February 28, 2013

  • <大吉利是>


    農曆年,單身人士最開心。此乃每年已婚人士派息同除淨之日。

    年年俾人情好似供強姦金咁,為既都只不過係想每年逗返$40息咁大撚把。最樂觀情況下,你每年逗朋友$40利是,當初俾人情$500,咁個yield有8厘,好過買乜野劏房酒店得個3、4厘之餘仲要怕俾誠哥昆。誠哥昆你就梗架拉,傻豬。不過,無乜朋友熟到每年都逗到利是,而又可以俾五舊水人情咁少。每年都見個d,人情起碼一千,$40個yield得4%,真係通脹都輸埋。

    其實,親朋戚友派幾多錢利是,我從不在意(但上面用左一百三十字計利是回報率)。老闆既,係另計。通常公司會派一封開工利是、老闆自己都會再派。

    —–

    為避免俾人話我係$500港女,戴一戴頭盔先。


    首先,我重申我係好撚小器、好記仇。我唔想以德報怨 – 等同俾誘引鼓勵人對你唔好。有恩於我既人,我會記住;同樣有負於我既,永不忘記。
     

    第二,我會將今年利是錢捐俾鍾庭耀(上年都係)。收$100,000定$1,對我實質的財政影響,是零。

    第三,錢在某程度上代表到物件既價值。更準確黎講,係代表到呢個人/事物係一個特定對像心目中既價值。我覺得尹光演唱會第一行唔值$550,但我阿媽覺得值,咁咪買黎睇。倒轉黎講,我會用一個月人工去睇少女時代,阿媽知到實屌到七彩。至於鄭伊健,佢只係值一張$180既飛。$500睇鄭伊健? 哈哈哈,你傻撚左咩。

    第四,切勿對號入座萬一唔覺意對啱位,坐左落去,好好檢討你做人的方法。比較正面既方法係積極尋找方法投胎轉世,即係自盡。 

    —– 

    阿藍同我講過某上市公司執董既故事。此公司市值排本港頭十名以內,亦係行業內既龍頭 – 我講緊唔係香港既龍頭,係宇宙既龍頭,宇宙飛龍。宇宙既龍頭係乜野意思? 即係,如果大英百科全書有汽水呢個字既圖例,佢會出可口可樂咁。呢間公司就等同汽水界既可口可樂,或者自拍淫照界既陳冠希。大家唔使估係邊間公司。既然我用代號,就係唔想講。呢度唔係測試IQ既地方,麻煩大家將聰明放係如何玩candy crush 而唔俾人係facebook上知道。

    呢間公司每年開工利是,$100,人人有份,永不落空。$100多唔多,我可以講,多即使今日$100就黎連食餐大家樂都唔夠,即使黃埔花園九千蚊一呎,即使今年我三十幾歲,以一封利是計,我覺得$100係好多。間公司係香港有5000-7000員工,每人一舊埋單五十萬至七十萬。

    會計部暗啞底講過呢筆數有部份係公司出,咁家族作為公司大股東,公司出即係大老闆出。講開又講,傳說話阿大瘤去x臨門食飯同包女星,都係公司出錢,小股東有份埋單。咁計每人一舊水利是,員工起碼得益到少少。 

    好咧,咁呢間公司既執董又點呢? 執行董事,或稱執董,係成公司最高層高層高層個幾個之一,負責公司既重要決定,所以又稱為 執行倒屎叫得執行倒屎,佢只係負責倒屎。倒完屎就梗係由下面個班低層、奴隸、侏儒處理。 

    年報話其中一個執董三四千萬 (港幣) 年薪。


    好咧,恭喜發財,佢俾幾多錢利佢統領既同事 (大概二百人) 呢?
          

    $20。   

    不論係近身保鑣,定係小小文員,過去一年懶懶行,還是衝鋒陷陣,新年搵三四千萬既老闆,都係得到$20利是一封。

    阿藍係佢頭馬之一,人稱御前帶刀侍衛。你諗下,皇帝面前可以帶刀,同後宮可以有啫一樣咁把炮。不過,利是都係$20。佢話第一年跟老闆做野,個排有大交易,賣野俾外國基金。鬼佬既世界,得佢自己過年,根本唔會理你。阿藍年三十晚同年初一,無返過屋企。年初二晚搞掂,初三休息一日,初四真係初四咁既樣返工。 你可以想像佢初四收到封$20利是既感覺。

    知道條友派$20利是後,阿藍再無去老闆房團拜,新年個排佢直頭唔想見到佢。你一年同佢打生打死,擔幡買水,佢新年都係俾$20利是你咁大撚把。佢唔想因為一百幾十而唔開心,但係年初一做到年三十晚你仆心仆命佢連幾十蚊都同你計,你覺得好無癮。 

    係,無錯。你返工有人工,年終有雙糧,有時有花紅,派利是只係一種形式、一個token of appreciation,唔好太介意幾多錢。

    係囉,佢用$20話你知佢appreciate 你。Thank you very much. Arigato. 多撚謝. 倒垃圾個阿姐我都俾$50拉!” 阿藍笑說。 

    “咁你覺得阿姐 ‘值’ $50嘛。” 我哈哈大笑

    “係囉,阿姐係我心目中既價值,比唔上任何一個員工係執行倒屎心目中既價值。即係我幫佢衝足一年,值$20;無同佢做過野既,值$20。俾利是俾到違返人性,會折壽。不如唔好撚派拉屌你老母。”

    “唔好咁講拉,我俾清潔個個$20渣。”

    “係囉,我對我老闆黎講既重要性,等同清潔阿姐對你既價值。領左屎就搵我去抹,抹完又俾返屎你做禮物。真係一張紙巾一條底褲都有佢既價值。 

    “算拉。我聽講有人而家會俾硬野做利是。真係乜野人都有。我老闆都係俾$50渣。” 

    “嘩! 多過我150%!” “不過,其實,佢往年係俾$100。” 

    唔 . 撚 . 係 . 呀 . 嘛? 減利是錢咁缺德既野都做? 乜你公司生意好差咩?” 

    “差都唔係爭個一千幾百拉。公司三四十人,每人封多$50,咪講緊幾千銀。真係等開飯咩。執柒左佢拉。”

    “唔係喎。你老闆好撚有錢,好似有三四億樓係手架喎。” 

    “而家d樓動輒一千萬,三四億有幾咁閒。我成日叫人唔好比較、唔好計較。但我無見過人減利是錢。唔好話你唔記得上年俾幾多。Fuck you。唔見你唔記得然後俾五百?” 

    “不過咁喎,你前陣子先叫人唔好慶祝情人節咁無事搵事做。你老闆平時對你好咪得,一封利是算得乜。你唔好自相矛盾喎。” 

    “即係咁。如果你唔想派咪大方講  : 我唔撚派利是。呢d咁形式化既野,我唔撚做。

    而家唔上唔落,做d唔做d,想點? 兩面不是人。無心做咪唔好做。你要知道情侶的關係,是平等的 – 雖然好多男人感受唔到。而老闆同下屬,係有分高低。有能力既多付,是很合理的事。減利是?  咁你不如下次去拜祖先話d香貴左好多,俾大陸佬買撚晒,所以裝少一支囉。橫豎你都唔知祖先吸唔吸到d香。 

    大家唔係要同你分身家。你有錢,大家對你有期望。

    我五六歲以前住荃灣舊區,有次新年同外婆行街,撞到佢一個已經有七八十歲既婆婆。第一次見那個婆婆,佢話 ‘俾張紅紙你’,然後俾封利是我。 

    我好記得個封利是,因為個利是封有d舊。過左初十五拆利是,打開婆婆封利是,裏面真係有張紅紙,寫住 ‘大吉大利’。而家諗返,的確似抽獎抽到 “祝你下次好運”。個陣我係有唔開心, ‘點解個阿婆唔係入錢?”。

    我問阿媽。

    阿媽同我講 ‘阿婆老,無錢。紅紙係份心意。你唔好咁計較有冇錢。’

    我明白阿婆份心意。好感激佢。十蚊八蚊對我無乜影響,但對阿婆可以好大影響。做野唔可以咁撚自私淨係諗自己。但而家你咁小家,連開工利是都減,只會傷到大家,同埋自己。年初五流流,一打開你封利是,個個係排隊屌你老母,大吉利是咩。 

    “人係會專登做d野黎落自己面。有朋友係香港灣仔某骨場做,娛樂大亨、肥人既林建X會去幫襯。佢會簽貼士,每人$2。”

    “兩蚊? 哈哈哈哈哈!!!!!!!!! 佢以為自己係地鐵優惠站 定係 長者乘車計劃服務提供者? 套用一代宗師既講法,人活了一輩子,有人成了面子,有人成了笑料,都是時勢使然。你簽貼士只顯露到你性格既缺點 – 孤寒但偏偏愛面子。 

    不過咁做,只會將自己既面掃落地。有句話叫 : ‘面就人地俾,架就自己丟’。我不知道這是否香港獨有 : 越有錢、越有權、越有地位的人,越涼薄、越欠缺人情味。也不計他們的智商了。總之你每天打開報紙,數一數,不難發現官階越高,身份越顯赫財產越多的人,道德水平、誠信就越低落。 

    講開又講,你未派利是俾我。” 

    “你串鳩我離婚呀? 無利是派!” “孤鳩寒。” 

    —–

    派利是一樣,加人工又是另一樣。 聽過幾個真人真事。 

    第一個,三個月過試用期過左,老闆加$50人工。多撚到…幾乎唔夠八達通增值一次。

    第二個,碩士畢業,係公司領文員既人工 (約兩萬),但做管理層既野(幫執屎執屎),工作三年,主管死都唔肯俾返個executive 位人。公司有位、又肯俾錢,個個高級既都贊成,係主管死都唔肯。


    其實你想條友自己辭職,唔使搞咁多野。講一句就得。


    以前室友既公司,每年6月出花紅。唔係多,都係1-2個月人工既花紅。上年6月,老闆出左電郵話生意唔好,無花紅。生意有幾差? 公司無出profit and loss statement。不過都算。老闆係電郵結尾話如果黎緊幾個月生意好,會睇下有冇得派返。
     

    賤撚到咁既人都有。明知你班人無花紅會即刻hea 做,就放一支食唔到既蘿蔔俾你。我同室友講,睇相佬呃你十年八年,我呃你三個月: 你老闆滾鳩你地同佢地賣命。 

    之後個幾個月室友做到似隻狗咁。好咧。結果出三星期花紅。不如你逐日逐日、逐分逐秒出呀笨。 

    其實你想樓下班人走,唔使搞咁多野。講一句就得。 

    好多野唔出聲無人話你啞。做到咁仆街,分明趕客,同整個圾垃廣告出黎一撚樣,幫倒忙。


    好咧,你既然做到咁出面。咁決定辭職唔做。
     

    跟住,好多人話而家既後生無loyalty。

    首先,話人無loyalty個班,係今日四五十歲個班。個班人90年代瘋狂轉工加人工;今日自己上左位,走唔郁/唔想郁/你郁唔到佢,後生既無位上想出去走走,佢就話你無loyalty。你話梁振英屌鳩人無誠信係如何如何地有說服力既一件事呢。

    好,算,唔計你以前,講實際。返工係返工,唔係上興趣班,講金唔講心。loyalty根本唔值錢,亦無人會欣賞。好簡單。你可以想像你同老闆講 “嗱,我對公司好忠心,唔會轉工咧,你可唔可以即刻加我25%人工?” 

    我敢寫包單你老闆只會耍鳩你。你唔係話辭職跳槽,由侏羅紀開始等到宇宙毀滅都唔會有日老闆無端端訓醒覺得你忠誠好有價值然後加你25%人工。對老闆忠誠,老闆唔會對你好。對老闆講心,只係搵自己笨。總之你俾錢,我覺得錢夠,咪同你賣命;無錢,you go home and eat banana。總之一份錢一分貨,蔗渣決無法煮出燒鵝的味道。

    不要誤會,對工作忠心與對老闆忠心是兩回事 – 對人和對事的分別。對工作忠心是敬業樂業那一方的事。你可以不喜歡你老闆,但對你工作忠心;可以忠於你老闆,但唔忠於份工。當然好多人係對工作唔忠心、又唔對老闆忠心。

    我睇左NBA廿年。球星話要轉隊走,總係俾人話忘本。問題係:大部份球隊同老闆做過乜野令你覺得佢珍惜你?

    近年最最最最反骨,要數Lebron James. Lebron James 未去熱火之前,效力克利夫蘭(Cleveland)騎士七屆。係騎士既七年,當地人幾乎當佢神咁拜。2010球季完左,James宣布轉去熱火,當時克利夫蘭幾乎發生暴動。而時每次James去克利夫蘭作客,都會俾人柴台柴到爆。 

    James 去左熱火兩年,拍住Wade, Bosh, Miller, Haslem,  Chalmers, 第一年打決賽,第二年拎冠軍。佢係騎士七年,老闆只係搵左一班蛋散supporting cast去幫佢 – 最出名既係肥到似豬既奧尼爾。最叻個年入決賽俾人炒4:0,每年見到Boston  Celtics就代表出局放暑假,望住一班蛋散,點有可能唔走?

    球員反骨,但老闆呢? 當你無利用價值,一句 “It’s business.”,係咁先。九十年代好多球星 – Dominique Wilkins,  Patrick Ewing – 忠心耿耿。不過到老年唔再當打,球隊一個唔該就換走你,換新人換錢換鞋換妻換公仔。最仆街係Wilkins俾人交換左去Boston Celtics – 一隊係季後賽幾次踢佢出局既球隊。邊個在意佢地既感受? 柏賓呢? 拎左六個冠軍,公牛一直underpay 佢。

    James Harden 今季係火箭打到識飛。佢當年draft 之前打俾雷霆個GM,講佢唔介意做三哥,排係Durant同Westbrook後面做supportive role。結果雷霆簽左佢,好成功,上年入到決賽。結果呢? 開季前雷霆唔想俾錢簽佢,換走左佢。 

    “It’s all about business”

    既然 “It’s all about business”, 咁我地就 talk about business and only business。 

    我唔buy loyalty 呢樣野。忠心? 忠你老母。要忠心唔該你自己養隻狗。  

    (啓事 : 以後新的文章會先放 原人圈的 blog, 過兩三天才放到 xanga. 另外, 我會重新整一下之前寫落的文章, 係 原人圈 blog 來個大雜燴

    原人圈 面書 群組 : https://www.facebook.com/TheHongKongOriginals

    原人圈 blog : http://www.hkoriginals.hk/ )

Comments (4)

  • 史兄呢篇文寫得幾好。

    不過講真,如果你唔派利是,咪又係盞被人背後排隊攪你老母。文化問題,派就梗架啦,而且仲唔可以樣衰‥‥‥呢個係小弟既睇法。

  • 完全支持史兄嘅觀點。史兄越寫越有火一定是受到今年嘅人工同花紅刺激?(諗起我就燥, 史兄收唔收靚 :p ?)

  • @flowerss002 - 老闆派就梗. 至於同事, 其實你派幾多都唔會有人理. 有人D公司係唔興派利是的.

    @david_0624 - 我咪係俾老闆扣左利是錢個個人…

  • “我聽講有人而家會俾硬野做利是。” =_____=

Post a Comment

Leave a Reply

Your email address will not be published. Required fields are marked *