May 2, 2007

• <5.1 隨想>

  我知. 今日已經係 5月3日. 但無損個人對於 5.1. 的游思妄想.

  邊個話經濟起飛, 就會國泰民安? 距離香港兩個鐘頭船既澳門, 前日就發生警民衝突. 差人仲開左五炮; 事後有澳門議員咆哮, 之呼者也一大論 (水平同本港議員差唔多) 話差人唔應該向天開槍. 屌! 梗係拉, 有乜埋由唔係向人群開槍? 射雀有屁用? 求其向暴民其中一人開一槍, 甚至乎係向自己開槍 (夠反高潮), 個d 暴民即刻停手. 使春開五槍咩. 而家仲好似唔覺意誤中副車, 射錯好人; 又平息唔到暴亂, 分分鐘司警仲要賠湯藥費, 個五粒 .38 手槍用子彈真係比伊拉兄美軍既軍費用得更不明不白…

  相比之下, 香港既差人就見慣大場面, 不單只唔使開槍, 就連槍都可以跌係地度, 支炮就似廿皮三支既滾地龍咁係地下轉下轉下 (d 議員又竟然為此而召開左個特別會議. 天呀!!!!! 會議上涂謹申仲煞有介事問 “究竟係咪警員覺得有危險, 所以要拔槍?). 又或者開槍根本唔係為左捉賊…

  提起差人, 又諗起尋日駐港解放軍軍營開放予市民參觀. 解放軍對香港的作用, 不過和安安, 佳佳, 樂樂, 盈盈等四隻國寶級畜牲無大分別. 佢地除左霸佔愛丁堡個一塊地皮之外,
  就係逢初一十五開放個軍營, 等香港市民去參觀一下, 同埋觀賞下駐港解放軍各式各樣既表演 – 升旗, 步操, 舞槍, 鐵頭功, 散打, 木獨,
  唔郁唔笑, 如此這般. 大家春秋二祭除左可以一親女解放軍既香澤外, 更可以進一步了解國情, 觀摩一下我國如斯落後的軍備. 你班港燦, 連飛機大炮都未見過…

  同
  四隻國寶唔同既係, 要睇駐港解放軍並唔需要科水入海浪公園, 只需要凌晨四點起身排隊拿飛就得 (痴鳩線. 據講, 各駐港愛國單位如傳統左報,
  中旅社等員工皆可以拎飛). 就尋晚電視報導所見, 小朋友對於呢項解放軍親民活動, 顯然非常受落. 20 years ahead, when
  they grow up and become AO, 佢地肯定比起而家既港英餘孹更加精忠報國.

  由此可見,
  中央不必亦無需再派大熊貓作為社交大使 (拿, 係社交唔係外交), 千辛萬苦將國寶係四川運落黎. 只要定時定候打開軍營, 等港燦去睇下飛機大炮,
  或讓解放軍出外走走, 到尖沙咀買點電器, 兼整頓一下不良店舖 – 差哥你也敢騙? 人家一個手刀就將你櫃台劈開一半.
  晚上再到漆咸圍一帶的酒廊表演鐵頭功, 金剛腿, 順便抓一點外快. 要做到軍民一家親, 並不是單靠打開軍營, 運兩只畜牲, 簽兩張屍爬就成.
  要首先為小朋友洗腦, 解放軍做得到!

  講起我國既國寶, 又諗起國人對東瀛島國篡改侵華歷史, 甚為反感. 不錯, 東瀛人不尊重歷史. 但我國的教科書, 又何嘗以中立既態度解釋過漢, 隋, 唐, 元朝各帝都要積極向外擴展版圖呢? 秦代打匈奴, 都話人地係邊疆搞搞震. 但請問一下, 歐洲人得罪左成吉思汗一族人d 乜, 要搞到蒙古人打到去威尼斯呢? 朝鮮 (即古韓國) 又做錯d 乜, 要隋文帝煬帝兩父子最後要亡國都要去打人地? 吐老番人係咪生得唔夠靚仔, 所以唐太宗為左一句天可汗, 就要將人滅族呢? 我係中國人, 但並不認同國家做甚么也是對. 以上所引述的歷史, 或者有所偏差, 但概括而言, 香港的中史書, 不斷灌輸一種 “我國興盛, 打外族就係光宗耀祖; 我國積弱, 人家來侵佔就是十惡不赦”, “非我族類, 要先除之而後快” 呢種不要得的觀念. 這種觀念, 比起東瀛人明刀明槍篡改歷史, 更加危險.

  滿清積弱, 比人地八國聯軍, 火燒後欄. 除左指責人地搶左寶物放係大英博物館, 認真對待過僱用義和團呢班神棍既錯誤的教科書數目, 是零; 指出 “兩國交戰, 不斬來使”, 但滿清偏偏趕人地英國駐華大使出國, 人家最後客死異鄉, 這做法大錯特錯的教科書數目, 是零.

  要真正客顧面對歷史, 就不能只要求人家客顧面對對自己不利, 自身利益受損的歷史上; 自己也要客觀地面對自我膨脹, 自吹自擂的歷史. 每逢睇到呢d 叫人認真對待歷史既報導, it makes me too sick.

  好了. 有讀者表示, 文太長太正氣, 有違作者性格人物特徵, 並不令人信服. 我都係慳返啖氣.

  話說在 “大便” 一文內提及, 史弟寫作的靈感大多來自屙屎時. 但所謂 水能戴舟,
  亦能覆舟, 有次我就爭d 俾自己d 屎臭死. 話說小弟前排去日本前, 不知何故臨出門口, 竟然要放低四兩. 但好死唔死, 又好手尾得滯,
  淨係放底個廁所板, 無沖水, 就雞咁腳出左門 (其實我唔清楚係咪叫好手尾). 如是者, 個一煲咸水燉爛屎, 就炆足九日. 可能個排腸胃好,
  屙d 屎唔臭 (??), 所以九日都冇發生腐屍味.

  但我係東京返到屋企, 搬野搬到成身涼, 諗住開個小先.
  打開個廁所板…. 呀頂佢個肺…一道白色仙氣緩緩向上升, 隨之而來是舖天蓋地的臭味. 我強忍淚水及停止呼吸, 沖左三次水.
  但由於煲野炆得太耐, 好似大家係公司個杯茶咁, 過左一個週未就會有漬. 個廁所, 唉, 於是乎凌晨二時, 有中國籍男子係廁所一面爆粗,
  一面洗廁所…

  而講起廁所, 不得不提史弟頗勤於洗廁所, 大約一個月一次. 比起廳同房既季度清潔, 廁所應該,
  重申係應該, 乾淨d. 記得好幾次同老頭住重慶個陣飲醉酒, 係床度訓訓下想嘔, 臨急臨忙跑去廁所, 但吐唔中, 嘔晒係廁所側邊,
  但個陣又太醉自己唔知, 掙係識返上床訓, 於是乎第二朝起身就俾老頭瘋狂 xyz, 好幾次更想開拖 – 如果佢唔拎武器, 我應該夠佢打.
  但係佢長期袋住士巴拿等工具, 作為一個稱職既汽車維修員, 呢個係好正常. 可惜佢正職笨非一個汽車維條員… 一個人住都試過幾次食錯野,
  嘔到一廁所都係…  起身就一聲屌…

  嘔係廁所都算. 當年有朋友飲醉酒, 醉後係人地屋企睡覺, 三更半夜, 居然嘔到人家碌架床的隙縫. 嘩. 呢下真係陰毒.

  另外…這個說出來有點難為情…是昨晚還是有一張羽絨被在床上, 那也是唯一的被. 27 度還冚羽絨…

  • 1:09 pm
  • 2 Comments