March 12, 2009

• <新居>

  寫完舊居, 講下新居.

  新居係灣仔, 近天樂里附近, 對面就是 Neway – 大學時經常去這間卡拉 ok. 但後來卡拉 ok 越黎越貴 (我屌佢, 而家仲要按人頭收版權費; 咁我俾個d 人頭費係做乜? 又唔係我入去唔唱歌齌睇波可以免所謂版權費), 我都好少去. 而家仲話唔食得煙…. 我不如沖涼個陣唱下夜曲叫唱左k…

  一直想住在灣仔. 尤其是當年日日放工去行太源街, 我恨不得就住係修頓個度. 後來發覺租金好高, 而家住近電車路/ 皇后大道東都會好嘈, 於是打消念頭. 

  後來有住灣仔的舊同學 “移民”, 問我租不租. 新居的業主是舊同學的父母, 叫做識, 所以租金應該比市價低了一點; 但據稱由於佢父母要返夜, 佢地有時會晏就上黎係另一間房訓陣. 也沒有什么所謂 (起碼而家無), 除非有一天他們上來時見到有兩團赤裸既肉係廳度….

  我知廢話太多, 去片. 留意, 因為我無 wide 鏡, 所以影出黎間屋好似好細. 其實, 間屋好撚大, 起碼我覺得. 有時候甚至認為間屋太大, 無乜安全感.

  ok, 所以我應該住籠屋呀嘛.

  (1) 廳

  據我理解, 電視後面個d 櫃, 係八九十年代屋企必有既.

  更重要係, 左邊個除櫃桶, 係假既, 拉唔開. 如果你唔明, 個d 櫃桶 大概等於無線劇集, 大屋裏面個度門咁, 係假既, 拉唔到出黎.

  再唔明我都無辦法.

  記低大廳梳化的位置, 再參加下面既無獎遊戲.

  
  

  (2) 書 “房”

  唔知點講好.

  留意書房無端端有套酸枝家具.

  話說我去睇樓既時候 (搬入去之前, 我只睇過一次十分鐘樓), 呢套咁既酸枝家具, 係放係大廳度. 仲要放係而家放梳化的地方.

  一入門口, 就睇到呢套野. 我心裏叫左句 : 嘩, 乜咁撚老土? 然後諗起葉間裏面阿葉問同廖師父係比武之前茗茶… 快使用雙截棍, 哼哼哈唏….

  但試探之下, 得知業主幾鐘意呢套野 = 佢唔會掉. 於是請求佢放入書房. 而家望望下, 套野順眼左. 再加上我左d 唐老鴨上去, 即刻潮晒.

  留意, 按下電掣, 唐老鴨會發出無限光芒.

  
  

  (3) 睡房

  無錯. 我係反對執床行動委員會既主席.

  有時候我就唔會點解要用枕頭巾, 一樣我阿媽叫我用既野. 有時返去食飯, 佢會問我有冇用枕頭巾 (??). 但佢從來唔會問我有冇女朋友. 由於可見, 枕頭巾重要過女朋友.

  仲有, 係舊屋個陣, 佢見到我無用枕頭巾, 娥到仆街. 我知道點解老頭要同佢離婚. 皆因老頭連枕頭都唔用.

  之不過…

  問1 : 用枕頭袋既原因係?
  
  
  答1 : 廢事整污糟枕頭.
  
  
  問2 : 咁何解要用枕頭巾?
  
  
  答2 : 廢事整污糟個枕頭袋.
  

  ok. 我即刻諗起佛跳牆既故事 (冷飯成功!)

  按此推論, 枕頭巾應該包個膠袋, 再用鐡盒裝好. 唔怪之得古代人既枕頭係木箱黎.

  

  (4) 唐老鴨

  我發現我太多唐老鴨 (屌你!! 你而家先發現?). 可惜屋企無乜位, 搞到佢地要迫埋一角.

  除左下圖, 我仲有一個行李既唐老鴨未搵到位放…

  有親愛既讀者投訴我呢度變左唐老鴨天地, oh, well….咪寫少d law.

  

  • 9:13 am
  • 30 Comments