這還是我第一次看 “現代經濟學之父” 既鉅著. 這綠色封面版本是 abridged version, 書中沒有 book IV 及最精彩既註腳. 當年係商務用 $140 買, 買完先知少左 d 野, 悲.
心有不甘, 於是乎去晨衝買左本藍色封面既完全版. 二百九. 成本字典咁厚, 根本拿唔到出街睇
儘管內容不同, 但兩本書既下場一樣 – 就係係床下底生活左成三年.
呢兩個星期綠色版本終於重見天日.
_________________________________________________________________
<今期壹仔>
終於有d 好野睇. 佢搵到巴士阿叔. 仲係 K 做左個訪問. 雖然遲左一個星期, 但估計此舉仍然會將巴士阿叔呢個話題推向高峰, 然後跌落懸崖.
去 wisenews 搜尋過去一個月既報章, 一共有 160 篇文章包含 ”你有壓力” 這句說話. 每日五篇, 以前可能係副刊或者港聞 (其實呢d 野無乜必要上港聞). 但而家連報紙既國際版係唔係都整句 “你有壓力我有壓力”…
巴士阿叔為香港的五月帶來短暫的歡樂.
好快大家會有新話題.
非常人語仲有陳德廉 (若果跟過佢寫論文就等同張五常徒孫, 咁我認識起碼三十個). 避重就輕. 兩個字, 食得咸魚抵得渴.
I was reading that in tears.
Month: May 2006
-
-
<world-cupism II>
以下就係早兩日講個張相 (其實係海報)
睇得唔清… 邊個知道有 UPLOAD 相既 HOST? (謝過 ami_aewws)
消息人仕透露, 下排右四乃胡國雄. 上排左二及左四其中一位為耶蘇.
至於我女友個老頭…
留意下個足球! 係最傳統個隻~~ 唔似而家足球似排球咁五顏六色.
-
<Xanga Special News>
The road to public listing is just next to you, Kursk.
http://www.xanga.com/Kursk/490786420/item.html
___________________________________________________________________
<To be, or not to be?>
由於巴士阿伯太紅 – 據講已經去到 <紐約時報>, 遲d 應該會有 FIB 同蘇格蘭警察跟進, 立會應該會有人走出黎立法規管網上粗口, 陳水扁老婆同女婿個單野, 好似無乜人留意 – 除左 tommyjonk.
物以類聚. 睇黎第一家庭 (並唔係阿一鮑魚. 肉麻到嘔, 美國貨係好, 但當翻譯成中文, 可以笑死人) 含家都係貪得無厭之人. 他們稱不上貪小便宜, 因為幾千萬台幣並唔係你可以拎出黎, 更加唔會有郵差將十幾萬既崇光購物卷放入我郵箱.
而更令史弟疑惑既係, 崇光個邊又有記低買個個人既名 (如果你諗住用黎收買人心, 邊會出自己名?) – 我估計肯定買個條友用自己個名有折扣, 係熟客. 於是乎係貪小便宜導致貪得無厭.
阿扁錯了嗎? 如果呢個世界只追求一人做事一人當, 阿扁當然沒有錯. 馬英九己經同宋楚瑜 (見註) 達成共識, 要求阿扁交代事件, 還台灣人一個公道.
可惜吳淑珍是 “總統夫人”, 趙建銘的身份是 “陳水扁女婿”. 中國人社會永遠沒有 “一人做事一人當” 這回事. 阿扁錯就錯在選錯老婆, 揀錯女婿.
這故事對幾十億人類有什么意義?
搞政治最好不認六親. 畢竟, 好少人好似梁錦松咁明刀明槍幫自己搵著數, 咁笨, 咁情操高尚 (可能阿董當年串緊佢咁高手, 竟然敢幫自己搵著數).
在投身政圈前, 請花一點錢帶家人到非洲尼日尼亞旅行, 好讓他們俾當地人用 AK47 俘虜, 或者找來孟婆茶或是忘情水給你家人及朋友享用. 遠的不說, 劉千石 (還記得他嗎? 立法會議員呀) 為左阿媽, 也為了一本永久性回鄉証, 而放棄樽鹽. 老母死唔斷氣, 或者死得不合時, 令千千萬萬既政治家要向現實屈服, 也間接造就劉千石一世也只能當政圈二打六的角色, 也注定他一世俾人瞧不起.
當年三國演義, 程昱獻計曹操, 叫老曹搵人扮徐庶老母寫家書, 叫徐改投曹操陣營. 徐信以為真, 去到許昌, 知道中招. 其母大罵徐庶, 並心痛徐庶看不通當中詭計而自盡. 三國既故事當然不可以盡信, 但我相信徐母完全明白搞政治要六親不認呢個道理. 做大事, 可以不理枝節.
老母可以唔認, 但又真係唔可以無家室. “家室” 只係一個表面, 顯示你個人定左性 – 好似尹佬係無道間同劉德華講 : 等你結左婚, 個人定左性, 仲有機會上嫁. 結婚只係一個形式, 亦係某程度上話俾人聽你唔係同性戀, 更無沙沙滾.
婚要結, 但唔可以亂結. 董建華誓估唔到老婆若干年後竟然自動自覺係機艙認叻, 陳水扁睇怕都唔可以廿年前知道老婆原來咁鍾意去崇光買野. 政治家的伴侶, 並不是求其在雅虎有緣人識一個就可以. Paris Hilton 尚可以與窮光蛋玩 SM, 但哈利皇子卻不能戀上不明來歷的女孩. 你試下哈利皇子三十二歲仲未結婚, 鏡報肯定日日話佢搞基, 仲搵人寫 <The Road to Brokeback Mountain : Prince Harry> ; 英國太陽報隔週刊出 <哈利在酒吧 : 與艷舞女郎的十五年>.
離婚, 重婚係政治舞台係禁忌. 當年林煥光俾人唔覺意係日本影到同女友人一齊, 轉頭即刻辭職 – 當然呢件事並唔係俾人影到咁簡單, 但好明顯係唔想再搞大件事.
點知老婆係咪會發神輕? 給她一張, 什至乎係十張, American Express 黑金咭, 並打通全球 LV, Gucci, Prada, 既sales 通道, 睇下佢點. 並唔係留意佢使左幾多錢 (作為總理既你使緊既不過係捐款者既街錢外), 而係佢究竟會唔會持住 “我老公係仁濟醫院既總理” 而氣高扯揚, 把聲線提高八度, 叫 sales 大開後門, 好讓她在沒有 VIP 咭的情況下揀秋冬新裝.
錢借左可以還, 波輸左可以贏返, 但道德同尊嚴丟掉了, 要花很大的氣力才能拾回. 你試下係金融機構話一個同事無道德同職業操守, 這比說他生花瘤耶菜花, 殺傷力強上千萬倍. 佢一定同你死過.
做政治人物, 只不過係將自己套入一個預先定落黎既劇本度. 你係 n 歲應該結婚, y 歲應該生仔, z 歲應該成為某某委員, 等等. 無得飛紙仔, 無 take 2, 所以政治人物比起所謂既演員, 更加應該拿影帝. 列根到今天依然有人懷念, 這是不無道理的.
老婆都勉強叫自己有得揀, 但女婿或者新抱就真係欲哭無淚. 李國寶個大仔李民橋同羅寶盈都叫門當戶對, 但結果都係離婚收場. 而陳水扁… 唯有講句, 物以類聚. 正所謂外母見女婿, 口水姐姐娣. 有怎么樣的外母, 就有怎么樣的女婿.
陳水扁已經被 KO 了. 你有 d 潛質, 下年整容再黎過咧.
註 : 宋. 楚. 瑜. 令我想起南宋, 戰國時既楚, 還有三國時既周瑜. 半璧江山, 未能一統天下, 先天不足, 後天改壞命, 實非戰之罪. 唔怕生壞命, 最怕改錯名, 宋楚瑜一世只能當其 宋 . 楚 . 瑜, 陪跑份子是也.
-
<WORLD-CUPISM>
距離現在不夠兩個星期, 香港會進入一片世界盃主義, world-cupism. 開口埋口除左波盤, 就係3:2 或者 2:0. 當然你我會搵機會係公司個廁所訓覺, 甚至乎搵埋老細一齊訓 – 個排屙少d 係公司屎, 唔係會俾人媽你.
大家都有壓力, 當然你公司既 OL 會坐埋研究意大利有邊個靚仔球星, 同埋邊個好大隻好有肌肉咁. 唔好以為我歧視緊你我公司既 OL. OL 係用黎偷睇同埋溝既. 大家立場不同, 行為有異, 無可厚非. 如果旁邊個女同事同我講尋晚魯爾入個球波, 根據佢用家中既軟件分析過, 其實腳毛有0.3 mm 越左位, 一係可能佢溝我, 二係可能我入錯行, 會汗額, 然後即刻辭職. 情形同行女人商場個陣, 我係度狂望其他女仔一樣. 阿媽同我講過, 當年佢跟人 (斷估唔會係女) 入去旺角場睇波, 連個波係邊都唔知. 睇條毛?
畢竟唔使等選特首就有野可以全民參與, 大家唔使開口呢個做政治show埋口o厄綜援唔使坐監, 消一消戾氣, 係好事. 總之, 大家會係恒指跌到 14500 點既時候落力為細哨歡呼.
睇世界盃, 唔使去旺角行人專用區申請有線. 有線又貴 (平極都差唔多兩舊水一個月), 又無野睇, 唔知點解仲有人肯要佢d 股票. 更加唔使去安非法解碼器, 你電腦bt 左既有格仔既咸片係唔能夠, 重申, 係唔能夠, 用解碼器去消除. 我亦唔會叫你等睇無線亞視得個一分四十三秒, 短得可憐既體育新聞, 反正睇新聞只係為左趙海珠郭詠琴張慧慈王珊, 新聞質素同內容係點, 自黃德如開始已經無乜人理會. 網上最o岩睇大陸電視台. 你去 pplive.com 裝返個網上電視, 就可以免費睇國內既電視台播世界盃. 不過要聽大陸北京國語 (r, z 音無處不在, 還有 捲舌頭 及 “兒” 音), 同埋忍受質素差一點. 免費娛樂算係咁. 如果你想要已經收左山既阿叔旁述, 你要開住巴士阿叔既無解決版.
強烈推薦 pplive (佢仲有好多個台, 連周星馳周潤發李小龍每人都有獨立一個台), 除非你鍾意同一大班人係酒色睇 (d人仲可能係唔識既), 咁就另計. 呢d 咪叫背向祖國, 面向世界盃, 完完全全係優勢互補. 使鬼開經濟高峰會咩.
我最鍾意阿根廷. 原因? 球員又夠矛, 夠直接, 野野都要擺明收你山, 唔似歐洲佬咁陰陰濕濕. 更重要係左後衛蘇連似足年近四張既李健和, 對作為吸香港血既我, 夠晒親切感. 之前又有奧迪加, 又係和仔 (??? 四張咧喎, 仲和仔? 處都破左五十幾年) 咁既外型. 希望列基美一干人等生生性性, 唔好好似上年咁分組賽行人止步… 上年有就黎收山既巴迪斯圖達都係入得兩球, 今年好好醜醜都趙低荷蘭先好講. 唔使講, 如果唔鍾意阿根廷, 無謂係度話你鍾意英格蘭.
我最撚憎碧咸. 咁靚仔, 但係老婆又咁醜… 真係吹佢唔脹.
女友個老頭以前踢甲組. 無錯! 係香港職業足球既甲組~ 當年條友叫 “沙僧”, 結婚唔知點解有傳媒報導 (佢屋企台面塊玻璃下面有張剪報, 過埋膠). 當年佢同米雪姐 (米雪姐都痴痴地線, 成五十歲人望上去似三十) 既男朋友尹佬既樣貌同身形有七份相似 ……….. 而家? 你知唔知立法會議員張宇仁係點既身形? 咪三個圓圈law, 一個懂得自己行, 會講好多野既雪人. 個日睇返佢以前精工張相 (有傳奇人物胡國雄, 仲有兩件據聞當年都好紅, 生得好似耶穌咁既鬼佬), 再望一望眼前呢件肥佬…. 你都唔知我忍笑忍得幾辛苦.
-
<數字人生>
我有 41 個 subscription. 假設每位辛格人仕一個星期寫三篇 (邊個可以好似我咁日日係辦公室寫?), 每週我大概會閱讀到 123 (咁o岩既) 篇文章.
資訊泛濫, 人類濫交. 我決意每個星期五都整個 辛格一週回顧, 羅列該週值得重溫既文章, 好波不妨一睇再睇. 亦都俾無乜時間四圍瀏覽既人, 食下快餐咁.
放心, 我唔會咁低能放我自己既文章落去.
5/26 週記 :
1. 齋鹵味 on <森美與商台>
2. 力為 on <不替男人拿購物袋的女人>.
3. 瘟神.命 on <大個左你就明嫁咧>.
__________________________________________________________________
<多此一問>
iamsorman 同 lazybrenda 係咪識既?
我成日話去做記者, 呢條問題, 顯晒功架. 起碼唔會要求更進同回應.. -
<香港漫畫>
香港漫畫已死.
就以武林神話 – 無名 – 來說, 佢而家係天下既角色, 簡直係死唔斷氣. 情形同董廢帝後期既角色差唔多. 你想佢死, 但佢偏偏唔死, 仲要得閒無事出黎玩串個party, 講兩句賴有見地既野.
馬榮成個本 <天下>, 真係得啖笑. 自從幾年前個個無敵既釋武天走出黎, 搞亂個局 – 連武林神話無名都唔夠佢打, 仲唔係搞亂個局? 從這樣 “老祖宗” 式天下無敵既角色一出場開始, 天下畫集正式宣怖走進了死胡同. 故事紊亂不堪, 雜亂無章, 就連唯一既賣點 – 畫功超卓, 分鏡絕核 – 都消失得無影無蹤. 當然, 在均衡點上, 人既邊際生產力在各項生產活動上應該相同 – 而馬蛇炒樓搵咁多, 俾少d 時間畫野好應該.但你唔好理. 據業內人仕講, 天下仍然係最好賣既港產漫畫. 天下畫集可以繼續出, 無非係有一班當睇漫畫係食飯屙屎既人仕, 每個星期好似食白粉咁俾 $14 買天下.
香港既漫畫集過去個十年, 都只係食老本 – 即將既有既故事人物畫完再畫, 死完返生再死再返生, 情節老土, 題材十年如一日. 十年前是天下, 龍虎門, 黑豹, 海虎/武神, 黑社會漫畫. 今天也是天下龍虎門黑豹, 我亦敢講, 十年後如果作者唔死 (其實呢樣野唔係太重要), 都仍然係天下龍虎門黑豹. 前排竟然還有人夠膽死返出成廿年前既中華英雄, 並用什么數碼技術重新上色, 弄得不倫不類.也有人返出黑白版既龍虎門和中華英雄, 我估比新的漫畫好賣得多. 情況就像劉小慧周慧敏湯寶如既3CD 單碟價寶麗金精選碟好賣過關心研和周麗淇既總和既三次方. 古龍的絕代雙驕只能畫到一百期漫畫, 為保飯碗, 作者竟自己寫出續集來. 古龍九泉有知, 必定吐血再死一次. 當年史弟第一次接觸龍虎門, 史弟七歲, 王小虎大概十八九; 今日我再看龍虎門, 史弟廿六七, 王小虎仍然是他媽的十八九.
本地漫畫, 過去十多年跟本沒有長大過.
本地漫畫情節清一色打鬥搏擊, 大佬, 而家已經係廿二色紀殺人網絡咧. 十數年前還有數本週刊漫畫講鬼的 (怎努力也想不起名字), 也有名愛情漫畫 “情若無花不結果”. 但時代進步, 我們的漫畫業不止沒有進步, 還在往後退. 日本的漫畫, 題材早就超越了肢體上的打鬥. 金日一, 頭文子D, 稻中, 網球王子, 男兒當入樽, 全部是香港漫畫界可望而不可及的題材. 這都不是只在日本當紅而來到香港仆直的漫畫, 他們全是在港賣個滿堂紅的題材. 我看過鄺氏那本抄襲而成的首都高速, 嘩, 嚇死人, 一架唔過廿條線既 “車”, 竟然可以佔兩張 A4 紙. 賽車過程全部用口同旁白講 (“好快~~” “咁樣轉彎都得?”), 皆因筆者根本唔夠功力去表達. 還有肥良當年屎忽痕, 畫了五期講打籃球既漫畫. 痴鳩線, 個個手臂石頭咁大去打籃球, 完全似班武神係度打交. 漫畫仆直, 肥良仲可以屌鳩讀者唔識貨!
當然, 打鬥搏擊也可以畫得精彩絕妙, 但香港既漫畫界仍沉於誇張, 力量型式表達既繪畫手法. 為彌補表達上的不足, 港式漫畫對於量化式力量情有獨鍾 : 九十九點九九九重天, 紅橙黃綠青藍紫鬥氣. 一將力量量化, 就只會像二戰時德國一樣有什么 power inflation. 招式仍然係降龍十八掌, 乾坤大挪移, 少林功夫, 排雲掌, 火雲邪神. 天呀~~~ 而當肥良此等粗獷式式繪畫方法到今日仲可以生存到, 你就知道本地對手係幾不濟 : “嘩哈哈哈哈” 佔半版, 大頭佔一版, 旁白佔版半, 於是乎一本三十二項既公仔書, 竟然可以得一百二十格漫畫, 即平均一版 A4 紙得四格漫畫. 打鬥劇情永遠係 A強B弱,B轉強A原來留有一著,B又出絕招,A詐死絕地一擊然後勝出. 好悶. 你對上一次係書報攤等一本本地漫畫出版, 係幾時既事?
我清楚記得, 對上次等本地漫畫, 係等許景琛街頭霸王第 39 期 <頭巾之秘, 昇龍之拳>. 這是我最後一次在本地漫畫找到震撼. 那時, 我只得小學六年級.
說到底, 由於業界仍然停留係數十年前, 香港仍然依靠 “勞力” 去搵食, 唔需要太多腦袋. 娛樂既需求亦不大重視思考, 讓讀者留有空間想像的時代, 於是乎本地漫畫完全於棄故事編排, 文戲弱個不堪, 構圖薄弱, 不重視以背景環境以及說話黎打造故事及人物, 最多係旁白加句 : 一看便知是個十惡不赦的壞蛋. 大佬, 你畫到d 友好似大口青咁, 惡形惡相, 貪財, 姦淫, 係人都知係奸. 好些漫畫, 背景還背景, 燈光還燈光, 這些對故事劇情有要影響既原素, 香港漫畫界都無乜點放係心上. 話某某去到咩地方, 個個 “咩地方” 係點無乜關係, 反正對劇情半點影響也沒有. 畫公仔, 就要畫出腸來. 什么畫得不好, 就用旁白告訴你. 只希望繼續以暴力的畫面去滿足讀者, 這明顯是不合時宜的做法了.
香港漫畫過去最叻既, 就係 dum 人買第一期. 黃玉郎乃最能將此招發揮光大的祖師爺. 第一期既畫功永遠最好, 最靚. 但十期八期後, 唔知你會以為係第二本漫畫, 皆因畫面實在太醜咧. 日本漫畫剛好是相反, 第一期可以極醜, 但十期後畫功及表達方法以幾何級數咁上. 十年前的龍珠, 星矢如是; 後來的電影少女 (桂正和所畫的女生正到爆), 稻中兵團如是; 到最近的狐忍, one-piece 也如是.
老本食得好, 可以延年益壽. 萬一好似高橋陽一咁死唔斷氣, 足球小將仲要係綠茵場上踢波 (戴志偉晨早可以做殺手), 一場球賽畫足四年, 金漆招牌好容易打爛. 許景琛畫街霸3畫到要走佬, 黃玉郎連神兵 3.5 (第四部垃圾, 但因為第三部受歡迎, 繼續畫己完結既第三部, 於是想出這個 3.5 來) 也要畫個死不斷氣, 黑豹又夠膽死全人類失憶然後重新洗牌, 聶風和步驚雲據估計已經五百幾歲, 活係廿一世紀. 仲想點?
漫畫己經唔可以停留係純粹俾讀者感官刺激既層面上. A4 平面既刺激, 永遠比不上職業特工隊加上杜比 5.1 所帶來的震撼. 香港的漫畫所需要的是轉型, 加重文戲, 多著重故事編排, 多元化的題材. 儘管我不喜歡選角 (謝…檸檬…做王小虎), 但龍虎門拍成電影, 我倒希望為漫畫業帶來新的機遇. 當然, 不能像外國電影般生產大量周邊物品 – 遊戲, 紀念品, T-SHIRT, 玩具 – 增加收入 (這才是真正的收入來源), 這又是另一回事了. 當年既兵器玩具曾為漫畫界帶來一點希望, 但大家一窩蜂走去出, 一星期出九十幾把兵器, 邊有咁多武林高手? 結果咪玩謝d 水, 馬騮打飛機.
諗深一層, 食老本可不是漫畫界獨有之惡習. 本地既足球界, 電影界, 電視界, 出版界, 全都有差不多的惡習.
結論? 你睇左我鳩o翕咁耐, 梗要俾d 甜頭你. 如果你有玉皇朝 (0970), 仲唔拿拿臨去 7 仔賣左佢?
我們從來不是文化沙漠. 但隨著人們食老本既行為越黎越過份, 20 years from now, 香港碩果僅存既地道文化正式會消失. 那時, 十CD 單碟價賣戴夢夢林宛, 無人會理你.
學教主話齋, 唔好再賴 BT 咧. -
<不必相見>
我未死, 起碼今日仲未.
其實, 我過去個星期, 病到成隻狗咁. 病到我以為自己就快要死 – 儘管那只是普通的發燒感冒腸胃炎. 每日都訓係床度, 個頭好痛, 又諗唔到乜野正經野, 再加以為自己會死 – 儘管如果因為發燒而死, 個人認為太無謂, 於是乎竟然諗起自己既喪禮來.
早前已經說過, 自己理想的喪禮是怎樣的. 今次係床上再諗, 係諗下各人見到我既時候會講d 乜.
(1) 我還想到有些人會認識我幾十年, 但從來沒有見過我真身. 這次係喪禮見到, 便說 : 呀, 原來呢條粉腸就是史弟, 抵佢死/可惜他已經死了. 還有些人大家可能在網絡上溝通多年, 要到某某的喪禮才有機會一聚 : 呢條友就係 x x x? 唉… 一直以為佢好靚仔…
情形就像大魚奇緣裏面既主角, 在父親喪禮上看到各個傳奇人物, 那感覺既興奮又難過. 大家聚首一堂, 猜下枚, 食下煙, 過黎同我影下相, 幾過癮. 法事過後, 離開暢行道, 登上 10 號小巴, 一切隨風而去, 天空仍然是藍色. 當然, 那個時候, 我什么都不知道了.
我想, 大概有些人, 不必見. 不見反而有著憧憬 (原來佢咁矮咁醜咁高咁靚咁有錢咁串…), 我更欣賞那種君子之交淡如水的關係. 見了, 關係亦會變得複雜. 是好是壞, 我不知道. 但我較為欣賞現在的交往方式 – 大家既然是路人甲乙丙的關係, 就繼續當其路人甲乙丙好了. 再者見了, 就未必可以造到群英聚喪禮既效果.
(2) 然後我想到一d 好耐無見既朋友. 包括小學時既初戀情人, 大學時一直得不到的女同學, 碩士時的日本籍友人… 等等. 就算我死了, 他們大概也不會知道, 也不太關心吧.
(3) 我也想到親人和女友 (連佢地都諗埋, 你可以想像我病左幾耐). 這時候 now 的仆街 8 號台 (即播 “獨家試愛” 的 trailer 台, 現改為 118), 正播放著 變種特工 (x-men) 第三集既片段. 女角痛苦地叫狼人 :
Kill me~
沒有什么比叫自己最親的人殺死自己更痛苦. 如果一個人認真地叫你殺左佢, 佢所面對既困難真係好高大, 所需要的勇氣比臭氧層更厚. 裏面涉及的情感也很複雜, 我不知道怎樣可以有系統地說出來. 對, 我是支持安樂死的. 要求親人代為向醫生轉達了結生命的勇氣, 並是超出道德和法律的範疇.
__________________________________________________________________
<NBA Playoffs>
My earlier predictions on the Eastern Conference is partially correct and on the Western Conference, entirely incorrect.
Anyway, this is the most insane and interesting NBA Playoffs I have ever watched :
- Two straight 7-game series for my most favourite run-and-gun team ever;
- Two great come-back-from-verge-of-elimination series (Piston-Cavs; Suns-Lakers);
- Large pool of talents with great variety of team plays (Team spirit of Piston; the unstoppable Wade and L.James; the guns of 333333~~~ Suns; The bench of Mavs could be starting 5 in another lottery team; the Yoga-like Ginobili reminds me of master Kamal)
- Early elmination of my hatest team (Spurs and Lakers).
- Huge mistakes by great players (Ginobili in Game 7 versus Mavs, see below; Nash in Game 4 versus Lakers with two turnovers).
- Blow-outs with great offensive moves (Game 1 of Piston-Cavs; Game 7 of two Suns series)
FUNNY :
1. Look at Chris Kaman of Clippers in Game 7 versus Suns. EVERY sinlge play he complains to the officials. Yea, EVERY. What is he doing? With 2 seconds – by the time Kaman could only raise his hands and open his month trying to speak – Marion have an AND1 play on the other side of the court. You keep talking you are committing suicide. No wonder Mike (coach of Clippers) puts him on the floor for only 20 minutes, despite Kaman is 7 foot 1 and the average of Suns is something like 5 foot 7.
2. With less than 30seconds your team leads by 3 after your 3-pointer, now the top scoer of the opposite team drives down the lane, what will you do? I have no idea what Ginobili has in his mind when he fouls Nowitzki for an AND1 play to give Mavs the tie at 104. Shouldn’t you let him go? Shouldn’t Ginobili know Nowitzki is 7-foot? What is he thinking? What does Greg (coach of Spurs) feel? With almost no bench scoring (oh yea, almost all Mavs in PF or C foul out), does Ginobili ever remember that it is no different from self-killing for Spurs to play over-time, after Duncan playing almost every mintue of the game? This is the greatest mistake I have seen in playoffs of NBA in the last decade.
Before that, in the Game 3/4 (i forget) 1994 NBA finals (Jordan’s Bulls versus Barkley’s Suns), a Bulls (again forget the name) passed directly to Barkley for a layup right under the basket during over-time, right after a basket by Suns. I saw Jordan and Phil Jackson have heart attack after that.
3. I totally understand from this year’s playoff that a team with 3 major scorers is not enough to bring you to conference finals. Spurs (Parker, Duncan, Ginobili) can’t, Nets (Kidd, Carter, Jefferson) can’t, Wizards (Butler, Jamison, Arenas) can’t. Not to mention Lakers, Clippers, Nuggets…. Of course if you have Wade or James you can stay a little bit longer…
To win you must have 5 scorers… yea… FIVE, at least 13-15 points per game in a reliable manner. All 7 players of Suns score at least 10 in Game 7, the bench of Mavs is the best I have ever seen (could be compared with the 80s Celtics), the Piston’s starting five can give you 15-20 per game.
If my observation is correct, Miami heat will be eliminated by Pistons soon… in about 7 games…
And Mavs versus Suns… I am rather reluctant to predict as both sides have great starting lineup and bench, the coaches are also skillful. Remember Kurt Thomas might back for the Suns….. Mavs 4:3, with no more than 3 games decided by above 10 points.
Nowitzki and Nash………………………………………….
-
Though a little bit too quick too fast…
anyway…
I’m BACK
That “S” does not mean I am superman. The burden of being super is so great that I prefer to be an ordinary, if possible, super-ordinary man.
That “S” represents the returns of your little brother “S”.
Yea, 史弟. That Ass. He misses everyone he knows via xanga so that he decides it’s time to back.
