<自甘墮落>
香港既中文報章, 全部好似十五六歲既港女咁, 去 348 食免費搖頭丸同旺角青年上床唔識字, 一步一步自甘墮落.
東方及太陽自從內銷祖國後, 變成左報, 比起人民日報更左. 星島係打正中產 (??? 燒炭死晒拉) 旗號既左仔地產報. 明報某部份既新聞更加蘋果化, 更加為左寫而寫, 文筆又唔通順, 已經再唔係十幾年前適合中學生讀既報紙. 成報新報無乜點睇, 唔敢評論.
好在仲有信報, 可惜林行止因為生痔瘡又要賣. 小道消息話賣唔成, 起碼今日仲未成交. 澤楷要搞信報, 你估真係去街市買棵菜咩. 林行止兩公婆梗有d 前期工夫要搞.
而蘋果… 真係唔知佢想點. 娛樂無料, 算; 國際新聞變成 “花邊/有趣事情”, 都幾好; 體育, 變成一本波經波盤都係大勢所趨. 但我真係頂唔順佢個 <蘋果批>.
咪笑. 唔係麥當奴食得個 d <蘋果批>, 而係有蘋果有個新 (都差唔多兩個月) 既論壇及評論叫 <蘋果批>. 主題從經濟, 交通, 旅遊, 到環保都有, 多是從經濟學出發, 批評政府, 反對監官, 支持市場. 作者有三個 : 李兆富, 孫柏文, 何民傑.
每日睇呢個專欄, 純粹係為左朝早睇d 搞笑野黎開心下, 唔係既話一日到黑坐係寫字樓, 悶死都似. 講得白d, 呢三個人, 未夠班係蘋果有個地盤. 唔係話佢地講既野唔o岩, 而係佢地好多時只係將經濟學參考書的原則譯成中文, 再加上最潮既香港新聞, 如此這般一番, 炒埋一碟.
儘管楊懷康已經出晒名係爛中之爛 – 我估香港人對自由市場仲抱一個懷疑既態度, 係由楊懷康與 佢既 海耶克所造成 – 呢個 <蘋果批> 比起楊的無定向風更加不濟. 有時認為, 如果我去寫 (唔好嘈, 呢d 野梗係假設性拉. 講梗係天下無敵), 肯近比呢三條茂利更加好睇同有 point.
*******************************************************************
下面為題外話, 唔睇對你人生無乜影響.
早排係 inmediahk 睇到有人批評李兆富 (當時孫及何尚未加入), 笑爆. 節錄如下 :
“我一向覺得李兆富很強，強在很內斂，因為讀了他這麼多年來寫的文，沒一篇是有POINTS的，一個可以把鋒芒收得這麼深入的人，在香港很罕見。”
而我亦肯定, 李兆富沒有看過凱恩斯的所有著作, 因而認為 “除了這一番話之外，凱恩斯一世人沒有幾句真知灼見”. 這是露了底, 凱恩斯成名的一句, 是 in the long run, we are all dead. 我只看過凱先生的兩本書, 但我肯定佢一生人唔止幾句真知灼見.
不要以為我在針對李一人, 而事實上我是認識孫柏文及李兆富 – 那種認識當然唔係會食飯行街睇戲, 而係係公眾場合見到大家有幾句個隻. 孫柏文二千年既時候參加過港島區立法會選舉, 睇過一次選舉論壇, 佢講市場, 支持學券制, 但係講得太空泛 (同今日佢寫蘋果既水平差唔多), 兩樣野 (支持自由市場同無料到) 都令我記得佢個名, 有d 印象.
後來, 我總算學會了如何去愛… 唔係, 又鳩o翕左. 後來孫柏文成立左獅子山學會, 一個本地智囊, 李兆富係骨幹成員之一. 佢地主張 “獨立性”, 唔接受任何商業團體同財團既支持及控制, 避免任何潛在利益衝突. 呢樣野, 我幾買.
半年前我撞到孫, 佢提及李兆富係技術上已經唔係獅子山學會既人, 因為佢去左幫蘋果寫野, 同佢地主張既獨立性有d 衝突. 又有道理喎, 我幾同意.
兩個月後, 孫柏文開始係蘋果寫其 <蘋果批>.
呢d 叫乜? 咁臭係今日的我打倒昨日的我. 經濟學者唔使食飯咩.
*******************************************************************
講返蘋果 (原來上面幾十行都係離題). 肥佬黎繼續放個咁既專欄係度, 會嚴重拉低蘋果日報既質素 (邊際低過平均嘛…). 而專欄已經有李怡同張五常此等食古不化既古董係度, 陶傑又偶爾放兩三遍番書屁, 再加三隻無的放矢既經濟學學生, 實在叫人太沉重. 李八方 (即黃昏商台節目左右大局主持人李慧玲) 既所謂政壇花邊, 又係無料到暈.
好好地一份報紙, 搞成咁. 肥佬黎唔係以為年年六四七一都有助蘋果銷量先得嫁. 無人會日日食爛蘋果.
