January 31, 2007

• <情人節 2007年版>

  早發貼了一點…

  真係令人簡動, 去年的 情人節 entry, 竟然有第二集~~

  好, 情人節… 還有什么好說呢…

  (1) 過去廿幾年, 並非每年情人節也有情人在旁. 在沒有情人的那幾年, 有拖拍的人會打來安慰數句, 說什么 “就快咧, 呢d 野可遇不可求” , “下年咪有, 使乜愁” 等屁話. 於是無拖拍既男人 – 邊有女人肯情人節陪非男友既男人去街 – 於是乎麻甩佬聚首一堂, 舉杯消愁, 大家互相慰藉.

  但若干年後的今日, 我發覺, 其實最應該被安慰的, 並非那些孤家, 寡人, 電車男, 尼姑, 而是個班有拖拍既人.

  此話可解?

  (2) 第一, 這純粹是所謂 “我睇你好, 你睇我好” 既道理. 有拖拍既人想獨處, 單身既人想拍拖, 此乃永恒不變之定律.

  第二, 個人認為, 情人節是一個多舊魚的節日. 首先, 佢無假放. 回歸前英女皇生日翌日有假期, 但聖華倫天奴節翌日, 係唔會有 time-off.

  可惜既係, 咁唔代表你可以一句 “無假放” 之後就乜都唔做. 既然有個 “奴” 字, 大家就要做好奴隸的本份 – 所以我唱國歌, 從來不唱那一句. 因為我不是奴隸. 無論如何, 要滿足女人, 呢日所花的精神, 心思, 比滿足你那四十仍然是單身的老闆更花氣力, 還有金錢. 心思可能大家會滿足於過程, 但恐怕沒有人以俾人斬一頸血為樂. 如果以單日計, 情人節個日鮮花既價格升幅, 比起二次世界大戰時的德國 hyperinflation 還要高. 高又怎樣? 一眾狗公, 可以不買嗎? 當然不可以, 這些值價是有基本因素支持的, 否則那種高得像泡沫的價錢又怎能從情人節出現後, 就一直沒有爆破過?

  當一眾 OL 在公司鬥花多既時候, 此等有如軍備競賽, 搞核反應堆的無聊運動, 會令男友們送花的數目, 心思及質素, 變成一場需要經過精密計算的佈局. 而送花的時間, 比起買賣窩輪更講求 timing – 不單花要大紥要美麗要夠排場, 還肯定要女友全公司都知有人送咁靚的一紥花俾女友, 更重要係, 在收花此之前又沒有四十歲, 生完仔個屎忽大過台面既秘書八婆, 向心急如焚既女友作出以下奚落式對白 :

  “依, 我老公都送左花黎, 乜你仲未有既~~依 ~ 你睇下…. 依~~~~~~依…咁大紥…依依~~ 都叫佢唔好嘥埋d 咁既錢. 儲錢買間大d 既樓咪重好..依依依“

  你唔好埋佢晨早流流依乜春. 一紥花頂多三千元, 同買大間d 樓有乜關係? 總之, 女人一聽到呢d 說話, 就係你既錯. 然後無限上綱上線網上行, 無花無樓無車無有錢老頭, 乜都係你既錯. 即使佢係 ifc 返工, 你係太古坊, 只要電話一響, 一聽, 洪洪的烈火將透過聽筒從港島西直射向港鳥東. 男友頓成炮灰 – 你才付了八百元買一紥十二支的玫瑰, 而遲了送上她公司, 不過是 ifc 保安太過嚴密, 送花仔要經過七重保安, 十八銅人先可以去 55 樓…. 實非戰之罪也, 邊個叫佢係金管局做?

  可惜既係, 買賣窩輪, 尚可求教於一眾財經演員. 但哪裏有人傳授 “如何準時將花送到女友手上”? 有種便自己種, 自己送.

  但誰知道, 誰理會? 為何秘書的花又可以早一點送到? 你自己也答不出來. yahoo! 知識+ 無人答, 誰也答不出來. 你更想問, 究竟為何情人節要送花搞呢搞路? 上維基可以找到答案, 卻找不到解決方法. 別天真地以為你明天補送三十紥, 事情就可以超額解決. 這只會招徠更多恐怖對話 :

  “鬼咩, 佢男友尋日唔記得送, 所以咪今日送番…”
  
  “下? 乜情人節都可以唔記得?”
  
  “呵呵, 可能人地成日係外地工幹, 有 jet lag 呢…”
  
  一眾人等 : “嘩哈哈哈哈~~”

  到時, 沒希望了, 早一點放工, 買定狗屎, 回家送飯吧.

  還可以怎樣? 一會兒與所謂 “邪惡軸心” – 不是意大利德國日本, 更不是伊朝北韓 – 你那班在女友心目中是壞份子的老友, 大吐苦水, 只會徒增自己的壓力. 啞子吃黃蓮從來就是這么一件悲壯的事情, 你只好像姬野愛般, 把委屈像精液般吞下.

  再細心想想, 只是送一年花, 已如徒手前往地雷陣送死. 若不幸 (….) 與同一女友拍上超過三年拖, 要每次也突破上年, 再創新高, 再俾驚喜, 是需要何等創意呢? 恒指也要經歷十年浩劫先可以再創新高, 但你每年既驚喜就要越黎越大. 就如史弟, 第一次手劃唐老鴨; 第二年用 小畫家劃; 今年已經技窮, 正苦練用腳畫唐老鴨咧… 難道你認為買一幅唐老鴨掛畫就可以了事嗎? 我連自己那關也過不了… 除非你對該一段感情已沒有要求, 否則你總想做到最好. 不是最好, 也要80分.

  (3) 幸運地, 我遇過幾個情人 (包括現在那位), 她們也不太講究大時大節要搞大龍鳳. 幸運地, 也遇過情人, 竟嫌到山頂慶祝聖誕節不夠浪漫. 果真一樣米養萬樣人.

  有時候, 女孩子並不太喜歡大龍鳳, 尤其是大龍鳳左幾年…… 若然男孩肯花點心思, 寫兩隻字 (但事前請練一下中文字…以免對方有嘔吐既感覺), 劃兩隻公仔, 細心觀察一下女友, 要令女友快樂, 其實不太難. 退休 J 的女友也曾說過, 若男友肯寫信給自己 (唔係電郵), 其實是份不錯的禮物… 以前一個女友喜愛 GUCCI, LV – 她大概也會承認自己是港女 (… 噢, 這是個網上禁語…), 她一年生日, 我特意買了一本壹本便利 – 不是為了阿嬌的偷怕相 – 而是為了裏面的 LV, GUCCI 袋相. 我從相片中把她的頭剪下, 然後拎左去鵝頸橋… 呀, 唔係… 係將個頭貼左係 A4 紙.

  之後畫左個身俾佢. 記住胸不能太大, 否則佢會發你圍, 話你影射佢個胸細 – 即使你不過係將事實反映 – 胸大呢d 野留返俾倉井空, 再者好多野唔輪到你講道理; 腰, 十九吋; 腿長, 四十二吋 – 畫既時候切記忘掉現實世界, 否則你好難過. 根住係壹本便利, 剪個 LV, GUCCI 落黎, 貼係條手度 – 用 BLUE-TAG, 唔好用膠水. 之後係隔離寫 : 真既買唔到, 唯有送多幾個假既. 入埋另外幾個紙 GUCCI, LV 落信封度, 俾佢換袋. 一本壹本便利唔夠, 咪買多兩期, 橫豎你都會睇入面d 咸相.

  感動嗎? 完成時我自己差點哭了出來. 我玩了很久, 才捨得送給女友. 這便是本科生的生活了… 唉… 大學生….

  我想, 要逗女友開心, 若然可以用錢解決, 便用錢解決 – 畢竟大家也同意, 可以用錢解決的問題, 不是問題…

  但當大家出來幹活, 連食飯屙屎也沒有時間, 還說什么心思? 早餐也還沒有食就要安排地方 二月十四 食晚飯, 還有對白, 搞 gag, 搞浪漫. 一切一切, 功用和滿足感, 是零. 心機度, 是一百.

  還有那些負心漢 (即所有男人), 即使那天想和女友分手, 然後趕在十二點先與新歡來個巫山之行, 但聽了馬鹿專家說 千萬不要在重要節日分手, 於是乎仍幻想能當個好男人. 閉起雙眼你最掛念誰, 眼晴張開身邊究是誰? 負心漢恨不得那廿四小時快點過, 讓錢不用再白花 (或花在更值得花的地方上), 情人節最好不要出現!

  畢竟, 就算經過史弟呼籲, 認為 “找對了愛人, 情人節每天都過” 的人, 少之有少. 當然, 若情人節如此, 有誰想每天也是情人節? 誰也不想找情人, 願與五姑娘渡日咧.

  結論係, 即使這個情人節你沒有愛人, 仍值得慶幸. 所以今年情人節, 仍然是單身既你, 不妨 send 個 sms 俾拍緊拖既人, 安慰下佢地. 越拍得耐, 甚至乎係結埋婚既, 越值得有一個長長的 sms.

  來吧, 齊來安慰那些狗公, 包括史弟.

  

  (4) 被 tag 了

  其實唔係咁鍾意玩呢樣野. 不過竟然有人誤會我成日埋怨愛人, 於是乎借情人節來反擊一下那些不盡不實的意見….

  名字 : 史
  對象 : 唐老鴨

  1.  因為你既產品越黎越難買, 所以美好.
  2.  因為你夠奸, 夠古惑, 所以美好.
  3.  因為你有分部係日本, 所以美好.
  4.  因為你愛我比我愛你多, 所以美好.
  5.  因為星期一至五也不用和你拍拖, 所以美好.
  6.  因為你不拘小節, 所以美好.
  7.  因為你不是港女, 所以美好.
  8.  因為我愛你, 所以美好.
  9.  因為你誠實, 所以美好.
  10.因為你比我矮, 所以美好.
  11.因為我比你高, 所以美好.
  12.因為你愛睡覺, 所以美好.
  13.因為我不相信愛一個人需要理由, 所以美好.
  14.因為任何理由也不是愛的理由, 所以美好.
  15.因為答了有愛的理由, 也就有不愛的理由, 所以美好.
  16.因為你懂說純正廣東話, 所以美好.
  17.因為你愛唐老鴨, 所以美好.
  18.因為情人節, 所以美好.
  19.因為無聊, 所以美好.
  20.因為所以, 所以美好.
  21.因為愛行聯合廣場 (不再是 MRT 咧), 所以美好.
  22.因為愛吃吃吃, 所以美好.
  23.因為我愛看咸片, 所以美好.
  24.因為技窮, 所以美好.
  25.因為大家都不愛結婚, 所以美好.
  26.因為天天都是情人節, 所以美好.

  27.因為美好, 所以美好.

  • 9:52 am
  • 14 Comments