September 5, 2006
-
<最討厭的地方>
我住蘭桂芳附近.
但我其實好憎蘭桂芳.
所以住年幾都係去過十次以內, 其中八次係為左睇世界盃, 另外兩次係為左去香江大學校友會食飯而經過.
用最簡單既語言講, 蘭桂芳係一個極度虛偽的地方.
三九唔識七, 係酒吧遇見, 個個都好似他鄉遇故之咁, 投契到不得了. 於是乎你可以同一個完全唔識既人談天說地, 風花說月, 講你有幾快樂/不快樂. 大家明明是屙香港尿, 食香港米, 讀香港書的, 但偏偏以一句 “yo, sup man.” 打招呼. 跟住剛相識既大家, 就好似失散左幾十年無見既兄弟咁, 天南地北, 古今中外, 琴棋書畫, 中英法日, 無所不談 (我d 四字詞係識咁多). 然後我請你一杯 jack daniel on the rock, 你轉頭贈我一 set shooters 作回禮. 於是乎大家酩酊大醉, 輕輕鬆鬆鄧梓峰, 傾談了一個晚上. 到了第二天在鏞記對面的星巴克醒來, 發覺曾用手機打出一個不知道對方是誰的電話 – 儘管昨夜你曾與此人盡訴心中情.
轉個鏡頭, 在 dragon-i 內, 沾了七分醉的冰鮮豬排, 其臀部在你肚臍對落六寸對下徘徊, 而一口氣吸了半支醇萬的你以三吋不爛之舌在豬耳探索, 雙手則在比國際機場更平坦的山頂游走. 不知情者以為你們剛拍拖三個月, 打得火熱. 卻不知在分貝 240 的黑人音樂下, 你們連對方叫什么名字也未能聽得清楚, 就開始忘我地跳著辣身舞.
鎖你, 我完全覺得一切都好虛偽.
不錯, 在 dragon-i 內跳舞的男女, 120% 是為了一夜情, 或者幾夜情 – 要解決了人生金字塔最底的一層, 人才能向上爬呀 - 這是殷海光說的. 但對於放左工依然要係酒吧同人 social, 我接受唔到. 三唔識七做乜要講重要野俾你知呢? 咁左咁重要既野俾你知, 我同真正老死又傾d 乜好野? 我連係真正為工作而鳩o翕都唔想去, 放工仲要同你班粉腸扮 friend?
蘭桂芳好些酒吧, 連拳也不准客人猜. 怎樣? 難道要我干哽四支 black label, 五支喜力嗎?
我寧願去灣仔有香江大學學生做拳手, 狂劈四打金威埋單無端端 $960既地道酒吧. 那句 “yo sup” 留番俾假鬼佬拜山用好了. 我也寧可跟邪惡軸心 – 任何男人身邊也有的一班壞分子 – 到 neway 去叫 $36 買八送三的 budwiser 玩失蹤狂吸醇萬一首歌都無唱過淨係睇左周慧敏谷胸既mv 埋單三千二幾跟住係灣仔搭 $12 紅van 三分鐘返屋企. 那是空虛無聊, 但不至於虛偽.
真正的朋友, 只會識於微時, 而人物和地點一定不會是 $60 一支藍妹的中產及酒吧. 你們可能曾相約在西貢一起 wild camp, 拿著百佳買的伏特加及金龜o麥花生, 到望著白沙灣的山頭一飲而醉. 大家還可能在山頭大叫 “我沒有醉”, 二人然後鬥快跑到山頂 – 那當然是飲醉酒的人才會做的事.
又或者一大班人暑假, 每人背著六支大喜力從中環碼頭搭船到大嶼山, 然後到塘福租一間的渡假屋. 那八百呎的小房, 其實不過是情侶的炮房, 床上還有熱熱的避孕套, 卻不知為何能容下十八人. 大家 bbq, 到沙灘玩沙, 煲煙, 到晚上到附近的士多租恐怖片, 讓同行的女同學嚇破膽; 又或是租下素人黃色影片, 男生來上一課向人體奧秘史, 女生則學懂高級減肥學. 大家也再沒有分房分床睡, 反正是睡著了就好.
半夜你屙夜尿個陣, 發現係學校坐你旁邊的肥仔鼻寒聲似七級地震, 孔武有力的籃球隊主將睡相似蝦米, 文科考第一的書生夢遊時會扮起愛因斯坦來. 第二天醒來, 大家再來一個循環, 打牌飲酒講粗口, 直到第七天暑假完結.
若干年後你會回味大嶼山發生的人和事, 儘管你的初戀情人是藉機會與你分手, 儘管你曾和與你看上了同一女孩的高大衰打架, 這些都沒有回頭路了. 但不要緊, 你會回味, 你為曾過過這樣的日子而感到興奮和安慰. 這些時光, 儘管到你會考結果是 12 分時 – 可惜你不是低分天才 – 會覺得是虛渡, 但許多年後你在街看到一班中學生, 正準備去長洲時, 感覺卻是那么充實.
但你不會懷緬在蘭桂芳的日子. 那些日子, 其實是你人生最黑暗的一段時間. 星期一至四 OT 至晚上十二點, 連吃麥當奴的時間也沒有; 辛苦地等到星期五, 沒有男友的妳卻找不到地方去, 於是乎體內的工作癮又起. 妳掙扎, 不想繼續和四十歲還沒有結婚的女主管在這個 happy friday 戰鬥下去 – 其實是妳怕若干年後變成她 – 於是乎一個人走到蘭桂芳, 但工作癮令你不自控地繼續工作上的 social 人生. 不想回家, 不想太清醒回家, 不想太清醒地想著工作回家, 於是你在 71 吧找個三唔識七, 目不識丁, 有眼無珠, 坐著 bar 台的人傾訴. 三杯 JD 已令人失去自控能力, 忘我, 忘掉老女主管, 忘掉自己將會成為她…
這樣的人生, 循環了六個年頭後, 你一天感到, 原來自己浪費了 312 個星期五 – 你可以學完四套 dickson YOGA, 跟八個舞王跳拉丁舞, 學完黃桂南推銷的所有零格風語言. 但你偏偏去了做工餘的 working life, 與那些九唔搭八, 只見一次的假鬼佬盡傾心中情. 這樣虛偽的日子, 你不想回味. 你寧願死, 也不想這些日子再出現.
_________________________________________________________________________________
作者取材, 休息數天
(後面: 又係呢句? 悶唔悶d 呀? )
Comments (20)
” 那些日子, 其實是你人生最黑暗的一段時間 “…..
哈哈，好難得我完全認同你所講既每一句說話。
推！
[ 我想轉載去我個 site！ 無問題？ ]
睇到簡直想喊！所以，我來來去去也只是得十多個中學時期已相識的朋友。其他？嗯…
嘩! 擊掌!
正﹗
中學時暑假去大嶼山宿營果段真係正~~~果時暑假既重頭戲就係去camp, 真係好開心, 不過我地無托著幾支大喜力入去, 反而係有人托住部大大部既CD 機入去, 千山萬水咁搭車搭船再行餐死先入到去, 都唔知點解幾次租d 屋都咁鬼難搵, 而家諗返都好攪笑, 不過都已成過去勒……
我之前果份工係蘭桂芳附近, 所以每日返工都會經過果度, 我無你咁憎果度, 因為基本上我無去過果度, 次次都只係經過, 果時試過有同事話放工去果度飲野喎, 我無去度, 心諗放工都仲要對住你地, 真係好熟咩? 但係佢地又唔係真係咁fd, 只係正如你咁講social 下, 總之成班都係虛偽到死, 去social 咪又係各自另有目的, 呢個世界又真係有d 人可以咁假, 放左工都繼續做戲, 乜唔辛苦既咩? 我真係做唔到
推推推推推推推推推推推推推推推推推推推推推推推推推推推推推推推!!
有時去d有一大班人既party，都唔知social黎做乜。講來講去，都係個「仔」字或者「女」字。
如果要擴闊社交圈子，或者充實人生，其實應該去做義工。
我有朋友很享受老蘭生活，我卻向來不喜歡。
好端端的大家廣東話為母語到了那裡卻來「wussup」，的確虛偽得作嘔。到了床上還不是說回「粗鄙」的廣東話。
無比認同。
還有，史兄的行文風格好像跟之前有點不同了，很特別。
蘭桂坊…
響蘭桂 social 0既, 一係旨在扮布爾喬亞, 一係為搵食. 為搵食0既, 扮鬼又好釣鬼又好, 都係搵啖食0者. 差在食0既係人, 係錢, 定係通殺. 不過印象中好似花0左錢又食白果0既多.
至於為0左扮布爾喬亞0既, 60 蚊一支喜力自我感覺良好一下, 大概同0拍丸 high 一陣個原理差唔多. 對佢0地0黎講, 去少一日就會好似黃庭堅講0既 “三日不讀書” 咁, 即刻變0左一堆地底泥.
不過賤0的講句, 我都想有本事負擔到 60 蚊一支喜力扮布爾喬亞. 有本事扮0野虛偽下, 總好過冇. 當然, 過0左要靠扮靠充0黎 feel good 0既級數又唔同講法.
路過貴境, 隨口亂吹, 幸勿見怪.
史叔，你變老了，但我「NIKE」。
連殷海光都出埋，想搶飯碗乎？？？
去老蘭，一係屌鬼，一係釣鬼。
嘩,好得很~~~我覺得應該四處貼.
可能是人本身懶,情願浪費都唔想做有意義的事…
社交圈可能就是咁,大家哈哈哈咁就一日.因為我們的寂寞.
我也覺得文風轉了…
十分十分認同. 寫得好到不得之了. i love you~
我不喜老蘭，因為我無錢….
哈哈！
推呀~~~
EY : 隨便.
Sorman : 我既好朋友都係中學同學多. 大學嘛….
Denise, Daniel, Kursk, Vincent, 自僱 J : 謝過咧
Reelastime : 你個名… 好特別. 放工仲要見到同事, 真係想作嘔 – 唔係我唔鍾意份工或者同事, 而係放左工大家應該有自己既空間. 使唔使廿四個鐘都對住大家呀, 況且我唔信大家愛對方愛到咁既程度
hyster : 係咩? 前排俾教統局列為壹級禁地之後, 咪廢事寫粗口, 學下陶傑寫野law…
長年輸家 : 請問… 乜係 “布爾喬亞”…
tommy : 嘩哈哈哈哈, 說真的, 即使我唔記得一字一句, 殷海光那篇人生的意義, 對我影響頗大.
布爾喬亞…bourgeoisie, 小資是也.
你見我用0的咁0既字, 都知我呢0的係典型舢舨充炮艇演0野之人…或者同呢0的蘭桂友都未必有咩分別. 嘿~
我只是在想, 像我們一樣花口水/花心機/花筆劃, 跟陌生人說這麼多的心底話, 卻不敢給至親的人知道..
又是什麼樣的一種「虛偽」?
htAB說得好啊！是虛偽，還是變態？
我由google來的
很好的文章 : )
史兄，可以refer 嗎? 我想吹個故仔好耐。碌左好耐先搵得番你篇xanga
daphne629 : 求之不得呢. 請~~~