September 13, 2006
-
<和她拍拖的, 是你>
SH 有這么樣的一個遭遇 : 友人的女友找不到友人, 深宵致電 SH. 睡夢中的 SH 看到來電顯示, 立刻把電話掉到老遠. 這女人如何麻煩, 早已聽聞.
然後一天, SH 餓到七彩, 諗住落樓食飯. 在樓下碰到該友人的女友. 女友哭喪著臉, 問 SH 知否友人和別的女人有染, 如此這般. 搞一大輪, 最後 SH 去到飯店, 飯店已經關門.
許多人擁有成人身分證, 卻表現出兒童般的智商 – 不是嬰兒, 是由於嬰兒聰明得很. 明明穿著中環 OL 的服裝, 拿的是香江大學的畢業證書, 幹的是國際顧問公司的高級顧問, 行經比起沒怎么唸過書的人更欠缺常識.
自己唔識好好管教男朋友, 或者男朋友瞞住你去搵第二個, 應該自我檢討一番. 你來找我, 難道預計我會鉅細無遺地將友人所有開房的時間日期對手參與人數三圍數字年齡性別第一次約會地點告訴你嗎?
拜託, 和他拍拖的, 是你. 你, 是友人的女友. 我和你的關係, 就是那么多. 對, 你是可憐, 但說到最後, 我的好友是你男朋友, 不是你. 對嗎?
食屎屙飯地將友人的電話號碼告訴女友, 和吳三桂當年放清兵入關, 分別不大. 失機無神收到有來電顯示但不知道是誰的女人, 竭斯底里 , 聲嘶力竭地問 : 我男友去左邊?
我唔係佢老母, 邊撚個知?
拜託, 和她拍拖的, 是你. 你有問題, 我可以幫你解決. 你女友有問題, 你自己解決. 夜晚陳佢既, 係你唔係我. 況且, 我無興趣陳佢.
搞清楚一點, 你是我朋友, 而她不過是你的女友. 好些更離譜, 竟然希望朋友代講分手 (就像韓國電影 “真的愛你” 中車太鉉的角色, 但當然冇錢收). 大家廿幾歲人, 你當初拍拖無問過我好唔好, 但分手既時候要我幫你講? 還聽過一些故事, 男的瞞著女的去滾, 男的像縮頭烏龜, 男的母親最後要替兒子認錯. 這樣的男人, 要來幹嗎? 也有人和我說, 其女性友人的男友最愛在有免費午餐的時候出現, 但每次有機會要科水的場合, 總會消失得無影無蹤. 怎樣? 連小白臉也要友人替你養嗎?
人家反對你倆的關係, 你們就以 “拍拖係我地兩個既事” 來作擋射牌; 吃了虧, 要人幫忙, 就視 “外界介入, 幫我一把” 為理所當然. 活像每逢 G8 表示人民幣要採取更有彈性的匯率機制時, 外交部發言人總以 “人民幣匯率機制乃國家內政, 外國不得干預” 來反駁. 什么程翔, 人權, 法輪功, 政治迫害, 六四事件, SARS, 總之一句 “國家內政”, 不是黃皮膚拿中國身份証講國語在中國出世入籍共產黨的通通給我收聲. 然後當出了錯, 吃了苦頭, 見勢色不對, 或有求於人, 就左一句要求外國 “支持一個中國立場”, 右一句”中國在迅速發展, 許多通報機制尚未形成”, 一聲唔該, 就把自己的責任推得一乾二淨.
史弟也有這裏的一個遭遇. 女同學 JL 背著男友去約會別的男生, 整夜沒有聽電話, 也沒有回家. JL 晨早打來, 叫史弟幫手編織一個大話 – JL 與史弟一起去唱 K (儘管我叫賓周, 但我其實無賓周. 女同學的男友見到史弟, 史弟會立刻除褲以表 “清白”. 所以他們都十分放心讓女友同史弟去劈酒. 當然, 佢地未睇過我既 XANGA…), JL 飲至啤啤夫, 不省人事等云云. 老實說, 這大話只有傻西或者真係自願被騙既人先至會信, 皆因連編織呢個大話既人都唔信…
無論如何, 後來 JL 男友打來 (JL 問過史弟可否俾電話號碼佢男友), 史弟用好似你打去信用咭中心熱線既聲線 (請按 “1″ 字…) 講一次大話.
信, 就預左唔信. 但條友竟然後來打黎屌鳩我, 話我串埋 JL 黎o厄佢. 係, 但你屌鳩我有乜用呢? 難道是我每晨早都打俾朋友問佢地有冇大話要夾計講? 就算我認 – 我當然無認講大話 – 我都淨係得屎眼俾你, 你係咪無左 JL, 要返個男人屎眼? 唔係, 咁係咪屌鳩完我就叫出左啖氣呢?
明白一點吧 : 和她拍拖的, 是你.
史弟的父母早已離異 – 不論是名義上好, 實際上也好 – 對於關係的終結, 早已看化 (當然還有其他原因, 另文再續). 早年十分仇恨老爹, 不是他不愛我們, 而是是他不明白關係是兩個人的事, 要結要離, 是兩個人的決定 (他們當然會考慮父母兒女及其他人的意見). 條友屌鳩我阿媽既朋友, 工作地點附近的街坊, 還有媽的兒弟姐妹. 大家幾十歲人, 是不會這么容易被人誤導的. 買基金, 股票, 可以被電視電台d 粉腸o厄, 但十幾年既忍耐及痛苦, 不是假的.
拜託, 和她結婚的, 是你.
老爹後來改變策略 – 所有人也是經濟動物, 不論年齡背景宗教收入, 行為皆會因誘不同而改變 - 叫阿姨舅父幫手勸阿媽唔好離婚. 舅父是個大情大聖之人, 許多人說他像許冠文, 他大概會回答 :
勸乜撚? 咁不如我勸你乖乖咁同佢離婚呀笨.
據我估計, 當年老爹沒有找舅父, 否則蘋果創刊無耐已經有十級家族血案報導. 我也肯定每年的倫常慘案中, 有不少遇襲目標並非當事人.
別將你男/女朋友統稱邪惡軸心. 殺手也有小學同學, 葉繼歡也有朋友, 但不見得他們全部口袋都有支黑星手槍. 和他/她拍拖的, 是你. 如果你的男朋友因為邪惡軸心而變壞 – 他已經拿了成人身分證的話 – 他一是本質已經腐敗. 一是他本質清純, 但受朋友引誘變得腐敗, 又或是他才是邪惡軸心的要員. 這樣的男人, 不要也罷, 又關他身邊的 “邪惡軸心” 何干呢? 又萬一他朝台灣三千萬人 100 百仙支持台獨, 他媽的共產黨又怎可以只派人暗殺陳水扁及其父李登輝呢?
拜託, 和她拍拖的, 是你.
Comments (8)
史兄的文章越來越噴飯
我都唔小心gee左一聲…好似老師咁
經你咁樣一提，我都諗起一段經歷，不過就無你講果ｄ咁誇張，會深夜打黎擾人清夢，有次我有個女性朋友既男友好慌張咁打電話黎搵我個ｆｄ，我記得果陣我係岩岩放工，詳細情形我唔記得勒，但係我就記得佢好驚咁話唔見左佢，我果陣仲以為佢意思係佢失左蹤tim，點知佢意思係佢打佢手機搵唔到佢姐，再問多少少，原來佢只係果日call 唔到佢，唔係過左幾日都搵佢唔到果隻，心諗佢使乜咁緊張？之後佢仲話驚佢會做傻事喎，心諗唔係卦，睇你地個樣都係嗌下交姐，唔使死呀話，同埋以我所知，我相信我個ｆｄ唔會做傻事lor，又或者最少唔會為佢做傻事lor，之後應承佢話如果我個fd call我就話佢知，後尾我記得話返俾我個ｆｄ既時候，佢既語氣係懶洋洋咁同我講話無野呀，好似好少事咁，都唔知點解佢男友會咁大反應
不過我覺得無論如何都唔應該打電話去煩自己既女友／男友既朋友，你地兩個人拍拖，有ｄ咩咪你地自己兩個解決lor，做咩要去騷擾人喎，更加唔應該半夜三更打俾人lor
擊掌!
佢地係犯賤丫，定係逃避現實搵人發洩?
夜晚陳你的. 是我
如果有睇過《警訊》的話，有集講警察放蛇捉唔用安全帶既小巴乘客，當放蛇警察表示身份既時候，被捕者唔係自責、亦唔係鬧警察，而係鬧司機﹕「啊﹗你同佢地夾埋﹗」
香港電台簡直係拍左一個「人版」出黎。
有D人根本唔想面對現實，於是搵人出氣或者推卸責任。
等於但凡有病人死左，家屬就會話醫生醫死人。(醫生係咪真係犯左錯﹖冇人知。)
不負責任，四圍推卸﹔只懂 complain, complain and complain 而不會想想如何改變。
同《女王的教室》裡面女王鬧學生既內容，係一樣的。
呢套戲拍既係細路，講既，其實係大人。
大人向來不比小朋友成熟。
Yeah, there was once this girl (who is my brother’s friend) came up to me and asked me to tell my brother that she is not interested in developing into a relationship with him. I was like, “WHAT THE HECK?!”
拍案叫絕!
唉, 我識得一個朋友, 做咗人地第三者, 個大婆竟然 “局” 我出嚟, 話想忠告我我朋友係奸既
都痴咩線既