愛情信箱 (史弟版) – The impossible trinity
親愛的史弟 :
唉, 史弟你好. 靚媽閉關, 睇黎有排都唔會再開返個愛情信箱. 希望你可以幫我拉… 雖然我都係打定輸數…
話說我月餘前認識到一名男生. 他完全是任何一個女人心目中的完美對象 – 有錢, 靚仔. 可惜… 原來他是同性戀的! 這實在是情天霹靂.
我很想改變他的性取向, 又怕失敗. 然而他又十分有錢和靚仔…
該怎樣辦?
儀
******************************
儀 :
睇黎你患左好嚴重既思覺失調. 寫信黎又打定輸數? 操, 我勸你下次慳返.
老實說, 我不認識你, 你所講那個的男生我也肯定不認識, 要俾意見, 我怕點條黑路你行, 更怕講出蘋果日報專家阿媽係女人式意見. 然而我可以說一些事情給你聽聽 (對, 我也有點思覺失調).
你要有心理準備. 皆因呢篇文… 好長好長好長.
不知道你高考或大學有沒有修過經濟學. 宏觀經濟學其中一條非常出名 (我認為) 的結論, 叫做 “Impossible Trinity”, 即一個 (細小而開放的) 經濟體系只能從 (1) 自由資本流動; (2) 固定匯率 及 (3) 獨立的貨幣政策 三樣東西中選擇兩樣. 所以美國佬叫人民幣叫大陸匯率有多d 強性, 即係叫內地一係開放資本賬, 一係放棄獨立既貨幣政策.
點解會有 Impossible Trinity? 我估你都係隨口問, 為 “情” 所困既你邊有時間做其他邏輯思考. 等你熱情冷卻個陣都仲想知, 你可以去 維基百科 睇.
係你仲未爆粗熄瀏覽器之前, 等我講返你個畸屎.
我想, Impossible Trinity 也能應用在超過 99% 的男生身上. 當然不是自由資本流動固定匯率獨立的貨幣政策, 而是 (1) 靚仔; (2) 有錢; (3) 非同性戀.
這不是甚么邏輯推論所得的結果, 而是根據觀察, 與友人傾談, 無無謂謂既所見所聞所納歸出. 世界, 特別係香港, 只有 唔靚仔, 又窮到仆街既男人; 基本上 Impossible Duality 已經足夠.
只是, 我發現, 許多又有錢又極度靚仔的男生, 並不喜歡/ 不會愛上女人 – 你舉出中外有名的男藝人, 他們大多是同性戀, 或者起碼傳出過同性戀的新聞 : 張國榮, 梁朝偉, 湯告魯斯, 畢彼特, 祖迪羅, 艾頓莊 (呢個只係湊夠數), 也不要說許多時裝藝術文化界的傳奇人物. 雜誌的鑽石王老五, 你細心留意一下, 唔計條友老左 (變得唔靚仔) 或者破左產 (唔再鑽石), 其實年年也是個幾條友, 絕少會有人因為 “結左婚” 而被剔除於鑽石王老五既名單上!
點解會有 Impossible Trinity? 我不知道. 或許 男人好咸濕, 一咸濕, 好色, 有錢 (但唔靚仔), 俾女性榨取金錢既機會大大提高, 好可能變窮; 若靚仔 (但無錢), 大多數係小白臉, 唔係就玩女玩得多, 俾人複桌, 畫花塊面.
這是 trade-off, 上帝是非常公平 (儘管對一些後生, 唔靚仔, 無錢, 無頭髮的人非常唔公平).
點解 Trinity 是靚仔/有錢/非同性戀, 而不是 “對女友好”, “為人忠直” 或其他因素? 有錢靚仔非同性戀, 是與一個男人談戀愛的 最基本 因素, 也是最顯然而見, 唔需要真係拍左施先知既 三個重要基礎.
我不是說 “對女友好”, “為人忠直” 或其他內涵不緊要, 我並不相信全香港女人也是港女. 但這些東西, 你要真的與一個男生拍拖, 還要拍很久拖才會知道. 可是他是同性戀的話, 就連拍拖的機會也沒有. 再者, 好些男人, 對 A 女友關懷備至, 但對 B 女友可以呼呼喝喝. 所以, 比起有錢靚仔同性戀, “內涵” 是頗主觀的事, 究竟一個人是否細心, 很多人可以有不同意見. 大家連事實也沒有搞好, 還說什么 Trinity?
當然, 這所謂 Impossible Trinity 的三個原素, 可以更外. 你可以將 “非同性戀” 改為高度 – 顏福偉也不過是五呎餘 – 但所得將 “同性戀” 改為其他任何一個原素, 其可應用的男人數目, 必定大減.
同性戀有甚么問題? 兩個麻甩相愛, 個人認為並無問題 (但一想像到二人在床海翻雲覆雨…). 問題是, 對一個女生來說, 一個男生是同性戀比起他已經結了婚, 更像珠穆朗馬峰般遙不可及. 不是嗎? 有了所謂 MBA – Married But Available – 及叫做 “離婚” 的玩兒後, 結了婚其實沒啥大不了. 但若男生只喜愛男人, 他頭頂就有光環, 背後有翼, 腳底有七星, 神聖不可侵犯, 只可遠觀而不可褻玩.
他是同性戀有錢兼靚仔, 是定局. 咁你點算?
這答案或許會叫你氣餒.
別要打造一個再造人卡辛.
別妄想能改變他的性傾向, 而他又繼續有錢和靚仔. 若你真的明白上述的 Impossible Trinity, 其實你也應該明白, impossible 就是 impossible. 不要相信某大運動牌子的口號說, impossible is nothing.
要改變一個人, 不是沒有可能. 但過程中所受的苦痛 – 不論是去將人改變的還是被人改變的. 我不清楚你的朋友是屬於 “天生” 或是 “後天” 同性戀, 但估計同性戀的他是對女性及異性戀的關係沒有信心. 怎樣改變人家的性傾向, 我不清楚 (儘管有人曾向我表示自己的性傾向可以像Q太郎的外形隨意改變), 你應該請教社工或是有關人仕. 即使你能成功改變他性傾向, 而他同時又有錢兼靚仔, 你有大機會失去他 – 這種男人比百麗 (HK1880) 或 A 股更加渴市. 股份一旦由非流通變為流通, 勢必一去不復返.
我所知道, 而又最為匪夷所思的一個實例, 是男友兼女友胸部不夠大 – 記住不是女友胸部平坦, 而是 “不夠大” – 叫女友吃豐胸丸. 女友照做, 藥丸有甚么副作用, 男友當然不知道. 是經期不穩定, 肥腫難分, 情緒上落大. 每晚交歡, 男友坐在下面, 上面雙手享受著 34D時, 他是不會知道的.
故事的結尾是, 胸大了的女友 (不知道她吃的丸子是甚么牌子), 更多男生泡, 最後劈腿去了. 好聽一點是是典型的前人種樹, 後人乘涼; 難聽一點, 這男友簡直是戇撚鳩.
偉人不是個個當得起. 與其養肥條三文魚俾佢游走, 倒不如繼續與他做朋友吧. 即使只是肩並肩走在街上, 不懂 Impossible Trinity 的女生, 肯定對你又愛又恨. 物質主義一點看, 若成為他知已, 也應該有一點甜頭. 畢竟, 人言可畏, 香港其實並不是想像中開放, 懂得欣賞一個有錢靚仔但同性戀男人的人不多. 這男生可能受到父母, 社會, 四面八方的壓力, 即使有錢和靚仔, 也未必一定快樂. 抱著交朋友的心態, 與他多傾談交往, 可以擴闊眼界, 也不需怕俾佢抄你底你對你毛手毛腳.
放鬆一點, 找個醜樣, 無錢又咸濕的男人吧.
史弟
p.s. 可否寄張影到你個樣 + 全身既相俾史弟?
