May 7, 2009

• <紅事 二三事>

  快踏入三字頭 (嗚嗚… 看到 199x 出世的小朋友也快將成年, 倍感悲哀). 除了髮線向上, 肚腩向外, 還避免不了的, 就是由年頭參加婚宴去到年底. 我去年飲了六七次, 己經算少了. 好些友人, 平均一個月飲一次.

  
  (白事也有, 但幸好經驗不多, 還是說些開心的事吧)

  我是很喜歡參加婚宴的. 一來在預期中, 自己不會擁有一個 (有的話, 是個悲哀的意外); 二來, 可以分享人家的喜悅, 是十分感動的. 三來, 可以見到一些失散多年的朋友.

  當然, 好些婚宴也過份造作煽情. 曾有友人說遇到頂唔順既婚宴, 要中途離開. 我想, 我是幸運的.

  ——————–

  多講無謂. 進入正題. 我係呢度要提出人情計算機這方程式, 等大家可以輕鬆鬆計算出婚宴要付的人情. 唔使再問黎問去.

  底價篇
  
  請飲底價 : $500 (解釋? 對唔治, 無得解釋. 你認為地政署拍賣地皮, 底價是可以解釋的嗎? 你太天真, 太傻了. 定底價是藝術, 不是科學)

  去唔去篇

  唔去飲 : -$200 (i.e. 兩張相 + 乳豬 + 翅 + 炸子雞 + 兩三隻橙, 淨值 兩舊)

  酒店擺酒 : +$300 (只係為左朋友唔好蝕咁多. 如果一席每人俾多三舊, 總數三千六. 好似好多. 但酒店擺酒, 太多雜費; 而且去得酒店擺, 其他配套唔慳得. 你朋友已經蝕桌娶左個老婆/ 嫁左個無錢老公, 唔好令佢地連擺酒都要搵邦民. 金融海嘯呀~~~老友)

  合府通請 : 約每位 +$300 (economies of scale)

  食西式/ 午餐 : 無須理會任何加減, 硬掘 $500

  背景篇

  認識新娘 + 新郎 : +$100 (by the way, 我試過飲一餐, 我新娘新郎, 甚至乎全場一個人都唔識. 點解? 我戇鳩鳩代我老頭去飲… 其實, 我飲完都唔知自己有冇去錯.)

  識識新娘 / 新郎 : 五年以上, 每年 +$20 (當你有三十歲人, 真係識左五年後仲有一年十次以上聯絡個d 先叫好朋友)
  
  做兄弟 : -$300 (做兄弟每每做到隻狗咁. 減三舊水算少. 夏天做兄弟, 減多你一舊添呀)

  做姊妹 : +$200 (做姊妹有利是收, 加上可以折磨兄弟, 呢個機會, 好似萬事達咭咁, 此 . 刻 . 無 . 價. 加兩舊水算係咁. 如果有人請我做姊妹, 唔使變性反串, 我包一圍都仲得呀! 皆因我有信心新郎接唔到新娘, 或者去娶過第二個.)

  做 MC : -$500 (做司儀幾乎食都無得食. 加上要承擔可能講錯野既壓力)

  表演篇

  新郎哥唱歌 : -$100 (唔係佢唱得好唔好聽既問題. 反正面對咁多人, 一定唱得難聽. 連阿舜咁有信心, 上都市閒情都領左野. 重點係, 佢一定唱d 肉麻到嘔既情歌. 張學友幾乎中梗. ok! 要有中庸之道. 要晒恩愛, 唔一定要唱超冧情歌.)… 不過….

  新郎哥唱以下任何一首歌 : +$200 至 +$2,000

  - 回首 (李克勤) : 第一句
  - 幾分傷心幾分痴 / 心癮 (王傑)
  - 離開以後 (張學友)
  - 任何一首周杰倫的情歌 (除左簡單愛, 可愛女人). 個人推介 退後, 說好的幸福呢
  - 於心有愧 (陳奕迅)

  - 餓狼傳說 (張學友) : +$2,000. 如果新郎係開頭一段狼叫中, 忍得住唔笑, 莫講話 $2,000, 兩萬都俾

  講講下呢部份似歡華滿東華既籌款節目添… 歡迎留底意見唱乜野歌…

  新娘喊 : +$200 (講真, 好少見到新娘唔喊. 不過, 喊係一種真情流露既表現.)

  如果新郎哥多謝屋企人既時候喊 : +$200 (此乃孝之表現)

  如果新郎哥見到老婆喊跟住喊 : -$500 (台上兩個人一齊喊. 似哭喪多過似喜事. 女人喊既時候, 男人應該好好照顧老婆, 幫佢解圍. 一齊喊既話, 我係會忍唔住係台下面笑… 最癲, 我見過一家人, 新娘新郎爸爸媽媽一行五六個人係台上面喊. 我屌呀… 似乜?)

  
  新娘表演吞劍/ 頂波 : +$1,000 (如果吞新郎哥把劍… 嗯… 未諗到加錢定扣錢… 口爆加五十…)

  姊妹有靚女 : @+$100, if any at all (呢個你可以放心. 遇到靚姊妹既機會, 係零. 唔好睇少女人既妒忌心. 你以為佢結婚個日真係最靚? 係呀, 當世上靚過佢既人無份係婚宴出現, 咪係佢最靚…law)

  兄弟有靚仔 : @+$200 (嗯…. 靚仔既兄弟, 唔係結左婚, 就係黎緊要結婚…. 除非你自信心夠 – 事實上我就聽過有d 友仔就黎結婚, 走去做人兄弟; 結果溝左個姊妹, 連婚都唔結. 呢d 咪叫型…)

  ———————-

  
  例子

  — 認識十七年既友人於年底結婚. 搵我做兄弟 同 MC (唔知會唔會因為呢篇文而再三思. 我懷疑佢未必會請我飲添. 哈哈哈哈哈).

  — 佢女友, 即係老婆, 我都識. 以我認識佢地兩個, 以上加錢表演既野, 估計唔會有; 兩個亦唔係眼淺既人. 兄弟? 我咪係. 姊妹… 嗯… 無驚喜… law

  — 算術如下

  底價 $500 + 酒店 $300 + 兩個都識 $100 + 識17 年 $340 – 做兄弟 及 MC $800 = only $440…

  嗯… 呢條方妙拿非常妙呢…

  睇怕友人要取得一千元以上既人情, 應該要吞劍或者唱 餓狼傳說… 其實佢搵返個靚靚姊妹, 條數就可以再諗諗既…

  ———————-

  <炒冷飯 – 零三年的一篇文章 紅事 . 白事>

  紅事白事, 本是兩個各走極端的節目: 一個慶祝有情人比翼; 另一個哀掉死去的人, 但可笑的是, 兩者有許多相似的地方.

  在婚禮上你可能會再見十年也不會見面一之的親戚朋友, 大家打招呼, 吹水, 打麻雀, 有講有笑, 重溫舊夢; 在喪禮上, 你見到這些親朋戚友的機會會更高. 雖然大家不會有講有笑, 僅會點點頭, 讓大家對方知道自己來了便成, 但孝子們依然會大打麻雀. 無計, 漫漫長夜, 守夜無聊嘛… 不同的是, 有白事時一家人的心反而扣得更緊, 關係比平時親密得多了, 而且彼此間的爭拗也少得多. 當然, 我並不是鼓勵大家多做白事, 少做紅事.

  紅事有 “大琴姐” 主持, 一口氣說出祝福及好意頭的說話; 白事則有 “哪磨佬” 衣衣哦哦, 唱出節奏奇特的歌. 無人 (包括他們自己) 會明白二人實際在說什麼, 反正也是連珠炮發, 大家也是求求其其就算了. 但有一個問題我不明白, 為何不能找 “大琴姐” 做那些”哪磨佬” 了? 不是性別歧視是什麼?

  參加紅白二事, 皆要 Fall 水: 紅事公價五佰 (可以是日元, 你給美金當然更佳, 英鎊更是樂意之至); 白事豐儉由人, 唯獨一定要是單數, 請給港幣.

  主角都要化粧. 新娘的面往往化得像批當一樣, 經常令我疑幫她們化粧的人常要做兼職幫白事的主角化粧. 有時我會覺得白事主角的笑容比起新娘的更燦爛, 這個是必然的, 當你一天要和一大堆老公/老婆的朋友 (你不認識) 拍照, 哪裏能笑了?

  有錢人家或名人辦婚宴, 多有樂隊增興 (只有有麻雀打, 那有人理會這些了? 大家都想永遠不會開席, 好讓他們可以永遠打麻雀. 輸了錢後聽到這些音樂, 不是更興烚烚嗎?); 名人辦白事, “叮叮打打” 的音樂少不了, 這些音樂, 比起那些 “成個老襯, 從此被困” 等老土樂曲更有新意及特別. 若結集成雜錦碟, 就立刻在HMV CD 銷售排行榜把什麼周杰倫, 容祖兒也比下去. 或是找林夕或是黃偉文為樂曲填上歌詞, 嘿嘿, 出年大家成年都要聽著名副其實的 “死人歌” 了.

  還有有錢人的紅白事 (為何總是有錢人? 很簡單, 因為他們有錢有權有勢有名氣, 就是沒有實力). 傳媒總是樂此不疲地採訪及報導這人的紅白二事. 八卦的人依然會一邊鬧記者無聊, 一邊看得入神, 更和三姑六婆在酒樓高談闊論; 更甚者, 有些好大喜功的夫妻, 無恥地把表現兩人之間如何恩愛的婚禮, 放到人家的電視台上播映, 還要放在晚飯時段播放, 令人嘔心及嘔飯. 他們最後當然會落得離婚或家破人亡的收場.

  到目前為止, 除了王妃戴安娜的喪禮價值連城外, 暫時也沒有別人死後的價值依然這樣高. 董建華及其他政府官員是例外, 我實在實不到他們生存在這世上有何價值; 他們死了, 市民還可說一句 “抵佢死” 以洩心頭之恨, 還有一些 “剩餘價值”. 他們越快死越好.

  還有一條龍式服務: 現代人工作繁忙 (或是繁忙地扮有工作), 許多人根本分身不暇去安排紅事或白事, 於是所謂一條龍式服務就應運而生. 紅事方面, 你說出你的要求, 只需放下足夠的銀兩, 自己只需預老婆/老公一個 (沒有? 不要緊. 有些公司有專人為你安排你的另一半, 但不擔保是異性.) 只要你到時到候到達指定地點, 婚禮就會完成. 有些公司更會幫你預辦離婚手續 (這樣的安排倒不錯), 就像你去旅行時reconfirm 回程機票一樣, 好讓你能隨時隨地與他人遠走高飛. 白事也有人為你安排一切, 當然, 沒有人會為人安排一個主角 (除非你自己為自己安排); 你放下的也是港幣或可在人間使用之真錢, 請勿放下溪錢或冥通銀號的銀紙.

  食完 (搶完?) 酒席的最後一道菜 – 香橙十二個後, 大家親朋戚友會第一次見到紅事主角 (無人保証你開席前會見過, 因為你老早就飛奔到麻雀台去), 並與他們握手; 白事完結前, 大家也會距離見到主角, 不用說也知道, 她/他不會和你握手. 如果會的話, 你大概是把紅事和白事混在一起了, 請冷靜. 如你肯定這是白事, 叫救命吧!

  ———————-

  • 9:58 am
  • 49 Comments