March 31, 2008

• <又到終結時>

  (1) 經過三個月, 恒指終於跌完咧~~~ 係第一季已經跌夠咧~~ 因為第一季已經完~~ 無得再係第一季跌咧! 太好咧!

  四個字 : 屍橫遍野!

  睇下圖最右個行. 恒指三個月跌左 17.7% 即係你上年年尾有 20% 利潤, 一季後仍要蝕錢! 太恐佈咧.

  古語有云, 升得快, 跌得更快..

  - 越南跌左 45% (記住係三個月). 唔好問個d 究竟係乜股票, 可以跌咁多. 買左既人都唔知拉, 何況無買?

  - 大陸跌左 21% – 31% (A 股指數有點不同. 是但拉)

  - 台灣炒大選, 大中華得佢升 (馬英九好野~ 但之前年年 underperform 到九彩)

  

  (2) 係開始之先 (咁上面個d 係乜?), 首先送出堅料一單 :

  候任世界銀行高級副行長兼首席經濟學家林毅夫表示，他贊成暫緩推行港股直通車。

  他在香港指出，港股直通車應直至人民幣完全自由兌換和內地金融體系建設完善為止才推行。

  轉載自明報

  嘩哈哈哈哈哈, 若果你記性好, 記得 Impossible Trinity 係乜 (唔係搞笑個個, 係 Alan Walters 原本個個), 一個國家只可以係以下三樣野揀兩樣 :

  貨幣政策;
  貨幣自由兌換;
  資本流控制 (capital control)

  我國國力強盛, 自主的貨幣政策, 要定你; 若有貨幣自由兌換 (即如林毅夫所言), 必須同時放棄資本流控制…

  但無資本流控制.. 使叫港股直通車? d 錢自己搭火箭去火星都得拉. 到時度度都直通, 阿爺對我地既愛護及寵幸去左邊? 林毅夫係咪即係曲線叫我地唔好再心存幻想港交所可以上返 $268.6 既歷史高位?

  (3) 講起港交所, 一起睇下佢係第一季既表現. 又係四個字, 慘不忍睹.

  

  一季無左 40% 呀, 陰公. 一手由 11 萬 得返 6 萬幾, 你話唔蝕入肉… 最慘都仲係納稅人! 以港府上年入市價每股 $154 計, 我地就咁就無左 4 億 (七百萬人每人 $500). 唉, 難為我地每個電費戶口都係得 $1800, 一家四口都蝕唔止呢個數…

  (4) 講起慘, 都未夠呢隻九龍紙業慘. 四個字 : 修橋補路無屍駭…

  

  一季無左 66%!!!! 嘩, 我係九龍紙業既股東, 真係媽聲四起呀. 即刻整返隻香港紙業搵錢呀 (係呀, 我知, 係玖龍紙業嘛). 原本為佢跌到夠拉, 點知 3/14 一出業績, 又再跌 40%. 認真低處未處低, 一山還有一山低…

  (5) 真正既騙局, 係隻叫 中石油 既股票. 你以為石油股同油價有密切關係… you are correct, until recently.

  

  深色個條係石油期貨, 淺色個條係 857. 你睇好石油, 但無得直接買; 睇返歷史, 857 同佢郁得好貼, 跟住… 跟住咪好似我咁一手蟹貨.

  自從 07年 12 月, 兩條線就好似分開左既戀人咁, 再見不是朋友之餘, 仲要越走越遠…. 喂~~~ 返黎呀~~~ 記住寫信俾我呀~~~ 我會好掛住你呀~~

  (5) 係一遍屍駭中, 終於俾我重拾一點自信 (及雄風) – 匯豐教開始有回歸的痕跡了. 今季… 佢終於 outperform 恒指 (但都係跌…)

  

  利益申報, 我有 5 號 同 857 號; 亦有盈富, 所以間接持有 388.

  (6) 你唔知盈富係乜? 你仲想睇完上面問我拎貼士? 有d 錢真係要俾人賺嫁. 自己搵個理財顧問問下拉…

  (7) 如果你夠串, 識得買 2809, 上一季眾人皆死你獨勝.

  

  (圖來自 bloomberg)

  • 11:29 am
  • 13 Comments