May 8, 2006

• <經濟轉型>

  今年考會考既小朋友, 你地真係好撚慘.

  慘既並唔係考英文卷無出貓個班細佬, 而係個幾十個到懂得用阿媽出俾佢部 3G 既電話上網搵答案既聰明仔.

  如果年尾有人問零六年經濟轉型最成功既例子, 非呢單 “手機出貓事件” 莫屬.

  政府日日鼓勵人地搞轉型 (當然佢自己肥到成隻豬咁, 連身都轉唔到, 莫講話轉型), 過去幾年除非張玉珊搞左個修身堂, 靠幫人轉 “型” 而成功, 最令人振奮既經濟轉型事件, 就係呢單 出貓事件.

  試想想. 由漢代有考試入仕途既制度開始, 中國人及眾多的人類就不段在鑽研各式各樣出貓, 即作弊, 既方法. 收買考官, 抄係衫領, 將貓紙放係前面女同學既長髮下, 抄定一份, 還有當年周星馳用手機問功課.

  呢d 方法, 最大既問題係無法保障無其他人知道 – 萬一要出到收買考官呢招, 仲可能要搵中間人, 所謂多隻香爐多隻鬼. 從前, 要搵d 方法唔俾人知道自己出貓, 代價可能高過自己走去讀書. 出貓呢d 既唔 cost-effective, 更加唔能夠巧妙運用科技既技術, 正走向下岥, 實在係夕陽工業. 好多細佬寧願唔讀, 都唔再想方法出貓.

  直到呢次, 香港人真係威返次. 呢次出貓既奧妙之處, 係溶合左人類既文明與及廿二世紀既偉大發明. 人類最大既文明, 就係廁格裏面你合法地擁有無限既私隱 – 那管你是在作出大膽到飛起既性幻想, 在研究如何把辦公室既死敵先除之而後快, 在玩倒豎沖 (唔好問點解, 我唔知) – 只要不作出過量既聲浪, 與及無太多人排隊既情況下, 你做乜都無人知. 其他人亦無權過問, 及從合法渠道觀看你在 10 平方呎的長方形格內, 究竟係度做乜.

  廁所正是這樣一個令人多么振奮的出貓好地方. 但是, 事前不知道題目, 又不可能打電話問人, 有 9G 都無用. 幸運地, 考評局造就天時, 連文章既出處都話埋俾你知. 地利 (廁所的無限私隱), 人和 (你阿媽買左和黃, 更幫襯埋誠哥), 百年難得一次既機遇, 邊有可能忍到?

  係邊個地方邊個朝代出現過政府係無收錢既情況下, 造就人地出貓? 無. 下年回歸十年, 除左幻彩詠香江, 我地終於有野叻過澳門.

  係廁所上網出貓, 就算差佬捉到你, 都挫你唔入. 記住咧, 以後唔需要搵女同學幫手出貓. 三個字 : 出貓不求人.

  但政府話要徹查事件. 痴線, 即刻拿拿臨頒幾個 “經濟轉型” 獎俾佢地. 考評局仲話要出貓刑事化. 我即刻笑左出黎. 點呀? 滿清十大酷刑呀, 用火燒, 炮烙, 然後李國章捉住靚仔條頸問 : 你d 同黨係邊, 邊有仲有份出貓? 唔係搵火印你~~~

  大佬, 連o厄綜援都係援刑, 你估法官會唔會因為d 細佬用手機上網而留佢地案底, 仲叫佢地坐監? 咪低能拉.

  一諗起胡仙無事, 阮道雲個仔藏毒輕判, 而黎緊出貓要滅族, 共產黨真係正

  (謝過 hystercireul 指出為阮道雲而非袁道雲, 已更正)

   

  • 8:50 am
  • 8 Comments