<高人結婚, 結婚高人>
上星期中學同學高妹 T 結婚. 據聞, 高妹中學畢業就開始同老公消防 F 拍拖, 一拍十幾年, 都係時候結婚. 叫得做高妹, 高妹 T 真係好高, 172 cm. 聽講佢結婚個日著埋高跟鞋, 起碼 五呎十. 消防 F, 六呎二. 兩個企埋好似兩座 IFC 2 咁, 成班五呎二三既企埋去, 全部成為幼齒.
睇相, 嘩, 高妹 T 靚到不得了, 不愧係添記 92 系美人之一. 消防 F 娶得美人歸, 一定要好好對高妹 T.
祝佢地白頭到老. 快d 生返個, 仲要生返三個, 響應特首呼籲拉.
每逢身邊有人結婚, 史弟都好開心. 畢竟, 係人生裏面搵到一個你肯對住佢幾十年既人, 唔係一件輕易既事. 我對左自己廿幾年, 日日照鏡都會講 : 又係你? 好悶呀.
呀, 終於知道d 人點解要去整容 : 唔想日日對住同一個自己.
*****************************************************************
講完人, 講下我自己.
史弟只不過係廿幾歲. 唔知點解, 近排成日有人問我幾時結婚. 被問及幾時結婚頻密既次數, 比屙夜尿仲多. 大概 “你幾時結婚” 已經取代 “食左飯未” 成為廢話榜第一位.
大概三四日就會有人認真地問我一次 : 喂, 幾時到你同女友拉埋呀?
拉埋道閘就有份.
我覺得, 係我覺得, 如果自己要結婚, 目的有兩個 :
第一, 係俾個機會召集所有我識得既人, 一齊坐理食餐飯, 飲下酒, 猜下拳咁. 當然, 佢地要科水, AA 制之餘, 仲要俾埋我同老婆, 仲有我同老婆屋企人個份. 結婚, 比起黑社會大佬努力咁打電話吹雞, 更容易召集一千幾百人 (30 圍 x 12 人 = 360 人, 仲要加理d 明明唔係盲, 但忽翅總係忽到成台都係既待應. 聽講有d 仲會偷食乳豬添. 唔怪之得我食親乳豬都無雞脾拉. 仲有, 佢地仲好鍾意將 vsop 當成中國茶, 硬係要加d 滾水落去溝淡佢).
第二, 結婚, 乃離婚既先決條件. 就好似高斯話, 私有產權乃市場交易既先決條件咁. 要試離婚, 必先結婚. 欲練神功, 必先自宮. 唔好問點解要離婚, 我大概會答你 : 人生總係要乜都試下. (背後 : 屌你唔試下毒品, 殺人呀笨?)
總之, 結婚既作用, 係為左日後可以離婚. 唔結婚去搞離婚, 就好似大陸佬咁成日話台灣從來冇分裂過, 但日日都要講統一咁.
*****************************************************************
根住, 呢下經典. 當初我聽到呢段對話, 真係呆左.
首先交代, 我而家唔係同屋企人住; 第二, 我阿媽同老頭係九龍有個單位, 而家我阿媽住緊. 話說, 有一日女友出左糧, 約我老母飲茶 (但其實佢地完全唔熟). 在短短三分鐘既手提電話對話裏 (當時我不在老母或女友旁邊), 竟然發生以下對話 :
阿媽 (無端端) : 我住緊呢度, 應該都唔會賣嫁咧.
女友 (??? 無拉拉講d 咁既野) : … … …
阿媽 (繼續) : 就算係賣, 都係等你同史弟結左婚之後先至賣.
女友 (暗叫不妙) : … … … … … … … … … … … … … … …
事後女友向我講返呢段話. 真係嚇到我仆街 : 梗係唔係因為我阿媽竟然會以為我會結婚, 而係, 你諗下點解佢話 “就算係賣, 都係等你同史弟結左婚之後先至賣”?
好恐怖呀~~~~ 我唔要每日話左 “飽咧, 唔飲”, 但仲有成碗湯係台面~~~ 我唔要 12 點前熄燈訓覺 ~~~ 我唔要放假 10 點鐘要起身~~~
