November 16, 2008

• <補習告示 @ 惠康>

  好咧. 有讀者投訴我成日講日本 (其實只係東京). 咪唔講 (住).

  細個既時候 (兩三年前), 同阿媽行惠康, 除左買士多啤梨軟心綿花糖, 最令我感興趣的, 就係收銀後面個塊告示版, 裏面既補習告示.

  成日懷疑, 究竟係咪真係有人係個度抄低個電話, 然後搵補習老師? 唔知. 但呢個告示版, 十幾廿年一直就係百佳同惠康出現. 我估, 除左政府同共產主義, 無用既野係唔會長時間出現係呢個世界.

  以前貼告示既人, 八仙過海, 每一張都係自己寫, 唔會用影印機, 更加唔會有彩色 (尖沙咀個陣有成十間惠康百佳, 咁貼咁抄都幾係野).

  日轉星移. 以前個體戶既時代, 已經一去不復返. 家陣補習已經成為一行專業, 要搞連鎖店式. 就連上門補習都一樣. 而家要呢d 告示, 唔使再抄低 – 個度有一疊任你拎. 好似去揀女咁, 你鍾意邊條, 揀邊條.

  又講多左無謂野. Anyway, 前排 (腳未斷個陣), 拎左幾張有趣既告示, 分享下.

  (1) 王小姐

  我份人好仆街. 22 分其實只可以叫做良好, 同個 “優” 字有d 距離. 咁 30 分係咪叫 “爆好”, 40 分叫 “喪好”?

  王小姐d 字好靚.

  另外, 呢間網上補習扯皮條公司, 好著重個 “柒” 字.

  好 “柒” 既導師逾 七萬, 七年 來服務逾 七萬 學生. 七一得七, 七七四十九, 七四十九 二四三, 二 + 四 + 三 = 九…. 三三不盡六六無窮…

  

  (2) ? 先生

  相比之下, 修讀理學既 ? 先生 – 我估係先生掛 – 既字就普通得多. 無乜筆力咁. 篇野似文字牆.

  收費合理點解會以 “…” 作完結? 欲言又止, 高招, 高招.

  

  (3) 何小姐

  好野! 何小姐為左表示佢本身係識繪畫, 特登係告示上畫公仔.

  唔好似為教繪畫既人, 就一定畫畫好叻. 通常教人炒股票既人, 自己多數輸到仆街.

  

  (4) 王小姐

  又係王小姐 (王氏不愧係大姓).

  何小姐教畫畫, 所以畫公仔. 王小姐可能當d 客係水魚, 所以畫條魚.

  
  可惜佢逃唔過我法眼 (及屎眼). 我認為佢同 1 號既王小姐係同一個人.

  — 內容及結構大同小異 (當然可能係一個王小姐抄另一個王小姐)

  — 部份字跡相近. 佢都幾有心, 左邊魚魚個幅字體較草, 右邊個個較公整. 但 “港大文學院”, “解決”, “學習上” 字體好相近.

  好無聊, 我知.

  

  (5) ?小姐

  佢既綠色 + 紅色告示令我諗起女同學當年既七色螢光筆 同埋 九色 3M tag.

  
  btw, 呢個同1 號, 4 號既王小姐, 又應該係同一個人.

  — 請留意三幅告示中的 “學生”, “補習”.  相近字體既字包括 : “學” “現” “考”

  — 當然亦有可能係補習社代抄寫

  得咧. 好無聊呀嘛. 一個無女友又跛撚左既人, 出唔到街, 唔研究無聊野唔通去整核彈咩, 打 J 唔能夠分分鐘都打嫁, 師兄. 俾小小空閒回下氣都得掛.

  

  (5) Michelle 小姐

  好鍾意佢 d 字. 但我唔明點解係 “做事有責任心, 故家長考慮本人”

  係想講佢既戰績? 我唔識解. 佢可以講因果關係, 但用黎拉客作用不大 (屌你大把客仲出告示做乜?)

  另外, 為左保障皮條公司既利益, 所有導師都無直接既聯絡電話. 只可以打去熱線或者上網睇. 致電 michelle… 請問係咪打 “michelle” 跟住 send sms 去 #8618?

  

  • 1:00 pm
  • 23 Comments