意喎, 係見一見, 點都請. 好肯定又係唔知邊個高層朋友D仔女.”

  最搞野係佢見工個日, 我經過走廊. 我見到條友係度玩iPhone, 仲係度玩angry bird. 真係玩都玩得弱智.”

  “唔係呀嘛? 佢做乜唔拎部psp 搵人連線踢實況? 班IT佬上年俾人炒晒之後,無人同我玩. 而家我袋部psp 得個袋字.”講既時候大力係西裝袋拎左部機出黎.

  “見佢有眼耳口鼻, 咪請. 不過我估就算佢死左, 都要抬條屍黎返工. 好拉, 有d合約既問題, 佢好似好唔滿意. 佢問點解無花紅出.

  大力噴左咀個啖酒出黎 (支市呀!!!)  “喂! 師兄, 你做暑期工渣喎, 不如俾埋間公司你好唔好? 呢個係公司既定政策. 就算你係大佬闆個仔, 都無得改. 仲有, 小朋友, 你屋企已經好撚有錢, 住淺水灣. 點解有錢人咁撚有錢都仲係咁貪?

  點知佢搵左佢老母出馬, 打黎搵我傾. 以前見過有老母陪個仔去面試, 佢老媽仲同我講, 話個仔小學做過風紀隊長, 叫我請佢. 屌你! 咁我細過個陣去麥當奴, 話自己大個仔識叫野食, 咁咪可以做特首? (你識笑既話年紀都有咁上下). 不過, 連簽張約都要搵老母出馬, 真係第一次見, 遲D洞房搞唔掂都要打俾老母求救.

  佢老母一開口就話以前係某上市公司既人事部阿頭, 正八婆. 好咧, 最後都傾唔掂, 佢阿媽都屈服, 無花紅就無花紅. 我打返俾拜仁哥, 講講下, 佢突然用好認真既口吻話 :

  ‘嗱, 安祖, 其實我識你老闆, 佢叫 Rose.’

  嘩, 我係電話另一邊, 忍笑忍得幾辛苦.

  眾人大笑.

  “我地公司名就係老闆個名, 咁你識我老闆個名有幾撚出奇呀? 真係, 峰哥呀嘛, 你係用隻腳踢波既. 我無講大話拉!”

  仲有, 我係人事部主管, 關於人事既野, 老闆都要聽我講, 你又算老幾?

  “咁你點答?”

  我話 :

  
  “細路, 我識你老母. 我真係識你老母呀! 我同佢講過幾次電話添呀!”

  眾人又哈哈大笑.

  “橫豎呢個暑假完左, 我地都唔會有機會見到拜仁哥, 講多單笑料.”Nelson 哈哈大笑.

  “大老闆交帶落, 俾佢見識多D. 屌聽左咁多, 唔知係咪老闆個私生子黎. 咁好拉, 帶佢去同班外國芬佬present, 咁佢明明係外國留學生, 唔知點解英文屎到無比. 我做完present, 佢答問題. 班芬佬問佢點睇歐債, 大家都係喂喂喂睇下佢鳩答D乜…

  芬佬 :“What do you think about the debt crisis in the Europe? Do you trust that the people have already solved the problem and we shouldn’t be worried anymore?”

  拜仁 : “Oh well…(下刪一億無厘頭英文)…I don’t trust the penis.”

  芬佬(大驚) :“Excuse me? You don’t trust the…?”

  拜仁 :“I don’t trust the penis.”

  “哈哈哈哈哈. 仆你個街, Europeans 點解可以讀成penis? 佢係邊間補習社學返黎? 可唔可以介紹俾我去進修下?” Nelson 笑道.

  我個陣已經笑到流眼淚. I don’t trust the penis… penis? penis? penis? penis? penis? penis? penis? penis? penis? penis? penis? penis? penis? penis?

  你知唔知點解明太祖要立個碑, 唔俾太監干預朝政? 因為佢熟讀歷史, 深諳太監皆禍國, 設太監而終不禍國是 “竟然” 而不是 “由於”. 事實上, 太監係中國歷史上禍國既頻率, 遠超外戚, 黨爭, 奸臣, 飢荒, 天災, 戰爭, 橫禍, 好色, 縱慾. 太監 + 廢帝簡直係亡國既絕頂combo. 太監同正常男人有乜分別? 咪係爭條賓周囉. 你連賓周咁重要既工具都信唔過, 仲可以信乜? I don’t trust the penis!

  “好咧. 咁我幫佢解左圍, 佢想將個波俾返我, 又想擦我鞋. 佢話我係成個團隊最重要既人…

  ‘Let me give it back to Nelson.  He is the one who pulls the plug in our team.”

  “Pull the plug?” 眾人疑惑.

  “Pull the trigger 呀仆街!”

  —–

  個下我差d俾支煙濁死. 真係誤當馮京作馬涼. 古巨基話齌, 別講笑, 忿怒爆開了, 讓我爆開了. 救命呀…

  “哎呀…點解會咁嫁. 其他野渣都算咧, 當你細路仔, 無見過世面. 但乜佢地而家連基本辦事能力同英文口語能力都冇…又冇常識, 點係現實世界生存呀…”秀英又再一副可憐天下父母心既口吻. 佢地生存係靠父母嫁, 傻豬!

  大力又點起純萬, 吐出煙圈.

  “下, 呢D渣嘛…百份百真人真事. 好多年前, 有次收工去蘭桂芳Whiskey Priest 飲野, 個陣酒吧仲食得煙. 個年個新仔…好似叫菲立…想食煙點知枱面無灰煙缸, 咁佢想問個女待應攞返個.

  Whiskey Priest 既待應都係外國人, 咁佢口窒窒咁問個女侍應  :

  
  Can you gimme an asshole?

  再咁落去大家要笑到請病假, 於是建議將班細路既事先記低, 擇日再談.

  (仆街又爛尾咧)

  • 9:14 am
  • 7 Comments