好悶.
好悶, 同埋好悶.
無乜心機做野, 仲有好悶.
無乜心機好悶好累好想放假.
Month: July 2006
-
<Pandora’s Paradox>
除了女友外, 還有不少朋友喜愛唐老鴨. 一位和我說 :
喜歡唐老鴨, 有人性, 有喜怒哀樂, 他古惑, 但心地不壞. 不像米奇, 小熊維尼整天也笑面迎人, 太假了, 不真實.
在虛擬的世界尋找真實, 在真實的世界追尋虛擬, 就是我們的生活. 直接一點, 每天活在矛盾與掙扎之中, 怎至乎用上與目的相反的方法去達到目的, 這就是人生.
當然, 世上所有事情的界線, 變得越來越淺薄與含糊.
於是乎, 老馮日寄之所以受歡迎, 全因它的拍攝手法真實 – 膊頭遮住半邊鏡頭, 不用路軌, 不打燈 - 令明明係假的故事看上去真實起來; 長毛梁國雄走進憲制裏, 是為了最終打到憲制; 我們每一天受老闆的氣, 吞客人的屁, 就是為了一天可以當老闆, 然後如此對待下屬及待從.
最明顯的例子, 就是發動戰爭, 以希望取得 “最終的” 和平.
還有梁朝偉演活了的臥底. 要捉壞人, 先演壞人. 而劉德華既反臥底, 做壞人, 又要先扮好人.
這究竟是自欺欺人, 還是要最後達到目的, 必先在短期內放棄它?
許多人想改變世界, 希望間中放底堅持與目標, 以為最後必取得勝利. 最後, 世界改變了這些人.
於是乎, 施丹為了使人三十年後仍然記得這個有血有肉的球王, 在德國足球場, 廿億對眼睛面前表演了法國武台劇劇目 : 鐵頭功怒破十字聯防.
如果以二流的劇目 – 法國拿得冠軍, 施丹光榮退休 – 作世界盃謝幕, 人們很快很容易就會忘記這球品一流, 腳法秀麗的球王. 完美的東西不真實, 不真實的東西容易被遺忘. 在一個不太真實的地方 – 包括了施丹那接近神奇既控球技巧 – 施丹做回了旺角麥花臣的中年阿叔.
為了令人們記得自己這個腳法完美的球王, 施丹像西班牙的蠻牛, 為了見紅而衝向成個球場最多仇家既臭馬, 馬特拉斯.
施丹絕對是一個一流的編劇與導演.
於是乎, 潘朵拉的那個小盒, 最終必需打開; 不釋放死亡與疾病, 我們也無法得到希望.
只是
.
.
.
.
.
.
.
.
.
.
.
.
.
.
.
希望那一天到來, 無人知. -
<做秀>
前兩日收到個電郵, 呼籲全港市民今年 8 月 8 日晚上 8 時熄燈 三分鐘, 以 “引起政府對環境污染問題的關注”. (www.lightsout.com.hk)
環保喎, 梗係要訓身, 不惜一切咁支持拉. 尤其當我去完澳洲, 空氣何奇清新? 我帶個d 鼻敏感藥都無掂過.
睇清楚d, 熄燈渣喎. 點解唔熄埋冷氣同風扇? 據我所知, 一屋用電用得最勁既係呢兩樣野 – 要支持環保, 減少用電, 從而令發電廠減少由燒煤所生產既電力 – 唔係應該拿拿淋熄埋冷氣佢?
今日蘋果話廣州官渡珠江做環保秀. 游一次水就環保到, 咁香港大浪彎同清水灣咪日日有香港人捨身成仁? 如果對珠江既水質咁有信心, 不如搵個水杯黎倒兩啖你飲咧?
_________________________________________________________________
香港既經濟學者 – 即大學個班 – 人工就高, 但收納稅人錢既佢地, 都未試過為納稅人講野.
政府話要收 GST, 點解無一個經濟學者走出黎反對? 大部份係外國浸過咸水既佢地, 莫非連經濟學 101 都唔識, 淨係識 overlapping generation model?
至於政府… 又走出黎o厄人. 你班愚民, 以為 standard rate 真係可以減 5%… 弱智. 以為中小企可以有 exemption 唔使俾稅? 發夢咧. 對經濟無影響咁正, 咁不如收夠 500% 拉.
我從來無聽過有人敢講收稅對經濟有利.
但係香港呢個咁荒謬既地方, 有人敢講, 又竟然有人信.
愚民, 繼續俾錢你既高官同政府法定團體拉.
-
<愛你變成害你>
許多父母, 望子成龍, 祈女變鳳. 愛兒愛到出汁, 用盡一切方法以物質滿足兒子, 但到頭來弄巧反拙, 兒子無法再從物質取得快感, 轉向追求什么後現代感觀快感, 最後在的士高私藏供女伴使用的 K 仔俾差人捉到, 害得父母的一擔心機付諸一炬.
或父母愛子心切, 希望兒女走條容易點的路, 於是乎大搞計劃經濟, 什么也為其兒計好晒 : 三歲學琴, 四歲學跳舞, 五歲學吞劍; 十八歲前不得與女生談話, 九時前要睡覺, 蘋果日報只準看法庭版; 三年級要開始解剖老鼠, 五年級要發明直升機, 中五只選理科科目 – 文科只是供那些書凱子讀的. 兒子想假日跟同學去踢波, 老父生怕踢斷腳, 阻礙兒子進軍英國 imperial college 既土木工桯系, 勒令不准去, 但又偏偏安撫兒子說 : 爹地都係想你好.
好一句 “想你好”, 埋葬了不少兒童獨立思考的能力及作出選擇的決定權. 兒童的前途, 也付諸流水了.
這兒童, 叫做香港.
別聽什么特別政府所說, 香港經濟成功是因為 “阿公放水”. 以一個無原材料, 無農產業, 無人, 面積只有 1200 多平方公里既地方, 香港人均生產總值高達廿萬, 是因為資本主義. 簡單一點說, 資本主義是保護好私產, 建立好法制, 讓人民為自己的一切作出決定和選擇, 而不是由官員為計劃好.
在大陸佬既反對下, 李澤楷不能把電盈的成個盤出售, 只能賣掉新加玻盈動手上的兩成多股份. 死了 75% 心的小股東終於可以壽終正寢, 入土為安.
市場話, 大陸佬認為 “電訊” 係 “策略性” 行業, “不能落入外資手上”, 起碼佢唔可以做大股東. 即使在 WTO 下, 許多行業的中外合資既企業, 外資最大只可以有 49% 的股權. 係大陸佬 – 即網通, 電盈股東之一 – 反對下, 李澤楷將兩成多股份賣俾梁伯滔 (得咧, 倉頡無個個滔字), 係唯一 “executable” 既 “best option”.
我現在不是電盈的股東, 呢單鵰對我荷包無任何影響. 但因為大陸佬既反對而令單鵰做唔成, 呢樣野已經令香港既金融業踏上死亡既道路.
講起歧視, 所有人都話反對. “race does not matter”. 你唔歧視佢個人, 但歧視佢既錢, 我估, 呢d 都叫曲線歧視. 前個星期係澳洲, 有條南韓佬黎講野, 話一個經濟體系既最大銀行, 一定要係由本地資金所擁有. 我問佢呢d 叫唔叫 “racial discrimination basing on the source of fund”, 佢即刻面都紅晒.
私有產權 (又要講返大教授個套) 包括資產的自由轉讓. 你大陸佬要係個賊竇玩 A 股/B 股, 限制外資擁有權及外來資金, 我話之你. 香港有香港的一套法則 – 一套成功的法則 – 咪將你個套放係香港身上.
一國兩制? 政府同證監唔係應該係呢個時間出黎講我地有一國兩制, 嚴格執行基本法, 保護私有財產, 促進香港成為金融中心嗎?
操.
我看香港也越來越接近大陸. 早排領匯上市無耐, 有英國對沖基金買左領匯部份股票, 有班人竟然夠膽走出黎講話要限制外資擁有領匯既上限, 免得本地民生落入外國人手中.
痴鳩線. 你係邊撚個呀? 幾個屋村仔商場, 人地芬佬會浪費時間黎整死你地? 唔好去炒高股價?
訓醒未呀.
再讀 : 陶傑的文章 -
<不愧為球王>
今日必玩 : 球王遊戲
http://www.break.com/index/zidane_head_butt_game.html
******************************************************************
又 : 究竟馬特拉斯講左d 乜, 令球王咁要使出絕學頂你個肺? 報紙吹水話涉及種族歧視或施丹屋企人, 九成係吹水. 我估不出以下其中一項.
可能一
馬 : 你就係鐵頭功? 用到頭鎚入波, 我先係鐵頭功.
施 : (用頭頂向馬) 鐵頭功呀咧.
可能二
馬 : (廣東話) 尋晚阿嫂好溫柔~~施 : (日語) 阿媽爹.
可能三
馬 : (細細聲) 我係意大利跟保方買左 兩皮野 歐羅你會俾人紅牌, 成 20 倍; 穿埋係我令你出場賠 3000 倍. 三七分賬, 如何?
施 : (用頭頂向馬) 成交!
可能四
馬 : 喂, 施丹. 聽講你去過中國跟解放軍學頭鎚, 跟住先識得係九八年頂到個世界盃返黎. 但我又去過少林寺學金鐘罩, 練成十二關, 無罩門. 唔知最強既矛同最強既盾撞埋一齊會點呢?
施 : (用頭頂向馬) 解放軍萬歲~ 毛主席是最偉大的!
******************************************************************
一招頂你個肺, 今日起碼有十個 xanga 講施丹 :
1. Amazinao
2. Johncoal
3. 畢文 (佢未必想我 post 佢條 link)
4. iamsorman
5. lawkain
6. tommyhonk
7. amoebien
8. Lerendezous
-
<無間道 IV>
走過 7-11, 見到本估計係有宗教背景既 “天使心”, 封面寫住雞那咁大隻字既頭條 :
宇宙有神/上帝嗎? 霍金 : MAYBE!
我沒有信教, 對所有宗教認識不多. 宇宙是否有神, 不在此討論範圍內. 我想講既係, 天使心個編輯, 肯定玩緊野.
Maybe, 即 “有可能”. 天使心肯花上標題去引述霍金既 “maybe”, 即佢地認為是重大發現 + 重要消息了. 但天主教/基督教的入門口訣, 不就是宇宙有神/上帝嗎? 明白, 並相信宇宙有神, 接受這是事實. 若有人 – 不理他是百萬富翁還是乞丐, 怎至可能係遺傳學權威說 : “阿媽可能係女人”, 這有什么值得好報導?
仲有, maybe 即同時代表 maybe not. 天使心個編輯, 好明顯係暗啞底踩緊自己信個個教… 咁仲唔係無間道 IV…
_______________________________________________________________
<柯達 400>
去澳洲 bondi beach 帶唔夠菲林, 去附近用 A$10.95 – 即 HK$60 – 買左一筒柯達 400. HK$60 係香港可以買四筒… 算, 鬼叫自己低估澳洲既吸引力, 貴都要買. 記得里奧同我講過柯達 100 同富士既差唔多, 但 400 近乎垃圾, 千祈唔好買. 但係個個時候, 睇住個海灘咁靚, 唔影簡直對唔住自己.
不聽老人言. 筒柯達400 浪費左我澳洲既四分一心機. 完全唔知影左 d 乜.
究竟係我技術屎定係菲林問題 – 我當然認為係後者 – 好快會知. 因為我仲帶左四筒 富士 100-400 去. 過兩日有結果. -
<垃圾>
自從人類發現循環再造呢樣偉大行為後, “垃圾” 呢個詞語變得有點詭異. “垃圾”可以成為有用的東西, 咁仲叫佢垃圾有點名不副實. 以後鬧人 “垃圾” 係褒定貶? 使唔使下下都要 “無用既垃圾”?
儘管人類有循環再造, 佢地最叻就係製造垃圾, 一些不可以循環再造, 是名乎其實的垃圾. 唔係既話使鬼咁多發明家. 最好的例子就係人類以文字寫下許多垃圾, 作為直接 output, 或供其他人用作生產垃圾之用 (intermediate input). 當然包括史弟許多的辛格文字, 還有無數既法律條文.
廢話少說 – 這句話我幾個月前已經講緊, 就好似政府話香港落實一國兩制一樣 - 我幾年前係退休 J 既推薦下 (退休 J 係邊個? 並唔重要. 最重要係佢廿幾歲已經退左休) 我有幸成為 gmail 既用戶.
未用 gmail 之前, sinaman 個個, 簡直嚇死人, 每日平均有成三十封垃圾電郵, 恐怖. 每一日開郵箱, 都係咁 delete d 電郵.
一改用 gmail. 嘩~~ 不得了, gmail 竟然懂得將人家發給用戶的電郵 scan 過 (我肯定佢d 員工有偷睇人地既電郵), 垃圾電郵 – spam – 會直接丟到 “別處”, 無謂大家一開郵箱就係度狂 delete.
不過, 最近我發覺佢個 spam filter 開始頂唔住, 每日都會有各方奇人異士話我知可以以優惠價買偉哥. 但史弟想話俾佢地聽, 我中學同學既女友係係輝端做 (佢做白老鼠, 負責試下偉哥得唔得), 要既話 – 雖然未必使 (王傑 : 即使真相哪有勝過一仗~~ 呀呀) – 史弟可以以特優惠價買.
有時做野做得悶, 又無人發電郵俾我個陣, 我就會去 “別處” - 即係儲住垃圾電郵既地方, 睇一睇d 垃圾電郵. 當然唔會咁笨開黎睇, 只不過睇 heading 同第一行都知係乜野. 不過好多時都睇唔明, 原因係有勁多既垃圾電郵係用韓文寫成 – 即那些全部係圓圈, 三角, 直線, 曲線 既所謂文字.
如果一個國家電子傳媒及發達程度可以用垃圾電郵黎直接量度, 即垃圾電郵越越多國家越發達 – 情形好比固體廢物與國家生產總值呈一個正關係 – 即非洲窮人連人肉都想食邊度會有廢物的話, 依我既電郵顯示, 毫無疑問美國既國力仍然係淋巴溫. 佢既製藥業 (即偉哥) 同金融業 (即按揭業) 尤其旺盛, 然而佢既婚姻/性行為介紹服務更是雨後春筍. 至於韓國, 應該係淋巴吐, 不過由於睇唔明, 唔知佢介紹乜野服務/商品.
祖國正急起直追. 好多團體話可以收錢介紹白領我識. 白領? 白領? 我日日都望住幾打, 不如你俾錢我介紹俾你拉. 有人妻, 人夫 (男女平等), 美女, 醜女, 港女, 賤男. 廿皮任揀.
仲有d 係日本既電郵. ~~~~~~~~~~~~~~~~~~~ 唔好心邪, 係我去日本既導遊電郵…. 導遊~~~~~~~~~ 唔好心邪, 要俾錢, 而且我女友都一齊………. ~~~~~~~~ 3P?
另一種垃圾, 就係隨銀行月結單寄黎既 “優惠券”. 這不是申請信用咭送既 i-pod 或者 psp, 而係佢不請自來既彩色紙張. 每一次我開銀行寄俾我既月結單, 我只會係信封拎張單出黎, 裏面成吋厚既野, 我眼尾都唔望就會掉去垃圾筒.
我都唔明, 銀行咁多人, 咁多數據, 可唔可以寄呢d 優惠之前做下少少分析? 最簡單 : 一個廿六歲, 未婚, 同屋企人住既男仕, 點睇都唔需要 mothercare 既 $100 現金券掛? 妙麗現金券點可能用得著? 可唔可以睇一睇個客過去十二個月係邊度簽過咭, 同買乜野多, 然後先寄d 有用少少既野黎?
寄d 券出黎都係想人用你張咭, 俾少少誠意, 一定有回報. 銀行而家呢種水銀瀉地, 唔理好醜, 一於有殺過無放過既宣傳心手真係落後到爆. 同一個無知既賭客去到澳門神話, 見到大細台, 拿拿臨買晒大細圍骰點數, 好合皮咁坐係一邊, 無乜分別. 好彩既話有一兩局開圍骰你羸到錢, 咁賭就真係倒錢.
匯豐o岩o岩寄左一封野黎, 封面寫住 “誠獻年費豁免及獎賞優惠”. 我張 ican 咭, 大學個陣申請, 終身免年費. 唔知佢誠獻乜春. 打開封野, 唔見有現金, 發現一疊優惠券. 除上述 mothercare 及 妙麗外, 有以下商號既優惠券 :
1. DAN RYAN (上一次食係兩年前, 好貴, 唔好食)
2. 意粉屋 (食極都食唔到 $250)
3. 哈根. 達斯 ($200 當 $30 用, 有少少建設性. 但兩個人食極都係 $180 落樓)
4. 翠亨村 (上一次去飲茶係八歲)
5. GIGASPORTS (唔可以用黎買 NIKE/ ADIDAS)
匯豐係咁, 東亞係咁, 渣打, 星展, 全部都係咁. 東亞寄親都成吋厚, 邊 Q 個得閒得?
史弟係度呼籲 : 各銀號與其浪費紙張同資源, 不如寄幾張惠康/百佳 $5 無限制現金卷黎, 功 . 得 . 無 . 量. 唔寄都算, 就連d 垃圾都黎返你d 員工要咧. 或者人地黎買基金先送俾人拉.
至於如何用數據用增加收入, 打低對手既真實事例 : wal-mart 係英國唔夠 tesco 打, 都係由於後者識用數據分析顧客既消費模式. 相反香港銀號市場部, 充斥住各式各樣既美女…
-
<Cont’ 明報世界盃報導>
圖片版如下 :
(轉載自明報)
好一幅八陣圖. 就算諸葛亮再世, 恐怕也未必完全了解呢幅圖. 當然, 諸葛亮未必知足球, 列文 同埋 no look pass 係乜.
如果你認為明報仲係個份 “適合中學生學中文” 明報, 請闡述何謂 “射門角度刁鑽的皮球” (請參閱羅素下面個個 box). 史弟中文唔好, 皮球可以用上 “射門角度刁轉”, 係咪下次可以用 :
“時速一百二十公里的羅賓奴直飛死角入網”
“推左走右既足球殺入禁區, 並獲得十二碼”
“籃球來一個 alley-oop 三十六十度入樽”
本份做唔好, 成日就搞三搞四.
值得留意既係, 意大利球員著既係由 cookies 四女擔任代言人既 sketchers 暴走鞋.
明報萬歲~~~
科學足球萬歲~~
我在 fifa.com 看片段, the most entertaining team 有阿根廷…. 我實在很喜歡阿根廷.
-
<失蹤人口 2>
咪感到奇怪. 當加菲貓有第二集 (儘管你未必知有第一集), 百法百中又有第二集 (要係 DoDo 姐個鼻未跌落黎之前拍好), 老友記拍到第N 個season 先肯收手 (由 jennifer aniston 未結婚扑扑脆到佢前夫搭上更加仆仆脆既 angelina joeie), 我既失蹤人口有第二集, 有乜出奇?
大概一年前我提及過想搵返既失蹤人口 (必看, 否則下面一定睇唔明), 當中包括小學既初戀情人, 還有碩士時的日本仔朋友.
今天有意無意間終於搵返日本朋友, 不過係係網頁度. 原來佢仲未精盡人亡 :
Graduated from Hitotsubashi University with BA in Business and Commerce. Working experience at UBS Securities, Investment Banking Department, and was involved in financial/operation strategy and stock market analysis. After joining OPE Partners, responsible for corporate valuation, financial modeling, and due diligence, and has been involved in foreign investment deals and buyout.
・
Kawaba Resort Co., Ltd. Director
無見幾年, 佢塊面長左好多, 起碼成倍. 唔知係咪睇得咸片多, 佢個樣好撚淫.
Director? WTF. 我仲係一條溝唔到女既可憐虫. 嘩哈哈哈哈. send 左個電郵俾佢, 希望可以係日本短聚拉.
然後某一天上班個陣, 係街口撞到 “某時期的同學”. 大家迎頭相向, 互望大概有 0.5 秒. 你我沒有向對方打招呼, 也沒有停下來. 你我繼續上路 – 其實在那 0.5 秒裏, 我嘗試用計量經濟學 (總之好多數字) 走二千八百個模型, 計三千四百條方程式, 去計算向你打招呼的得益和代價.
原來, 0.5 秒就只足夠 (1) 察覺到有個人 (2) 你原來認識這個人 (3) 眼巴巴看著這個人在身邊擦過. 我開始相信, 這是最好的結局. 就算有強力水晶球, 我也不知道巴勒斯坦和以色列恢復對話後會怎樣. 我不想, 不敢, 也不能知道.
生活可不是加減數.
原來, 0.5 秒就足夠我看清楚一個人. 你看上去胖了, 而且面和眼睛也有點浮朣 – 我打賭是你的病和治療的藥物令你如此. 還有, 你的衣著也浮誇了, 浮誇很有點像時下的旺角妹. 若再多望 0.1 秒, 我大概笑個不停了.
你我沒有為對方停留, 也沒有再想聯絡對方.
這是最好, 也是最悲壯的結局. -
<得閒, 飲茶 3>
到這班三字頭女生走到社會工作, 她們基本上已形成一種幾根深柢固的預期, 女生是要男生追的. 而在物質上, 因為好多女生在三十歲前工作順景, 可以照顧自己, 於是乎根本不再考慮結婚生仔為最後依歸. 四字頭的可有點女生不同, 儘管她們會工作, 會有機會上位, 但她們多會選擇結婚, 也會選一些工作不大需要負太多責任, 無乜手尾要跟的工作 – 秘書小姐, 中小企的內部會計, 跟單文員等等.
可憐的是那些三字頭男生, 他們的預期及腦袋根本追不上女生的改戀. 為何女生的預期有隨住社會進步有改變, 但男生沒有或變得較慢? 廢話一點說, 儘管女性的地位提高了, 多人工作了, 但對於男性來說, 機會沒有變少過 – 大學學位的增加多過額外女生入讀的數目, 上市公司的主席及主要職位仍然是男性. 香港只有富翁而沒有富婆 (對不起, 根據維基, 王德輝是九零年被人綁架, 龔如心要到九七年才正式要求法庭宣佈王死亡, 龔才正式成為富婆) 明明一直告訴我女生和我結了婚後會做家庭煮婦, 但她們現在連婚也不想結~~
基於以上發展歷史, 三字頭男生和女生基本上建立不同的預期. 男生一方面希望女生可以善解人意, 細心, 體貼, 另一方面因為不斷目睹女生在社會上的地位提升, 收入增加, 常希望女生可以自己解決問題, 不理是心理上的還是財政上的. 男生自己呢? 他們好像沒有怎樣進步過 : 大學畢業的人工可以抓二十 k, 只是中學畢業的, 不僅唔係識好多字, 人工有萬五元一個月已經算不錯. 相比女生的時裝店 (儘管係不斷去), 男生可花錢的地方可多了 – 遊戲機, 相機, hi-fi, 電腦, 各類書籍 – 一個月其實無乜錢剩. 沒錢想泡女? 不是不成, 但要花點心機心思. 走到社會的女孩天光受氣到日落, 只要是男孩肯花點心機, 女孩是十分受落的 – 許多男孩走去學整蛋糕, 也是為搏紅顏一紅罷了 (當然呢D 技巧對住所有女生都受用, 係 general skills). 畫幅畫, 寫封信 (唔係電郵, 係用原子筆寫既), 老老實實, 可以殺死好多人.
但食慣快餐既男生, 點肯投資落呢d 技術度? 落慣的士高, 老蘭既佢地, 只要花一百幾十就有免費餐食 – 我很討厭這個用字 – 可苦還要學呢學路. 唔肯付出就想溝到女, 這不是妙想天開嗎?
而女生呢? 大家工作都有壓力, 不可能再叫佢地再好似以前咁, 對於男朋友千依百順 - 我日頭受男上司同d 客既氣都夠慘, 放左工仲要受你條粉腸氣? 她們世面見多左, 知道世界係點, 而且收入不斷增加. 同男朋友一齊, 點可以仲屈就係茶餐廳 – 老老實實, d 女仔自己一個人都可以去翠華食野? 於是乎男女走在一起, 就如搭上大胸的女友一樣, 是一條不歸路, 大家生活質素, 水平和消費也會以幾何級數上. 但為何女友回唔肯 AA 制? 唔係唔肯 – 我相信好多女仔唔介意 AA 制 – 而又係個句, 佢地成長既片段不斷提示她們, 付鈔是男生應有的責任.
女生可以回饋男生的, 實在也不多. 不懂煮飯 – 就連煮個公仔面也懶 – 不溫柔, 不體貼. 要吃貴野, 又要男生俾錢, 難免俾人既感覺係貪得無厭. 最底線講到性嗎? 又有多少女生肯從不同的渠道去改善自己的性技巧?
於是乎兩性都徘徊於預期與現實之間, 找不到任何著腳點. 歷史叫人太沉重. 長期無法取得同識, 大家開始互罵相方不是 – 而在互聯網推波助瀾之下 – 產生了大間 “港男” 與 “港女” 的討論. 沒有 doubld coincidence of wants, 可以用鈔票解決問題 – 但沒有鈔票是問題的根本, 沒有辦法解決了.
