January 30, 2012

  • <女子組合的起與落>

    話說用左成個月糧, 睇完少女時代演唱會.

    睇完, 開心完, 但有個問題好困擾我成個月 (雖然演唱會只係完左兩星期) :

    究竟少女時代仲可以玩幾耐?

    好些人會立刻跳出來說 : 永遠大紅大紫咧. 如果你答案係咁, 唔好再睇落去, 我建議你去 youtube 睇返呢條片, 繼續J 落去算. 作為一個男人, 第一次睇真係幾難忍得住唔扯旗. 你相信永恒? 十年後 Yoona 32 歲, 仲可以叫少女時代?

    因為無聊, 我根據維基一些資料, 找出1990年後國際有名女子組合資料 :

    (xanga 後備圖)

    解說一下.


    The Group

    這裏只揀了女子組合 (girls group), 不包括主要走創作路線的女子樂團 (girls band). 女子組合以行行企企的成員為骨幹 – 通常有幾份姿色, 偶爾會加一兩個能唱能跳既成員 – 通常其醜無比, 就算識作曲作詞就算識都係一支起兩首止. 例如 Speed 明顯地上原多香子就係食飯兩味, 島袋寬子 就係擔擔抬抬. 未有時間 (亦唔打算花時間) 去仔細研究每一隊, 但大部份組合既方程式都係咁. 唯一例外既係 Twins. 兩個長期行行企企, 香港果然係一個充滿奇蹟既地方…屌你呢d 先叫獅子山精神.

    再唔明組合 同 樂團 既分別, 老實講你咁撚蠢, 唔好睇落去 – 即係 草蜢 (組合) 同 Beyond (樂團) 既分別, 明冇?

    只選女子組合, 沒有挑男子組合 (如當年紅到真係痴線既 New Kids on the Board), 主要原因係我懶. 第二, 女子組合, 主要係賣樣, 賣外表 而 女子樂團可以賣埋 才華, 市場與客源不同, 可以不理.

    而女子組合, 我又只挑了較受歡迎的 4 隊 (Spice Girls, Atomic Kitten, All Saints, TLC – 以銷量計算) 同 亞太區較紅的3隊 (Speed, Twins, S.H.E. – 後兩者只是大中華區較受歡迎).  不在列表上, 但又值得一提的有 t.A.T.u (俄羅斯; 當年維港巨星匯有搵佢地, 黎完之後一沉不起), Morning Musume (Morning 娘, 由頭到尾我唔覺得佢地紅), Bananarama (早年既美國女子組合).

    事實上, 甚少女子組合可以紅遍全世界. 雖然上面有7隊, 但嚴格來說只有 Spice Girls 可以做到在各個洲份都紅起來. 而將 Twins 同 Spice Girls 放係同一個列表, 簡直係侮辱左人類. Twins 個兩個歌手, 十年黎無進步過, 其實係件好難得既事 – 阿 Sa 講野仍然係好似咬住咀唇, 語氣係低低能能, 阿Gill 經過08年陳冠希事件後仍以玉女形象示人; 佢地連成名既側手翻都失手… 真係達爾文在生都俾佢地激撚死.

    不過, Twins/Speed/S.H.E. 同 少女時代/AKB48 都係亞洲市場既組合, 應該有一定參考價值. 因此, 儘管我將所有組合放埋一齊, 大家未必要將 少女時代/AKB48 同 過往既女子組合 睇齊. 純粹開心下就好.

    還有一點, Spice Girls, Atomic Kitten, All Saints 三組皆為英國組合, 一齊係1990-2000年打個你死我活 (雖然佢地並非完全overlap). 我比較肯定的是, 競爭有助質素提升. 正如90年代頭的NBA 競爭最激烈, 那時候的NBA 最好看; 然後到98-02幾乎是個黑暗期… 而香港樂壇最好看, 就是90年代譚詠麟+張國榮+四大天皇 (仆街, 呢個名幾撚老土!!!) 的年代. 那個時代競爭最激烈,人材濟濟 – 1990-1998年間無人能同時有最受歡迎男歌星/亞太區男歌星/金曲金獎兩樣 (cf. 林峰先生); 李克勤, 許志安, 關淑怡 與 彭玲 也不過是二線頭的角色. 這也是為什么當年一些並非一線的歌星今天復出仍有大量觀眾 – 今天競爭太弱了. 男的只有一個陳奕迅, 女的也不過是容祖兒與謝安琪; 也不夠台灣的爭. 你不喜歡也好, 你一定識唱每天愛你多一些/分手總要在雨天/祇想一生跟你走/那有一天不想你/離開以後/情深說話未曾講. 不計林先生的 chok, 你答得出 男人信什么 是誰唱的嗎?

    那是2010年金曲金獎的歌曲.

    Number of members/ Age of members at debut

    大部分女子組合都係3至4個人. 原因, 女人好麻煩; 在夠吸引力既情況下, 越少女成員越好. 你睇下淨係謝安琪一個都咁多是非… 所以少女時代 (9個) 同 AKB48 (佢話就話48個, 但計埋後備應該有60個. 如果計埋其他分支多過解放軍.) 出道五六年, 居然無乜不和新聞, 真係奇怪.

    佢地出道既時候, 成員都在18-21歲呢個身材同樣貌都屬於一等一既年紀. 只有變態國家日本, 先會接受到小妹妹上台唱歌 – 島袋寬子以speed 成員出道時只有12歲. 仆街真係毛都未生齊… This tells you something about the preference of male.

    Peak

    Spice Girls 同Speed 幾乎一出道就紅到仆街, 2年紅爆, 4年就散band; 其他組合用3-5年時間到達頂峰. 如果你將3-5年加上 少女時代 (2007年出道), 佢地應該係 2010-2012 年最紅.

    即係話, 少女時代今年會最紅, 亦都只不過紅埋今年. 之後隨著個人樣貌同質素下降, 再加一兩單離隊合約問題 (幾乎肯定出現), 之後就無以為繼.

    而 AKB48 (2005年出道), 以組合計, 佢地既頂峰已經過左 (2010年). 不過, 究竟乜野係 AKB48? 去左拍AV 個個中西里菜, 可唔可以叫自己做 AKB48?

    Active years and first substantial break

    定義上黎講, 過左頂峰就會走下坡.

    呢句係廢話.

    你會問, 點解會走下坡? 點解唔可以一直保持係頂峰?

    Bill Russell (波士頓塞爾特人名宿, 曾拿11次NBA 冠軍) 在其自傳有以下的一段

    It’s much harder to keep a championship than to win one.

    After you’ve won once, some of the key figures are likely to grow dissatisfied with the role they play, so it’s harder to keep the team focused on doing what it takes to win. Also, you’ve already done it, so you can’t rely on the same drive that makes people climb mountains for the first time; winning isn’t new anymore.

    There’s a temptation to believe that the last championship will somehow win the next one automatically. You have to keep going out there game after game. Besides, you’re getting older, and less willing to put up with aggravation and pain… When you find someone who has the motivation to overrule that increasing pain and aggravation, you have a champion.”

    Bill Simmons 叫這 Curse of Winning : 大家都以為成功是靠自己. 當你作為組合好紅好紅, 成員就會以為成績係依靠個人. 即係咁講, 唱片賣到一百張, 4個成員個個以為有三十張係自己既支持者買既…但呢條數計唔可能出現.

    更重係, 呢一百張唱片並唔係4個人 “個別” 吸引力加埋既成果. 如果佢地以個人出碟, 每人可能只係賣到15張. 餘下個40張, 其實係佢地作為團體, 作為組合既成果.

    但當你係頂峰, 引誘多 (錢女人男人花天酒地), 大地在你腳下, 國計掌於手中, 你唔會咁諗. 尤其當你踏入26-28歲 (出道後5-10年), 開始人老珠黃, 開始要為自己打算, once there is a break or a crack there is no way you can bury it. 尤其是女人, 更加麻煩. 又或者你發覺組合走下坡, 你更想獨立發展, 留條生路; 越咁諗, 組合更走下坡, 周而復始. 呢個時候就會有不和, 離隊, 拆伙既傳聞. 最終變成解散既事實. 大部份女子組合都會有一個重要分裂, 令團隊無法再以原班人馬繼續 (短暫或長期), 或隨後有新成員加入. 苟然殘存的組合, 大多都無乜所為.

    我沒有實際數據, 但上述理論成立的話, 樂團組合拆伙既機會就遠比組合低得多 – 因為成員都 “知道” 自己在組合的位置, 高估自己實力既情況應該較少見. 而男子組合既壽命亦會較女子組合長.

    事實上, 7隊女子組合中有4隊解散過, 一是鬧交不和 – 話左女人麻煩 (All Saints 仲搞野. 聞說佢地係飛機爭一件 jacket 著最後散band.), 一是 人類自自私私要有家庭要生仔要有個人發展  (Spice Girls, Atomic Kitten, Speed). 不是有四個成員, 每人的平均貢獻是1/4, 有很多東西要靠團隊才發揮出來 – 這是女子組合最令人悲傷的事. 分拆後, 個別發展既成員, 成就遠比不上組合既成就既 1/N (N 等於成員數目) – 除左 Victor Beckham, 佢一生最大既成就就係嫁左碧含. 呢點大家都無異議. 呢個大過世界上99%女人既成就 (係英國計應該淨係輸俾英女皇, 死左既戴安娜 同埋 凱蒂).

    總括來說, 女子組合既活躍壽命最多11年, 之後都係似植物人咁名存實亡 (除非你覺得Twins 仲好活躍). 大時大節, 春秋二祭或者結婚周年紀念, 佢地就會出黎復出唱下歌咁. 不過個陣時大部分成員都變到師奶, 個條車胎大到, 個樣老撚到… 今時今日個Victoria 俾你屌你仲屌唔屌? 所以乜野少女時代, 有得睇好睇埋呢兩年…

Comments (11)

  • 留名,其實SNSD我完全唔認得d樣,只係認得d腳!

  • 睇少時都可以睇到寫論文, 史兄你是得嘅:p(唔怪之得hello kitty 乜lun product都有la :p)

  • 作為睇GG既毒男,你相當有學術精神,不如試下膽粗粗搵佢地做訪問research

  • 「香港果然係一個充滿奇蹟既地方」XDDd

  • 在世界末日前,仍能遇上少女時代的  高峰  !?

  • @nfts9527 - 我連d 腳都唔認得.

    @david_0624 - …嗯… 其實呢個題目可以一路寫落去, 寫到出書出論文…

    @Feheart - 不如搵左Twins 先. 話晒係香港精神代表.

    @fongyun - XDDDDD

    @Wind_and_Sky - 如果有世界末日, 咁定義上佢地一定係之前有高峰, 因為無以後可言.

  • 哈哈~ 香港真係一個神奇的地方, d 所謂歌星, 無樣無聲無歌無技, 都可以當紅一時. 其實我相信史兄你出場, 應該都可以找到粉絲 ( under the condition that Paco is behind your back). 都怪香港人, 就算飽讀詩書, 都只不過係一介愚民. 個個都唔諗野, 又或者諗親都係只和自己切身利益有關的野.

    甘時代興衰, 幾千年來都係甘發生 ga la, 但大部份人總無法知道何時是頂峰. 要不然, 個個都做到索羅斯啦……..

    唉, 女人就是如此 (我自己係女人都死講), 斤斤計較. 小小事, 就死纏爛打, 咬住唔放. 明明只係一件外套的事情, 可以重復又重復地鬧鬧鬧, 直至所有身邊的人怕怕, 怕到要走佬為止. 好聽地說, 這是 ‘細心’, ‘著緊’, 難聽地說, 就是 ‘麻煩’, ‘搵交嗌’.

    可惜, 有誰不會年華老去?

    都怪你地d男人膚淺, 個個都只管美女, 那有真正肯看看人家的料子? (雖然女子組合可能料子不多……) 當一個人本來普普通通, 突然變成了多人擁戴的明星, 自然會驕傲, 以為自己真的好勁. 正常人都會如此, 有如那些高高在上的高官, 就以為自己好叻……

    如果有個女人, 肯為你而捨下青春, 為你而花時間, 你要好好珍惜她. 因為她已為你付出最珍貴的東西了!

  • 寫女子組合竟然沒提到GIRLS ALOUD?!?!

  • @chris - hahaha. 頂我才疏學淺無聽過. 第二集會嘗試加返…

  • 作為一個少女時代的FANS,自覺對佢地有足夠認識,希望係度講幾句當補充乜都好,希望史兄睇得到。
    首先多謝你果日有同我一齊去睇演唱會XD
    「少女時代仲可以玩幾耐?」如果你問我……如果係發緊白日夢,咁佢地當然係永遠都咁紅
    但係現實唔會係咁,不過我唔同意佢地最紅係紅埋今年……如果食住而家呢個勢,應該仲可以玩兩三年,最少都紅埋2013。
    因為少女時代會唔會繼續存在完全取決於短約成員,大部份成員都係約長約,甚至死約,只有一個自己屋企比較有錢既成員今年約滿,但已經講左會留低。(你知係邊個既)而又有一個成員係李SM 既親人,係自由約(你都知係邊個架啦!)即係話只要佢地仲覺得有得玩,咁就仲會繼續落去
    只要佢地一走,長約果D 固然冇得走,死約果D 仲會比人侷住繼續,到時又少左D 人,又或者換人,人氣自然會下降,好似史兄咁講,好多價值都係由團隊創造,而唔係個人,咁到時成團人都會受累。
    出於利益關係之下,比著你做入面其中一個,除非你係有錢果個,或者自由身,如果唔係點敢同其他人有不和,點都死留住隊友,有幾耐玩幾耐!
    其實我已經冇野做就搵返佢地以前既表演出來睇,就來變成那些年……

    個人覺得少女時代,乃至女子組合,賣既不單止係樣、身材、歌舞藝,而係成個形象。你唔一定要係一個玉女(不過最好係),你只要令到其他人見到你覺得開心就得,當佢地有一日再做唔到呢樣野,我就覺得佢地果陣時會冇得玩….不過至少而家唔會係

    最後,希望演藝生涯只係佢地人生既一部份,畢竟光芒熄滅了人還是要繼續活下去。

  • 最大問題係佢地結婚

Post a Comment

Leave a Reply

Your email address will not be published. Required fields are marked *