<911>

2001 年 9 月 11 日. 當日在花旗當完兼職回家, 吃完晚飯正看電視. 突然, 馮兆寧走出來報特別新聞. 唔知做乜有架飛機係世貿. 睇睇下唯一架飛機又飛左埋去. 我當時同阿媽講 : 第二架飛機肯定係電視台拍野失控飛埋去.

跟住世貿好似積木, 好似睇戲, 好似豆腐, 成座跌落黎.

之後既一個星期, 我既心情都活係不安之中. 而紐約既塵, 足足成個月先散.

唯一既好處, 就係之前所講既 “世界 X X 日” 少左一個. 同埋, 大家地理常識好左, 知道有個地方叫阿富汗. 仲有, 半島唔止係尖沙咀有間酒店, 仲係中東地區有間電視台.

最後既係, 大家已停止發展核武. 需求定律是也.
________________________________________________________________

<未訓醒>

前排畢文個西執左, 據聞係有關港大醫學院命名. 跟住有人話因為係古代醫人係救人為本, 收錢係次要等云云… 所以用李嘉誠個名唔正確. 但有人又認同大學內建築物可以用人名命名等.

哈, 中國古代學校都係 “義學” – 有錢佬捐錢或廟宇科水俾窮人讀 (仲有官學), 唔收錢的 (或收好少), 目的都唔係為錢. 如果 “因為古代行醫唔係為錢, 所以醫學院唔可以以人命名” 是成立的話 (哈哈哈哈哈), “因為古代辦學唔係為錢, 所以大學既建築物唔可以以人命名” 點解唔成立呢, 又?

史弟睇怕真係未訓醒.

<工作二三事>

公司部電腦, 成個星期都未熄過. 我諗, 與其要每一天開機一次, 等三五七分鐘, 之後再找回要使用的文件, 倒不如用 OPM – 即 other people’s money – 開著部電腦好過.

住得近公司既著數係住得近 (!!!!!). 就算做得夜返屋企都唔會太遲 (總工作量及每小時工作量上升). 當然因果關係會隨腦袋適應而改變 – 因為唔怕遲所以做得夜, 總工作量無變, 但每小時的平均工作量下跌. 想像唔到我係柴灣 OT 到十二點 (呢樣已經係無可能既事) 但我住荃灣會點. 住得近既另一著數, 就係你有借口俾自己放工 : “咁近, 返屋企先做拉.” “好, 食完飯返屋企再做”. 跟住返屋企打實況.

今個星期有一個幾驚人既紀錄 : 係我返左兩年工以黎第一日未係辦公室睇過蘋果日報.

講起 OT (!!!!!), 好些職業, 辦公室及家是分不開的. 簡單點說, 你沒有工餘時間可言, 廿四小時腦袋也要運作, 每一刻也是 OT. 倒轉來說, 如果你享受工作的話, 你每一刻也是工餘時間. 別將 “工作量多” 及 這種公家不分的概念混淆. 前者可以有終結 – 即你手頭上的工作做完, 但後者的工作則溶入了你生活的一部份, 是沒有所謂完結的. 做投資銀行前線的, 怎放兩個月假到馬以代夫去渡假? 回來個市已經變天. 做高官的怎能下了班便為作欲為, 到蘭桂芳去泡女? 越需要和千變萬化資訊接觸的職業, 及那些需向公眾人物交代的, 公家是分不清楚的.

講完一大堆廢話, 我想講既係. 老師並唔需要以身所則, 崇高的道德標準並不是工作的一部份; 佢地既工作性質都唔係 “公家不分” 那一種. 放左工之後佢地既身份並唔係教師. 食煙飲酒泡女, 我唔知道有乜問題.

別將老師 “神” 化, 以為佢地係吸風飲露, 不吃人間煙火. 教你扮靚既人一定唔係李嘉欣. 國父都搞過四五條女.難道教書既唔能夠吸煙溝女結婚離婚生仔有外遇負資產講粗口咩? 情感及行為受到不理智的抑壓, 解釋了為何當教師的不少是教徒 – 這是一個發洩個人情感的機會.

當孔子要付出代價, 這代價未必人人肯付.

與其要唔吸煙飲酒, 但工作效率係零既老屎忽, 我寧願要教到我野, 開導到我既煙剷. 教語文科都只不過要考基準試, 唔係考你道德. 何況, 我不見得 ”賭錢吸煙溝女結婚離婚生仔有外遇負資產講粗口” 同道德有關.

一個教師自殺的威力, 比起一個殺師在學生面前食煙飲酒, 高上千百萬倍.