October 28, 2006
-
<遇上 . 主播 . 雜記>
唔知幾時開始, 主播成為左明星. 唔知係黃德如定係魏綺珊既關係, 大家已經常左睇新聞等同睇電視劇, 主播一定要靚女靚仔.
即係話, 如果你個樣似林雪但又想報新聞, 係香港要係電台先有機會.
1. 電視播放著 now 324 台, 亞視 24 小時新聞台. 女友坐在沙發, 咬著百力滋, 一面咕嚕咕嚕著新聞來來去去也是天下圍攻. 她問我, 施明德班人係咪想打持久戰, 斷陳水扁米糧, 餓死陳水扁一家. 我支吾以對, 皆因我諗緊幾時可以放假去實地倒扁.
好不容易終於捱到有關天下圍攻的報導結束, 男主播繼續報導新聞. 女友看著螢幕, 定了格一般, 眼定定看著男主播.
“喂, 你望咩. 條友仲醜樣過我.” 大家都知, 除非電視台想執, 呢樣野根本無可能.
“嘩呀呀呀呀~~~佢…係我大學同學.”
大學同學, 唔係前男友. 但其後每次睇 324 台, 祇要係該男主播, 家中都增添了不少溫馨感. 一家人 (後面 : 你講乜春呀), 感覺都好親切. 我成日係屋扮 : 歡迎收睇亞洲電視 24 小時新聞, 我係 我係范 x x.
女友去飲大學同學個餐, 話有機會見到男主播. 我叫女友問佢 黃珊 究竟正唔正.
得到的答案係 : 男主播無去飲.
挑.
根本係問左但唔話我知.
2. 跟住, 我又想起豬豬好似係友人既大學同學. 其實豬豬一d 都唔正.
3. 一次飯局, 竟然有機會同主播食飯 … 我係食飯前無耐, 先知原來佢係主播… 鬼叫自己睇世界盃都係睇 pplive 嘛. 後尾友人吹水, 得知佢竟然係該主播既粉絲 (後面 : 屌, 扮咩野….友咩人. 你咪係友人 law), 好在冇提及曾經同台食飯…. 唔係冇拎簽名加上無話佢知黎偷拍, 命都冇… 希望可以補拎簽名相一張, 同埋一套成個月既新聞報導…
4. 一次係朋友屋企睇友線, 硬覺得個主播好熟面口. 諗左半日, 終於諗起友線既女主播係遠房大學同學, 曾經係某d 社團組織合作過搞活動. 如果唔係認得個名, 真係以為佢特登整容整醜自己. 佢大學個陣, 靚好多.
5. 亞視英文台既記者, 原來係朋友既朋友個妹. 同佢家姐, 一d 都唔似樣, 不過英文一樣咁流利.
突然間, 全香港既主播都好似同我有關. 唔單止同女友之間只隔一層, 我突然覺得, 同全香港既主播, 都只係隔一層. 當然, 此層不同彼層.
6. 工作地點要走過長長的走廊, 盡頭是大堂. 午飯時抄小路, 偷行平時華人與狗不得使用的大堂通道, 見到一班記者. 行行下, 竟然見到她 – 曾經在 324 台, 而家去左無記既靚女主播. 我呆左一呆, 皆因我同佢既距離只有五吋以內. 真人比上鏡仲正.
只能夠呆一呆. 皆因再多呆半秒, 好容易俾人發現兼抄家. 用 0.3 秒極速記低佢既樣, 之後一路食飯, 一路回味. 夠痴漢, 夠變態. 實情係, 史弟患有樣貌失憶証, 對女性面孔既記性極差. 完全唔記得佢大概係點. 只認為佢去無記, 係為左擴闊自己既觀眾層面. 望完 0.3 秒, 印象係 – 佢係 now 個陣化既妝, 比起係無線時化的好看得多. 起碼, 佢塊面無咁紅. 起碼, 佢眼影無咁突出. 起碼, 睇唔出佢皮膚原來只係一般. 至於佢靚唔靚, 真係完全無印象.
7. 又係午飯, 唔係點解成日食飯個陣撞見女主撞. 行過老廉大樓, 見到無線女主播報施政服告. 完全無停低, 皆因講唔出女主播個名. 講唔出佢個名, 皆因佢唔靚, 又唔係朋友既朋友. 原來, 只要無左個一層, 大家無晒 connection – 嘩, 一句中一句英好潮 – 一d 都唔好玩.
***************************************************************
Comments (10)
下次史兄研習日式影片,
如果影片內容講女主播,
可能又係遠房大學既朋友,
關係應該比其他女主播更親切
「愛上」女主播乃近年之怪現象(難道正如smalllee所言?)，之前的葉雅媛、陸家敏就算出街做扒也不會有途人盜拍。
但早前，我見過豬豬響某餐廳飲野時，身前身後竟有七八部相(手)機，仲有人拍短片，幾乎扑埋佢咪!!!
無記呂姓與方姓男記者，是老死的舊同學。SARS期間，呂姓記者北上報導祖國人民吃野味情況，老死看完，說：「鏡頭一cut，以佢性格，應該會叫人拿多對筷子，等佢可以食埋一份。」自此以後，每次在電視上看見他，我都很想笑。
史兄，你跟此兩主播又有connection，因為他們是你仇家的朋友的舊同學，可惜兩位都是男生。
Kagray, 你老死間中學應該係我果間喎咁……
聽講呂bel以前有次做突發事件，採訪一架失事既直升機，事後段片出左街之後老總讚佢做得好，因為話個畫面影到架直升機既螺旋槳重轉緊，去現場去得夠快咁話喎。
而實情係，做記者係記者同攝影師自己決定用咩鏡頭角度，呂記者去到，自己用手轉郁個螺旋槳，然後Roll 機……
呂記者同方記者都有粉絲同佢地整個人網頁，好激嫁…
最靚既女主播，梗係沛然啦，呵呵呵~~~
邀請了幾位中大舊同學觀禮,其中有一位前女主播和兩位現任電視台記者… 細妹報告,兩位堂弟眼甘甘望著前主播,頻呼”靚女呀~~”,而我阿婆就問我”那個男的是不是xxx?”
果真是異性相吸…
嘩，突然見到那麼多現任與前任同事名字，我也覺得和大家很有connection。
我可以答你問題(1)：正。
至於意見(4)，放心，我不會轉告她的，哈哈。
咁好玩，我又黎認親認戚先~~~ 不過，其實而家只要大學畢業既都會有一個半個同學係做傳媒架啦！！（點解以前唔覺？以前好難見到主播，覺得主播係好專業既工作）
比較特別既係，我果年有一個同學去左友線娛樂做開荒主播（呢，同任賢齊拍 MV 果個），另一個去左亞視做茄呢啡（都做過半個節目主持既）。開頭係友線見到佢真係好唔慣，佢比我感覺唔係做娛記，係一個不食人間煙火既女仔，而家見佢成日掔大喉嚨講野，又化到勁濃妝，講爛 gag，唉……
仲有其他同學同師弟（淨係認得師弟…）去左做記者，最有 connection （又中又英 ar！）既算係向毛記做緊記者，個鼻(同個頭)好大既男仔囉~~ 記得有年 O’camp 見到師姐（前無線女記者 XX媚），驚為天人，好靚，但勁比 D 師兄玩，好慘……
仲有，我個妹係李臻既 fans，試過夜晚一見到佢報新聞會尖叫……（汗）
而我此刻最想得到的, 就是 黃珊 的簽名相.
賓達 : 如果我有幸成為你的堂弟, 我的表情反應行為也會一樣.
wpuiyin 918 : 你又知我講緊邊個?
史兄,我呢個星期日會出席一男主播的婚宴,幫你留意下見唔見到黃珊啦~~~~