March 20, 2007
-
<迷底終於解開>
上星期六, 到 neway CEO 唱K. 名唱K, 實劈酒. 當然… 唔知點解仲可以繼續食煙…
友人認識經理, 最後不知怎么, 五人去了一間可納容廿人的房間.
這不是重點. 皆因去到房後, 無乜人唱K.
皆因房間竟然有任天堂的 Wii 玩.
幾條麻甩仔就屈係一角狂玩 Wii.
淨係碌保齡都玩左幾局. 跟住幾條白痴打拳… 玩到上氣唔接下氣, 途中更有中國籍男子玩到太熱要除衫. 於是乎, 十一點玩到點幾, 大家無晒氣力先停手.
呢d 遊戲, 同屋企盒大富翁一樣, 要三四個人先好玩. 當然, 更大既賣點係唔使識打機都可以玩餐飽. 大佬, 我去機舖見到人玩三國誌大戰, 又擦咭又隻手好似貨櫃車司機轉軚咁轉黎轉去, 加上戰鬥系統極複雜, 又好似超貴. 真係連睇都懶.
當然, 溝女一流. 要教女孩玩, 更不免要有身體接觸. 例如教碌保齡或打高球, 少不免要擺出從後突擊的姿勢… 而係 K 熄燈後, 酒精香煙男女老幼果盤甩屎混作一團, 也少不免有人拿錯了別的棍當是 Wii 的操控桿吧… 所以 Wii 呢支催情藥…呀唔係, 係呢種催化劑, 的確係與女孩混熟的好朋友…
結論 (1) : Wii 真係幾好玩. 我想, 過去人們一直認為打機是造成孤僻, 電車男, 暴力好勝, 不善社交, 希特拉變成獨裁者, 北韓核試, 全球暖化等嚴重問題的始作俑者. 這些指控可以隨 Wii 而暫時消失了. 當然, 若有一天蘋果日報出現 “玩 Wii 爭勝鬧分手, 女孩氣忿坐天台” 等新聞時, 好些專家又會說像 Wii 這類競爭性而且有玩者面對面的電子遊戲, 應該在平心靜風的情況下玩, 不必太認真.
結論 (2) : 任天堂股票買得過. 當我坐地鐵遇見拿 nds 的人是 100% – 我沒有說笑 – 更覺得任天堂不需流淚, 只需要買入. 唔好買出產 nds 軟件的股票, 皆因香港人玩正版的人, 數目恐怕比有份選特首既更少.
結論 (3) : 如果你想提議我買返部 Wii, 我會反建議你唔好. 皆因上文有提及, 呢d 遊戲要三至四個人先好玩. 你叫我買等同提議我買飛行棋自己同自己捉.
更重要係, 小弟既電視只係得十五吋.
Comments (8)
我也掙扎了很久買不買wii或者NDSL
後來聽說NDSL的遊戲，不論DL與否都似乎很麻煩，便算了。
獨男們，小弟建議買wii 或ndsl 用作媾女用！
希望史兄有空分享《電玩遊戲換來獨男姻緣》。
結論 (2)— 男友身為機迷十幾年，成日同我講話有錢買任天堂股票都唔買匯豐。
璟浩︰麻煩的意思是遊戲本身很麻煩（很難玩？）？還是連玩翻版都很麻煩？
真係咁好玩?…..個個都話想買既
我下星期去日本，已經有人落左柯打叫我買返部Wii(平香港差不多$1000)，當然條件係部Wii會先被我扣留返三五七日先…
nep: 玩正版，又唔知邊到買，幾多錢；玩翻版，又驚有防盜技術驚有病毒驚無人放rom……
船頭驚鬼船尾驚賊既典型也。
璟浩︰哈哈，正版唔係黃金就係 188 架啦，一隻 game 約二百零到；翻版呢家野就永遠都係有辣有唔辣，付出少左風險梗會大 d 啦。聽過買一部 NDSL 再加幾百蚊就包一張 mini SD card 同幫你 dl 埋幾百隻 game 。病毒壞機就未聽過，不過有些翻版做唔到連線對打 （如 New Super Mario），亦有些可能上唔到 wi-fi 咁。
Wii 最近都有得改機，改完就可以玩翻版，二百幾蚊隻 game 變成幾十蚊隻的確對好多人黎講好吸引，但有咩潛在危險就未知。
但都係果句啦，買 game 都是尊重其設計和創意，如只為消磨餘暇其實有很多方法，而且，就算比你有幾百隻 game ，你玩得幾多先？
adrian, 大前提是，獨男必須能夠把女孩帶回家中，才可用到wii這門絕招。
就好似有老鼠建議把鈴掛在貓頸上，卻想不到怎樣掛上去一樣。