October 7, 2009

• <誠意推介 系列 3>

  留意 : 請預留一小時看這篇 entry

  好了. 想了很久, 終於諗到第三篇誠意推介, 以什么作為推介對象.

  今次介紹的, 不是網站, 也不是文章, 而是一個人. 同埋, 比較多片, 皆因呢個人, 齋屌唔射 齋o翕無片睇一d 都唔過癮.

  我估好多人會以為我介紹 AV 女優. 呢d 野搵 nike 集團就得. 再者, 女優個個都咁正, 介紹得邊個?

  好咧, 唔賣關子咧.

  我要介紹呢個人, 個名叫做 “米高 . 佐敦”.

  米高 . 佐敦, 洋名 – 其實佢本身就係一個洋人 – 叫 Michael Jordan, 簡稱 MJ. 話說前陣子返到公司, 有人同我講 MJ 死左, 我嚇到屎到標. 條友就黎入 籃球 既 名人堂 (大概等於英國既 MBE 勳爵), 咁都等唔到? 原來謝世的是唱歌那位 MJ – 米高 . 積遜. 而提起 MJ, 有一次向外公提起 米高 . 積遜, 他問我是否生愛滋那個. 生愛滋的叫 Magic Johnson (魔術手莊遜). 呢d 咪叫代溝… 阿叔, 我有聽過星鬥士星矢架.

  萬一你唔識佢, 米高 . 佐敦 (台灣譯名, 叫 喬丹) 是一位籃球員. 他在職業生涯中, 幾乎無乜獎未拎過 : 六次總冠軍 + MVP, 十次全 NBA 一隊, 九次全NBA 防守一隊等等. 佢個achievement列表, 水蛇春咁長.

  今日唔講數, 皆因呢堆數字同列表, 只能夠代表 佐敦 大約 20%.

  呢條友, 傻架.

  前陣子佐敦接受 名人堂 加冕, 在新聞發佈會上, 有記者問佐敦 對有人說他是史上最偉大的籃球員 有何看法 (英文是 “The Greatest of All Time, G. O. A. T.). 佐敦回答 :

  
  “這樣稱我為最偉大, 對一些以前的球員不公平. 例如張伯倫 (一場拿一百分的人), 韋斯 (湖人名宿) 等人. 若有機會, 我當然願意與他們作賽. 但我只會視之 (人們稱他為最偉大) 為一種讚美.“

  (影片中第一段, 就是佐敦的回答)

  我想佐敦搞錯了. 這不是讚他技術最好. 而是他最偉大.

  ——–

  佐敦代表一種精神 : 對勝利的執著, 決心, 戰意, 信心, 自我肯定; 與及他那技術, 智慧, 我只能想到一個人是與他同級的 – 李小龍. 望著佐敦的眼神, 的確很像李小龍. 兩個人也是神級的. 問問你長輩當有沒有在歡樂今宵看李小龍表演吋勁. 有一次舅父講起, 興奮到爆炸. 我相信若干年後我與友人的孩子說我收看過現象直播的佐敦球賽, 男的肯定會拜我為偶像, 女的為我口爆.

  是的, 即使今天有 youtube, 播的大多是入球片段. 控制球賽的能力, 防守, 默契, 只有看整場比賽, 整個球季, 才有深切的領會.

  不信失敗, 因為相信自己會勝利. 1997 決賽, 感冒照上陣, 拿 38 分 – 好多人一季都拎唔到. 他在名人堂發言人, 其中一個笑話, 就是有一場比賽, 他們打完三節落後 20 分 (一場比賽分四節; 每節十二分鐘). 佐敦在第四節拿了 15-25 分, 最後贏出了比賽.

  比賽完結後, 公牛隊 (佐敦的隊伍) 的其中一個助教走過來, 向佐敦說

  “There is no ‘I’ in team.” (意思指隊中沒有 “我”)

  佐敦回答 :

  “But there is ‘I’ in win”

  笑到我仆街. (上面那條片最後一段, 1:06 開始)

  佐敦會挑戰對手, 但他從來不認為任何人對他是威脅. 他深信自己是最強, 他只是純粹想勝利. 所以你不會見到佐敦少看, 蔑視對手. 佢差唔多四十歲時打廢隊巫師, 有理由相信佢基本上之前已經拎冠軍拎到厭; 但佢依然賣力到仆街. 佢唔會好似奧拉祖雲/ 德斯拉咁, 拎左總冠軍後懶懶行, 搞到巴克利無得拎.

  ——–

  佐敦的 EQ, 高到無朋友. 佢當年面對活塞壞孩子, 紐約人的打交式防守, 最多都係講 fuck you, 我懷疑原因係佢根本當D 人無到, 佢淨係諗住點贏比賽. 正如 楊天命 李天命講 : 你遇到小朋友同你用歪理講一D 道理, 你係唔會理鳩佢. 佐敦打交都係見過佢同米拿開拖. 我估計, 以今時今日既裁判水平, 以下影片既紐約人同活塞, 未到半場已經得返四個球員…

  順帶一提. 你諗下佐敦面對d 咁既防守, 都可以拎三四十分. 呢個人真係傻架.

  很多人以為佐敦只是入樽厲害. 他們定是將 人肉坦克占士 與 佐敦 搞亂了. 當然, 電視台為佐敦選最佳入球, 播的都是入樽呀, foul-in 呀等. 但其實佐敦準繩的投射, 才是他最強的武器. 從北卡羅蓮納大學開始, 佐敦已顯示出全方位的跳投能力. 在下面那條片, 佐敦拿了 69 分 (他生涯中最高), 大部份是來自投射.

  值得留意既係, 對於佐敦不斷入入入入入, 大部份對手都習以為常, 沒有大驚小怪.

  ——–

  你很明顯見到佐敦一年一年, 在每個範疇建立一級的技術. 80年代尾加強防守, 90 年頭開始射三分.

  90年後佐敦最明顯的進步, 就是發現原來有隊友呢樣野. 係佢有呢個驚世大發現後, 佢先拎到第一次冠軍.

  然後, 比較一下 93 年決賽 (第三次冠軍), 96 年決賽 (第四次冠軍) 同 98 年 (最後一次), 你會發現佐敦進攻的風格也漸漸改變了 : 隨住年紀漸大, 佐敦已少係外圍帶波殺入去; 佢反而依靠自己的身高, 腳步迫籃, 然後射 fade away. 這便是智慧 與 技術的結合. 相比之下 – 儘管我不想作太多比較, 反正佐敦是最偉大 – 奧尼爾打到今日仲係要爆. 據說, 高比 今個暑假去跟奧拉祖雲學迫籃, 他大概也發現自己體力開始下跌, 要改打法了.

  老左會無力爆籃; 但射 fade away 不會. 這是為何佐敦 46 歲對住 後生仔 依然打得下.

  留意呢條片

  — 佐敦能夠企係度唔助跑, 跳起入樽
  — 佐敦頭兩球, 係叫對手揀射邊邊, 佢再射
  — 佢唯一唔入個球, 係對方打到佢手
  — 對方係後生仔, 6 呎 4 (佐敦 6’6)
  — 佐敦已經 46 歲

  ——–

  講左咁多認真野 – 這是難得的, 皆因一講認真, 讀者 (包括自己) 都無乜興趣 – 講返d 笑料先.

  (1) 在佐敦還未射出 1998 年冠軍球時 (我對這球麻麻), 佐敦最經典的零秒出手, 就是對騎士的這球. 因為這球, 連防守他的 Ehlo 也出了名…

  (2) 我個人最喜歡, 反而對湖人的這球… 無端端係空中換手, 我企係度都未必做到. 其實佢係影片中有解釋, 佢 . 話 . 見 . 到 . 對 . 方 . 想 . 封 . 佢 , 所 . 以 . 佢 . 換 . 手 . 上. 佢講到好黎廿世紀殺人網絡個d 慢鏡咁…即係黎遠見到巴士黎, 你追巴士咁…

  (3) 名人堂的講話. 非常值得一看. 學英文都正. 自僱J 向我說過, 原來佐敦學過講野時幾時停頓最好聽, 最吸引到人. 講話有三部份, 你去 youtube 繼續看吧…

  (4) 佐敦最好的 40 個時刻 (影片質數麻麻). 留意 :

  — 33 (1 :25) : 合埋眼射罰球
  — 26 (3:02) : 犯規既球員今日肯定即刻被判出場
  — 25 (3:12) : 佢橫誇半個地球入波
  — 20 & 22 : 在同一場比賽出現 (可憐的紐約人)
  — 5 : 在紐約人主場播得最多的入樽

  • 12:14 pm
  • 17 Comments