September 5, 2010

• <史大叔的 必輸 投資大法>

  套用張五常的講法 : 這篇文章可以傳世.

  即係話, 呢篇文章, 可以翻炒又翻炒.

  這篇文的對象, 是一些快將投身 火坑 社會的年青人, 或者已經工作左一兩年既才俊. 叫得你才俊, 即係話, 你仲係窮西一條.

  至於已經年過三十, 工作經驗有廿年以上, 已經結左婚, 或者滿面胡鬚既人, 即使你仲係窮西, 可以唔使理. 因為 你 . 已 . 經 . 無 . 得 . 救.

  文寫了很久, 中間改了又改, 執完又執, 還是不滿意; 偏偏不出是甚么不滿意… 或許是教育意味太濃厚… 我一向認為通過 xanga 說教呢d 同長江三峽既浩瀚工程, 係幾個滿腔熱誠既 傻佬 教書佬 才會做的 (例子一, 二, 三; 通稱 三傻會 三師會)…

  ———–

  原來, 多年來我寫過唔同文章講投資, 自己唔google 自己都唔知道…

  — 五年前寫過一篇文章, 講投資;

  — 五年前又寫過, 講風險與投資;

  — 上年寫過講風險, 較生活化.

  順帶一提, 我有時候會 google 自己 (除左 google 史兄), 靠關鍵字搵返以前既文章. 無論如何, 上面既文章大體上都夠一致, 起碼, 錯也夠一致. 如果你跟隨以上指示投資, 可能一早已經破撚左產. 恭喜你!

  但講返轉頭, 一直寫 “投資” 個陣都冇講明 “投資” 既定義.

  首先, 投資笨唔等同買股票. 呢個, 只係你呢d 星斗市民一廂情願既想法.

  第二, 你要知道, 人類行為有 消費 與 投資 之分別 (嘩! 你要知道阿媽係女人!) 最簡單黎講, 消費 係用現有的資源拿拿臨而家用左佢; 而 投資 就係將現有既資源用作其他生產渠道上以希望換取長遠的回報…

   

  寫成咁, 係唔會有人明. 我讀書個陣都唔明. 但讀書既好處係, 你唔明, 其實唔係太緊要. 你讀人生的意義, 明咩? 讀論人論君子, 明咩? 只要你肯背, 肯記, 肯抄, 咁你起碼有書讀下. 記得教評局班友成日話人考試個陣囫圇吞棗. 屌你老母, 唔吞棗, 有人識背屌股戰場文. 唔囫圇, 邊個知乜野沉積岩係乜?

  再簡單講, 你有一百萬, 拎去燒左佢, 從中獲得快感, 叫 消費; 拎個一百萬去買部機器整餅俾自己食一世, 係投資.

  分類既野, 同香港政府一樣, 好豆泥, 好隨便. 又舉個例 :

  你去買部法拉利 (或者包一個陳法拉), 今日俾錢, 但以後日日可以享用, 係 消費 (消費一件durable goods; 如果你當陳法拉都係 durable…) 定 投資, 視乎你係以 消費者 定 公司 既名義去做呢件事 –

  如果你係一間公司, 用法拉利或者陳法拉去搵更多生意的話 (例如出租俾其他老闆), 就係投資;

  若你純粹日日係坐係度合皮, 就會當作係消費.

   

  再唔明, 其實唔緊要. 再簡單說 (我唔明點解你一開始唔簡單講…), 你去租樓就係 消費; 買樓就係 投資. 夠簡單未? 嚴格一點說, 你租時鍾酒店的消費程度, 就比租一個月屋既大; 而租一個月屋既程度, 就比租一年大…如此類推. 講到尾, 分類既野, 好夠彈性既.

  而投資, 未必一定要用錢, 而係可以用 資源 – 金錢, 時間, 土地, 泥土, 貞操, 身體, 木材, 原油, 桔梗, 蜂蜜, 人參 – 都可以用作投資. 遊牧人有時候採用 輪姦法 輪耕法 去耕種, 犧牲短期的收成以換取長期更好的收成, 都係投資的一種.
   
  ———–

  我三歲開始讀經濟 (阿媽陀我個陣已經有胎教), 每次講俾人聽我讀經濟, 有九成既人都會有以下反應 :

  讀經濟呀… 咁乜野 number 得?

  久而久之, 我己經有一套標準答案 – 好似政府乜野 line to take 咁 – 一遇到呢條問題, 照背照答.

  讀經濟, 同炒股票可以話係毫無關係. 以為有, 只係你呢d 星斗市民一廂情願既諗法 (無恥到原文內炒冷飯…)

  咁既誤解, 幾十年黎一直存在. 正如我當年搞 debating society, 係搞 debate, 唔係打 debate – 正如做馬欖不等於性能力強勁. 我同舊室友每次同人講我上 debate soc 個庄, 對方都只係得一個反應 :

  哦, 咁你 debate 咪好叻 lor~

  我記得開首時兩三年, 我還會很認真向對方解釋搞(野) 和 打(真軍) 的分別. 幾年後, 我們聽到呢d 說話, 都係會回應一句 :

  係呀, 打debate 最叻.

  ———–

  好咧. 咁究竟我想講乜呢?

  先求知, 後投資.

  我真係希望今年畢業既朋友, 想買四仔 – 樓仔老婆仔生仔車仔 – 真係要諗清楚先. 因為每一樣野, 都係重要既投資. 記住以下各點.

  0. 點解要投資?

  好簡單, 因為你想有錢. 如果你唔想有錢, 你可以將錢放係床下底. 致富既重點係, 你首先有份工作可以保住你條賤命, 然後搵機會投資. 甚少打工仔可以做到飛黃騰達, 但要小富, 好多人都係靠投資.

  記住, 係小富, 唔係大富. 至於大富, 一半靠命/好彩, 一半係靠賤. 美國富豪 Bill Gates 係好心, 捐咁多錢, 但唔好忘記佢廢到無倫既 視窗vista (或任何一代視窗), 同 當年迫柒你用 IE, 佢係賤. 也勿論本地一盡人板富豪.

  因為投資可能係未來帶來回報 – 即你將來既收益大過今日付出 – 所以你投資, 有機會令你有小富. 而老老實實, 我所講既投資, 並唔包括拎舊錢去開公司. 第一, 風險好高; 第二, 我未試過. 同人介紹D未試過既野, 咁耐以黎我只係試過一次. 咁攬下攬下又唔會有冇損失, 但叫人去開公司或者投資朋友既公司, 可以輸鑊金…

  1. 投資前, 請清左你既咭數 同 關窿

  清咭數 : 我肯定你做正正經經的投資 – 買股票, 樓宇, 外幣 – 回報肯定無信用咭既利率咁高. 你呢邊賺 10-20%, 個邊要俾 50%. 識計加減數, 你就知你應該 首先還清條咭數, 然後先諗投資; 還晒錢先好去投資.

  而清利率只有 6%-7% 既關窿數, 則出於另一個更重要考慮 : 無投資, 你唔會破產, 唔會俾人淋紅油, 唔會俾人告, 唔會俾人話你仆街. 但你欠債 – 那怕是無乜用既政府債 – 以上各點 (破產, 紅油等等), 通通有機會係你身上發生.

  好多人話政府收既利息好高, 成 6%-7%. 呢批人係活係個井裏面. 送錢俾你好唔好? 呢批人仲話好意思話自己讀過十幾廿年書, 真係不知道所謂. 我想問, 你憑乜野叫政府係無抵押, 無收入證明, 只得你阿媽做保證既情況下, 用 Prime – 2.5%借錢俾你? 你那張所謂香港大學一級榮譽沙紙, 值幾多錢? 唔還, 政府根本唔可以好似收數佬咁迫你還錢, 6%-7% 係低到爆! 不過, 呢個世界梗有d 大學生借錢唔撚還.

  所以投資之前, 首先還清 咭數 + 關窿. 老實, 關窿咁抵, 還唔還又無乜所謂…

  2. 儲錢

  還晒錢, 當你再無爭人錢之時 (又兩句講同一樣野…. 加利仔速度唔夠高, 跑得慢, 唔夠對手快…), 就可以開以儲錢.

  投資之前, 係儲錢. 你要儲現金, 儲到有一定程度, 先好拎錢去投資 (例如買股票). 唔好儲 $20, 即刻拎 $20 去做投資. 你要預留一定的流動資金, 以應付各式各樣既意外需要 : 病左入醫院, 無端端屋企人要舊錢又想你幫手, 行行下街見到 iphone4, 你條女想係 100 日元對 9.2 港幣既時候去東京喪拼, 你讀書進修要交學費 – 呢樣可以當係投資既一種.

  投資, 最好係你無負債既情況下做. 唔係話你拎左去投資, 唔能夠將佢地變返現金, 而係中間可能涉及風險 – 你夜晚要錢但股市無開; 你想放層樓交醫藥費個市唔就. 如果你有流動資金, 可以頂住一陣先.

  至於流動資金, 要幾多. 因人而異 (廢話). 個人建議係人工既 1 至 2 倍. 如果你搵十萬九千七, 當然唔使咁多. 而係你做投資既時候, 最好能長時間維持一定的流動資金.

  至於點儲錢, 鎖你, 我唔知喎. 只要你換少部電腦, 去少次Neway, 飲少兩支麥哥倫 (嘩…), 返工搭少次的士, 去少次日本 (嘩, 越黎越對號入座), 一年儲到三五七百萬, 並非妄想. 記住, 儲錢係要慢慢儲, 唔好諗住儲一個月就會儲到好多錢.

  傻豬, 你要儲錢, 即係你本身無錢拉. 咁你點可能以為一日就儲到好多錢?

  有好多後生仔, 賺到兩個臭錢, 就搬出黎自己租屋住 (嘩, 越講越似自己). 呢d 人注定一世窮到燶. 我可以話俾你聽 – 因為我有經驗 – 自己租屋住, 好貴, 洗費好大. 我要話俾你知, 唔好租屋. 千祈唔好租屋…

  3. 投資

  好咧. 到左所謂戲肉.

  到你真係儲到舊錢, 可以開始諗下做乜野投資.

  你想知既冧把, 係無. 因為我都唔知. 你以為免費睇一個 blog 會有令人發達唔使撈既機會? 你不愧為入世未深既小朋友. 周秀娜夠正咧, 佢唔使出黎撈咩? 你都仲要睇呢個 blog, 仲要返工, 即係現實已經話左俾你知係無不勞而獲呢回事拉.

  講返投資.

  正正經經, 以風險計, 由低至高既投資產品分別係 銀行定期, 債券, 貨幣, 股票, 樓宇, 衍生工具. 當然, 唔正經既投資大把 : 整容 (望望 愛不疚先生…), 隆胸, 買支槍去打劫, 種大麻, 讀碩士等等, 但唔受年紀性別經濟特徵所限, 普遍性較大既, 始終係上述各項. 有機會的話 (=無機會), 我會談談其他唔正經既投資.

  只不過…

  — 多得美國佬, 港幣定期, 利息係零. 或者接近零. 你放六位數字, 一季收既息唔夠你買一份太陽報. 想靠利息買份金融時報黎增值? 儲十年就得. 如果你係獅子銀號既結存多過一百萬港幣, 你做定期大拿拿可以拎多 0.001% 既利息.

  嘩!!! 簡直係你阿媽大減價益你阿爸!

  如果你有一萬銀做定期, 一年利息多成 大拿拿 一毫子呀!!!!!!!!!! 你有廿萬, 一年可以搭多一次電車. 簡直係奇異恩典呀~~~~~~~
  

  — 以一般年青人黎講, 債券唔使諗, 因為一般既入場費都要 100,000 港幣 – 因為債券多數唔係俾散戶玩. 債券好穩定, 穩定到個價唔郁. 如果死都要買債券, 可以買 2819 或者 2821. 一年回報大概 3 厘. 你投資 50,000, 扣左洗費, 一年收 1500 息. 聽落去好少 (實際都係好少); 但大佬你好似乜都唔使做, 淨係禁左幾個掣渣喎…

  — 貨幣. 好難玩. 貨幣既幣值 (即匯率) 上上落落, 除左津巴布韋錢, 否則你係要不斷買買同賣賣, 先搵到錢. 同埋, 貨幣每日既交易時間係24 個鐘, 無錯, 即係一日無停咁交易. 以回報相比辛苦度黎講, 炒外幣唔划算. 又如果死都要買外幣, 可以買人仔 (屌!!!!), 一年大概 1 厘利息, 加上 3-4厘升值 (唔好估2005-2008 每年 6厘既回報會重臨), 每年大概 5 厘回報. 你投資 50,000, 一年變 52,500. 聽落去好少 (實際都係好少); 但都係個句 : 大佬你好似乜都唔使做, 淨係禁左幾個掣渣喎…

  — 樓宇買賣, 負擔好大. 除非你做 9成按揭或者屋企人支持你, 否則畢業生想買樓, 我唔建議. 第一, 你俾唔到首期; 就算俾到, 而家美孚新村 (千幾年樓齡), 600 呎 300 萬, 一個月供 $11,000; o岩o岩出黎既後生仔, 好樂觀咁一個月搵 $20,000, 你收入 50% 去左供數. 如果加 一厘息, 你已經要仆街. 第三, 你將錢供樓, 好難有流動資金, 如果遇上乜野樓市大跌, 銀行要你補差價, 你仆硬街.

  所以, 而家樓無論幾平幾貴, 我都唔建議後生仔拎錢去買樓.

  講左咁耐, 得返股票可以買… 咁上面講撚左一大堆垃圾, 結果係無用既…

  好咧, 呢句真係有用 :

  睇股不如睇市.

  睇市, 好簡單. 學股神畢菲特話, 當人群恐懼, 你就貪心; 人群貪心, 你就恐懼. 而將 “阿媽及姨媽姑姐” 代入 “人群”, 你人生就變得好簡單. 唔好似為好低, 但有好既野, 從來都係簡單, 甚至聽上去有d 低能. 屌, 英文夠係來來去去 A-Z 拉…

  另外, 有幾條阿媽係女人既原則, 非常有用.

  1. 了解你自己 : 通常, 後生仔可以眼光長遠. 唔好理一日可以升10-20% 既股票. 你唔係屋企既阿媽, 難以一日廿四小時睇住個市. 千祈唔好諗短炒. 再者廿三十歲既人, 搵錢不在於一日半日. 買炒股, 你從來羸唔盡, 但輸會輸到仆.

  ok, 我知道, 人一定係短視的.

  2. 買優質的公司 : 由於你錢少, 加上無時間, 唔好諗可以扑中仙股, 一毫變四毫. 大藍籌係貴, 但係有道理的. 概念係睇唔到既野, 有潛力即係今日仲係無錢賺. 功課可以做, 但你都無時間或者根本唔識睇年報. 無謂o厄自己. 再者, 年報都係o厄人既野多. 算罷拉, 六師弟.

  3. 至於風險分散 : 學某報高人話, 無一球都無謂分散風險. 曾經見過中年工作婦人手頭上有超過廿隻股票, 嚇死我. 邊睇到咁多? 優質股票, 十隻內之就夠. 如果你想穩陣, 又想分散風險, 買 2800 (盈富基金). 一次過可以買45 隻優質藍籌.

  4. 小注開始 : 唔好一次過成副身家買落去 – 除非你身家真係得 $3,000. 首先要買少少, 等自己有 incentive 去留意住個市. 好多人成日得個睇字, 唔買乜春都唔做. 信我, 你買少少, 對個市, 對你買左既股票, 留意度上升一億倍.

  咁無論你買左或者諗住買, 都唔該搵下講股票同大市既網站. 環球既可以睇 bloomberg – 你睇下我即使睇緊咸片都開住個 bloomberg… 而香港既可以睇 etnet.com.hk, 佢有即時報價, 本地既新聞, 公司公布好快有.

  5. 對沖. 如果你買國泰但怕油價不利盈利, 咪買石油股. 好多野都可以做個對沖 (不過比較弱), 代價係升值能力會下降. 如果你買得優質估, 對沖有點多餘. 而且錢唔多, 對沖黎做乜? 得一舊水買大又買細, 咪即係博開圍骰?

  6. 咪買基金. 此乃騙財工具. 好多基金經理既知識, 比你同我更膚淺. 加上你買賣基金, 由你落屙打到執行到, 可以差幾日. 如果遇上大風大浪既日子, 真係政治一日都嫌多. (小心 : 盈富基金並唔係基金)

  7. 估票唔係女, 唔好溝. 什么平均成本投資法, 笑撚死人. 你覺得心水股票抵, 有錢多多也要買.

  對住股市初學者黎講, 最好係去銀號開個股票戶口, 然後設立一個月供股票計劃. 唔想幫人賣廣告, 但某獅子銀庄而家免手續費, 連結在此 (嘩, 咁叫唔想幫人賣廣告); 而 本港中資銀號一哥, 可以俾一個手續費, 任揀九萬幾隻股票 (通常買兩隻要收兩次錢).

  遙想公瑾當年, 小喬初嫁了. 隨令公征戰, 賺得最多的股票, 就是月供的那些盈富基金. 這也是為什么我認為與其花時間揀股, 不如跟住大市走. 起碼, 人輸你輸. 咩呀, 大家都一齊咁仆街lor…

  世上最厲害的數學, 就係複利呢個概念 – 唔明可以睇下黃子華講. 如果你投資既公司, 每年派息, 但你唔想收錢, 改為收息, 可以揀幾隻有以股代息既股票 (例如 匯豐, 東亞等).

  總之, 後生仔, 一出糧, 拎錢出黎買盈富基金, 勇一點可以買中國A50 (2823) – 入場費每手只是 $1,200. 唔好理佢一萬點定兩萬點, 買拉… 屌.

  最後一句

  朋友, 忘記你d 強積金吧…

  • 12:43 pm
  • 16 Comments