June 8, 2010

• <世界盃應注意事項 – 女生版>

  對唔治, 係唔會有男生版的. 大家都俾我滾慣.

  話說四年一度既世界盃又黎咧. 抱住作育英才既心態, 我係度建議十項女生應該知道有關世界盃既野, 等佢地呢排係一班男同事/ 男同學之中, 唔好無左話題. 如果你連世界盃 6月11日開波都唔知, 或者甚至乎連世界盃係今年舉行都係10秒先至發現… 咁你更加要睇 – 雖然更好既建議係算撚數三個字…

  畢竟, 黎緊個幾星期, 除左乜春野起錨, 大家只係會聽到世界盃既消息. 我更加肯定每日賽果都排先過恒指收市. 我亦認為呢幾個星期對好多人黎講, 係渡日如年 – 特別係對個d 之前個晚睇凌晨兩點半第二日無射波既人黎講. 除左酒吧生意好左, 收入多左既, 都應該包括街口個醫生.

  再講多句, 其實我係唔睇足球的…

  好咧. 廢話少講.

  1. 世界盃, 主要目的係踢波, 文雅d 講, 即係踢足球. 兩邊球員 – 因為有無間道 (通常係鎮守後方的球員), 所以兩邊既人數未必相等 – 努力不懈地將皮球送入對方的龍門. 此運動古時稱為蹴踘 (千世爛片赤壁一最後個場戲, 班曹軍千里迢迢去到南方, 仗都唔打, 就係為左玩蹴踘. 你可想而知兩千年黎其實中國人真係無進步過).    

  不過, 世界盃目的係踢波, 呢個說法只係對足球員有效. 對大部份觀眾黎講, 世界盃, 主要目的係賭波.   

  你可以唔信我, 不過有真既數字俾大家睇下. 過去四屆世界盃, 每逢決賽週時 (大部份為六月), 香港股市成交較該年一至五月 (至世界盃前) 平均減 23%; 而其他年份既六月成交, 比起頭五個月增加 11%. 鐵 . 證 . 如 . 山 ! 世界盃根本就取代左股市, 成為左賭仔既賭錢場地!     

  		Average	Median
  World Cup Years (1994, 1998, 2002 and 2006)		-23.4%	-25.5%
  Non-world cup years (1993 to 2008)		10.6%	7.1%

  2. 今屆世界盃, 英格蘭已經無左人稱萬人迷既碧咸. 你可以繼續因為靚仔而支持英格蘭 – 假如你認為高治都係靚仔 – 但唔好再提英格蘭有碧咸. 仲講碧咸, 其實好撚 out. (屌, 搵搵下料見到有內地網民寫左呢點…) 同埋, 同碧咸差唔多靚仔既奧雲, 都一樣已經收左皮.

  3. 同樣道理, 阿根廷既球員中, 係無馬拉當拿 – 條友係教練. 以阿根廷外圍賽既成績估計, 佢做教練主要係負責同美斯講 : 拿, 屌你老母, 你咁咁咁扭過d 人, 射入去就得嫁咧. 巴西亦無 朗拿度 同 比利. 畢竟你睇緊既係 2010 年世界盃. 你講個堆, 應該係上世紀既人黎.

  而戴志偉 同 小志強, 係漫畫人物, 同 AV 動作片一樣, 係假既. 現實世界既日本隊, 係強隊中既魚腩. 衝力射球呀, 猛虎苛於政射球呀, 中場射波呀, 全部係日本人既幻覺. 心同此理, 推而廣之, 以人物全部唔會出現於今屆世界盃 : 柏金, 奧華馬斯, 告魯斯, 古烈治, 雲巴士頓, 哥連拿, 利華度, 盧比度叔叔, 馬甸尼, 柏賓 (法國名將), 佐敦 (籃球名將), 老虎活士, 費達拿, 拿度.

  不過, 已經六十幾歲既華朗, 仍然係阿根廷球員 (我一度懷疑老馬收埋兩個秘密武器 – 一個叫巴迪斯圖達, 另一個叫馬拿當拉, 無錯, 即係老馬佢自己). 而身高九呎既荷蘭門將雲達沙, 仍然有得踢. 估計, 人材缺乏到咁, 呢兩隊無乜機會.

  4. 重申, 阿叔林尚義已經謝世. 今屆世界盃, 無阿叔.

  順帶一提, 足球比賽係以入球多寡分勝負. 足球並唔係打拳, 唔係計點數 – 即係計下兩隊半場/一場有幾多個角球, 犯判, 射門次數, 越位. 偏偏大部份講波佬淨係識講呢d, 彷佛角球多就會羸波咁.

  另外, 無線同亞洲無得播世界盃, 已經十幾年. 唔好再沉迷80年代個d 香港既光輝歲月. 個段日子已經隨肥彭同佢兩個當年正到嘔既女, 一齊離開左香港. 俱往矣!

  5. 唔好問, 亦再唔好嘗試去理解, 乜野叫越位. 對好多人黎講, 要了解越位, 比起解釋傳說中既七大千禧年難題更加難. 四年前你陪個位 (前) 男友, 個陣佢為左滾你上床, 由世界盃外圍賽, 到意大利拎左冠軍, 都一直解釋俾你聽乜野叫越位. 你個陣以為自己識, 其實, 你冇識過. 但最終俾佢o厄撚左上床. 即使你今次 (以為) 識左, 過一排又會唔記得.

  算撚數咧! 簡單一點, 當越位同政改一樣, 都係超錯. 總之, A 隊越位, 個波就歸 B 隊, OK? 識唔識又有乜所謂? 世界盃都係四年一次. 正如金融海嘯, 百年一次, 知黎做乜春?

  6. 今屆世界盃既主辦國, 係南非. 南非, 係一個位處非洲既國家, 並唔係等同整個非洲. 一般人對南非有下列既誤解 :

  — 全部係黑人? 個度只有八成人係黑人, 南非係有9% 既市民為白人. 比例上, 香港既黃種人比起當地既黑人更多.

  — 南非好撚窮? 南非笨不等同埃塞俄比亞 : 南非的人均 GDP 每年有約 10,000 (ppp 計), 後者只有佢十分一. (香港約40,000, 內地約7,000)

  — 南非名產? 鑽石, 黃金 及 其他礦物 (鑽石公司 De Beers 既鑽石洞, 有不少係南非)

  — 南非既名人? 前總統曼德拉. 唔知邊個黎? Beyond 首光輝歲月就係講佢.. 唔識 Beyond? 你可以當曼德拉係南非版既甘地或者華盛頓. 不過觀乎你連曼德拉 同 Beyond 都唔識… 係印度聖雄甘地, 唔係 Tom Hanks 個阿甘喎…

  7.  如果你男友話去睇波, 唔該唔好一齊去. 原因? 不論係踢定睇世界盃, 都係一件非常非常男性化既事. 除左花生, 橫飛既就只有粗口, 特別係個 “屌” 字. 而睇波現場第二出現多既人物, 就係 “你老母” (排第一通常係 “球證”. “球證 扯旗 舉旗”, “球證俾牌”, 球證吹雞. 佢肯定出現多過任何一個球員).

  順帶一提, d 人講屌你老母, 即使佢係對住你講, 大部分情況下, 佢都其實唔係真係想屌你老母. 並非佢唔係話唔係想屌你老母咁簡單, 而係佢根本無一個特定既老母想屌. 再講深d, 佢根本唔係想 “屌” 同理 “屌某個老母”. 佢只係想發洩, 想屌你老母o者… (屌你老母, 越講越亂).

  8. 如果你男友話尋晚去左睇波, 千祈唔好問賽果. 一來你可能勾起佢d 唔開心既事, 包括鍾意既球隊輸波, 同埋輸錢, 二來你可能會勾起佢d 開心既事 – 其實佢根本無去睇波…

  9. 如果你睇報紙見到比利話邊隊邊隊贏, 咁你唔好認屎認屁, 話比利覺得某隊會贏, 所以睇好個隊. 原因 : 比利係出晒名既明燈, 佢話掂個d 隊, 通常係分組賽出局.

  10. 講左咁耐, 你應該當世界盃個個月, 世界上無左男人. 如果你真係咁好學, 可以睇下呢位仁兄寫既足球文盲系列. 講明先, 佢講到似層層, 真係可以拋下書包呀.

  要打入男同事/ 同學既世界盃話題圈, 唔好一開口就話邊個靚仔, 邊個大隻呢類掃興既說話. 咁樣做同一提起名牌就講 LV, Gucci 一樣咁無品味. 你點都提句 Hermes 呀… 你起碼講一句 :

  
  

  美斯係神射手大熱, 不過屌你老母, 咁多年除左朗拿度, 無乜邊個神射手係大熱當選. 我估係雲佩斯! 你老母14 倍值搏呀! 加上荷蘭唔係比利既心水, 真係信心大增呀. 話唔定雲佩斯可以繼伯金之後, 再次成為世界盃金靴獎的荷蘭球員呀.

  嘩, 一句說話已經透露晒你明白以上 9 點!!! 信我! 背熟佢, 同班麻甩同事講一次. 佢地肯定唔會當你係鍾意碧咸個類 OL.

  男人睇波唔睇靚仔, 越靚仔既球員, 只會越乞人憎 . 如果佢本身唔好波, 好似碧咸咁, 佢同陳光榮一樣, 都會成為男人公敵. 就正如百貨公司既化粧小姐無個靚既道理一樣 – 信我, 韓國, 日本, 新加坡, 香港既化粧小姐, 無個靚.

  倒頭來說, 世界盃同金利來一樣, 都係男人既世界. 何苦要強行插入呢? 班麻甩由細到大都對住呢個波 (儘管你已經有一雙), 你點講都唔夠佢地黎. 正如除左基佬, 係無男人會加入女人堆講化粧品.

  所以, 呢個一個月, 你努力點約埋姊妹一齊做瑜伽拉. 橫豎俾左兩年學費, 你咁耐淨係上左一堂…

  
  (喂~~~~
  
  你老母你又去取材??
  
  記住寫信返黎呀~~~~~~~~~~~)

  • 1:36 pm
  • 24 Comments