March 12, 2007
-
<周未遊記>
這便是大懲罰嗎?
上星期五去理髮… 發現… 嗚….. 髮線開始向上移了……………………………………….
嗚嗚嗚嗚嗚嗚嗚嗚嗚嗚嗚嗚嗚嗚
我一直唔係賣樣, 只係賣屎忽 – 我不會天真得以為我可以靠文字搵食 – 但老天也不要將我較像平常人的特徵拿去呀…. 連一向拍馬屁的理髮師也不得不承認…. 髮線向上移了. 小弟不過是二十出頭, 我不想學肥姐, 更不想學鄧浩光去織一個真既假髮.
嗚…我以後出街要學側田咧.
嗚… 點解你仲要係顯示器面前恥笑我?………….
*****************************************************************
帶著沉重既心情, 與一眾人等去灣仔唱k…. 操, 星期五晚每人 $100. $100! 簡直係百佳就黎過期鑵頭既價錢, 髮線向上既災難式發現立即一掃而空.
禁煙對健康既得益, 無人見到. 但香港既卡拉ok 就黎執笠, 任何去k 既人都感受到.
*****************************************************************
星期六, 三點半起身.
首先收到好消息… 有免費煙食. 仲要係地球既另一端帶返黎… 牙都未刷, 拿拿臨係廁所食返枝先…
諗住去翠華食下午茶, 但最後去左泰昌買蛋撻…. 因為之前係地球既另一端有人同我講屋企樓下有戲玉睇.
梗係拎住蛋撻去睇人排隊入 H&M … 嘩… 頂佢個肺. 使唔使呀?
我企左係對面 (中藝門口), 一路食蛋撻一路望, 當然暗地一直驚嘆. 排隊男女既比例大概是 2 : 8, 有外國人但不多. 說時快那時忙, 蛋撻食完. 於是乎拿拿臨食煙. 食食下有個胖胖既外國白人拿著雪茄, 站在我旁邊, 一路吸, 一路口o翕o翕. 我望望佢, 佢對住我話 “It’s crazy..” 跟住我同佢講, 之前個晚十點已經有人排隊, 佢成即瑪莉咁既咀, 完全唔相信.
之後佢話佢老婆排隊, 佢同老婆講自己一個人行下, 之後返黎接佢 – 若香港的男孩子提出這要求, 恐怕落得五馬分屍下場. 大家拎住支煙, 開始係街度吹起水來… 原來佢係南非人 (我細問之下先肯定佢係南非人, South African – 我一直以為南非只係得黑人), 同老婆黎香港玩一個星期, 之後再去越南辦點公事. 聽他口吻, 他十分喜愛香港, 說了數次 “wonderful experience”. 知道佢去越南, 我告訴他那裏的 舊中央郵局, 現在變成了一個打 IDD 既地方, 很值得一去. 然後那裏又有很多法國式建築等…
說著說著, 胖子同行的伙伴 (不似他兒子, 似南美人) 來到, 又是一大輪 “It’s crazy…” 式口號, 然後我又說有人尋晚開始排隊… 皇后大道中又頓時多了個扑濕瑪莉….
*****************************************************************
吹完水, 去左銅鑼灣… 才發現最愛行的那間 $10 店快執了. 以前很喜愛一起行這間 $10 店打發時間… 可以大造文章… 但還是算了… 執笠九折, 拿拿臨買了些日用品.
六鐘先發覺自己成日未食過一餐似樣既, 咁o岩行過東角, 見到一直想試既雪村晚市開門, 於是乎一條冷入去扮遊客. 瘋狂食食食, 又忍唔住叫左支 真澄, 一飲, 又醉, 頭痛到不堪. 若然你上星期六見到一名 M 字額既男子八時許係銅鑼灣飲醉, 並向女途人性搔擾….
*****************************************************************
我唔要 M 字額呀……
Comments (17)
哈哈~~~ 好一篇有趣既遊記! 史兄, 你唔好唔開心啦, 你就算真係變左 M 字額又或者大吉利是講句變左做禿頭, 我都會繼續當你係朋友黎架~! 我會繼續支持你既~! ^_^ 而且禿頭都可以係好型架~!
我都好耐無去十蚊店勒, 原來佢就黎摺勒, 我都要搵日抽d 時間去睇下有無咩野買先…..
先不說十個光頭九個富（不是仆街個仆──仆音「傅」），單是光頭本身已是個生招牌。塞翁失馬呀史兄～～～
十蚊店要結業了？幾時Last Day?
H&M，我很有興趣去寫篇文章，奈何我的時裝觸角實在太過薄弱。
P.S.冒著被分屍的危險，偷讚一句，「同老婆講自己一個人行下, 之後返黎接佢 – 若香港的男孩子提出這要求, 恐怕落得五馬分屍下場. 」寫得極佳，足以令所有香港男人流下男兒淚……各位如果一星期之內仍未見到我再出現，煩請到西環海面執番齊我……
好邪~~ 我星期六0既路線同你幾乎一模一樣, 時間地點都係!!! 但我唔覺街到有M字額喎…即係唔係好嚴重0者…放心啦朋友~~~
I don’t leave comment regularly. But I feel your pain, so I’m gonna to suggest Rogaine. Scientically proven to work for most people. Relatively cheap, no side effect. Plus even if it doesn’t really work, at least it ease your worries psychologically.
史兄，你戒煙吧，可能有幫助的。
香港人一遇新開張o既野就瘋狂到仆街，而且呢間野又鬼咁出名，賣麥當娜d 衫丫嘛，梗係d 明星呀，師奶呀，港女去搶風頭啦，充闊太機會！！
搵次麥當勞賣衫，再送開心樂園餐，又會有一班人去搶貨。
史兄，節哀順變。
算吧啦史兄，我男友一早睇通世情—剃光左 lu ！！H&M 同 Mos burger 差唔多，香港人不嬲都係新屎坑三日香，而家都無人排 Mos burger 啦！
嘿!!!! 駛乜前一晚十點黎排隊呀!!!!!!!! 我星期日黃昏去, 係就係做樣擺堆鐵馬係處, 但都唔駛點排!!!!! 對於 H&M 既印象, 一行埋去望到個門面, 竟然覺得D裝修有D似 GIORDANO !!!!!!!!!. 入到去, 目立 目立 眼, 就覺得D衫同格局似 ESPRIT !!!!!!! 不過價錢算幾平既!!!!! 可借今季D衫唔多 口岩 我 !!!! 同埋裡面好似打丈咁, 想話慢慢揀都唔得, 點買丫!!!!!! 不過睇雜誌講, 話佢地聲稱”日日有新貨” WOR!!!! 遲D去睇下點!!!!! 麥當娜系列…….對我冇咩吸引力, 但雜誌講話佢地曾經同 KARL LARGAFIELD , VICTOR & ROLF, STELLA MCCARLEY (應該串錯字) 合作, 嘩!!!! 呢個正!!!! 遲D睇下有冇筍野!!!! 同埋我發覺入去既人, 似乎都有唔少潮人….. HEHEHEH………..
10蚊店執, 係東角果間定京士頓街食街果頭吉之島果間呀???????? 如果係東角果間執, 冇所謂丫!!!! 仲有吉之島!!!!! 果間仲正仲好玩!!!!!! ( 但話時話, 我呢排少行老銅, 分分連吉之島果間都摺埋都未定 )
朋友!!!! 你好靚仔!!!! ( 唔駛驚M字額 )
呢隻就係 da ken 講o個隻，我都聽過話 work：http://db.regaine.com.hk/men/page0.html
其實隻洗頭水普通人用都得，係髮型師講既，用左頭髮靚 d 有光澤 d。我都用過！
係時候買定支百蘭地查下啦
M字額唔緊要,唔好戀戀不捨,他日留個bar-code頭…..
「點解呢個世界咁唔公平? 點解我咁靚仔，但係要冇頭髮…?」by 大師兄in。
「點解呢個世界咁唔公平? 點解我咁靚仔，但係要冇頭髮…?」by 大師兄in功夫。
好恐怖既故事….
Marcella: 我o個晚都o係o個度…. 附近間魚米家?!
Lagerfeld/McCartney/V&R 都過o左去o架喇, 我淨係買過S.McCartney o個d, 大部分都麻麻地咋。D(英國)人極之瘋狂無禮無秩序, 你會以為將會發生人踩人事件, 死o係H&M…如果唔駛變態, 我都好想要V&R的平婚紗!
鴨鴨 !!! 你就好la!!!! “領教” 過英倫既 H&M !!!! ( D衫同D顧客 ) ….. kekekekek……
我知上述果D LABEL 係過去左既事, 但佢地或者會陸續有來, 同其他LABEL crossover 呢!!!!
V & R 平婚紗 !!!!!!!!!! 有幾平?????? 得唔得架??????? ( 我佑而家冇咯, 我八下遮…..heheheh……….. )
靚媽：Bar-code頭者，係咪好似當年地鐵廣告裡面個禿頭先生咁，幾條頭髮宛如毒蛇吐信隨風飄舞，分十‧零界或者分前後界果種？
bar-code 頭只令我諗起零零發裏面個個西門吹雪…