<超級無敵海景佛跳牆>
新年流流, 唔好寫d 咁認真既野.
總之曾蔭權腳痛中波膽既機會, 因為求籤個單野而大大提高.
********************
話說有位兄長, 下班回到家中. 老頭神色慌張, 叫佢埋一角傾密計.
“今日你細佬學校打黎.”
“? 做乜?”
“老師話佢出貓”
“嘩!”
其實兄長並唔係奇怪老弟出貓, 只係奇怪點解出貓會俾人捉到.
屌! 有邊個讀書無出過貓? 考試個陣都試過同隔幾行個同學傾計.
但唔通同老弟講 “你出貓無所謂, 但唔好俾人捉到”? 一定發生倫常慘案, “灌輸錯誤學習態度, 鼓勵親弟出貓; 兄長被老父狂劈千多刀至死”.
好咧, 於是急召當時人應訊.
********************
“你點解出貓?” 兄長懶嚴正義詞地問.
“唔記得.”
“你都已經讀中一, 點解唔記得?”
“唔記得寫手冊” - 主角手冊登場
“點解唔記得寫手冊?”
“因為無抄落手冊”
屌佢, 去到呢個位兄長已經想笑出黎. 佢忍燃住, 繼續.
“點解無抄落手冊?”
“因為唔記得抄”
屌你, 咁就已經 Loop 左一次 (波兒波兒波兒魚兒小寶貝~~~).
“咁點解唔記得抄?”
“因為無睇到黑板” Thank god, 終於有新人物黑板先生出現, 唔使再 loop 落去.
“點解老師寫黑板你無抄低?”
“因為唔記得抄”.
夠咧, 屌你! 再問落去都無意思.
********************
“咁默d 乜? 你點出貓?”
“詩…八句, 每句七個字, 一人背幾句”
原來 甲同學背四句 (屌你! 背撚到四句就好心背埋另外四句拉!); 老弟與 乙同學每人兩句.
“咁老師點發現你出貓?”
“我拎本書出黎睇”
兄長心諗 “??? 屌你呀, 背兩句都背唔到?”
“既然一人背幾句, 點解仲要拎書出黎?”
“默書個陣, 唔可以拎轉頭望後面本默書簿”
嘩!!! 屌你呀!!! 兄長真係差d 忍唔撚住笑左出黎呀!!
“乜你出貓之前無諗過, 默書個陣係唔可以周圍望嫁咩? 乜你以為默書個陣好似上 PE 堂咁周圍郁嫁咩?”
“er….”
好咧, 呢d 問題無答案. 而且再問落去, 兄長真係會笑左出黎.
********************
“好咧. 既然你要出貓, 即係唔識首詩. 你同我抄 200 次拉.”
老弟瞳孔放大一億倍, 無奈又要屈服於兄長的淫威下.
“好咧, 讀一次首詩黎聽下”
“…… …… …… ….. 佛跳牆….. ….. “
兄長當時替老頭抄寫別的報名表中, 未有為意.
“再讀一次”
“…… …… …… ….. 佛跳牆….. ….. “
佛跳牆? 兄長心想, 這首新詩的作者也夠奇怪, 寫詩也想著吃.
“好咧, 讀埋呢次, 罰抄 100 次就算咧.”
“…… …… …… ….. 佛跳牆….. ….. “
兄長越想越覺得不對勁. 這不是新詩, 詩的意境也和食沒有什么關係. 好地地點解會有 “佛跳牆” 走出黎?
於是一手搶去老弟課本… 一看…. 他終於忍唔住, 要衝入廁所爆笑鳥…
********************
馬穿山徑菊初黃，信馬悠悠野興長。
萬壑有聲含晚籟，數峰無語立斜陽。
棠梨葉落胭脂色，蕎麥花開白雪香。
何事吟餘忽惆悵？村橋原樹似吾鄉。
********************
延伸觀看
[7:05 至 7:20]
