December 19, 2007

• <酒精 FAQs>

  聖誕將至. 呢個普天同慶既日子, 大家少不免係各式各樣既派對三兩杯落肚. 可惜偶爾發生飲酒猝死事件, 令人關注飲酒對健康既影響 (尋日又發生一單). 史弟借此機會講解一下, 等大家飲酒飲得健康 D. 留得青山在, 那怕無柴燒? 沒有國, 哪有家?

  Q. 要防止飲酒猝死, 有什么辦法?

  A. 一, 唔好飲酒 (看我是多么善解人意!); 二, 要知道自己身體有冇暗病, 例如心肌梗塞, 心臟病等. 更加要肯定自己對該類酒精無敏感. 我有數個朋友對酒精敏感, 飲完會出現氣喘, 身痕 (大概等同好些小朋友對花生敏感). 好些對啤酒等平價貨敏感, 但對威士忌等貴價貨又沒有. 世事就是這么神奇.

  如果你兩樣都做唔到, 又要飲酒. 咁記住 :

  一, 千祈唔好溝酒飲. 百威可以溝喜力, 但啤酒不可以溝威士忌, 玫瑰露亦不宜混入紅酒. 皆因溝酒飲, 嘔既機會, 接近 100%. 死既機會, 大過 100%; 即係死梗.

  二, 如果之前無飲開酒, 徵狀如飲一杯就訓, 飲一啖就嘔, 聞一下就醉, 咁你千祈唔好飲烈酒 (即威士忌, 伏特加, 及各式 shooters). 記住, 淨係飲啤酒. 紅酒酒精成分不高, 酒量淺者亦頂得住; 但啤酒有氣, 唔飲得既人好快個肚似有啤啤咁, 飲唔落, 醉既機會亦大減.

  三, 女士們千祈唔好飲d 易入口既酒. 皆因, 越易入口, 越易飲得仲多, 醉既機會越高. 數年前有一杯好美麗既雞尾酒, 叫 林保堅尼 (對, 是與跑車同名的飲品). 會著火的, 非常易入口. 我當年就見過不少女生, 飲下又一杯 (儘管一杯成舊水), 飲飲下自己醉左都唔知.

  順帶一提, 飲酒後做任何運動, 不論運動既地點係床上或者床下, 都係非常危險既事. 心跳加速會令酒精及血液運行得更快, 醉得更勁. 所以男生要係平安夜要平平安安咁令人失身, 都係飲少D 好 (當然對方要飲多D).

  男生也別因一時之快而逞強 (我講緊呢d 快感係來自飲酒), 明知到頂仲係咁飲. 好多人就係咁飲到入醫院.

  Q. 市面上有許多解酒丸, 解酒藥. 可以先服用再飲嗎?

  A. 大家係去玩, 唔係去賣命. 做乜要咁辛苦, 食解酒藥去飲酒? 飲極唔醉, 一肚水, 其實好辛苦. 除非你係同日本人, 韓國人, 內地人傾生意, 咁呢D 藥就大派用場. 否則, 去派對, 唔好食呢D 藥. 要食, 食定偉哥.

  Q. 如何知道自己到頂?

  A. 憑經驗. 這不是說笑, 你未飲醉過, 實在唔會知自己個頂係邊. 這也是為什么許多飲酒後猝死的, 都是酒門新手 – 數年前好像有個新郎定兄弟新婚之晚就咁領野. 若你飲到想嘔, 應該即刻停止, 唔好再飲. 到你身痕, 出現一粒粒紅點, 已經太遲. 若你膚色較白, 飲到變紫 (好似十元紙幣咁既顏色), 更應該即刻飛的入醫院洗胃.

  若果你想知自己到頂未, 不妨飲飲下叫朋友玩 “醉酒佬行直線遊戲”. 顧名思義, 就係叫晒你所有朋友一齊行直線, 或者跑直線. 若果你行唔到, 固之然係飲醉; 之不過你行到都唔使開心, 因為一個清醒既人係唔會參加呢D 遊戲 (除左奧運 100 米賽跑). 所以, 無論你行唔行到, 一參加呢個遊戲就代表你已經有D 醉意, 某程度上已經係飲醉酒.

  Q. 萬一飲醉酒, 點算?

  A. 其實無 “萬一” 呢回事, 因為飲醉酒同交稅一樣, 係人生裏面係無可避免. 再者, 問點算既並唔係飲醉個個, 而係冇飲醉或者未飲醉既人. 皆因飲醉酒既人同你女朋友一樣, 都係大撚晒. 要執手尾既都係無乜點醉既人. 所以大學時與友人去飲酒, 大家都飲到鬥快醉咁款…

  飲醉酒最辛苦並唔係飲醉個陣 – 個陣其實好撚 high – 而係第二日. 過度吸入酒精會令身體出現缺水既情況, 繼而出現頭痛, 肚痛 (飲醉酒第二朝大便的機會率是 100%), 戇鳩鳩等徵狀, 人稱 hangover. 若果你仲有一丁點意志力, 麻煩飲一支 1.25 公支既水先好訓覺. 擔保第二日戇鳩鳩既情況能減至最低.

  Q. (For 女生 only) 萬一飲醉, 點算?

  A. 要睇下同行有冇咸濕既男性友人. 有, 你都放心可以返到屋企 (係咪自己屋企我唔敢講). 千祈千祈唔好合埋眼, 皆因好多女生飲醉酒就呼呼大睡, 其實好危險. 同埋唔好一個人去飲酒, 最好有 d 比較熟既女生一起去.

  Q. 怎樣訓練酒量?

  A. Practice makes perfect. 買定半打青島, 或一兩枝威士忌, 放係雪櫃. 得閒拎出黎飲一兩鑵/ 杯, 飲得一年半載, 包你千杯不醉.

  Q. 如何解決全球暖化危機?

  A. 這好像超出了會考範圍….

  • 3:09 am
  • 19 Comments