September 11, 2006
-
<寫字的速度和質素>
以男孩的標準來說, 我的字體值 90分. 當然, 係自己俾自己 90 分. 同埋其實我係一個女人.
前陣字與友人談起寫字, 我說定要讓子女寫得一手好字. 現在的孩子, 根本不懂寫字, 好些連名字也寫不好, 寫得像林正英在彊屍先生寫既鬼劃符差唔多. 一手好字, 是資產. 寫字是一種長遠投資, 要從兒童時學起. 男孩能寫一手好字, 寫一封情書, 女孩定會失魂落魄. 如果身懷一手醜字, 就獻醜不如藏拙, 輕則把女孩嚇怕, 重則俾女孩及其友人作笑話.
我唔識寫文學, 寫左等於獻醜. 講下實用及功利主義既野.
前陣子統計處有人黎屋企做調查. 個個男仔手字… 我完全唔知入電腦個個人點可能睇得明 – 我想連該男孩也搞不清楚自己寫什么. 我有衝動同佢講 “不如我幫你填”.
我也當過學生. 女孩子的字, 永遠比男孩的好, 最少整齊, 端正, 清楚. 很多男孩子寫的字, 即使寫在格仔紙, 也像八號風球後的海旁, 或是星期日的皇后像廣場, 亂七八糟, 潰不成軍. 一個人的字反映其心理質素及個性, 大概是對的.
我小學二年級才懂寫自己的名字 (太多筆劃), 並一路寫得一手醜字. 直到小學五年級, 坐在旁邊的男孩, 鐵畫銀勾, 寫字好似雕刻咁大力. 字寫在第一頁, 可以印到頁底. 偏偏他寫出來的字, 字體端莊, 深深的吸引了我 (係d 字深深吸引我). 好野梗要抄, 於是乎好一段時間, 我寫字也是出盡九牛二虎之力. 驟眼看上去, 有九成似那同學的字體.
字體雖然整齊, 但下下大大力, 好累好累. 更重要的是, 寫字會寫得慢, 明明十五分鐘能做完功課, 雕刻要花上四十五分鐘, 阻住我睇童夢. 小學冇教寫英文 “撩草”, 但跟姐姐學過一陣子. 升中之後, 將英文 “撩草” 溶入 中文 中, 不僅字體美觀, 而且速度提高了不少.
在美觀與速度取得平衡, 並不是容易的事. 如果你預科讀文科 – 中史, 西史, 地理, 文學 – 你會明白高考根本唔係考你記性, 係考你寫字的速度. 如何在四十五分鐘內把十頁單行紙用文字填滿, 是一種學問; 而如何在填滿之餘, 令改卷的人也容易閱讀, 這是一種更高深的學問. 只顧字的美觀而減慢速度, 答題時手會跟不上腦袋, 很容易答漏要點; 寫一手快但醜的字, 沒有人看得明, 沒有用.
我也當過半個 “老師”. 大概是電腦的興起, 好多細路, 而家連自己個名都寫唔好. 老師是沒有時間幫你研究你寫左d 乜 – 統計處那男孩子應該是電腦高手吧. 你寫字既責任, 就係要老師唔使用腦咁改卷. 字體不堪入目, 胡里胡塗, 是很難取得高分的.
好寫一手好字, 最重要, 是執筆的方法. 根據我觀察, 執筆方法不正確的人, 寫字靚極有限; 所有寫字美觀整潔的人, 執筆方法大致正確. 現在的父母, 一味狂買迪士尼動畫, 兒童教育軟件俾仔女, 很少聽見父母 “陪仔女寫字練字”, 或者 “捉住佢隻手學寫字”. 兩個畫面, 一個係老母開心咁陪個仔玩電腦, 一個係老頭捉住喊緊既女寫字. 後者是較溫馨, 較有 “人氣” 的.
我還記得, 小一時用原始人拎長槍打獵既方法執筆寫字, 阿媽二話不說, 一野 fit 過黎, 手指腫到好似大脾咁粗, 拿拿臨睇住圖表黎學執筆. 每逢小學開學, 頭幾天除了訂校簿, 老師會特別問有沒有同學需要購買矯型膠球, 以改善執筆方法. 將那個膠球套在筆尖對上, 執筆時姿態會正確起來. ”執筆膠球” $5 一個, 好些同學像見到 twins 閃咭唔使錢咁, 十個十個咁狂入… 那時沒有 twins, 改為夢劇院好了. 由於藤條更有效, 我沒有用過執筆膠. 山頂既朋友, 有用的嗎?
持住一手好字, 我經常恥笑人地既字體. 女友的字像豆鼓, 細細粒; 退休 J 既字係圓圓的, 好似卡夫最細粒個 d 棉花糖; 女同事既字醜得我叫佢用電腦打算, 唔好俾我見到.
延續申讀 :
(1) <寫意> jeanne56g
(2) <寫字> hystericireul
Comments (16)
我ｄ字其實同一個陝西農民的字差不多，這也成為我在班房攪gag的一個好題材。
以前我的字很整齊，小四的時候參加公開作文比賽，我前所未有的有心機寫字，得獎後被展覽。不過媽媽看了我的字，說，你看冠軍那個的字比你好。
弱小心靈從此走上歪路－－我不再用心寫字，我要用「文采」證明手字唔駛靚。
兩年後，我真的得了冠軍。
待續（在我自己那邊繼續寫）
嗯….好文。不是馬後炮，看過hystericireul和jeane 那兩篇文章，那刻我是想講一講現在小朋友 (以至中朋友和大朋友) 都不能寫一手工整的字來…我也覺得能寫得一生好字是一個assest 來的。嗯…可惜那怕忙得沒有寫下來…一直擱到現在給史兄寫了 (當然你比我寫得好很多)
我d 字寫得好唔好其實好睇我果刻趕唔趕時間，同埋心情係點，所以都好飄忽下，小學時好羨慕ｄ女同學ｄ字好靚，真係好似教科書入面ｄ字咁，好勁～不過我ｄ字既自我評分都係中等至中下啦，又唔係特別靚，咁史兄你ｄ字係偏大定係偏細架，英文既話會係寫正階定係草書呢？我寫正階靚少少，所以我就寫正階
果個矯型膠球我都好似有買過，不過用兩用就無要勒，可能唔慣卦．．．我有個ｆｄ寫ｄ字都係細細粒架，不過其實我覺得佢ｄ字都靚架喎，佢好有心機寫架，不過最好放大返少少啦
另外，我想借個地方黎問下ｋｕｒｓｋ，陝西農民的字即係點呀？勁撩呀？
陝西農民d字，咪好寫字好似文盲咁，而且完全冇統一風格，即係自己抄一次自己寫既字，搵王七輝案果ｄ字跡專家都會話我假冒文件。
哈～～～咁其實都幾高難度架喎，你英文會唔會寫得好ｄ？我覺得我ｄ英文寫得好過中文少少既
英文好好多。得果26個字母。
史兄，好文!
率直地表達自己的想法，是向來寫作愛繞圈的我努力學習的~
我自問自己的字也算得過去，小學的生字簿都是甲等的。可是我的執筆方法卻殊不正確，像握拳一樣。
而更不幸的，是我一二年級的時候看了中文ETV說「鐵劃銀勾」，那時不懂甚麼陰力陽力，因此寫字真的跟雕刻一般。那時的中指第一指是歪向一面的，因為給長出來的厚繭推開了。(後來可能做粗口手勢做得多，變直回來。)
那些硬膠，我倒從來沒有用過呢。小時候我執筆是握拳式的，隨時準備拿起筆來捅人……
我自己寫字是非常大的，單行紙一行只寫得到十個字左右，有同學──是也母型──寫得到三十多個字，蔚為奇觀。
皇姊寫字也寫得極小，像米雕。
我向來不覺得女孩子寫字會自動比男孩子好看的，因此我倒沒有分開男孩和女孩來比。可是上了大學後，發覺有些男孩寫的字簡直是辨認困難，每個字的部分都是獨立走出來的，要看得明他究竟在寫幾個字已經很難了。
那個矯型膠球，我連聽都未聽過……
細個o個時老豆呃我，話正確姿勢執筆寫字唔會「支力」，所以好比心機跟佢學執筆。
每次覺得「支力」就認為係自己姿勢唔正確，後來先發現，寫得多字係點都會『支力』o既……
我自己d字一般啦，睇心情啦，記得考會考時正值人生的高峰，撩得黎睇到，快到無朋友，只不過考完隻手好似唔係自己一樣….
越來越覺得讀得書多的人寫字唔一定靚，又越來越明白細心的女仔寫既字係好睇d既，返工見d醫生寫D字，只想講一個字：「頂你個肺呀~~~~」 唔識串個藥名就撩過佢….撩到呢….
所以由細到大都覺得護士係世上的認字特警，咁都睇到
當然，宜家明白只不過係估到佢大約會係邊個位寫d乜姐….
我d 字體都有90 分
Kursk : 謝絕推銷.
iamsorman : …我近排都忙到嘔… 你個強屈金幾正..
r 兄 : 我英文寫草書整齊過正階..
hyster : 呢個係後花園, 真人並唔係咁率直. 風格唔同拉, 畢竟如果人人寫野好似我咁, 世界會好悶. 大家有相對優勢, 你唔同我, 世界先有趣.
bonnie : 係呀, 開頭執筆唔正確會支力, 但如果壞左手勢, 執返正確先至會支力…
溫臣 : 認字特警… 哈哈哈哈
退休 j (自僱 j???) : 90 分核突.
因為寫字太慢，所以高考輸了。
唔好講咁多,SCAN手字上來看看先。
咁係咪個個都要scan?
死未，咁我咪連生存既價值都冇。
我係連去銀行簽名，都要每次拎定身份證出黎等人查既人……
我好鐘意睇人d字o架！
scan 黎睇下都好喎！