November 18, 2009

• <阿叔的笑話數則 2 – 老母篇>

  注意 : 看此 entry 同 做人一樣, 切忌認真. 認真你就豬了.

  老母是塵世間最偉大既人. 我地鬧人係想人地受傷, 鬧人地重視既人 : 所以我地都係屌人老母, 唔會屌你老頭, 唔會屌你樓下看更, 唔會屌個雪櫃 (唔知點解諗起呢個例子).

  偉大既人, 容易惹來妒忌, 以及爭拗. 特別係 你老母 同 你女友 之間既爭拗, 分歧終端機都無用. 因為老母, 女友 同 恒指上落一樣, 從來無道理可言.

  (1) 唔提老母 二

  嗯… 嗯… 嗯…(點頭中)  又炒冷飯 (唔提老母一)

  話說, 阿媽已經勒令我用兩個枕頭袋, 我亦屈服係淫威之下. 但阿媽好似 奸人堅 同 麥加登 咁, 永遠唔會罷休, 一路死心不息, 鍥而不捨, 可一可再, 接二連三咁玩鳩我.

  最近一次食飯, 兩母子又有真情對話.

  “你屋企有用枕頭巾嫁可?” 一路講, 老母一路望住我. 我知, 佢係 FBI 既人, 識得透過我眼神同肢體語言 (例如 扯旗) 黎睇我有冇講大話.

  
  “有.” 滿有信心地答. 不過由於諗起兩個枕頭袋, 忍唔住笑左半下.

  “你記住用呀~ 仲要用兩個枕頭袋. 我同家姐都係用兩個”.

  三個人, 六個枕頭袋, 三條枕頭巾. 加上替換的, 成屋都係枕頭袋/ 巾. “枕頭and related 物品” 相比 “人口” 既比例, 肯定高過手提電話用戶 對 本地人口 比例 (約 150%)

  阿媽聰明絕頂. 上次講漏左佢點樣整蠱我一大鑊. 呢次仲同老姊一齊黎.

  去杜拜之前無耐, 佢同老姊去左內蒙. 七日.

  好死唔死, 老姊有養魚. 三四日唔餵, ok; 七日, 返黎恐怕會發出屍臭 – 老姊如是說. 於是我仗義幫佢餵魚 (說穿了都是淫威下既產物).

  我搬左出去已經好幾年 (孝子….), 無屋企既鎖匙. 於是同老姊講, 要餵魚就將鎖匙放係鐵閘下, 我用加藤鷹之手伸入去拎.

  好咧. 去到第四日, 兩母女打黎, 話佢地玩得好開心, 重點當然係叫我記住餵魚.

  於是我搵左個星期六既下午, 諗住幫佢餵魚… 點知去到門口, 搵黎搵去都搵唔到鎖匙.

  無. 點用神之手都搵唔到 G點 鎖匙. 三十幾度, 搵兩搵, 成個人濕晒 (唔好心邪).

  於是, 無奈地打俾老姊.

  “喂~ 點解無鎖匙既?”

  “下? 係咩, 無咩? 等我問下阿媽先” (係呀, 我特登打 $10 一分鐘 IDD 黎 o厄鳩你呀~)

  背景為兩母女講野….. 阿媽接過電話… 咕嚕一輪…

  “哦. 係呀, 條鐵閘鎖匙係信箱裏面.”

  …

  …
  …
  …
  …
  …

  …
  …
  …
  …
  …

  …

  但係我無信箱鎖匙…

  何苦要咁樣整蠱我呢? 我有俾家用呀. 點解要咁做?

  同埋, 如果你唔見晒成抽鎖匙, 最終係開唔到信箱拎條後備匙出黎用. 咁同太陽能電筒有乜分別?

  唔知. 阿媽的確擁有驚世智慧.

  未完.

  餵唔到魚, 我驚左幾日d 魚會死.

  老姊返黎.

  話d 魚健健康康 (我唔知佢點得出呢個結論); 一條都無死.

  乜撚野屍臭. 無發生過.

  屌, 正一老千. 兩母女仆街過 中策 (235).

  (2) 唔提老母 三

  從前, 有一對情侶, 買樓後同居.

  二人同居一段日子. 有日發覺屋企度櫃門壞撚左, 好似鄭艷麗對波咁搖搖欲墮.

  女著男的去搞掂度門. 男既, 當然係掛住打機 同 打機, 仲有打機. 無論咩野男人都好, 賤男 好教師 也好, 鄭伊健好, 每人都會沉迷一款電子遊戲. 如果你以為佢無 psp, xbox = 唔打機, 唔該你順便 uninstall 埋nokia 手機個個貪食蛇. 你知唔知幾多男人係辦公室廁所屙屎都係為左打機?

  好咧. 個男既堅持唔整. 度門無事無幹, 男既打機打機再打機, 雙贏.
  

  直到有日, 個女既老母黎執屋.

  唔知點解, 男打機既時候, 度門好地地無事; 點知女友個老母黎度, 櫃裏面d 野就好似潮吹咁湧出黎, 連人帶車 連埋度門 一野 “擲” 左落老母度. 壓傷左老人家.

  “老老實實, 你如果壓傷我, 我都算 (潛台詞 : 話晒係我揀你做我男朋友); 你壓傷我老母, 一個無辜既老母, 真係無得傾. 老母得一個 (潛台詞 : 男朋友可以好多). 仲有我已經叫左你十次整好度門, 身為男人你連少少責任感都冇 (潛台詞 : 你到今日都唔肯娶我), 一日到黑淨係識打機. 成三十歲人, 淨係掛住玩 (潛台詞 : 你搵錢唔夠多). 我地唔可以再咁樣落去.”

  小心, 上述係我憑空創作既女生對白. 唔好咁認真.

  無奈地分手; 講真, 幾無奈. 為左度門而分手. 同當年泰國總理因為上烹飪節目而落台一樣, 情何以堪? 逝去感情如何留得住… 我諗左一陣得出以下教訓

  教訓 1 : 應該聘請鐘點執屋

  教訓 2 : 唔好俾鎖匙老母/ 俾佢上你間屋

  教訓 3 : d 櫃唔好有門, 或者d 櫃唔好擺野

  教訓 4 : 死不悔改

  教訓 5 : 唔想結婚, 但又想有女友, 應求教於鄭伊健

  延伸閱讀 : “我寧願你玩女人好過玩玩具” (我兩樣都玩)

  (3) 唔提老母 四

  前陣子去了台灣.

  以前一直唔信星座. 一來, 我信司徒法正多d. 二來, 星座, 命運, 幸運 同 夢遺, 林嘉欣一樣, 都係凡人如我 觸摸唔到, 控制唔黎既野 (你控制到夢遺嗎? 如果得, 我估你連去月球都唔使用太空船). 過份相信會覺得生命太多乏力, 無力感.

  呢幾年, 經過無數既經驗, 我深信, 天蠍座既女人, 好記仇, 好麻煩.

  
  第一, 我老母係天蠍座. 呢個係最佳例子. 離婚十幾年, 仍然咁憎我老頭. 如果加埋之前個d 日子, 我老母過去一個世紀一直憎我老頭 (即使佢今年未夠六十). 據另一個天蠍座既女人講, 我唔會理解, 因為我阿媽係天蠍座. 潛台詞係 : 只有天蠍座既女人, 先會了解天蠍座既女人.

  第二, 有年中秋, 我拎左半盒月餅去朋友度, 俾佢女友話我食淨半盒餅仲好意思拎去, 講左幾年. 當然, 我仲記仇, 因為我仲記得佢女友仲記得我淨係拎左半餅月餅去.

  這個友人與女友 – 數年前出現過的可人兒 (哀哉, 人家還是那個女友), 也有份去台灣.

  話說… 旅程某天, 一行人去台北 sogo (忘記了為什么要在台灣行香港也有的 sogo; 前陣子在新加坡還厲害, 行日本的高島屋百貨). 友人已靜靜地買下生日禮物.

  行完 sogo, 去左好撚遠買老婆餅. 我懷疑去左台南買 – 不過是永春站 三統食品 的老婆餅. 不過途中經過台灣地道街市, 十分有趣.

  友人買老婆餅, 係因為佢老母好多年食過, 一直話好好味. 黎之前, 講左一千次叫佢買.

  試過係日本, 死抬爛抬, 買唔切手信, 去唔切中野玩具坊, 唔到女, 但點都要帶兩包麵包糠返香港. 唐老鴨可以唔買 (其實唔可以), 涉谷池袋可以唔去, 然而死之前點都要去上野既二木果子買麵包糠 – 兩包香港新世界百貨有得賣既麵包糠. 唔買, 死得好慘. 煩到你仆街. 煩到你下次去完日本, 買返俾佢, 佢都會話 :

  係拉, 上次你又唔記得買 (下刪九億字).

  咁咪行行行, 買老婆餅. 一打半十八隻, 夠皮拉. 友人開左一隻黎食, 嗯…. 脆脆既老婆餅, 也沒有榮華的那樣甜. 可是我對老婆 (人妻另計), 同老婆餅都無乜興趣.

  一路都無野… 跟住食飯, 我先發覺原來友人女友嬲左佢 – 據聞同桌既人, 兩個鐘頭前就知.

  死因 : 友人肯為自己老母行咁遠路買老婆餅

  為左老母咁行, 孝之表現也. 咁都嬲? 唔明. 總之, 可人兒覺得男友不夠重視自己, 沒有將自己放係第一位, 老母同自己跌落水唔肯定男友會救自己先. 話左女友皆無道理可言拉.

  嬲 . 左 . 成 . 晚 .

  麻煩還麻煩, 可人兒是風趣的. 第二天我見他們重拾舊歡, 問點解會無事. 可人兒嬉皮笑臉地說 : hehe, 都係我衰. 哈哈哈哈!!

  哈. 我想是友人使用了禁術 生日禮物…

  証明老母都係麻麻煩煩, 成事不足敗事有餘. 若然你老母同女友都係天蠍座, 叫朋友做定帛金俾你都得咧.

  未完.

  友人拎返去d 老婆餅, 佢老母話味道麻麻地.

  好撚野. 友人俾佢老母玩得仲徹底. 話晒我只不過係過個海餵唔到魚; 我朋友要搭飛機過南中國海…

  - 完 -

  • 11:15 am
  • 13 Comments