November 4, 2006
-
<重慶 . 玩票>
你唔係睇緊八千里路雲和月 (小鳳姐 : 啦啦啦咧啦啦啦, 啦啦啦咧啦啦啦~~), 亦唔係尋找他鄉的故事. 重慶係指尖沙咀既重慶大廈, 即係門口永遠有一大班印巴籍人仕叫你去 “咖哩王食咖哩” 既重慶大廈.
對於重慶大廈, 有九成人香港既印象係 : (1) 重慶森林, 王家衛, 林青霞. 白粉. 好邪罪好神秘 (2) 好多印巴籍人仕, 俗稱阿差. 係咁叫你食咖哩或者 (3) 好多賓館, 好多黑人.
基於以上印象, 每次我同人講我住 [過] 重慶大廈, 所有人都會張開好似瑪莉咁既口, 然後問 : 乜個度有 [中國] 人住嫁咩? 乜唔係得食咖哩同賓館既咩?
何止有人住, 我既童年就係係重慶大廈度過.
*****************************************************
女友係幼稚園教師, 有人問可否推薦一些 playgroup 予其女科款參與. 與其他小朋友玩 – 此乃史弟兒時每日都做既事情 – 竟然要科款, 已經係荒謬絕倫之事. 細問之下, 友人之女兒的年齡為…
六個月大
實在令人捧腹大笑. 六個月, 識叫爹爹未?
細閱今日之星島日報, 更令人震驚的事情是, 好些啤啤剛滿月已經俾父母捉左去上 playgroup~~
*****************************************************
史弟長於香港, 除左旅行, 根本未出過國, 是 100% 香港仔. 當年係重慶大廈, 天天都參加 playground. 皆因老頭既電器店旁總有許多年紀差不多的小朋友, 不分種族, 不分年紀, 一同玩 捉依因.
由
於重慶大廈有好多裁縫度身頂造印度服飾, 他們的布紗用完後, 會剩下一碌又一碌既人等高廁紙筒 (個陣生得矮, D 紙筒有差唔多一米長). 呢d 一米高廁紙筒,
就成為左當年小朋友比武既兵器 – 直接用黎當劍用, 或者改裝成為其他武器 – 後來碩士個陣識得用廁紙筒造雙截棍扮李小龍, 都是由於細個個陣試過. 大家好似幽遊白書咁分隊打交, 跟住 捉衣因, 玩到成身大汗之後, 大家就去太子爺個度買汽水飲.而家出租率得三成既重慶站
及情況更加可悲既up-date mall, 係史弟出世既時候係 “首都酒樓”, 跟住變為 “意法日百貨”. 百貨冷氣強勁,
夏日就成為左一班重慶娃鬼既遊樂場. 我地最鍾意就係係 而家 up-date mall 個入口玩 chi-牆, 捉依因.每
日就係咁過. 係重慶大家的小朋友, 並不太過介意玩伴的膚色, 一來是真的不太介意, 小朋友可理不了那么多; 二來是,
許多印巴籍人仕根本就是土生土長的香港人. 好些印巴籍人仕, 他們的廣東話比起許多 DJ 及所謂歌星更加純正, 更少懶音; 再者,
香港中國人他們在重慶大廈才是小數族裔… 只要你有手有腳 (其實也不大需要), 你來參加, 我們是無任歡迎的.一班十歲以下的街童, 每天便在重慶大廈這個充滿各國佳麗的地方探險與及撕殺.
*****************************************************
或許是時代變了. 今日小朋友玩, 竟然要俾錢. 除左係砵蘭街識朋友要俾錢之外, 原來世界上仲有友情係建立係錢上面.
若果連一齊玩都要錢, 李麗珊話養個啤啤至成人要 $400 萬, 肯定吹水. 咁睇起碼成千萬先得.
*****************************************************
[史報訊] 我地強烈建議政府推出 “公園券” 及 “playgroup券” 等玩票, 家長可以以玩票參與 playgroup. 沒有這些玩票, 小朋友無法與其他孩子作出有效溝通, 對佢地日後既心智發展會造成嚴重傷害. 特別係弱勢社群及生長係貧窮家建的小朋友, 由於佢地父母都要長時間工作, 未能多花時間係子女上面, 培養他們的溝通能力; 將他們留係街上, 容易被黑社會及不良份子招攬 (後面 : d 黑社會真係得閒咧~~~).
許多 OECD 的國家已經推出相關的玩票. 國際經驗顯示, 香港也有必要推出相關政策, 以免落後於發達國家及對長遠競爭力造成不良影響. 社工系及教育系學者亦表示, 小朋友於成長期必須與其他小朋友有充足的溝通及交流, 以免造成大量御宅族. 日本早年就是欠缺相關措拖, 令社會上出現成千上上萬的自蔽青年. 所以香港政府及社會福利署必須推出玩票, 等家長放心俾子女係政府認可既遊樂場及 playgrounp玩耍, 並從中學習與其他小朋友溝通及建立團體精神. 我地已經成立 “向政府爭取玩票關注小組”, 希望凝聚社區力量及民眾壓力, 迫便政府係有關方面推出政策.
Comments (11)
由於我細個時身邊已經自動有兩個玩伴,即係朕既兩個皇姊,所以我一路都唔會落街玩。
而呢兩個最佳玩伴,亦同時係鍛鍊我體格(打波同打交)同口才(互寸同鬧交)既最好同伴。
唔知點解而家成個社會乜都好似系統化晒咁,而唔知點解d家長亦都越來越緊張,係無謂地緊張果隻。真係好鬼痴線。
其實點解香港會變X成咁……? 我真係唔太睇到香港有乜野光明既未來…… 個個都痴左線… 無論邊方面,亦復如是。
第一,小鳳姐個隻係大江南北
第二,我女友讀緊教育心理學,即係遲下搞遊戲谷主果班人。強烈要求史兄把本文封印十年,以免斷我米路。
最多請食飯當掩口費,或者第時史弟弟或史妹妹一世免費攜帶父母進出遊戲谷。
重慶大廈!史兄你的童年好似好好玩咁。
你有冇學識煮咖哩?識就唔該下次煮畀大家食!
playgroup,犬兒8個月大時,也帶他上了一堂(免費….當然)。那一小時,只不過要玩下玩具、油顏色(低b,犬兒個陣連筆都未曉執,係咁塞張紙叫佢油)、唱下歌仔。望住教唱歌個兩位西洋哥哥,老媽認定他們是孌童,所以之後無上過。
要玩呢d,老媽跟他玩也可以。要找同年紀玩伴,2歲返bb班都唔遲。
難道重慶大廈既環保咖哩*就係經濟學人史兄既發明?
*環保咖哩:循環再食,以食客食剩之咖哩為再生能源,再次提供給其他食客
你講細時玩既野, 又勾起我d童年回憶.
我細時係金絲雀一名 (遮係話我啊媽唔畀我通處欄, 一日困向雀籠 – 屋企, 唔同金絲貓….), 玩伴都只得我細妹, 但我自覺果陣既”自家品牌免費playgroup”都幾有創意. 記得最金果次係趁老豆老母落左街食飯, 一行轉背我同細妹就即時作反 : 我家的地下係舖光滑既水晶膠地板, 我地將d爽身粉”審”滿一屋通地都係, 然後除左鞋但著住襪向上面搧來搧去扮溜冰……..就向最爽既時候, 老豆老母突然行返番轉頭, 一打開門見到我地咁, 就梗係打鑊金…………
講起玩, 新一代同我地果代真係冇得揮!!!! 而家仲衰到連自發自創既”玩”都冇得玩, 要貼錢去玩埋d千篇一律扼大人扼細路搵笨柒playgroup.
小學時weekend/放暑假都會落樓下平台玩. 成班十幾個住同屋苑/附近0既0靚仔0靚妹,跳橡筋繩,打羽毛球,踢波,何濟公,癡紅牆,狐狸小姐幾多點,紅綠燈,大白鯊,糖癡豆,踩單車… 玩到七點先返屋企食飯.. 幾開心呀~~
其實拎個半歲大bb去playgroup,0係父母用0黎曬命/識人多過想bb學0野(咁細,學乜春0丫~). 有舊同學住新界西北,帶個歲零0既女去中環聖佐治大廈返playgroup… 阿爸阿媽阿仔阿女全部中國人樣,但全部人都講英文… (點解我會知,因為有另一同學要問呢位同學’才羅’0野,約0左0係playgroup等,佢先有機會一睹奇景…)
而家d 人一生個bb 出黎就趕住推佢出去學乜學物, 唔好執輸丫嘛~~ 我都識得有人推佢個仔去上果d playgroup, 唔平架 (基本上係呃錢), 上一兩個鐘, 話學英文呀, 國語呀咁, 細細個就接觸會好d 喎, 但係而家佢連最基本既禮貌都學唔識, 唔知呢d 係咩教育………..
playgroup 都不是那麼負面的,看內容吧!但是,我覺得人生不用什麼都正經八斗,計算經濟效益吧?小朋友喎,佢地o既天真都要扼殺?!睇怕呢班父母要進行思想再教育,跟dum 哥的公公學下道理。
又,看樓上 lazybrenda寫到她的偽西人同學,本人對此做法很反感。看報道,張學友夫婦和女兒也是只以英語對話 (現在聽聞開始用普通話,因為普通話逐漸成為重要語言)。我第一個反應是,你尊唔尊重自己o架?
其實呢,人人生多幾個,平日同兄弟姊妹玩,假日加埋表哥表姐,就攪掂啦!上 playgroup d $$,可以飲餐茶,再每個細路一支甜筒有突啦!
又又,我都想食史太公咖哩!
更新 : 尋日見到 PLAYGROUND 係玩 role play, 扮醫生律師. 痴鳩線, 梗係d 仆街老闆睇 av 睇到上腦, 要d 細佬扮埋教師玩易服. 點解唔可以扮貨車司機整面包? 呢d 咪係由細細個間接咁灌輸d 唔正確既觀念law.
至於食咖喱咧喎… 可能只為係度食唔好係度屙既關係, 史弟咁多年黎係重慶食咖喱不過廿次. 至於小李所講既循環經濟, 我倒沒有聽聞過呢. 不過, 如果大家想去重慶食咖喱的話, 我是可以做領隊的…
屌……想扮斯文都唔得!
點解而家既人咁戇鳩嫁……
扮醫生律師…… 細細個知鬼呢d野咩…… 細個多數中意做巴士司機呀果類,班仆街大人好心唔好扼殺小朋友既思想自由。
早前返中學母校,見到一家人係咁淨講英文溝通,我屌!